Unsaon Nato Pagbayad si Jehova?

KON dunay magbatog tiunay, mainitong interes kanato, nga tingali may himoon sa kaayohan nato, unsay atong sanong? Ang kalulot ug kamahinatagon kasagarang mopatunghag reaksiyon, dili ba? Nan, unsa man ang atong mga pagbati sa atong Diyos, si Jehova, tungod sa iyang makanunayong mahigugmaong-kalulot nganhi kanato?

Kay kita nagadali tungod sa mga kalisod sa kinabuhi, sayon kaayo ang pagpakawaybili sa pagkamaayo ni Jehova, nga molihok pa usahay nga maorag kita dili tinuod mapasalamaton. Busa, maayong mohunong kita ug mamalandong sa pangutana sa salmista: “Unsa man ang akong igabayad kang Jehova tungod sa tanan niyang mga kaayohan kanako?” (Salmo 116:12) Sa unsang mga paagi mosanong kita?

Mga Kaayohan Gikan Kang Jehova

Kon wala ang gasa ni Jehova nga iyang Pulong, ang Bibliya, kita mahisalaad gayod! Ang maisogong mga lalaki ug mga babaye sa nangaging kasiglohan nagpameligro sa ilang mga kinabuhi aron sila makabaton ug makabasa ning basahona, ug makasabot kita sa hinungdan. Ang mga tawo sa Diyos mapasalamaton sa tanang panahon tungod sa inspiradong Kasulatan, kay nasayod unsa kini ka mapuslanon “alang sa pagtudlo, sa pagbadlong, sa pagtul-id sa mga butang, sa pagdisiplina sa pagkamatarong.”​—2 Timoteo 3:16.

Hinuon, nasayod kita nga aron mahimong “bug-os masangkapan alang sa tanang maayong buluhaton,” kinahanglan nato ang labaw pa kay sa kahibalo sa ulo sa Bibliya. (2 Timoteo 3:17) Maoy pinaagi sa gahom sa balaang espiritu sa Diyos nga ang kaayohan gipatungha diha sa atong mga kinabuhi, ug kining kamatuorana giawhag sa atong pagtagad pinaagi sa makapadaning mga pulong ni Jehova pinaagi sa iyang manalagna si Isaias: “Ug karon ang Soberano Ginoong Jehova nagpaanhi kanako, bisan ang iyang espiritu. Mao kini ang giingon ni Jehova, ang imong Manunubos, ang Balaan sa Israel: ‘Ako, si Jehova, mao ang imong Diyos, ang Usa nga nagatudlo kanimo sa pagpahimulos, ang Usa nga nagapalakat kanimo sa dalan nga imong pagalaktan. Oh kon unta ikaw mamati lamang sa akong mga sugo! Unya ang imong pakigdait mahisama sa usa ka suba, ug ang imong pagkamatarong maingon sa mga balod sa dagat.’” (Isaias 48:16-18) Pinaagi sa iyang balaang espiritu, duyog sa iyang Pulong, si Jehova nagasugo kanato sa pagpahimulos, ug ang sangpotanan mao ang pakigdait ug pagkamatarong.

Dugang pa, ang aktibong gahom ni Jehova nagalihok nga epektibo sa atong kaayohan kay ang usa ka gambalay natukod na, usa ka yutan-ong organisasyon, nga pinaagi niana nagalihok ang balaang espiritu. Sa 1 Corinto kapitulo 12, gipanig-ingon ni Pablo ang Kristohanong kongregasyon sa usa ka lawas ug nagaingons sa bersikulo 7: “Apan ang pagpadayag sa espiritu gihatag sa matag usa alang sa mapuslanong katuyoan.” Siya nagpadayon sa pagpakita sa unsang paagi kita makapahimuot sa pagkahimong bahin sa yutan-ong organisasyon sa Diyos.

Lima ka tuig o kapin pa human sa iyang pagsulat nianang mga pulonga, gisulat niya ang iyang sulat ngadto sa kongregasyon sa Efeso nga niana gisaysay niya ang mga kaayohan sa pagkalangit nianang yutan-on nga kahikayan. Bisan pag ang iyang gisulti sa sinugdan gipadapat sa dinihogang mga Kristohanon, dili ba kadtong sakop sa “dakong panon” karong adlawa usab ‘napasibo pag-usab alang sa ministeryal nga buluhaton,’ nga nahimong ‘mga tawong bug-os nakatubo’ sa espirituwal nga paagi, nga lig-on sa pagtuo, ‘dili na bata,’ ug ‘pinaagi sa gugma nagatubo sa tanang butang ngadto kaniya nga mao ang ulo, si Kristo’? (Pinadayag 7:9; Efeso 4:12-16) Kitang tanan dunay maayong hinungdan sa pagkamapasalamaton.

Nailhan langkit sa Kristohanong kongregasyon mao ang matinumanon ug maalamong ulipon, kansang buluhaton, ang pagpakaon nato sa espirituwal nga paagi, maoy lain pang ebidensiya nga si Jehova nagahatag kanatog kaayohan. (Mateo 24:45, 46) Karon kita ania na sa gitagna nga panahon sa presensiya sa Agalon. Ang “ulipon” nagabuhat ba sa iyang buluhaton? Bisan pa sa kangiob ning “kataposang mga adlaw,” puno ba kitag paglaom? (2 Timoteo 3:1-5; Roma 5:5; 1 Timoteo 4:10) Oo! Ug ang atong paglaom dili lamang lagmit kondili tino nga kombiksiyon nga gipasukad sa pagtuo, nga sa baylo gipasukad sa lig-on nga ebidensiya.​—Hebreohanon 11:1.

Nan, dayag nga si Jehova, ang atong Dakong Magtatabang, naghatag natog daghan kaayo nga pasalamatan. Ang pangutana makataronganong mosunod:

Unsay Akong Igabayad Kang Jehova?

Nahauna, pagailhon nato nga wala magkinahanglan si Jehova sa bisan unsa gikan kanato. Siya mao ang nagaingon, “Ang salapi ako man, ug ang bulawan ako man,” ug “ang mga hayop ibabaw sa usa ka libong kabukiran.” (Haggeo 2:8; Salmo 50:10; Job 41:11) Kini nagkahulogan nga kita dili gayod “magpalit” ug pabor gikan kang Jehova; bisan pa niana gidasig kita nga mohimog buluntaryong mga halad ngadto kaniya. (Itandi ang 1 Cronicas 29:14.) Hinuon, may pila ka kondisyon sa atong pagkagitugotan nga kita motanyag ug mga gasa kang Jehova.

“Uban sa unsa nga moatubang ako kang Jehova? Uban sa unsa nga moyukbo ako sa Diyos sa kahitas-an? Moatubang ba ako kaniya uban ang tibuok nga mga halad nga sinunog, uban ang mga nating baka nga tagsa ka tuig ang kagulangon? Mahimuot ba si Jehova sa mga linibong laking karnero, uban ang tinagpulo ka libong suba sa lana? Igahatag ko ba ang akong panganay nga anak lalaki tungod sa akong pag-alsa, ang bunga sa akong tiyan tungod sa sala sa akong kalag? Gisulti niya kanamo, Oh tawong yutan-on, kon unsa ang maayo. Ug unsa ba ang gipangayo ni Jehova gikan kanimo kondili ang pagbuhat sa hustisya ug ang paghigugma sa kalulot ug ang paglakaw nga makasaranganon uban sa imong Diyos?”​—Miqueas 6:6-8.

Atong makat-onan gikan niini nga ang mga kinahanglanon ni Jehova kanunay nga makataronganon, kanunay makab-ot. Dugang pa, gipungting ni Jesus ang kinahanglanon nga ang atong relasyon uban kang Jehova ug atong isigkatawo kinahanglang matarong aron madawat ang atong mga halad. (Mateo 5:23, 24) Kay napahimutang na ang matarong nga pasikaranan, kita karon makasabot nga kitang tanan dunay igahatag kang Jehova, ingong pagpabili sa iyang kaayo kanato.

Sa Unsang Paagi Magamit Nato Kon Unsay Atong Nabatonan?

Kinahanglan ang panahon, kahago, ug sa usa ka sukod salapi, apan pagkadakong pribilehiyo ang paghawas kang Jehova diha sa buluhatong pagsangyaw! Kini nga halad sa pagdayeg ikahatag natong tanan kang Jehova. Ania ang pagbati sa usa ka payunir nga ansiano uban sa tulo ka gagmayng anak bahin niana:

“Ang pag-ambit sa pribilehiyo sa bug-os-panahong pag-alagad takos sa bisan unsang personal nga sakripisyo​—ug labaw pa—​kay kini ang labing epektibong paagi sa pagdayeg sa atong langitnong Amahan. Gawas pa, kini makapasarang nako sa usa ka sukod sa pagpasalamat kaniya tungod sa iyang dili-takos nga kalulot nga gipakita kanako sa personal.”

Midugang ang iyang asawa: “Usa ka dakong pribilehiyo ang pagtabang sa akong bana sa pagpayunir. Kini makapasarang sa tibuok pamilya sa pagbatog dakong bahin sa ministeryo, ug ang pagkakita nga ang mahigugmaong kamot ni Jehova nagatagana namo sa espirituwal ug materyal nga paagi makahimo kanamo sa pagtinguha sa pagdayeg kaniya sa labaw pa.”

Ang Watch Tower Society nanagtag sa mga Bibliya ug mga basahon sa Bibliya sa boluntaryong paagi sulod sa kapin sa usa ka gatos ka tuig ug nagpatik kanila sa kaugalingong mga imprentahan niini sukad sa 1920. Ang panahon ug kahago sa mga boluntaryo nga nagatrabaho sa Bethel sa paggama sa tanang basahon nga atong nabatonan karong adlawa, uban sa iya sa mga magmamantala ug mga payunir sa kongregasyon sa pagpang-apod-apod kanila, sa pagkamatuod, nahimong dugang paghatag alang sa hinungdanong buluhaton sa pagsangyaw.​—Mateo 24:14.

Gawas pa, ang mga Kristohanon sa mga nasod nga dato malipay nga mahibalo nga ang ilang malulutong mga gasang kuwarto, nga gipadala sa sangang-buhatan sa Watch Tower Society sa ilang nasod, nakapaarang sa daghan sa ilang mga igsoon sa ubang bahin sa kalibotan sa paggugol sa ilang bug-os nga panahon sa pagwali ug paghimog tinun-an. Ang mga misyonaryo gikan sa Watchtower Bible School of Gilead, mga magtatan-aw sa sirkito ug distrito, ug espesyal nga mga payunir natabangan tanan sa pagpadayon sa ilang bug-os-panahong pag-alagad sa maong boluntaryong mga amot.

Tingali imposible kanimo ang pag-alagad sa Bethel o ingong membro sa Programa sa Internasyonal nga Boluntaryong Magbubuhat sa Konstruksiyon. Apan tingali may salapi ka nga makasuportar niadtong nagahimo niining buluhatona apan kinsa nakulangan ug “pakapin” nga salapi sa pagpadayon nila niana. Ang makatabang nga pag-angay-angay sa ingon mahitabo, sumala sa gibatbat sa 2 Corinto 8:14. Ang mga sulat nga nagauban sa maong mga donasyon nag-apil sa mosunod gikan sa usa ka tigulang nga igsoong babaye nga misulat:

“Ako mapasalamaton kaayo sa tanang panalangin nga ginahatag ni Jehova kanako, ug ako nagaampo kanunay alang sa mga proyekto sa pagpanukod ug sa organisasyon.”

Ang laing igsoong baabaye miingon: “Palabihon kong kining gamayng kantidad may mahimong maayo sa teokratikanhong paagi kay sa magpabilin sa bangko nga duol nang mahugno!”

Ang usa ka igsoong lalaki nagpahayag sa iyang kaugalingon niining mga pulonga: “Ang pagtambag ni Jehova kanato sa paggamit sa atong mga katigayonan sa paghimaya kaniya maoy usa ka paagi sa dakong panalipod gikan sa hakog nga komersiyo, ang ‘ikatulong bahin’ sa daotang sistema sa mga butang ni Satanas. Mahimo bang pahimuslan ko kining kahigayona sa pag-ingon unsa nako ka malipayon nga may ikaamot sa pagpadali sa pag-uswag nga ginahatag ni Jehova, ug ako nagapasalamat kaniya sa paghimo nga posible nga ako gamiton.”

Mga Gasa Gikan sa Tigulang ug Bata

Makapadasig ang pagbasa sa matinuohong determinasyon sa mga tigulang si kinsa, bisag nagalaom nga makalabang-buhi sa kataposan niining sistemaha, pinaagi sa paggamag nahiangayng Testamento, nagatino nga makapahimulos ang buluhaton sa Gingharian enkasog mamatay sila. Ang pila ka ekspresyong nadawat gikan sa mga tigpatuman o executors, nga nagkomento bahin sa maayong tinamdan sa maong mga tagbilin, nagaapil:

“Maluluton kaayong tawo sa tanan, sa tibuok niyang kinabuhi . . . siya nahigugma kang Jehova ug sa iyang kalalangan.”

“Sa kanunay, ang intereses sa Gingharian mao ang una niyang gihunahuna.”

“Nakab-ot niya ang iyang langitnong ganti tapos sa 70 ka tuig nga matinumanong pag-alagad . . . sa kanunay buot niyang pauswagon ang kamatuoran pinaagi sa iyang katigayonan.”

Nalipay usab kami nga makadungog gikan sa mga batan-on, nga determinadong mogamit sa ilang materyal nga mga butang alang sa buluhaton ni Jehova. Ang usa ka sulat nga nadawat sa opisina sa Sosyedad sa Britanya naggikan sa usa ka magmamantala nga nagtungha pa. Miasoy siya nga nakadaog siya sa unang ganti sa usa ka bangga sa essay. Gisukip niya ang tibuok nga ganting kuwarta. Ang mga basahon sa Sosyedad mao ang bugtong tinubdan sa materyal alang sa iyang sinulat bahin sa “Kristohanong Pakigsaad,” busa gibati niya nga ang kuwarta sa tukma iya kang Jehova.

Tapos sa pagpangutana kon unsay iyang ibayad kang Jehova, ang magsusulat sa Salmo 116 nagpadayon sa bersikulo 13 ug 14 nga nagaingon: “Ang kopa sa dakong kaluwasan akong kuptan, ug sa ngalan ni Jehova ako magatawag. Ang akong mga panaad akong bayran kang Jehova, oo, sa atubangan sa tanan niyang katawhan.” Kay nagapabili sa bililhong gasa sa kaluwasan gikan kang Jehova pinaagi sa iyang Anak, gibati namong natandog, sama sa salmista, sa pagtawag Kaniya ug pagtuman sa atong mga saad Kaniya.

Daghan kaayo ang nahatag ni Jehova nga kaayohan kanato, ug bisan unsay atong mahimo ingong balos daw gamay kon itandi. Nan, pagkatukma nga isip kapahayagan sa pasalamat, buhaton nato ang tanang atong maarangan, sa tanang paagi! “Kanimo akong ihatag ang halad sa pagpasalamat, ug sa ngalan ni Jehova ako magatawag.”​—Salmo 116:17.

[Kahon sa panid 26]

SA UNSANG PAAGI ANG UBAN NAGAAMOT ALANG SA BULUHATON SA GINGHARIAN

◻ MGA GASA: Ang boluntaryong mga donasyong kuwarta mahimong laktud ipadala sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, o ngadto sa lokal nga sangang buhatan sa Sosyedad. Ang propiedad sama sa yuta ug balay, ingon man alahas o ubang mahal nga butang, ikadonar usab. Ang mubong sulat nga nagpahayag nga kana laktud nga donasyon angay magauban sa maong mga amot.

◻ KAHIKAYAN SA KONDISYONAL NGA DONASYON: Ang kuwarta ikahatag ngadto sa Watch Tower Society nga huptang gisalig, uban sa probisyon nga enkasog kinahanglanon sa persona, kini ibalik sa nagdonar.

◻ INSURANCE: Ang Watch Tower Society manganlang benepisyaryo sa usa ka polisa sa seguro o insurance o sa pagretiro-pensiyon nga plano. Ang Sosyedad angay pahibaloon sa maong mga kahikayan.

◻ TRUSTS: Ang mga tinigom sa bangko ikabutang nga in trust for sa Sosyedad. Ang stocks, bonds, ug propiedad ikadonar usab ubos sa usa ka kahikayan nga mapahimuslan sa nagdonar sa panahon sa iyang pagkinabuhi. Kining paagiha magwagtang sa gastos ug pagkadili-piho sa pag-establisar sa kamatuoran sa testamento, samtang nagaseguro nga ang Sosyedad magadawat sa pagkamatay.

◻ MGA TESTAMENTO: Ang propiedad o kuwarta ikabilin sa Watch Tower Society pinaagi sa gihimo sa legal nga testamento. Ang usa ka kopya angay ipadala sa Sosyedad.

Alang sa dugang impormasyon ug tambag bahin niining mga butanga, pagsulat sa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, o ngadto sa lokal nga sangang buhatan sa Sosyeda.