Pagbantay sa Kaayohan sa mga Tigulang

“Bantayi ninyo, dili ang inyong kaugalingong kaayohan, kondili ang kaayohan usab sa uban.”—FILIPOS 2:4.

WALA madugay tapos sa Pentekostes 33 K.P. “mitungha ang pagbagutbot [sa Kristohanong kongregasyon] sa bahin sa nagsultig-Gregong mga Hudiyo batok sa nagsultig-Hebreohanong mga Hudiyo, kay ang ilang mga babayeng balo nahisayloan man sa inadlaw nga pagpang-apod-apod [sa pagkaon sa mga kabos].” Pihong ubay-ubay niadtong mga babayeng balo maoy tigulang ug dili na makabuhi sa ilang kaugalingon. Maayo gani, ang mga apostol mibalda, nga miingon: “Pangita kamo sa inyong kaugalingon ug pito ka hingmatud-an nga mga lalaki sa inyong taliwala, nga puno sa espiritu ug sa kinaadman, aron kami makatudlo kanila sa pag-atiman niining gikinahanglang buluhaton.”​—Buhat 6:1-3.

1, 2. (a) Sa unsang paagi ang unang-siglong nagmandong lawas nagpasundayag ug interes sa mga panginahanglan sa mga tigulang? (b) Unsa ang ebidensiya nga ang buluhatong pagsangyaw wala pasagdi?

² Sa ingon giisip sa unang mga Kristohanon ang pag-atiman sa mga kabos ingong “gikinahanglang buluhaton.” Katuigan sa ulahi ang tinun-ang si Santiago misulat: “Ang matang sa pagsimba nga mahinlo ug walay hugaw gikan sa hunahuna sa atong Diyos ug Amahan mao kini: ang pag-atiman sa mga ilo ug sa mga babayeng balo sa ilang kasakitan.” (Santiago 1:27) Nan, nagkahulogan ba kini nga napasagdan ang hinungdanon-sa-tanang buluhaton sa pagsangyaw? Wala, kay ang asoy sa Mga Buhat nagaingon nga human mahikay sa tukma ang buluhatong panghinabang sa mga babayeng balo, “ang pulong sa Diyos nagpadayon sa pag-uswag, ug ang gidaghanon sa mga tinun-an nagpadayon sa pagtubo sa labihan gayod sa Jerusalem.”​—Buhat 6:7.

3. Unsang pagdasig ang gihatag sa Filipos 2:4, ug nganong kini angay ilabina karong adlawa?

³ Karong adlawa atong giatubang “ang mga panahong lisod sagubangon.” (2 Timoteo 3:1) Tungod sa pag-atiman sa mga katungdanan sa pamilya ug sa sekular nga trabaho kita tingali mabinlan ug diyutayng kusog​—o tinguha​—sa paghunahuna sa mga panginahanglan sa mga tigulang. Nan, tukmang ang Filipos 2:4 nagaawhag kanato nga “magbantay, dili sa [atong] kaugalingong mga kaayohan, kondili sa kaayohan usab sa uban.” Sa unsang paagi kini mahimo sa timbang, praktikal nga paagi?

Paghatag ug Pasidungog sa mga Babayeng Balo

4. (a) Ngano ug sa unsang paagi ang unang-siglong kongregasyon “nagpasidungog” sa mga babayeng balo? (b) Ang mao bang mga tagana sa kanunay gikinahanglan?

⁴ Sa 1 Timoteo kapitulo 5, si Pablo nagapakita giunsa sa unang mga Kristohanon ang pag-atiman sa tigulang nga mga babayeng balo sa kongregasyon. Iyang giawhag si Timoteo: “Pasidunggi ang mga babayeng balo nga tinuod nga mga babayeng balo.” (Bersikulo 3) Ang tigulang nga mga balo gitumong ingong sa linain takos sa pagdawat sa pasidungog sa dagway sa regular nga tabang sa salapi. Kana sila naputol gikan sa tanang dayag nga pangabuhian ug ‘makabutang na lamang sa ilang paglaom sa Diyos ug magpadayon sa mga pangaliyupo ug mga pag-ampo sa gabii ug sa adlaw.’ (Bersikulo 5) Giunsa pagtubag ang ilang mga pag-ampo alang sa pangabuhi? Pinaagi sa kongregasyon. Sa organisadong paagi, ang takos nga mga babayeng balo gitagan-ag diyutayng pangabuhian. Hinuon, kon ang usa ka babayeng balo may katigayonan, o mga paryenteng makaarang sa pagbuhi kaniya, dili na kinahanglan ang maong mga tagana.​—Bersikulo 4, 16.

5. (a) Sa unsang paagi ang pila ka babayeng balo mahimong ‘nangagpas sa katagbawan sa unod’? (b) Ang kongregasyon obligado ba sa pagsuportar kanila?

⁵ “Apan ang [babayeng balo] nga nagapangagpas sa pagtagbaw sa unod,” mipahimatngon si Pablo, “maoy patay [sa espirituwal] bisan pag siya buhi.” (Bersikulo 6) Si Pablo wala magpatin-aw sa unsang paagi ang pipila, sumala sa literal nga paghubad niini sa Kingdom Interlinear, “nagagawi nga maulagon.” Ang pipila tingali nakigbisog sa ilang “mga agda sa sekso.” (Bersikulo 11) Bisan pa niana, sumala sa Liddell & Scott’s Greek-English Lexicon, ang “paggawi nga maulagon” mahimong naglangkit usab sa ‘pagkinabuhing hayahay o sa labihang kaharuhay o pagpatuyang.’ Nan, tingali, ang pila buot nga padatoon sila sa kongregasyon, sa pagsuportar sa hinobra, mapatuyangon-sa-kaugalingong kinabuhi. Bisan unsa ang kahimtang, gipaila ni Pablo nga sila dili angay magadawat sa suportar sa kongregasyon.

6, 7, ug potnot. (a) Unsa “ang talaan”? (b) Nganong kadtong wala pay 60 sa edad dili takos modawat sa suportar? (c) Giunsa ni Pablo pagtabang sa batan-ong mga babayeng balo sa pagdawat sa dili-maayong “paghukom”?

⁶ Unya si Pablo miingon: “Ibutang sa talaan [niadtong magadawat ug suportar nga salapi] ang usa ka babayeng balo nga may panuigong dili ubos sa kan-uman ka tuig.” Sa adlaw ni Pablo ang babayeng kapin sa 60 ka tuig dayag giisip nga dili makabuhi sa iyang kaugalingon ug lagmit dili na magminyo pag-usab.a “Sa laing bahin,” si Pablo miingon, “ayaw dawata ang mga babayeng balo nga batan-on [aron itala], kay kon ang ilang mga agda sa sekso mopatunga kanila ug kang Kristo, sila buot nga magminyo, nga magbaton sa paghukom tungod kay wala nila tagda ang ilang unang pahayag sa pagtuo.”​—Bersikulo 9, 11, 12.

⁷ Kon “ang talaan” bukas pa sa mga babayeng balo nga batan-on, ang pila tingali nagdalidali sa pagpahayag sa tuyo nga magpabiling mag-inusara. Ugaling, sa paglabay sa panahon, sila tingali naglisod sa pagpugong sa ilang “mga agda sa sekso” ug buot magminyo pag-usab, ‘nga nagbaton sa paghukom sa dili pagtagad sa ilang unang pahayag sa pagtuo’ sa pagpabiling mag-inusara. (Itandi ang Ecclesiastes 5:2-6.) Gisagang ni Pablo ang maong mga suliran, nga mipahayag sa dugang, “Buot kong ang batan-ong mga babayeng balo magminyo, nga manganak.”​—Bersikulo 14.

8. (a) Sa unsang paagi ang mga lagda ni Pablo nanalipod sa kongregasyon? (b) Ang nagkinahanglan bang batan-ong mga babayeng balo o mga lalaking tigulang giatiman usab?

⁸ Gilimitahan usab sa apostol ang talaan ngadto niadtong may hatag-as nga mga rekord sa maayong binuhatang Kristohanon. (bersikulo 10) Sa ingon ang kongregasyon dili usa ka “estadong nagahinabang” alang sa tapolan o sa hakog. (2 Tesalonica 3:10, 11) Apan unsa na man ang mga lalaking tigulang o mga babayeng balo nga batan-on? Kon sila modangat sa kawalad-on, pihong ang kongregasyon nag-atiman kanila sa tinagsa ka kaso.​—Itandi ang 1 Juan 3:17, 18.

9. (a) Nganong ang kahikayan sa pag-atiman sa mga tigulang karong adlawa lahi sa iya niadtong gihimo sa unang siglo? (b) Ang paghisgot ni Pablo sa mga babayeng balo sa 1 Timoteo kapitulo 5 nagatabang kanato sa pagpabili sa unsa karong adlawa?

⁹ Ang maong mga kahikayan lagmit igo alang sa mga panginahanglan sa mga kongregasyon sa unang siglo. Apan sumala sa gipahayag sa The Expositor’s Bible Commentary: “Karong adlawa, tungod sa kinitaan gikan sa seguro, seguridad sosyal, ug kahigayonan sa trabaho, ang kahimtang lahi kaayo.” Ingong sangpotanan sa nausab nga sosyal ug ekonomikanhong hulagway, talagsa rang gikinahanglan nga ang mga kongregasyon karong adlawa maghupot ug mga talaan sa tigulang nga mga benepisyaryo. Bisan pa niana, ang mga pulong ni Pablo ngadto kang Timoteo mobulig kanato sa pagpabili: (1) Ang mga suliran sa mga tigulang pagaatimanon sa tibuok kongregasyon​—ilabina ang mga ansiano. (2) Ang pag-atiman sa mga tigulang angay organisahon sa tukma. (3) Ang maong pag-atiman limitado niadtong tinuod nga nagkinahanglan.

Pagbantay sa Ilang mga Kaayohan Ingong mga Ansiano

10. Sa unsang paagi ang mga ansiano karong adlawa makapanguna sa pagpakitag interes sa mga tigulang?

¹⁰ Sa unsang paagi ang mga magtatan-aw karong adlawa nagapanguna sa pagpakitag interes sa mga tigulang? Matag karon ug unya sila makaapil sa mga panginahanglan sa mga tigulang sa mga butang pagahisgotan sa ilang mga miting. Kon kinahanglan ang tinong tabang, sila makahikay aron kana ikatagana. Tingali dili sila ang moatiman sa personal, sanglit kadaghanan may daghang andam​—apil ang mga batan-on​—sa kongregasyon nga makatabang. Bisan pa niana, sila makadumalag maayo sa among pag-atiman, tingali pinaagi sa pagtudlog usa ka igsoong lalaki sa paghiusa sa pag-atimang ihatag sa usa ka indibiduwal.

11. Sa unsang paagi ang mga ansiano makasinati sa mga panginahanglan sa mga tigulang?

¹¹ Si Solomon mitambag: “Angay ninyong mailhan gayod ang panagway sa inyong panon.” (Proverbio 27:23) Sa ingon ang mga magtatan-aw makaduaw sa personal sa mga tigulang aron sa pagtino sa labing maayo kon unsaon sa “pagpakig-ambit . . . sumala sa ilang mga panginahanglan.” (Roma 12:13) Ang usa ka nagapanawng magtatan-aw nagpahayag niini niining paagiha: “Independente kaayo ang pila ka tigulang, ug dili maayo nga suknaon lamang kon unsay kinahanglang himoon. Labing maayo nga sabton kon unsay kinahanglang himoon ug himoon kana!” Sa Hapon nasayran sa pila ka magtatan-aw nga nagkinahanglag dakong pagtagad ang usa ka 80-anyos nga igsoong babaye. Sila mitaho: “Amo na karong ginatino nga may makakontak kaniya kaduha sa usa ka adlaw, sa buntag ug sa gabii, pinaagi sa pagduaw o sa telepono.”​—Itandi ang Mateo 25:36.

12. (a) Sa unsang paagi matino sa mga ansiano nga mabatonan sa mga tigulang ang kaayohan sa mga tigom sa kongregasyon? (b) Unsa ang maayong kagamitan sa mga teyp nga gigama sa Sosyedad?

¹² Ang mga magtatan-aw mabalak-on usab nga makabatog kaayohan ang mga tigulang sa mga tigom sa kongregasyon. (Hebreohanon 10:24, 25) Nagkinahanglan ba ang pipila ug transportasyon? Ang pipila ba yanong dili makaarang sa “pagpatalinghog ug pagsabot” sa mga tigom tungod sa mga kadaot sa igdulongog? (Mateo 15:10) Tingali praktikal ang pagtaod ug mga headphone kanila. Sa susama, ang ubay-ubayng kongregasyon karon nagkonektar sa mga tigom sa mga telepono aron ang mga masakiton makapatalinghog sa balay. Ang uban nagarekord sa mga tigom sa mga teyp alang niadtong dili makatambong tungod sa sakit​—sa pila ka kaso nagpalit sa mga cassette rekorder alang kanila. Ug sa paghisgot sa mga teyp, ang usa ka ansiano sa Alemanya miingon: “Ako nakaduaw ug daghang tigulang nga naglingkod lamang atubangan sa telebisyon ug nagtan-aw sa mga programa nga dili ikabatbat ingong makapalig-on sa espirituwal.” Nganong dili dasigon sila sa pagpatalinghog hinuon sa mga teyp nga gigama sa Sosyedad, sama nianang may mga honi sa Gingharian ug pagbasa sa Bibliya?

13. Sa unsang paagi ang mga tigulang matabangan sa pagpabiling aktibo ingong mga magmamantala sa Gingharian?

¹³ Ang pila ka senyor nga mga sakop sa kongregasyon nangahimong dili regular o dili aktibo ingong mga magsasangyaw. Ang edad, hinunoa, dili angay magpugong sa usa sa pagmantala sa “maayong balita sa Gingharian.” (Mateo 24:14) Ang pila basin mosanong sa yanong pagdapit sa pag-uban kanimo sa pagsangyaw. Tingali makahaling ka pag-usab sa ilang gugma sa pagsangyaw pinaagi sa pagpakig-ambit sa mga kasinatian sa pagsangyaw uban kanila. Kon suliran ang pagsaka sa hagdanan, hikaya nga sila magsangyaw sa mga apartment nga may mga elebetor o mga dapit residensiyal nga walay hagdanan. Ang pila ka magmamantala makapakuyog usab sa mga tigulang sa mga pagtuon sa Bibliya​—o himoon ang pagtuon sa balay sa tigulang.

14 ug kahon. (a) Unsay mahimo sa mga ansiano kon ang usa ka tigulang igsoong lalaki o babaye maglisod sa panalapi? (b) Sa unsang paagi ang pila ka kongregasyon nagtagana sa mga panginahanglan sa tigulang nga mga magmamantala?

¹⁴ ‘Ang salapi maoy usa ka panalipod.’ (Ecclesiastes 7:12) Ugaling daghang tigulang igsoong lalaki o babaye naglisod kaayo sa panalapi ug walay mga paryenteng andam motabang. Hinuon, ang mga indibiduwal diha sa kongregasyon kasagarang malipayon sa pagtabang kon pahibaloon sa panginahanglan. (Santiago 2:15-17) Ang mga ansiano makasusi usab kon unsang mga kagamhananon o sosyal nga mga serbisyo, mga polisa sa seguro, mga pensiyon, ug uban pa, ang mabatonan. Hinuon, sa pila ka nasod ang maong mga serbisyo dili mabatonan, ug walay laing kapaingnan gawas ang pagsunod sa sumbanan sa 1 Timoteo kapitulo 5 ug hikayon nga ang kongregasyon sa katibuk-an maoy motaganag hinabang. (Tan-awa ang Organisado sa Pagtuman sa Atong Ministeryo, mga panid 122-3.)

Ang mga magmamantala sa Nigeria nagtabang sa usa ka 82-anyos nga regular payunir ug sa iyang asawa sa materyal nga mga gasa. Sa gieskedyul sa gobyerno nga gub-on ang tinukod nga ilang gipuy-an, ang kongregasyon nagdapit kanila nga mobalhin ngadto sa usa ka kuwartong tapot sa Kingdom Hall hangtod mahikay ang laing puy-anan.

Sa Brazil ang usa ka kongregasyon nagsuweldog usa ka nars sa pag-atiman sa usa ka tigulang magtiayon. Sa samang panahon, ang usa ka igsoong babaye giasayn sa pagpanglimpiyo sa balay, pagluto sa ilang pagkaon, ug pag-atiman sa ubang pisikal nga panginahanglan. Sa matag bulan ang kongregasyon naggahin ug salapi alang sa ilang panggastos.

15. (a) May mga limitasyon ba sa tabang nga ikatagana sa kongregasyon? (b) Sa unsang paagi ang tambag sa Lucas 11:34 nahiangay alang sa pipila nga sobra ka pugoso?

¹⁵ Sama niadto sa unang siglo, ang maong mga tagana maoy alang sa mga takos nga tinuod nagkinahanglan niana. Ang mga magtatan-aw dili obligado sa paghatag sa maluho nga mga hangyo o mopatuman sa dili-makataronganong mga panginahanglan sa pagtagad. Ang mga tigulang, usab, kinahanglang magbatog ‘yano nga mata.’​—Lucas 11:34.

Pagbantay sa Ilang mga Kaayohan Ingong mga Indibiduwal

16, 17. (a) Nganong hinungdanon nga ang uban gawas pa sa mga ansiano magbatog interes sa mga tigulang? (b) Sa unsang paagi ang okupadong mga magmamantala ‘makapalit ug panahon’ alang sa mga tigulang?

¹⁶ Dili pa dugay ang usa ka tigulang igsoong babaye gisulod sa ospital. Ang rekonosir mao ang kakulang sa sustansiya. “Kon daghan pa sa kongregasyon ang may personal nga interes kaniya,” misulat ang usa ka ansiano, “tingali dili unta kana mahitabo.” Oo, ang mga ansiano dili mao lamang ang kinahanglang maikag sa mga tigulang. Si Pablo miingon: “Kita mga sakop nga iya sa usag usa.”​—Efeso 4:25.

¹⁷ Pihong ang pila kaninyo nabug-atan sa personal nga mga responsabilidad. Apan ‘magbantay, dili lamang sa inyong kaugalingong mga kaayohan.’ (Filipos 2:4) Uban ang tukmang personal nga organisasyon, kadaghanan ikaw ‘makapalit sa panahon.’ (Efeso 5:16) Pananglitan, makaduaw ka ba sa usa ka tigulang tapos sa pagsangyaw? Ang ordinaryong mga adlaw maoy mamingawong mga yugto ilabina sa pipila. Ang mga tin-edyer, usab, mahimong malangkit sa pagduaw sa mga tigulang ug pagpamuhatbuhat alang kanila. Miampo ang usa ka igsoong babaye nga gitabangan sa usa ka batan-on: “Salamat kanimo Jehova tungod sa batan-ong si Brader John. Pagkamaayo niya nga tawo.”

18. (a) Nganong ang pagpakigsulti sa usa ka tigulang tingali malisod usahay? (b) Sa unsang paagi mahimo ang pagduaw o pagpakigsulti sa usa ka tigulang nga tawo makapalig-on kanilang duha?

¹⁸ Panahon sa mga tigom, ikaw ba yanong nagahatag sa mga tigulang sa taphawng timbaya? Tinuod, dili sayon ang pagpakigsulti sa usang may pagkabungol o maglisod sa pagpahayag sa iyang kaugalingon. Ug sanglit makadaot man ang nagakaluyang lawas, dili tanang tigulang ang may masadyaong kinaiya. Bisan pa niana, “labi pang maayo ang usa nga mapailobon.” (Ecclesiastes 7:8) Uban ang diyutayng panlimbasog, ang tinuod nga “pagbayloay ug pagdasig” mahimong mosangpot. (Roma 1:12) Sulayi ang pag-asoy sa usa ka kasinatian sa pagsangyaw. Ipakig-ambit ang usa ka puntong imong nabasa sa Bantayanang Torre o Pagmata! O labi pang maayo, patalinghog. (Itandi ang Job 32:7.) Ang mga tigulang dunay daghang ikapaambit kon inyong tugotan sila. Miangkon ang usa ka ansiano: “Ang pagduaw niadtong tigulang nga igsoong lalaki nakahatag kanakog dakong kaayohan.”

19. (a) Ang atong kabalaka sa mga tigulang moabot kang kinsa? (b) Unsa ang pila ka paagi nga kita makatabang sa mga pamilyang nagaatiman sa tigulang nga mga ginikanan?

¹⁹ Dili ba angay nga ang inyong pagkamahunahunaon sa mga tigulang ipaabot usab ngadto sa mga pamilyang nagaatiman kanila? Ang usa ka magtiayon nga nag-atiman sa tigulang nga mga ginikanan mitaho: “Inay sa pagdasig kanamo, ang pila sa kongregasyon nahimong hinawayon. Ang usa ka igsoong babaye miingon: ‘Kon sige mong mopaltag mga tigom, kamo mahimong masakiton sa espirituwal!’ Apan siya dili andam motabang kanamo aron kami makatambong sa mas daghang tigom.” Samang makapaluya mao ang hanap nga mga saad sama sa, Kon ugaling gikinahanglan ninyo ang tabang, pahibaloa lamang ako. Kana sila kadaghanan mosangpot nga labaw rag diyutay sa pag-ingon, “Painiti ug busga ang inyong kaugalingon.” (Santiago 2:16) Pagkalabi pang maayo nga ang inyong pagkamahunahunaon hubaron nga aksiyon! Mitaho ang usa ka magtiayon: “Ang mga higala maoy talagsaon ug mapaluyohon! Ang pipila mag-atiman kang Mama sa duha ka adlaw sa usa ka panahon aron kami makapahulay panagsa. Ang uban magdala kaniya sa mga pagtuon sa Bibliya. Ug makapadasig gayod kanamo kon ang uban mangutana sa iyang kahimtang.”

20, 21. Unsay mahimo sa mga tigulang sa pagtabang niadtong nagaatiman kanila?

²⁰ Sa katibuk-an ang atong mga tigulang giatiman. Bisan pa niana, unsay mahimo sa tigulang mga Saksi mismo aron ang maong buluhaton himoon uban ang kalipay ug dili uban ang paghayhay? (Itandi ang Hebreohanon 13:17.) Kooperar sa kahikayan nga gihimo sa mga ansiano sa pag-atiman kanimo. Ipahayag ang pasalamat ug pagpabili alang sa bisan unsang mga buhat sa kalulot ang ginahimo, ug likayi ang pagkahimong sobra ka pugoso o sobra ka hinawayon. Ug bisan pag ang mga kaul-ol ug mga sakit sa pagkatigulang tinuod gayod, sulayi ang pagpadayag ug mangayaon, positibong tinamdan.​—Proverbio 15:13.

²¹ ‘Talagsaon ang mga igsoon. Ambut kon unsay akong mahimo kon wala pa sila,’ daghang tigulang ang nadunggang miingon. Bisan pa niana, ang pangunang responsabilidad sa pag-atiman sa mga tigulang nahiluna sa ilang mga anak. Unsay nalangkit niini, ug sa unsang paagi ang maong hagit maatubang sa labing maayo?

[Mga footnote]

Nahinumdom Ka Ba?

◻ Unsang mga tagna ang gihimo sa unang siglo alang sa tigulang nga mga babayeng balo?

◻ Sa unsang paagi ang mga magtatan-aw makaorganisar sa pag-atiman sa mga tigulang sa kongregasyon?

◻ Sa unsang paagi ang mga indibiduwal makapasundayag ug interes sa tigulang nga mga igsoong lalaki ug babaye?

◻ Unsay mahimo sa mga tigulang sa pagbulig niadtong nagaatiman kanila?

[Kahon sa panid 11]

Pagtabang sa mga Tigulang—Kon Unsay Ginahimo sa Pipila

Ang usa ka kongregasyon sa Brazil nakakitag sayon nga paagi sa pag-atiman sa pisikal nga mga panginahanglan sa usa ka igsoong lalaki nga nagpuyo sa duol sa ilang Kingdom Hall: Ang grupo sa pagtuon nga giasayn sa paghinlo sa tigomanan naghinlo usab sa iyang balay.

Ang laing kongregasyon didto nakakitag yanong paagi sa pagpaaktibo sa usa ka masakitong igsoon sa Tunghaan sa Teokratikanhong Ministeryo. Sa pag-abot sa iyang turno sa paghatag ug pakigpulong, ang usa ka igsoong lalaki iasayn sa pagdalag duha o tulo ka magmamantala sa pagduaw sa igsoon. Ang hamubong tigom buksan sa pag-ampo, ug ang igsoon mopahayag sa iyang asaynment. Ihatag ang gikinahanglang tambag. Makapadasig gayod kaayo ang maong pagduaw!

Ang nagapanawng mga magtatan-aw naghatag ug maayong panig-ingnan sa pagpanguna. Sa usa ka kongregasyon ang usa ka tigulang igsoong lalaki nga naglingkod na lamang sa wheelchair nahimong masuk-anon ug ingong resulta talagsa rang maduaw. Bisan pa niana, ang usa ka nagapanawng magtatan-aw naghikay sa paghatag sa igsoon ug pribadong salida sa iyang slide nga pakigpulong. Ang tigulang igsoon nakahilak sa iyang nakita. Matud sa magtatan-aw: “Gibati kong gigantihan ug dako sa pagkakitang ang diyutayng pagtagad ug gugma may ingong sangpotanan.”

Ang pila ka ansiano sa Nigeria miduaw ingong magbalantay sa usa ka tigulang nga igsoong lalaki ug nakasusi nga siya masakiton nga grabe. Siya gidala dayon sa ospital. Nakaplagang ang gulang igsoon nagkinahanglag dakong medikal nga pagtambal, apan siya dili makaarang sa pagbayad niana. Sa gipahibalo ang kongregasyon sa iyang panginahanglan, ang mga magtatan-aw nakapatunghag igong salapi sa pag-atiman sa iyang mga galastohan. Duha ka ansiano nagturnoturno sa pagdrayb kaniya ngadto-nganhi sa ospital, bisan pag kadto nagkinahanglan sa ilang pagpalta sa trabaho. Hinuon, sila nalipay nga nakitang naulian ang igsoon sa iyang sakit ug nag-auxiliary payunir hangtod sa iyang pagkamatay upat ka tuig sa ulahi.

Sa Pilipinas ang usa ka tigulang igsoong babaye walay pamilya. Ang kongregasyon mihimog kahikayan sa pag-atiman kaniya sulod sa tulo ka tuig sa pagkasakit. Ilang gitagan-an siyag gamay nga dapit nga kapuy-an, nagdala kaniyag pagkaon sa matag adlaw, ug nag-atiman sa iyang pagpanglimpiyo.

[Hulagway sa panid 10]

Ang tanan may bahin sa pagpasidungog sa atong mga tigulang sa kongregasyon