“Pagbantay Batok sa Tanang Matang sa Hakog nga Pangibog”
“Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.”—LUCAS 12:15.
1, 2. (a) Unsay imong namatikdan nga maikagong gipangagpas sa mga tawo karon? (b) Sa unsang paagi kita mahimong maimpluwensiyahan sa maong mga tinamdan?
ANG salapi, kabtangan, kadungganan, dagkog-suweldong mga trabaho, ug pamilya maoy pipila sa mga butang nga giisip sa kadaghanang tawo ingong sukdanan sa kalamposan o ingong garantiya sa usa ka maayong kaugmaon. Dayag nga sa adunahan ug kabos nga mga nasod, maikagong gipangagpas sa daghang tawo ang materyal nga mga butang aron moasenso ang ilang kinabuhi. Sa laing bahin, ang ilang kaikag sa espirituwal nga mga butang—kon aduna man ugaling— dali rang mawala.
2 Mao gayod kini ang gitagna sa Bibliya. Kini nag-ingon: “Hibaloi kini, nga sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, magmahigugmaon sa salapi, . . . mga mahigugmaon sa kalipayan inay nga mga mahigugmaon sa Diyos, nga nagbaton sa dagway sa diyosnong pagkamahinalaron apan nagpanghimakak sa gahom niini.” (2 Timoteo 3:1-5) Tungod kay ang matuod nga mga Kristohanon nagkinabuhi uban nianang mga tawhana sa adlaw-adlaw, sila kanunayng ginapit-os nga mopahiuyon niining matanga sa panghunahuna ug estilo sa kinabuhi. Unsay makatabang kanato aron masuklan ang paningkamot sa kalibotan sa ‘pagpugos kanato nga mopahiuyon sa mga sukdanan niini’?—Roma 12:2, The New Testament in Modern English, ni J. B. Phillips.
3. Unsang tambag nga gihatag ni Jesus ang atong konsiderahon karon?
3 Ingong “Pangulong Ahente ug Maghihingpit sa atong pagtuo,” si Jesu-Kristo nagtudlo kanato ug hinungdanong mga pagtulon-an maylabot niini. (Hebreohanon 12:2) Usa ka higayon niana, sa dihang si Jesus nagpatin-aw ngadto sa panon sa katawhan sa mga butang maylabot sa matuod nga pagsimba, dihay tawo nga misagbat: “Magtutudlo, sultihi ang akong igsoon nga bahinan niya ako sa panulondon.” Agig tubag, gihatagan ni Jesus ang maong tawo—ug ang tanan nga namati niadtong tungora—ug usa ka bug-at nga tambag. Iyang gipahayag ang usa ka puwersadong pasidaan batok sa hakog nga pangibog ug gipasiugda kini pinaagig makapukaw-sa-hunahuna nga ilustrasyon. Maayong patalinghogan nato ang giingon ni Jesus nianang higayona ug susihon nato kon sa unsang paagi kita makabatog kaayohan sa pagpadapat niana sa atong kaugalingon.—Lucas 12:13-21.
Wala sa Lugar nga Hangyo
4. Nganong wala sa lugar ang pagsagbat sa tawo kang Jesus?
4 Sa wala pa mosagbat ang maong tawo, namulong si Jesus sa iyang mga tinun-an ug sa uban pa nga angay nilang likayan ang pagkasalingkapaw, batonan ang kaisog sa pagsulti nga sila nahiusa sa Anak sa tawo, ug nga ilang madawat ang tabang sa balaang espiritu. (Lucas 12:1-12) Segurado nga kini maoy hinungdanong mga butang nga angayng hatagag pagtagad sa mga tinun-an. Samtang naghisgot siya nianang makapahinuklog nga mga punto, ang tawo misagbat ug mihangyo kang Jesus sa paghusay sa away sa pamilya maylabot sa katigayonan. Hinuon, dunay hinungdanong pagtulon-an nga atong makat-onan gikan niining hitaboa.
5. Unsay gipadayag sa hangyo sa tawo?
5 Ang usa ka basahon nag-ingon nga “ang kinaiya sa usa ka tawo sagad nga maila base sa kon unsay iyang gihunahuna samtang namati siya sa usa ka wali bahin sa Bibliya.” Samtang si Jesus naghisgot bahin sa ugdang nga espirituwal nga mga butang, ang tawo lagmit nga naghunahuna kon unsay iyang buhaton aron makab-ot ang pipila ka materyal nga mga bentaha. Wala hisgoti kon may lig-on ba siyang pasikaranan nga moreklamo bahin sa panulondon. Tingali gusto niyang pahimuslan ang awtoridad ug reputasyon ni Jesus ingong maalamong maghuhukom sa tawhanong mga kalihokan. (Isaias 11:3, 4; Mateo 22:16) Bisan unsa pay hinungdan niana, nadayag diha sa iyang hangyo kon unsay anaa sa iyang kasingkasing—kulang gayod siyag apresasyon sa espirituwal nga mga butang. Tungod niini, dili ba maayong susihon nato ang atong kaugalingon? Pananglitan, panahon sa Kristohanong mga tigom, basin dali rang maglatagaw ang atong hunahuna o kaha maghunahuna kita sa mga butang nga atong pagabuhaton human niana. Busa, angay kitang mamati pag-ayo sa kon unsay ginasulti ug maghunahuna kon sa unsang paagi atong mapadapat ang mga punto nga atong nadunggan aron atong mapauswag ang atong relasyon sa atong langitnong Amahan, si Jehova nga Diyos, ug sa atong mga isigka-Kristohanon.—Salmo 22:22; Marcos 4:24.
6. Nganong wala buhata ni Jesus ang gihangyo sa tawo?
6 Bisan unsa pay motibo sa maong tawo, wala buhata ni Jesus ang iyang gihangyo. Hinunoa, si Jesus miingon kaniya: “Tawo, kinsa ang nagtudlo kanako nga maghuhukom o tigbahin taliwala kaninyo?” (Lucas 12:14) Sa pag-ingon niana, gitumong ni Jesus ang usa ka butang nga nahibaloan pag-ayo sa mga tawo, kay sumala sa Moisesnong Balaod, ang mga maghuhukom sa siyudad gitudlo aron mohusay niana gayong mga kasoha. (Deuteronomio 16:18-20; 21:15-17; Ruth 4:1, 2) Sa laing bahin, adunay mas hinungdanong mga butang nga angayng tagdon ni Jesus—ang pagpamatuod bahin sa kamatuoran sa Gingharian ug pagtudlo sa mga tawo mahitungod sa kabubut-on sa Diyos. (Juan 18:37) Sa pagsundog sa panig-ingnan ni Jesus, dili gayod kita magpalinga sa adlaw-adlawng mga problema, kondili gamiton nato ang atong panahon ug kusog sa pagsangyaw sa maayong balita ug sa “paghimog mga tinun-an sa katawhan sa tanang kanasoran.”—Mateo 24:14; 28:19.
Pagbantay sa Hakog nga Pangibog
7. Unsang maalamong obserbasyon ang gisulti ni Jesus?
7 Kay mabasa man ni Jesus kon unsay anaa sa kasingkasing, nahibalo siya nga adunay mas lawom nga hinungdan kon nganong ang maong tawo mihangyo kang Jesus nga husayon ang ilang problema. Busa, imbes balibaran lamang ni Jesus ang hangyo, gipadayag niya kon unsa gayoy motibo sa maong tawo pinaagi sa pag-ingon: “Bukha kanunay ang inyong mga mata ug pagbantay batok sa tanang matang sa hakog nga pangibog, tungod kay bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.”—Lucas 12:15.
8. Unsa ang hakog nga pangibog, ug unsay mahimong sangpotanan niini?
8 Ang hakog nga pangibog nagpasabot ug labaw pa kay sa pagtinguha lamang nga makabaton ug salapi o pipila ka mga butang, nga mahimong magamit sa hustong paagi ug sa maayong katuyoan. Nagtumong kini sa walay-pagkatagbaw ug hakog nga tinguha nga makabaton ug bahandi o kabtangan. Naglakip usab kini sa tinguha nga maangkon ang mga butang nga iya sa uban, aron makabaton lang niana bisag wala kana kinahanglana, nga dili gani magpakabana kon unsay epekto niini sa uban. Ang tawo nga adunay hakog nga pangibog magsigeg hunahuna sa butang nga iyang gitinguha ug mangagpas pag-ayo niana nga samag iya na kanang diyos. Hinumdomi nga gipakasama ni apostol Pablo ang tawong dalo sa usa ka tigsimbag diyosdiyos, kinsa dili makapanunod sa Gingharian sa Diyos.—Efeso 5:5; Colosas 3:5.
9. Sa unsang mga paagi mapadayag ang hakog nga pangibog? Paghatag ug mga pananglitan.
9 Makaiikag nga si Jesus nagpasidaan nga magbantay kita batok sa “tanang matang sa hakog nga pangibog.” Ang hakog nga pangibog mapadayag sa daghang paagi. Ang ikanapulo nga sugo naghisgot sa pipila niini, nga nag-ingon: “Dili ka magtinguha sa balay sa imong isigkatawo. Dili ka magtinguha sa asawa sa imong isigkatawo, ni sa iyang ulipong lalaki ni sa iyang ulipong babaye ni sa iyang baka ni sa iyang asno ni sa bisan unsa nga iya sa imong isigkatawo.” (Exodo 20:17) Ang Bibliya adunay daghang pananglitan sa mga tawo nga nakahimog grabeng sala tungod sa hakog nga pangibog. Si Satanas mao ang unang nagtinguha sa butang nga dili iya—ang himaya, kadungganan, ug awtoridad nga iya lamang ni Jehova. (Pinadayag 4:11) Gitinguha ni Eva ang katungod nga mohukom kon unsay maayo ug daotan. Tungod kay nalimbongan siya niini nga tinguha, ang tawo nabanlod sa sala ug kamatayon. (Genesis 3:4-7) Ang mga demonyo maoy mga manulonda nga wala makontento sa ‘ilang orihinal nga pagkabutang ug mitalikod sa ilang nahiangayng puloy-anang dapit’ aron buhaton ang butang nga wala itugot kanila. (Judas 6; Genesis 6:2) Tagda usab si Balaam, Acan, Gehazi, ug Judas. Imbes makontento sa ilang kahimtang, ilang gigamit ang ilang katungdanan sa sayop nga paagi tungod sa ilang hakog nga tinguha sa materyal nga mga butang, nga misangpot sa ilang kaalaotan.
10. Sa unsang paagi ‘bukhon nato kanunay ang atong mga mata,’ sumala sa gitambag ni Jesus?
10 Haom gayod nga sa dihang gihatag ni Jesus ang pasidaan batok sa hakog nga pangibog, iya kining gisugdan pinaagi sa pag-ingon “bukha kanunay ang inyong mga mata”! Ngano man? Tungod kay dali ra kaayong makita sa mga tawo nga ang uban dalo o adunay hakog nga pangibog, apan talagsa ra silang moangkon nga sila nagbuhat usab niana. Bisan pa niana, si apostol Pablo nag-ingon nga “ang gugma sa salapi maoy gamot sa tanang matang sa makadaot nga mga butang.” (1 Timoteo 6:9, 10) Gipatin-aw sa tinun-ang si Santiago nga sa dihang ang sayop nga tinguha ‘makapanamkon na, kini manganak ug sala.’ (Santiago 1:15) Nahiuyon sa tambag ni Jesus, angay natong ‘bukhon kanunay ang atong mga mata,’ dili aron mamantay sa uban, kondili aron makita kon unsay gitinguha sa atong kasingkasing. Sa ingon ‘makabantay kita batok sa tanang matang sa hakog nga pangibog.’
Usa ka Dagaya nga Kinabuhi
11, 12. (a) Unsay gipasidaan ni Jesus batok sa hakog nga pangibog? (b) Nganong angay natong patalinghogan ang pasidaan ni Jesus?
11 Duna pay laing katarongan kon nganong angay kitang magbantay batok sa hakog nga pangibog. Matikdi kon unsay sunod nga gisulti ni Jesus: “Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” (Lucas 12:15) Angay gayod nato kining palandongon kay sa atong panahon ang mga tawo mahigugmaon sa salapi ug daghan ang nagtuo nga kon sapian ka, ikaw malipayon. Pinaagi nianang mga pulonga, gipasiugda ni Jesus nga ang makahuloganon ug malipayon nga kinabuhi wala magdepende sa materyal nga mga butang, bisan unsa pa kini ka daghan.
12 Apan, dili tingali mouyon niana ang uban. Basin mangatarongan sila nga kon duna kay materyal nga mga butang, mas haruhay ang imong kinabuhi ug mas malipayon ka. Busa, naghago sila pag-ayo aron ilang mapalit ang tanan nilang gusto. Nagtuo sila nga mao kanay makahatag ug maayong kinabuhi. Apan, kana nga panghunahuna nagpakita nga wala nila masabti ang punto nga gipasiugda ni Jesus.
13. Unsa ang timbang nga panglantaw bahin sa kinabuhi ug materyal nga mga butang?
13 Imbes hisgotan kon husto o sayop ba ang pagbaton ug daghang materyal nga mga butang, gipasiugda ni Jesus nga ang kinabuhi sa tawo wala magagikan “sa mga butang nga iyang gipanag-iya,” o sa mga butang nga iya nang nabatonan. Bahin niini, kita nahibalo nga dili kaayo daghan ang gikinahanglan aron kita mabuhi. Kita nagkinahanglan lamang ug igong pagkaon, besti, ug puy-anan. Ang mga dato dagaya niining mga butanga, apan ang mga pobre basin mangamas pa aron mabatonan ang ilang gikinahanglan. Apan inigkamatay nila, wala ray kalainan ang dato ug pobre, kay ang tanan mahanaw ra. (Ecclesiastes 9:5, 6) Busa, ang mga butang nga nabatonan sa usa dili gayod makapahimo sa iyang kinabuhi nga makahuloganon ug mapuslanon. Mas masabtan nato kini sa dihang atong susihon kon unsa nga kinabuhi ang gihisgotan ni Jesus.
14. Unsay atong makat-onan gikan sa pulong alang sa “kinabuhi” nga gigamit diha sa Ebanghelyo ni Lucas?
14 Sa dihang si Jesus miingon nga ‘ang kinabuhi wala magagikan sa mga butang nga gipanag-iya,’ ang pulong nga gigamit alang sa “kinabuhi” diha sa Ebanghelyo ni Lucas (zo·eʹ sa Grego) wala magtumong sa paagi o estilo sa pagkinabuhi, kondili sa kinabuhi mismo.a Ang gipasabot ni Jesus mao nga dato man kita o pobre, nagkinabuhi mang haruhay o igo rang mabuhi, dili kita makabuot kon unsa ka tas-a nga kita mabuhi ni makaseguro kon buhi pa kita ugma. Si Jesus miingon diha sa iyang Wali sa Bukid: “Kinsa ba kaninyoy makadugang ug usa ka maniko sa gitas-on sa iyang kinabuhi pinaagi sa pagkabalaka?” (Mateo 6:27) Ang Bibliya tin-awng nagpakita nga si Jehova lamang “ang tuboran sa kinabuhi,” ug siya lamang ang makahatag sa iyang matinumanong mga alagad ug “tinuod nga kinabuhi,” o “kinabuhing walay kataposan,” sa langit man o dinhi sa yuta.—Salmo 36:9; 1 Timoteo 6:12, 19.
15. Nganong daghan ang misalig sa materyal nga mga butang?
15 Gipakita ni Jesus nga dali rang matuis ang panglantaw sa mga tawo bahin sa kinabuhi. Dato man o pobre, ang tanang tawo dili hingpit ug usa ray dulnganan. Si Moises nag-ingon: “Ang mga adlaw sa among panuigon maoy kapitoan ka tuig; ug kon tungod sa talagsaong kabaskog kini maoy kawaloan ka tuig, bisan pa niana ang ilang pagpanlimbasog mosangpot lamang sa kasamok ug sa mga butang makapadaot; kay kini molabay sa madali, ug kami mahanaw.” (Salmo 90:10; Job 14:1, 2; 1 Pedro 1:24) Tungod niini, ang mga tawo nga walay maayong relasyon sa Diyos sagad nga mosagop sa panghunahuna nga susama sa gihisgotan ni apostol Pablo sa 1 Corinto 15:32: “Mangaon kita ug manginom, kay ugma kita mangamatay.” Kay nahibalo nga ang kinabuhi lumalabay ug walay-katinoan, ang uban misalig sa materyal nga mga butang. Tingali nagtuo sila nga ang pagbaton ug daghang materyal nga butang makahatag ug tinuod nga kasegurohan. Busa, naghago sila pag-ayo aron makatigom ug mga bahandi kay naghunahuna sila nga pinaagi niini, sila magmalipayon ug makabaton ug kasegurohan.—Salmo 49:6, 11, 12.
Usa ka Seguradong Kaugmaon
16. Ang tinuod nga bili sa kinabuhi wala magdepende sa unsa?
16 Tinuod tingali nga kon ang usa maayong pagkabutang—dunay abundang pagkaon, besti, maayong puy-anan, ug uban pang mga luho— mas haruhay ang iyang kinabuhi o mas motaas pa gani kini kay maatiman man pag-ayo ang iyang panglawas. Apan, tinuod ba nga makahuloganon ug may kasegurohan kanang matanga sa kinabuhi? Ang tinuod nga bili sa kinabuhi wala magdepende sa gitas-on sa kinabuhi sa usa o sa gidaghanon sa mga butang nga iyang gipanag-iya o gipahimuslan. Gihisgotan ni apostol Pablo ang kapeligrohan sa pagsalig nianang mga butanga. Misulat siya kang Timoteo: “Sugoa ang mga dato niini nga sistema sa mga butang nga dili magmapahitas-on sa kaisipan, ug magbutang sa ilang paglaom, dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan.”—1 Timoteo 6:17.
17, 18. (a) Unsang maayong mga panig-ingnan maylabot sa materyal nga mga butang ang takos natong sundogon? (b) Unsang sambingay ni Jesus ang hisgotan sa sunod nga artikulo?
17 Dili maalamon nga mosalig kita sa mga bahandi tungod kay kini ‘walay-kasegurohan.’ Ang patriarkang si Job adunahan kaayo, apan sa dihang kalit nga nahitabo ang katalagman, ang iyang bahandi wala makatabang kaniya; dali ra kining nahanaw. Ang nakatabang kaniya nga makalahutay sa tanang pagsulay ug kasakitan mao ang iyang suod nga relasyon sa Diyos. (Job 1:1, 3, 20-22) Ang materyal nga mga butang ni Abraham wala makapugong kaniya sa pagtuman sa malisod nga sugo ni Jehova. Tungod niini, siya gipanalanginan ug nahimong “amahan sa panon sa mga nasod.” (Genesis 12:1, 4; 17:4-6) Kini ug ang uban pang mga panig-ingnan takos gayod natong sundogon. Bata man kita o tigulang, kinahanglang susihon nato ang atong kaugalingon aron matino kon unsay labing hinungdanon kanato ug kon sa unsa gayod kita nagasalig.—Efeso 5:10; Filipos 1:10.
18 Makahuloganon ug matulon-anon gayod ang pipila ka mga butang nga gihisgotan ni Jesus bahin sa hakog nga pangibog ug sa hustong panglantaw sa kinabuhi. Apan, diha pay laing butang sa hunahuna ni Jesus. Siya nag-asoy ug makapukaw-sa-hunahuna nga sambingay, o ilustrasyon, bahin sa usa ka dili maalamon nga tawong dato. Unsay kalambigitan sa maong ilustrasyon sa atong kinabuhi karon, ug unsay atong makat-onan gikan niini? Tubagon kini sa sunod nga artikulo.
[Footnote]
a Ang laing Gregong pulong nga gihubad ug “kinabuhi” mao ang biʹos. Sumala sa Vine’s Expository Dictionary of Old and New Testament Words, ang biʹos nagtumong sa “gitas-on sa kinabuhi,” “paagi sa pagkinabuhi,” ug sa “mga butang nga makapatunhay sa kinabuhi.”
Unsay Imong Tubag?
• Unsay atong makat-onan sa pagbalibad ni Jesus sa hangyo sa usa ka tawo?
• Nganong angay kitang magbantay batok sa hakog nga pangibog, ug sa unsang paagi mahimo nato kana?
• Nganong ang kinabuhi wala magdepende sa materyal nga mga butang?
• Unsay makapahimo sa kinabuhi nga malipayon ug may kasegurohan?
[Hulagway sa panid 23]
Nganong gibalibaran ni Jesus ang hangyo sa usa ka tawo?
[Hulagway sa panid 23]
Ang hakog nga pangibog mahimong mosangpot sa kadaot
[Mga hulagway sa panid 25]
Sa unsang paagi si Abraham nagpakita ug hustong panglantaw sa materyal nga mga butang?