Paghupot sa Kalinaw ug Kahinlo sa Kongregasyon

KADA tuig, linibo ka tawo ang magpanon paingon sa balay ni Jehova alang sa putling pagsimba, ingong katumanan sa tagna sa Bibliya. (Miq. 4:1, 2) Malipay ta sa pagdawat kanila diha sa “kongregasyon sa Diyos”! (Buh. 20:28) Giapresyar nila ang kahigayonan nga makaalagad kang Jehova uban kanato ug makapuyo sa hinlo ug malinawon nga espirituwal nga paraiso. Ang balaang espiritu sa Diyos ug ang maalamong tambag sa iyang Pulong makatabang nato nga mahuptan ang kalinaw ug kahinlo sa kongregasyon.​—Sal. 119:105; Zac. 4:6.

² Pinaagi sa pagpadapat sa mga prinsipyo sa Bibliya, atong gisul-ob “ang bag-ong personalidad.” (Col. 3:10) Gipalabay ra nato ang ginagmayng panaglalis ug dili pagsinabtanay. Kay atong gisunod ang panglantaw ni Jehova, wala na ta maapektohi sa makapabahinbahin nga mga impluwensiya sa kalibotan ug nakapahimulos ta sa internasyonal nga panag-igsoonay nga nagkahiusa sa pag-alagad.​—Buh. 10:34, 35.

³ Bisan pa niana, may mga panahon nga motungha ang mga problema nga makaapektar sa kalinaw ug panaghiusa sa kongregasyon. Unsay hinungdan? Kasagaran, wala ipadapat ang tambag sa Bibliya. Kinahanglan gihapon tang makigbisog sa pagkadili-hingpit. Walay bisan usa kanato ang dili makasala. (1 Juan 1:10) Tingali dunay makahimog sayop, nga makahatag ug moral o espirituwal nga kahugawan sa kongregasyon. Basin makapandol ta sa uban tungod sa atong sakit nga mga pulong o buhat, o kaha mapandol ta tungod sa gisulti o gibuhat sa uban. (Roma 3:23) Busa unsay atong mahimo aron masulbad kini?

⁴ Kining tanan mahigugmaong gitagad ni Jehova. Ang iyang Pulong naghatag ug tambag kon unsay buhaton dihang motungha ang mga problema. Ang mahigugmaong mga magbalantay, ang mga ansiyano, makahatag ug personal nga tabang. Pinaagi sa pagpadapat sa ilang Kasulatanhong tambag, mapasig-uli nato ang atong maayong relasyon sa uban ug mahuptan nato ang atong maayong baroganan atubangan ni Jehova. Kon kita disiplinahon o badlongon tungod sa nahimo natong sala, makasalig ta nga kini maoy paagi sa atong langitnong Amahan sa pagpakitag gugma kanato.​—Prov. 3:11, 12; Heb. 12:6.

⁵ Motungha usahay ang ginagmayng panaglalis o problema tali sa mga igsoon sa kongregasyon. Kinahanglang husayon dayon kini sa mahigugmaong paagi. (Efe. 4:26; Filip. 2:2-4; Col. 3:12-14) Seguradong mouyon ka nga dakog posibilidad nga masulbad ra ang problema tali nimo ug sa igsoon pinaagi sa pagpadapat sa tambag ni apostol Pedro nga ‘magbaton ug init nga gugma sa usag usa, kay ang gugma magtabon sa daghang sala.’ (1 Ped. 4:8) Ang Bibliya nag-ingon: “Kitang tanan mapandol sa makadaghan.” (Sant. 3:2) Pinaagi sa pagpadapat sa Bulawanong Lagda, nga buhaton nato sa uban ang tanan nga gusto natong buhaton nila kanato, sagad atong mapasaylo ug malimtan ang ginagmayng kasaypanan.​—Mat. 6:14, 15; 7:12.

⁶ Kon mamatikdan nimo nga may napandol sa imong gisulti o gibuhat, kinahanglang molihok dayon ka aron makig-uli. Hinumdomi nga apektado sab ang imong relasyon kang Jehova. Gitambagan ni Jesus ang iyang mga tinun-an: “Kon magdala ka sa imong gasa ngadto sa halaran ug didto mahinumdom ka nga ang imong isigkatawo may kahiubos kanimo, biyai ang imong gasa atubangan sa halaran, ug lakaw. Pakigdait una sa imong igsoon ug human niana, balik ug ihalad ang imong gasa.” (Mat. 5:23, 24) Tingali wala ra mo magkasinabtanay. Kon mao, mas maayong makig-estorya ka niya. Ang maayong komunikasyon tali sa mga igsoon sa kongregasyon makatabang gyod aron malikayan ang dili pagsinabtanay ug masulbad ang mga problema nga motungha tungod sa pagkadili-hingpit.

⁷ Usahay, ang mga tigdumala kinahanglang motambag aron matul-id ang panghunahuna sa usa ka igsoon. Kini dili kanunayng sayon. Sa mga Kristohanon sa Galacia, si apostol Pablo misulat: “Mga igsoon, bisan kon ang usa ka tawo makahimog sayop nga lakang ug wala makamatikod niini, kamong hamtong nga mga Kristohanon paningkamoti nga tul-iron siya sa malumong paagi.”​—Gal. 6:1.

⁸ Pinaagi sa pagbantay sa panon, ang mga tigdumala makapanalipod sa kongregasyon batok sa daghang espirituwal nga kapeligrohan ug malikayan ang seryosong mga problema. Ang mga ansiyano maningkamot nga ang ilang pag-alagad sa kongregasyon uyon sa gisaad ni Jehova pinaagi kang Isaias: “Ang matag usa mahisamag tagoanan gikan sa hangin, usa ka salipdanan gikan sa bagyo, mahisamag mga sapa diha sa yuta nga walay tubig, mahisamag landong sa dako kaayong bato diha sa umaw nga yuta.”​—Isa. 32:2.

⁹ Si apostol Pablo nagpasidaan bahin niadtong dili maayog impluwensiya sa kongregasyon. Siya miingon: “Kami nagsugo kaninyo . . . nga likayan ang matag igsoon nga badlonganon ug wala magsunod sa instruksiyon nga inyong nadawat gikan kanamo.” Iya kanang gipatin-aw pinaagi sa pag-ingon: “Kon naay dili mosunod sa among giingon niining sulata, timan-i ninyo siya ug ayaw na pakig-uban niya, aron maulaw siya. Apan ayaw siya isipa nga kaaway, kondili padayon siyang tambagi ingong igsoon.”​—2 Tes. 3:6, 14, 15.

¹⁰ Usahay, ang usa ka igsoon wala makahimog seryosong sala nga takos sa pagpalagpot sa kongregasyon apan nagpakita siyag dayag nga kawalay pagtahod sa sukdanan sa Diyos nga angayng sundon sa mga Kristohanon. Lakip niini ang sobra ka tapolan, hinawayon, o hugawan. Tingali, siya ‘hilabtanon sa mga butang nga wala siyay labot.’ (2 Tes. 3:11) O tingali gimaniobra niya ang mga butang aron makakuhag materyal nga bentaha sa uban o nagpatuyang siya sa kalingawan nga klarong dili maayo. Ang kagrabe sa iyang pagkabadlonganon makadaot sa reputasyon sa kongregasyon, ug kini posibleng makatakod sa ubang igsoon.

¹¹ Ang mga ansiyano maningkamot una sa pagtabang sa badlonganon pinaagi sa paghatag kaniyag Kasulatanhong tambag. Pero kon padayon niyang balewalaon ang mga prinsipyo sa Bibliya bisan pag kadaghan na siyang gitambagan, ang mga ansiyano puwedeng modesisyon nga maghatag ug pakigpulong nga magpasidaan sa kongregasyon. Ang mga ansiyano angayng magmaalamon sa pagtino kon ang situwasyon seryoso ba gyod ug makapatugaw sa uban nga tungod niana gikinahanglan ang maong pakigpulong. Ang mamumulong maghatag ug haom nga tambag maylabot sa maong dili maayong panggawi, pero dili niya nganlan ang tawong badlonganon. Kadtong nahibalo sa situwasyong gihisgotan sa pakigpulong mag-amping nga dili makig-uban-uban sa maong tawo, pero makapadayon gihapon sila sa espirituwal nga pagpakig-uban kaniya, nga ‘padayong magtambag [kaniya] ingong igsoon.’

¹² Ang bug-os nga pagsunod sa matinumanong mga igsoon sa kongregasyon bahin niini posibleng makatabang nga ang badlonganon maulaw sa iyang binuhatan ug magbag-o. Dihang klaro na nga iya nang gibiyaan ang dili maayong panggawi, dili na siya trataron ingong gimarkahan.

¹³ Ang atong pagkaandam mopalabay sa kasaypanan ug mopasaylo wala magpasabot nga wala ta magpakabana sa daotang buhat o mikonsentir ta niini. Dili tanang sayop mahimong ipasangil lang sa atong pagkadili-hingpit, ug dili pod husto nga palabyon lang ang seryosong sala. (Lev. 19:17; Sal. 141:5) Giila sa pakigsaad sa Balaod nga dunay mga sala nga mas seryoso kay sa ubang sala, ug ingon sab niana diha sa Kristohanong kahikayan.​—1 Juan 5:16, 17.

¹⁴ Gihisgotan ni Jesus ang usa ka espesipikong pamaagi sa pagsulbad sa seryosong mga problema nga lagmit mahitabo tali sa mga Kristohanon. Kini ang mga lakang nga iyang giingon: “Kon ang imong igsoon makasala kanimo, [1] adtoa siya ug isulti kaniya ang iyang sayop nga kamokamo lang. Kon siya mamati, nakabig nimo ang imong igsoon sa hustong dalan. Apan kon dili siya mamati, [2] pagdala ug usa o duha pa, aron nga pinaagi sa duha o tulo ka saksi mapamatud-an ang tanang butang. Kon dili siya mamati kanila, [3] sultihi ang kongregasyon. Kon dili siya mamati bisan sa kongregasyon, isipa siya nga sama sa tawo sa kanasoran ug sama sa maniningil ug buhis.”​—Mat. 18:15-17.

¹⁵ Agig pagtagad sa ilustrasyon nga gihatag ni Jesus nga narekord sa Mateo 18:23-35, masabtan nato nga ang usa sa mga sala nga gihisgotan sa Mateo 18:15-17 maoy bahin sa kuwarta o kabtangan, sama sa dili pagbayad ug utang o pagpanikas. O kaha ang sala maoy pagbutangbutang nga seryosong makadaot sa reputasyon.

¹⁶ Kon duna kay ebidensiya nga ang usa ka igsoon sa kongregasyon nakahimo nianang salaa kanimo, ayaw dayog sumbong sa mga ansiyano, nga mohangyo nila nga labanan ka. Sumala sa tambag ni Jesus, pakigsulti una sa maong igsoon. Paningkamoti ang pagsulbad niana nga kamo rang duha. Hinumdomi nga si Jesus wala moingon nga ‘adtoa siya sa usa lang ka higayon, ug isulti kaniya ang iyang sayop.’ Busa kon siya dili moangkon sa sayop ug dili mangayog pasaylo, maayo tingali nga makig-estorya ka niya pag-usab sa sunod nga higayon. Kon ang problema mahusay niining paagiha, ang nakasala magpasalamat gyod kay wala nimo isulti sa uban ang iyang sala o wala nimo daota ang iyang reputasyon sa kongregasyon. “Nakabig nimo ang imong igsoon.”

¹⁷ Kon ang nakasala moangkon, mangayog pasaylo, ug mohimog mga paagi sa pagtul-id sa sayop, dili na kinahanglan ang dugang nga aksiyon. Bisag seryoso ang sala, ang ingon niini nga klase sa sala puwede rang masulbad sa duha ka indibiduwal nga nalangkit.

¹⁸ Kon wala nimo makabig ang imong igsoon pinaagi sa pagpadayag sa iyang sayop nga “kamokamo lang,” mahimong sundon nimo ang giingon ni Jesus, “pagdala ug usa o duha pa,” ug pakigsulti pag-usab sa imong igsoon. Kadtong imong iuban kinahanglang duna poy tumong nga makabig ang imong igsoon. Mas maayo kon nakasaksi sila sa gikaingong sala, pero kon walay nakasaksi, puwede nimong hangyoon ang usa o duha pa ka igsoon aron mahimong saksi sa inyong panaghisgot. Basin duna na silay kasinatian bahin sa inyong isyu ug lagmit makatabang sila sa pagtino kon sayop ba gyod ang nahitabo. Kon ansiyano ang hangyoon ingong saksi, dili siya magrepresentar sa kongregasyon kay wala man siya espesipikong itudlo sa mga ansiyano sa paghimo niana.

¹⁹ Kon ang problema wala gihapon masulbad bisan pag kapila na kang nakigsulti niya​—kadtong nakigsulti ka nga kamo lang duha ug kadtong nagpauban kag usa o duha ka igsoon—​ug gibati nimo nga kini dili mahimong palabyon, kinahanglang isulti na nimo kini sa mga tigdumala sa kongregasyon. Hinumdomi nga ang ilang tumong mao ang pagpatunhay sa kalinaw ug kahinlo sa kongregasyon. Kay nasulti na nimo kini sa mga ansiyano, mas maayong ihatag nimo kanila ang responsibilidad sa pag-atiman niini ug salig lang kang Jehova. Ayaw gyod tugoti nga ang panggawi sa uban makapandol nimo o makawala sa imong kalipay sa pag-alagad kang Jehova.​—Sal. 119:165.

²⁰ Ang mga magbalantay sa panon maoy mag-imbestigar niini. Kon matino nila nga ang usa nakahimo gyod ug seryosong sala batok kanimo ug dili mahinulsolon ug wala mohimog makataronganon ug haom nga mga lakang sa pagtul-id sa sayop, lagmit kinahanglang ipalagpot sa komite sa mga ansiyano ang nakasala gikan sa kongregasyon. Pinaagi niana, ilang mapanalipdan ang panon ug maampingan ang kahinlo sa kongregasyon.​—Mat. 18:17.

²¹ Ang ubang seryosong sala, sama sa seksuwal nga imoralidad, pagpanapaw, homoseksuwalidad, pagpasipala, apostasya, idolatriya, ug uban pang grabeng sala, nagkinahanglag labaw pa kay sa pagpangayo lag pasaylo gikan sa indibiduwal nga nahimoag sala. (1 Cor. 6:9, 10; Gal. 5:19-21) Kay nameligro ang espirituwal ug moral nga kahinlo sa kongregasyon, ang maong seryosong mga sala kinahanglang ipahibalo ngadto sa mga ansiyano ug silay moatiman niini. (1 Cor. 5:6; Sant. 5:14, 15) Ang uban moduol sa mga ansiyano aron itug-an ang ilang kaugalingong sala o itug-an ang ilang nasayran nga sala sa uban. (Lev. 5:1; Sant. 5:16) Bisan unsa pa man ang paagi nga nadungog sa mga ansiyano ang report bahin sa seryosong sala nga nahimo sa usa ka bawtismadong Saksi, ang pasiunang imbestigasyon himoon pinaagi sa duha ka ansiyano. Kon matino nga tinuod ang maong report ug may ebidensiya nga nahimo ang seryosong sala, ang mga ansiyano magtudlo ug hudisyal nga komite nga may labing menos tulo ka ansiyano aron atimanon ang kaso.

²² Bantayan pag-ayo sa mga ansiyano ang panon aron mapanalipdan kini batok sa bisan unsang espirituwal nga kadaot. Paningkamotan sab nilang gamiton ang Pulong sa Diyos sa epektibong paagi aron badlongon si bisan kinsang nakasala ug mapasig-uli ang ilang espirituwal nga kahimsog. (Jud. 21-23) Uyon kini sa instruksiyong nadawat ni Timoteo gikan ni apostol Pablo, kinsa misulat: “Atubangan sa Diyos ug kang Kristo Jesus, nga maghukom sa mga buhi ug mga patay, . . . pamadlong, panul-id, panambag, uban ang dakong pailob ug maayong paagi sa pagpanudlo.” (2 Tim. 4:1, 2) Ang paghimo niana mahimong magkinahanglag dakong panahon, pero apil kana sa mga paghago nga gihimo sa mga ansiyano. Ang kongregasyon nagpabili sa ilang mga paghago ug nag-isip kanila nga “takos sa dobleng pasidungog.”​—1 Tim. 5:17.

²³ Sa bisan unsang kahimtang diin ang usa napamatud-ang sad-an, ang pangunang tumong sa mga tigdumala mao ang pagpasig-uli sa espirituwal nga kahimsog sa nakasala. Kon siya tinuod nga mahinulsolon ug mahimo pa nila siyang tabangan, ang ilang pagbadlong kaniya, sa pribado man o atubangan sa mga saksi nga mitestigo panahon sa hudisyal nga husay, magsilbing disiplina kaniya ug makahatag ug hustong matang sa kahadlok sa mga saksi nga mitestigo. (2 Sam. 12:13; 1 Tim. 5:20) Sa tanang kaso sa hudisyal nga pagbadlong, dunay ipahamtang nga mga restriksiyon. Niining paagiha, ang nakasala lagmit matabangan sa ‘pagtul-id sa iyang mga agianan.’ (Heb. 12:13) Sa ngadtongadto, ang mga restriksiyon tangtangon ra samtang madayag nga nagkalig-on na ang espirituwalidad sa maong indibiduwal.

²⁴ Kon nakita sa hudisyal nga komite nga ang nakasala mahinulsolon pero ang kaso lagmit mabaniog sa kongregasyon o sa komunidad o kon ang kongregasyon kinahanglang magbantay batok sa mahinulsolong nakasala, ang simpleng pahibalo himoon panahon sa Tigom nga Kinabuhi ug Ministeryo. Mao kini ang basahon: “Si [ngalan] gibadlong.”

²⁵ Sa pipila ka kaso, ang nakasala milunang na sa iyang paghimog sala ug busa dili na mosanong sa mga paningkamot nga matabangan siya. Panahon sa hudisyal nga husay, tingali dili igo ang gipakita niyang “mga buhat nga nagpakitag paghinulsol.” (Buh. 26:20) Unsay himoon? Sa maong mga kaso, kinahanglang ipalagpot gikan sa kongregasyon ang nakasala nga dili mahinulsolon, busa dili na siya puwedeng makig-uban sa hinlong katawhan ni Jehova. Sanglit wala na ang daotang impluwensiya sa nakasala, mapanalipdan ang moral ug espirituwal nga kahinlo sa kongregasyon ug ang maayong reputasyon niini. (Deut. 21:20, 21; 22:23, 24) Dihang nahibaloan ni apostol Pablo ang makauulaw nga paggawi sa usa ka indibiduwal sa kongregasyon sa Corinto, iyang gitambagan ang mga ansiyano nga “itugyan ninyo ang maong tawo kang Satanas . . . , aron nga ang espiritu [sa kongregasyon] maluwas.” (1 Cor. 5:5, 11-13) Gihisgotan sab ni Pablo ang uban pang gipalagpot kay nahimong mga apostata niadtong unang siglo.​—1 Tim. 1:20.

²⁶ Dihang matino sa hudisyal nga komite nga kinahanglang ipalagpot ang dili mahinulsolong nakasala, kinahanglan nga ila siyang pahibaloon sa desisyon, ug ipatin-aw kaniya ang Kasulatanhong (mga) rason sa pagpalagpot. Dihang pahibaloon ang nakasala bahin sa desisyon, sultihan siya sa hudisyal nga komite nga kon nagtuo siyang dunay dakong sayop sa desisyon ug gusto niyang moapelar, puwede siyang mosulat ug tin-awng hisgotan ang iyang mga rason sa pag-apelar. Gikan sa adlaw nga ipahibalo kaniya ang desisyon, hatagan siyag pito ka adlaw sa pag-apelar. Kon naay madawat nga sulat sa pag-apelar, kontakon sa mga ansiyano sa kongregasyon ang tigdumala sa sirkito, nga maoy mopilig kuwalipikadong mga ansiyano ingong komite sa apelasyon aron atimanon pag-usab ang kaso. Maningkamot sila sa paghusay niini sulod sa usa ka semana human madawat ang sulat. Kon dunay apelasyon, dili una ipahibalo sa kongregasyon ang pagpalagpot. Kasamtangan, ang akusado dili pakomentohon ug paampoon panahon sa mga tigom o hatagag espesyal nga mga pribilehiyo sa pag-alagad.

²⁷ Ang pagtugot sa pag-apelar maoy pagpakitag kaayo sa akusado ug maghatag kaniya ug kahigayonan aron mapaminawan ug dugang ang iyang kaso. Busa kon ang akusado tinuyong dili moatubang sa husay sa apelasyon, ang pagpalagpot ipahibalo human mahimo ang tanang paningkamot sa pagkontak kaniya.

²⁸ Kon ang nakasala dili gustong moapelar, ipatin-aw sa hudisyal nga komite nga kinahanglan siyang maghinulsol. Ipatin-aw sab nila kon unsang mga lakang ang iyang himoon aron siya mapasig-uli sa umaabot. Kini maoy pagtabang ug pagpakitag kaayo kaniya ug kinahanglang himoon uban ang paglaom nga siya magbag-o ug sa ngadtongadto mokuwalipikar sa pagbalik sa organisasyon ni Jehova.​—2 Cor. 2:6, 7.

²⁹ Dihang kinahanglang ipalagpot ang dili mahinulsolong nakasala gikan sa kongregasyon, himoon ang mubong pahibalo, nga mag-ingon: “Si [ngalan] dili na usa ka Saksi ni Jehova.” Kini magsilbing pasidaan sa matinumanong mga igsoon sa kongregasyon nga mohunong na sa pagpakig-uban kaniya.​—1 Cor. 5:11.

³⁰ Ang terminong “dis-asosasyon” nagtumong sa aksiyon nga gihimo sa usa ka bawtismadong Saksi nga tinuyong misalikway sa iyang Kristohanong baroganan pinaagi sa pagpahibalo o pagsulat nga dili na siya gustong ilhon, o mailhan, ingong Saksi ni Jehova. O tingali gisalikway na niya ang iyang pagkahimong sakop sa Kristohanong kongregasyon pinaagi sa iyang mga buhat, sama sa pagkahimong bahin o sakop sa usa ka sekular nga organisasyon nga ang mga tumong supak sa mga pagtulon-an sa Bibliya ug busa hinukman ni Jehova nga Diyos.​—Isa. 2:4; Pin. 19:17-21.

³¹ Bahin sa mga nagsalikway sa ilang Kristohanong pagtuo niadtong panahon ni apostol Juan, siya misulat: “Sila mibiya nato, apan sila dili sama nato; kay kon sila sama pa kanato, magpabilin unta sila uban nato.”​—1 Juan 2:19.

³² Dihang ang usa magdis-asosyet sa iyang kaugalingon, ang iyang situwasyon atubangan ni Jehova lahi kaayo kay sa dili aktibong Kristohanon, kinsa wala na makigbahin sa ministeryo. Tingali ang usa nahimong dili aktibo kay wala siyay regular nga pagtuon sa Pulong sa Diyos. O tingali nakasinati siyag mga problema o paglutos ug nawad-an siyag kadasig sa pag-alagad kang Jehova. Ang mga ansiyano ug ang uban sa kongregasyon padayong makahatag ug espirituwal nga tabang sa dili aktibong Kristohanon.​—Roma 15:1; 1 Tes. 5:14; Heb. 12:12.

³³ Pero kon ang usa ka Kristohanon nakadesisyon nga modis-asosyet, himoon ang mubong pahibalo sa kongregasyon nga mag-ingon: “Si [ngalan] dili na usa ka Saksi ni Jehova.” Siya isipon nga sama sa tawong gipalagpot.

³⁴ Ang napalagpot o ang midis-asosyet gikan sa kongregasyon mahimong ipasig-uli dihang siya magpakitag tin-awng ebidensiya nga siya naghinulsol ug mibiya na sa iyang makasasalang buhat sulod sa igoigong yugto sa panahon. Iyang gipakita nga gusto gyod niyang mabalik ang iyang maayong relasyon kang Jehova. Ang mga ansiyano angayng magmaalamon sa paghatag ug igong panahon​—daghang bulan, usa ka tuig, o mas taas pa, depende sa kahimtang—​aron mapamatud-an sa indibiduwal nga tinuod siyang naghinulsol. Dihang ang mga ansiyano makadawat ug sulat nga naghangyo sa pagpasig-uli, ang komite sa pagpasig-uli makig-estorya sa indibiduwal. Timbangtimbangon sa komite kon nagpakita ba siyag “mga buhat nga nagpakitag paghinulsol” ug modesisyon sila kon ipasig-uli na ba siya nianang panahona o dili.​—Buh. 26:20.

³⁵ Kon ang tawong naghangyo nga mapasig-uli napalagpot sa laing kongregasyon, ang lokal nga komite sa pagpasig-uli makig-estorya kaniya ug konsiderahon ang iyang hangyo. Kon ang lokal nga komite sa pagpasig-uli nagtuo nga siya angayng ipasig-uli, ilang ipadala ang ilang rekomendasyon ngadto sa mga ansiyano sa kongregasyon nga maoy orihinal nga nag-atiman sa maong kahimtang. Ang duha ka komite magtinabangay aron maseguro nga mabatonan ang tanang impormasyon ug makahimog hustong desisyon. Pero ang desisyon nga ipasig-uli ang usa ka indibiduwal himoon sa komite sa pagpasig-uli sa kongregasyon nga maoy orihinal nga nag-atiman sa maong kahimtang.

³⁶ Dihang ang komite sa pagpasig-uli kombinsido na nga ang tawong napalagpot o nadis-asosyet tinuod gyong naghinulsol ug angayng ipasig-uli, ang maong pagpasig-uli ipahibalo didto sa kongregasyon nga maoy orihinal nga nag-atiman sa iyang kahimtang. Kon siya naa na karon sa laing kongregasyon, himoon sab didto ang maong pahibalo. Kini ang isulti: “Si [ngalan] gipasig-uli ingong usa ka Saksi ni Jehova.”

³⁷ Ang seryosong sala sa bawtismadong menor de edad nga mga anak angayng itug-an ngadto sa mga ansiyano. Dihang ang mga ansiyano maghusay ug kaso sa seryosong sala nga nalangkit ang menor de edad, mas maayong presente ang iyang bawtismadong mga ginikanan. Ang mga ginikanan mokooperar sa hudisyal nga komite, nga dili mosulay sa paglaban sa ilang anak nga nakasala aron lang makalikay kini sa gikinahanglang disiplina. Sama sa paghusay sa hamtong nga nakasala, ang hudisyal nga komite maningkamot sa pagbadlong ug pagpasig-uli sa nakasala. Pero kon dili mahinulsolon ang menor de edad, siya angayng ipalagpot.

³⁸ Unsay angayng himoon dihang ang dili bawtismadong mga magmamantala malangkit sa paghimog seryosong sala? Kay dili pa sila bawtismadong Saksi, dili sila puwedeng ipalagpot. Tingali wala pa sila bug-os makasabot sa mga sukdanan sa Bibliya, busa ang mahigugmaong tambag makatabang kanila aron ‘matul-id ang mga agianan sa ilang tiil.’​—Heb. 12:13.

³⁹ Kon ang nakasala nga dili bawtismadong magmamantala dili mahinulsolon bisag naestorya na siya ug gipaningkamotang matabangan sa duha ka ansiyano, kinahanglang ipahibalo kini sa kongregasyon. Himoon ang mubong pahibalo nga mag-ingon: “Si [ngalan] wala na ilha ingong dili bawtismadong magmamantala.” Unya isipon na sa kongregasyon ang nakasala ingong tawo nga kalibotanon. Bisag ang nakasala wala mapalagpot, ang mga Kristohanon mag-amping sa bisan unsang pagpakig-uban kaniya. (1 Cor. 15:33) Ang iyang report sa pagsangyaw dili na dawaton.

⁴⁰ Ngadtongadto, ang dili bawtismado nga gitangtang ingong magmamantala tingali gusto nang mobalik sa pagkahimong magmamantala. Kon mao, duha ka ansiyano ang makig-estorya kaniya ug susihon ang iyang espirituwal nga pag-uswag. Kon siya kuwalipikado, himoon ang mubong pahibalo: “Si [ngalan] giila na sab ingong dili bawtismadong magmamantala.”

⁴¹ Ang tanang nakig-uban sa kongregasyon sa Diyos karon malipay tungod sa espirituwal nga kadagaya nga gihatag ni Jehova sa iyang katawhan. Lunhaw gayod ang atong espirituwal nga mga sibsibanan, ug duna tay abundang makapalagsik nga tubig sa kamatuoran. Gihatagan sab tag panalipod ni Jehova pinaagi sa iyang teokratikanhong kahikayan ubos sa pagkaulo sa Kristo. (Sal. 23; Isa. 32:1, 2) Kay nagpuyo ta sa espirituwal nga paraiso niining gubot nga kataposang mga adlaw, mibati tag kasegurohan.

⁴² Pinaagi sa atong mga paningkamot nga magpabiling malinawon ug hinlo ang kongregasyon, padayon natong gipalamdag ang atong kahayag sa kamatuoran sa Gingharian. (Mat. 5:16; Sant. 3:18) Uban sa panalangin sa Diyos, malipay ta sa pagkakita nga daghan pang tawo ang makaila kang Jehova ug moduyog kanato sa pagbuhat sa iyang kabubut-on.