Mga Batan-on Nangutana . . .

Sa Unsang Paagi Makagamit Akog Mek-ap sa Hustong Paagi?

“GUSTO ka bang magbutang ug diyutayng mek-ap?” Nahibulong si Nina nga nakadungog sa iyang inahan nga misukna nianang pangutanaha. Sa miaging duha ka tuig, siya gidid-an sa pagmek-ap. Apan niining espesyal nga okasyon, sa salosalo sa kasal nga ilang tambongan, medisider ang iyang mama nga panahon na alang kang Nina nga makakat-on sa pangbabaye nga arte sa pagmek-ap. “Ginerbiyos ako ug diyutay,” nahinumdom si Nina. “Dili ko kamao sa pagbutang niini sa hustong paagi. Busa si Mama ang nagbutang nako ug diyutayng lipstik ug blush.”

Tingali mao usay gihunahuna sa imong mga ginikanan nga angay ka na nga magmek-ap.a Kon gamiton nga husto​—ug diyutay​—ang mek-ap makapatahom sa imong panagway. Apan, kon dili husto ang paggamit, baliskad ang epekto niini. “Ang ubang mga babaye magmek-ap ug kini matahom tan-awon,” miingon ang usa ka tin-edyer nga lalaki. “Apan ang ubang mga babaye baga mobutang ug mek-ap, ug mongil-ad na hinoon ang ilang hitsura.”

“Kon sila magbutang ug mek-ap nga hayag ug kolor, ug tinuod gayod nga hayag kaayo,” midugang ang usa ka tin-edyer nga babaye, “gihimo sila niini nga samag mga tigpakatawa sa sirkus!” Sa unsang paagi nga makagamit ka ug mek-ap nga makapatahom​—dili makangil-ad sa​—imong hitsura?

Mga Giya Gikan sa Pulong sa Diyos

Ang mga kosmetika dili na bag-o. Natago diha sa mga kagun-obang Israelinhon nakita ang mga panaksan ug mga paleta nga nagsilbi sa pagkatalagsaon sa modernong katuyoan. Kini “gigamit sa pag-andam ug mga kolor alang sa nawong” sa mga babayeng Israelinhon. Sumala sa The Biblical Archaeologist, sa Pebrero 1955, “ang paggamit sa . . . mga kosmetika kaylap kaayo” bisan sa panahon sa Bibliya.​—Ezekiel 23:40.

Karong adlawa, ang industriya sa kosmetika nagagasto ug hapit duha ka libo ka milyong dolyar sa usa ka tuig diha sa paanunsiyo sa Tinipong Bansa lamang. Migamit sa matahom kaayong mga modelo, ilang ginabaligya ang kinabag-ohang “hitsura,” gikan sa “natural” ngadto sa pagkatalagsaon. Kini nga “hitsura,” matud pa nila, maimo lamang kon ikaw mopalit ug han-ay sa mga produkto sa kosmetika. Hinoon diyutay ra kaayong mga babaye ang milampos nga samag mga modelo nga tan-awon. Ug bisan kon motahom sila, ang bag-ong “panagway” madaan sa dili pa mahurot ang unang tubo sa lipstik.

Ang Bibliya motabang kanimo sa paglikay nga dili makontrolar sa hangin sa urog. Kini nag-ingon: “Hunong na sa pagpahiuyon niining sistema sa mga butang, apan usba hinoon ninyo ang inyong kaugalingon pinaagi sa pagbag-o sa inyong mga salabotan, aron inyong masuta kon unsa ang maayo ug dalawaton ug hingpit nga kabubut-on sa Diyos.” (Roma 12:2) Sa panahon sa Bibliya, ang ubang Kristohanong mga babaye, tingali hilig sa pagsul-ob sa mapasigarbohong mga besti ug kuntodo nga mga estilo sa buhok nga popular balik niadto. Apan si apostol Pablo nagtambag: “Akong gitinguha nga ang mga babaye magmaligdong ug magbinuotan sa ilang kaugalingon pinaagi sa pagpamesti nga maugdang, dili pinaagi sa buhok nga sinalapid, ug sa bulawan o sa mga mutya o sa mahal kaayo nga sapot.”​—1 Timoteo 2:9.

Ang tambag ni Pablo wala magdili sa imong pagpatahom. Kini yanong nagkahulogan nga ang imong panagway kinahanglang “maligdong,” o angay, dili mapasigarbohon; makasaranganon ug mabuot, dili katingalahan o sunod sa uso. Ang Gregong pulong sa “makasaranganon” adunay ideya nga may ‘pagtahod sa opinyon sa uban,’ ug ikaw ilabina kinahanglan motahod sa opinyon sa imong mga ginikanan. Busa atong tan-awon karon kon sa unsang paagi kini nalangkit diha sa pagbutang ug mek-ap.

Sa Dili Pa Magmek-ap

Sanglit ginaingon nga ang mek-ap mopatahom man sa imong panagway, dili makamugnag maskara o pagtakoban, makatarongang ampingan una nimo ang imong natural nga panagway ug ang tibuok nga kahimsog. Ang paghupot ug balanse nga pagkaon ug eksaktong pahulay ug regular nga ehersisyo dako ug mahimo sa pagpadugang sa imong katahom kay sa bisan unsang mek-ap.

Ang tigtambag sa pagpatahom si Jane Parks-McKay dugang nag-awhag sa mga babaye “sa pagsugod sa sinugdan​—sa ato pa, ang regular, epektibong pag-atiman sa panit. . . . Ginapasagdan sa daghang tawo ang ilang panit . . . [ug unya] tabonan ang ilang dili-hamis nga kutis sa mga kosmetika sa paglaom nga kini mopatahom kanila.”

Ang mek-ap mosaler ug maayo sa maayong-pagkaatiman nga panit. Nagpatin-aw ang librong A Lifetime of Beauty: “Ang paghinlo sa panit maoy sama sa pag-andam sa bungbong aron pahiran ug bag-ong pintal: bisag unsa pa ka nindot sa kolor, ang gipintalan ngil-ad tan-awon kon dunay hugaw ug dili-hapsay sa ilalom. Ang dili-maayong pagkahinlong panit ugang tan-awon ug naghimbishimbis.”

Busa gisultihan sa usa ka makeup artist ang Pagmata!: “Sa buntag, mahimong hilam-osan sa babaye ang iyang nawong sa usa ka maayong facial cleanser. Iyang sundan kini sa facial toner ug maayong moisturizer.”

Timbangtimbanga ang Imong mga Panginahanglan

Karon, tan-awag maayo ang imong nawong ug analisaha ang imong maayo ug ang mangil-ad nga bahin sa imong nawong. Aduna ka bay mapadayganong mga mata, hamis nga kutis, o gani, mahimsog, nagkaangay nga kolor sa panit? Nan tingali ikaw nagkinahanglan ug diyutay o walay mek-ap. Sa laing bahin, tingali ang imong panit lanahon kaayo (kasagaran sa mga tin-edyer) ug dali nga tuboan ug dagkong bugas sa nawong. O hayan ikaw may bahin sa nawong (sama sa imong aping) nga buot nimong ipalutaw. Ang makasaranong paggamit ug mek-ap hayan makatabang.

Sa panahon sa Bibliya pahiran sa mga babaye ug itom nga pintal ang ilang mata aron ‘modako ang mga mata’ nga tan-awon. (Jeremias 4:30) Karon, ang eye shadow, lapis sa pagbadlis sa mata, likido nga badlis sa mata gigamit alang sa samang mga epekto. Ang mga foundation cream ug mga losyon mopaangay sa kolor sa panit. Ang blush mopalutaw sa imong aping.

Apan komosta kon nagkinahanglan ka ug tabang sa pagpili o sa pagbutang ug mek-ap? Adunay mga libro nga mabatonan sa publikong mga librarya nga makatabang. Apan tingali gusto usab nimong mangutana sa imong inahan o sa usa ka edarang higala. Ang usa ka tin-edyer nga ginganlag Tina nahinumdom: “Gidala ako ni mama sa pagpamalit ug ang tindera sa mek-ap ang gipapili kon unsa nga kolor ang akong magamit.” Ang mga tigtambag sa pagpatahom sa iladong mga tindahan makatambag kon unsa ang labing maayong kolor nga moangay sa imong panit ug unsaon sa pagbutang ug mek-ap. Apan kay ang ilang trabaho mao man ang pagbaligya kanimo sa mga produkto, pag-amping nga dili ka makapalit ug mga produkto nga dili nimo magamit. Ug tungod sa talagsaong mga panginahanglan sa imong Kristohanong paagi sa kinabuhi, imong tinoon nga dili ka makapalit ug mga kolor nga labing moangay sa pormal nga okasyon sa gabii apan dili angay sa eskuylahan o sa Kristohanong mga buluhaton.

Mga Tip sa Pagmek-ap

Ang mga estilo sa pagmek-ap lainlain gikan sa usa ka dapit ngadto sa lain. Apan ang pipila ka katibuk-ang mga prinsipyo mahimong ikapadayag:

Analisaha ang Matang sa Imong Panit. Sanglit ang kadaghanang mga tin-edyer lanahon man ug panit, maayo tingali nga imong gamiton ang sinagolan-ug-tubig, libre-sa-lana nga mga mek-ap. Kini dili baga busa dili ka tan-awon nga nagmek-ap. Daghan usab ang mibati nga ang lanahon nga mek-ap makasamot sa dagkong mga bugas sa nawong.

Basaha ang mga Etiketa. Itandi ang mga ingrediyente sa barato ug prisyo nga klase sa mahal nga mga klase. Tingali ang deperensiya lamang mao ang prisyo ug ang pagkaputos. Importanteng basahon ang mga etiketa kon ikaw alerdiyik sa mek-ap.

Gamit ug Hayag nga Suga. Kon kulang ang hayag, basin baga ra nga mek-ap ang imong mabutang. Sanglit ang pagbutang ug mek-ap sa kahayag sa plorisen isog tan-awon diha sa kahayag sa adlaw, sulay sa pagmek-ap duol sa bintana aron imong makita ang hitsura diha sa natural nga kahayag.

Pagbutang ug Mek-ap nga Dili Baga. Ang sobra bisan sa maayong butang makadaot. (Itandi ang Proverbio 24:13; 25:27.) Kon ang imong nawong sa kataposan mosinggit ug “mek-ap!” ikaw nagbutang ug daghan o nagbutang ka ug hayag ra nga mga kolor. Ang sobrang mek-ap makapabarato sa imong panagway ug mohatag pa ug dili maayong impresyon sa imong moral nga mga prinsipyo. (Itandi ang Ezekiel 23:36-42.) Busa pabilin sa dili-hayag, dili-sulaw, nga mga kolor. Tun-i pag-ayo ang mga teknik sa pagmek-ap aron ang blush dili tan-awon nga sama ug badlis diha sa imong nawong o ang eye shadow dili mohimo kanimo nga samag raccoon nga tan-awon.

Hinloig Maayo ang Imong Nawong. Nag-ingon ang librong A Lifetime of Beauty: “Ayaw katulog sa gabii nga dili makuha ang tanang lama sa mek-ap . . . Ang pagkaanad sa pagkatulog nga baga ang hugaw, bulingbuling, ug patay nga mga selula sa panit nga nanapot sa imong nawong mohimo sa imong panit nga dili-hapsay ug ugang tan-awon.” Usa ka doktor sa panit miingon pa gani nga “peligro nga maimpeksiyon ka ug manghubag ang nawong kon dili nimo kuhaon ang tanang mek-ap kada gabii una pa matulog.” Gamit ug panghinlo sa mek-ap, sama sa cold cream, sa paghinlo sa imong nawong.

“Ang kaanyag walay kapuslanan,” miingon ang Proverbio 31:30, ug bisan ang maayong pagkabutang nga mek-ap dili makatabon sa negatibong disposisyon o mabawng panghunahuna. Ang Bibliya nagpahinumdom kanato: “Himoa nga ang inyong kaanyag dili anha sa inyong dayag nga panagway . . . Kondili, anha hinoon sa natagong pagkatawo, sa dili madunot nga katahom sa maaghop ug malinawong espiritu, nga maoy bililhon uyamot sa mga mata sa Diyos.”​—1 Pedro 3:3, 4, New International Version.

[Footnote]

[Kahon sa panid 20]

Mga Kapeligrohan sa Mek-ap

Ang tiglaban sa pumapalit nga si Elaine Brumberg mitaho: “Daghang kemikal ug mga substansiya sa kosmetika motuhop sa panit ug makasulod sa lawas.” Ang uban kasagarang gigamit nga mga substansiya gisuspetsohang makakanser.

Ang ubang mga ingrediyente (kasagaran mga pahumot ug mga preserbatibo) nahibaloan nga maoy hinungdan sa alerdiyik mga epekto gikan sa pangatol ngadto sa pag-atsi. Tinuod, ang ubang mga produkto nag-angkon nga dili-makaalerdiyik o “nasulayan batok sa alerdiyik.” Apan kon unsay epekto diha kanimo sa usa ka produkto matino lamang pinaagi sa paggamit ug pinaagi sa maampingong pagtuki sa mga etiketa.

Ang laing kaylap nga kapeligrohan mao ang impeksiyon. Ang maskara mahimong lugar nga sanayan sa mga mikroorganismo nga nabalhin dinha gikan sa tabon-tabon o sa mga tudlo pinaagi sa apliketor sa maskara. Kini mopahinabog mga impeksiyon sa mata kon ang apliketor sa maskara makagaras sa mata. Problema usab ang impeksiyon diha sa tindahan nga adunay mga sampol diin daghang tawo ang nakatuslob sa ilang mga tudlo. Busa ang ubang eksperto nagsugyot nga likayi ang paggamit sa mga sampol sa tindahan diha sa imong nawong.

[Hulagway sa panid 18]

Ang imong inahan makatudlo nimo sa arte sa pagmek-ap