Pagdekorar sa Balay—Usa ka Magantihong Hagit

IKAW misulod sa kasarangang balay sa tagbalay. Sa unang pagtan-aw mapadayag ang usa ka maayong pagkadekorar nga pinuy-anan. Mahinlo ug pulido ang pagkapintal.

Makurat ka kon mahibalo nga ang tanang trabaho gihimo sa mga membro sa pamilya, nga miabaga sa hagit sa pagdekorar sa balay. Apan adunay mga kababagan nianang proyekto nga ikaw ray motrabaho. Busa sa dili ka pa mosugod sa bisan unsang proyekto sa pagdekorar sa balay, tagda ang mosunod.

Pilia Pag-ayo ang Materyales

Ang nagkadaiyang materyales karon nga mabatonan nagtanyag kanimo ug daghang kapilian kon bahin sa estilo sa imong pagpatahom sa imong balay. Unsa bay praktikal sa inyong dapit? Nindot kaha ang dekorasyong wallpaper? O tingali gusto ka ug veneer o panaptong ihaklap sa bungbong? Tingali makahunahuna ka ang simpleng pintal mohatag sa panagway nga gusto nimo. Una pa mohukom sa kataposan, palandonga ang praktikal nga mga bahin. Kini naglakip sa gasto, ang kalig-on sa materyal, ang kasayon sa pag-instalar, ug ang panahon ug kusog nga gikinahanglan sa pag-atiman ug paghinlo sa mga bungbong. Kining tanan kinahanglang ikomparar kon pilay magasto kon propesyonal ang motrabaho.

Ang kolor sa imong napiling materyal nga iadorno importante usab. Kini ba moangay sa ubang mga bahin sa lawak? Kon ang lawak kasagarang bugnaw, ang hayag nga bulok sa pintal mohatag kainit sa lawak. Ang pughawon nga pagkaasul o berde mohimo sa mainit nga bahin sa balay nga mabugnaw. Ang ngiob o kulang sa kahayag nga mga lawak mohayag sa pughawon ug kolor nga pintal.

Planoha ug Andama ang Inyong Trabaho

Ang sekreto sa malamposong pagdekorar mao ang maayong pagpangandam! Namatikdan ba nimo kon unsa ka dugay ang pagpangandam sa propesyonal nga tigdekorar ang ibabaw nga pintalan, kon itandi sa panahon sa aktuwal nga pagpintal? Kon ikaw ang motrabaho niini, ayaw pagdaginot sa panahon ug kusog sa pagpangandam. Ang mga eksperto nagsugyot nga tinguhaa nga ang ibabaw uga, hamis, ug hinlo.

Ayoha ang nadaot nga ibabaw pinaagi sa pagbutang ug masilya sa mga kang-a. Unya kuskusi ang giayo nga ibabaw sa pangliha sa bildo o papel de liha aron mohamis. Sa dili ka pa magsugod sa pagpintal, trapohi ug basa nga trapo ang ibabaw aron makuha ang abog sa palitada sa bungbong, ug paugaha.

Komosta ang imong plano sa pagbuhat? Gihikay ba nimo nga ilakip ang tibuok pamilya? Dili lamang nga ang tanan malangkit kondili ang tanan mobatig garbo sa trabahong matapos, ug kana segurado makapadasig sa maayong pag-atiman. Imbes kay buhata-sa-kaugalingon nga pagdekorar sa balay, himoa kini nga usa ka programang kamo-ray-motrabaho. Dako gayod ang mga ganti.

[Kahon/Mga hulagway sa panid 17]

PAG-ATIMAN SA INYONG MGA BROTSA UG MGA ROLER

1. Balikoa ug hinloa ang mga buhok sa bag-ong brotsa aron makuha ang abog ug matangtang ang nangluag nga mga buhok.

2. Ayaw ituslob ug maayo ang brotsa sa pintal. (Ituslob lamang ang ikatulo o katunga nga bahin sa gitas-on sa mga buhok sa brotsa aron dili mabasa sa pintal ang kaptanan.)

3. Hinloi ang brotsa inigkahuman ug gamit. Gamit ug tiner alang sa oil-based nga pintal ug init nga tubig alang sa latex nga pintal, o sa pintal nga isagol sa tubig.

4. Pusta ang hinlo, ugang brotsa sa limpiyong papel aron mosuhop ang kaumog ug dili madaot ang porma sa mga buhok sa brotsa.

5. Sunda ang samang paagi sa mga roler sa pintal, seguroa nga uga ang metal nga bahin aron dili tay-on ug busa molain ang kolor sa pintal sa sunod higayong gamiton nimo kini.