“Adtoa Ninyo ang mga Tawo . . . ug Tudloi Sila Aron Mahimong Akong mga Tinun-an”

1-6. Pag-asoy ug kasinatian sa mga Saksi nga nagsangyaw sa lainlaing kahimtang.

SI Rebecca, usa ka batan-ong Saksi ni Jehova sa Ghana, nag-isip sa iyang eskuwelahan ingong iyang teritoryong sangyawanan. Kanunay siyang magdalag mga publikasyon. Panahon sa reses, mangita siyag higayon nga makasangyaw sa isigkaestudyante ug nakasugod siyag Bible study sa pipila niya ka klasmet.

² Sa isla sa Madagascar, duol sa sidlakang baybayon sa Africa, duha ka payunir ang kanunayng magbaktas ug mga 25 kilometros, bisag init kaayo, aron maabot ang usa ka hilit nga baryo. Daghan silag gidumalahan ug pagtuon sa Bibliya.

³ Aron makaduaw sa mga molupyo daplin sa mga suba sa Paraguay ug Paraná, ang mga Saksi sa Paraguay ug mga boluntaryo gikan sa 15 ka ubang nasod naghimog 45 ka toneladang lantsa nga kapuy-ag 12 ka tawo. Pinaagi niini nga lantsa, gipakaylap sa kugihang mga igsoon ang maayong balita ngadto sa mga dapit nga lisod adtoan.

⁴ Sa Alaska, gipahimuslan sa mga Saksi ang talagsaong higayon sa pagsangyaw sa mga turista panahon sa ting-init. Inigdunggo sa mga barko nga punog turista nga lainlaig nasyonalidad, ang lokal nga mga Saksi magpahiluna na sa pantalan nga nagdispley ug mga publikasyon sa lainlaing pinulongan. Niana pong lugara, ang eroplano hinungdanon kaayo aron maabot ang lagyong mga baryo. Pinaagi niana, nasangyaw ang maayong balita ngadto sa katawhan nga nagsultig Aleut, Athabascan, Tsimshian, ug Tlingit nga mga pinulongan.

⁵ Si Larry nga taga-Texas, U.S.A., may espesyal nga teritoryo—ang nursing home nga iyang gipuy-an. Bisag nag-wheelchair tungod sa aksidente, si Larry busy kanunay. Iyang gisangyaw ang mensahe sa Gingharian ngadto sa uban, lakip ang paglaom nga gitudlo sa Bibliya nga sa umaabot makalakaw siya pag-usab ubos sa pagmando sa Gingharian.—Isa. 35:5, 6.

⁶ Sa amihanang Myanmar, usa ka grupo sa mga Saksi mibiyaheg tulo ka adlaw sakay sa barko gikan sa Mandalay aron motambong ug asembliya. Kay gustong makasangyaw sa maayong balita, nagdala silag mga publikasyon ug ila ning gitanyag sa kaubang mga pasahero. Inigdunggo sa barko sa usa ka lungsod o baryo, manaog ang kugihang mga igsoon ug molibot kadiyot nianang dapita nga magtanyag ug publikasyon. Sa laing bahin, ang bag-ong mga pasahero mosakay sa barko ug sila mahimong “bag-ong teritoryo” alang sa mga igsoon nga mibalik ug sakay sa barko.

7. Unsang mga paagi ang gigamit sa mga Saksi ni Jehova sa pagpamatuod bahin sa Gingharian sa Diyos, ug unsay ilang tumong?

⁷ Sama sa mga igsoon nga gihisgotan, ang kugihang mga alagad ni Jehova sa tibuok kalibotan ‘bug-os nga nagpamatuod bahin sa Gingharian sa Diyos.’ (Buh. 28:23) Sila manangyaw sa balaybalay, sa kadalanan, ug pinaagig sulat ug telepono. Bisag magsakayg bus, manuroy sa parke, o mopahulay kadiyot sa trabaho, mangita silag higayon sa pagpamatuod bahin sa Gingharian sa Diyos. Magkalahi tingali ang mga paagi apan pareho ang tumong—ang pagsangyaw sa maayong balita bisan asa nga dunay tawo.—Mat. 10:11.

8, 9. (a) Nganong usa gyod ka milagro ang pag-uswag sa buluhatong pagsangyaw sa Gingharian? (b) Unsang makapainteres nga pangutana ang motungha, ug unsay angay natong buhaton aron matubag kana?

⁸ Ikaw ba, minahal nga magbabasa, apil sa panon sa mga magmamantala sa Gingharian nga aktibo karon diha sa kapig 235 ka nasod? Kon mao, may bahin ka sa makapalipay nga pag-uswag sa buluhatong pagsangyaw sa Gingharian! Ang ginahimo sa katawhan ni Jehova sa tibuok kalibotan usa gyod ka milagro! Bisan pa sa lisod nga mga babag—mga pagdili sa gobyerno ug direktang paglutos—ang mga Saksi ni Jehova bug-os nga nagpamatuod bahin sa Gingharian sa Diyos ngadto sa katawhan sa tanang kanasoran.

⁹ Ang makapainteres nga pangutana mao, Nganong walay nakababag sa pag-uswag sa buluhatong pagsangyaw bisag kini gisupak ni Satanas? Aron matubag na, angay tang mobalik sa unang siglo C.E. Sa pagkatinuod, gipadayon lang sa mga Saksi ni Jehova ang buluhaton nga gisugdan niadtong panahona.

10. Sa unsang buluhaton gigamit ni Jesus ang iyang kinabuhi, ug unsay iyang nahibaloan bahin niini nga buluhaton?

¹⁰ Si Jesu-Kristo, ang Magtutukod sa Kristohanong kongregasyon, naggamit sa iyang kinabuhi sa pagsangyaw sa maayong balita sa Gingharian sa Diyos. Kas-a siya miingon: “Kinahanglan sab nakong isangyaw ang maayong balita sa Gingharian sa Diyos ngadto sa ubang siyudad, kay ako gipadala alang niini.” (Luc. 4:43) Nahibalo si Jesus nga iyang gisugdan ang usa ka buluhaton nga dili niya matapos nga siya lang. Sa wala pa siya mamatay, iyang gitagna nga ang mensahe sa Gingharian isangyaw “sa tanang kanasoran.” (Mar. 13:10) Apan, sa unsang paagi kini natuman, ug pinaagi ni kinsa?

11. Unsang hinungdanong buluhaton ang gisugo ni Jesus sa iyang mga tinun-an, ug unsay makatabang nila sa pagtuman niini?

¹¹ Human sa iyang pagkamatay ug pagkabanhaw, si Jesus mipakita sa iyang mga tinun-an ug nagsugo kanila niining hinungdanong buluhaton: “Busa adtoa ninyo ang mga tawo sa tanang kanasoran ug tudloi sila aron mahimong akong mga tinun-an. Bawtismohi sila sa ngalan sa Amahan ug sa Anak ug sa balaang espiritu. Tudloi ninyo sila sa pagtuman sa tanan nakong gisugo kaninyo. Ug hinumdomi nga ako magauban kaninyo sa tanang adlaw hangtod sa hinapos sa sistema sa mga butang.” (Mat. 28:19, 20) Ang mga pulong “ako magauban kaninyo” nagpaila nga siya magpaluyo sa mga tinun-an diha sa buluhatong pagsangyaw ug paghimog tinun-an. Gikinahanglan nila ang maong pagpaluyo, kay si Jesus nagtagna nga sila ‘dumtan sa tanang kanasoran.’ (Mat. 24:9) Makadahom ang mga tinun-an nga naa pay laing makatabang nila. Sa hapit nang mosaka si Jesus sa langit, iyang giingnan sila nga sa tabang sa balaang espiritu sila mahimong iyang mga saksi “hangtod sa kinalay-ang bahin sa yuta.”—Buh. 1:8.

12. Unsang hinungdanong mga pangutana ang motungha, ug nganong importante gyod nga atong masayran ang mga tubag?

¹² Motungha karon ang pipila ka hinungdanong mga pangutana: Giisip bang seryoso sa mga apostoles ug sa ubang mga tinun-an sa unang siglo ang buluhatong gisugo kanila? Ang maong gamayng grupo sa mga Kristohanon bug-os bang nagpamatuod bahin sa Gingharian sa Diyos bisan pa sa grabeng paglutos? Tinuod ba nga sila gipaluyohan sa Diyos ug sa balaang espiritu ni Jehova sa ilang paghimog mga tinun-an? Kini ug ang susamang mga pangutana gitubag sa Bibliya diha sa basahon sa Mga Buhat. Importante gyod nga atong masayran ang mga tubag. Ngano? Misaad si Jesus nga ang buluhaton nga iyang gisugo magpadayon “hangtod sa hinapos sa sistema sa mga butang.” Busa ang tanang tinuod nga mga Kristohanon, apil kitang buhi karon, kinahanglang mosunod sa sugo ni Jesus. Tungod niini, interesado kaayo ta sa kasaysayan nga nasulat sa Mga Buhat.

13, 14. (a) Kinsay nagsulat sa basahon sa Mga Buhat, ug sa unsang paagi nakakuhag impormasyon ang nagsulat? (b) Unsay gihisgotan sa Mga Buhat?

¹³ Kinsay nagsulat sa Mga Buhat? Wala nganli sa basahon kon kinsay nagsulat niini, apan klarong makita sa unang mga pulong nga usa ra ang nagsulat sa Mga Buhat ug sa Ebanghelyo ni Lucas. (Luc. 1:1-4; Buh. 1:1, 2) Busa sukad sa karaang panahon, ang “minahal nga doktor” ug maayong historyano nga si Lucas mao ang gituohan nga nagsulat sa Mga Buhat. (Col. 4:14) Mga 28 ka tuig ang yugto nga gikobrehan niining basahona, sukad sa pagsaka ni Jesus sa langit sa 33 C.E. hangtod sa pagkabilanggo ni apostol Pablo sa Roma sa mga 61 C.E. Ang pagpuli ni Lucas ug “namo” sa pulong “sila” diha sa iyang asoy nagpasabot nga siya presente sa mga panghitabo nga iyang gisulat. (Buh. 16:8-10; 20:5; 27:1) Ingong maayong researcher, si Lucas lagmit nakakuhag direktang impormasyon gikan ni Pablo, Bernabe, Felipe, ug uban pa nga gihisgotan sa basahon.

¹⁴ Unsay gihisgotan sa basahon sa Mga Buhat? Una pa niining basahona, gisulat ni Lucas diha sa iyang Ebanghelyo ang mga gisulti ug gibuhat ni Jesus. Apan sa Mga Buhat, gisulat ni Lucas ang mga gisulti ug gibuhat sa mga sumusunod ni Jesus. Busa ang gihisgotan niining basahona maoy mga tawo nga nakahimog talagsaong buluhaton, bisag ang kadaghanan nila giisip sa mga dili Kristohanon ingong “ordinaryong mga tawo ug dili edukado.” (Buh. 4:13) Kini nga basahon nga gisulat sa paggiya sa Diyos, nag-asoy bahin sa pagkatukod ug pag-uswag sa Kristohanong kongregasyon. Ang Mga Buhat nagpakita kon unsay pamaagi ug panglantaw sa mga Kristohanon sa unang siglo bahin sa pagsangyaw. (Buh. 4:31; 5:42) Gihisgotan niini kon sa unsang paagi ang balaang espiritu nagtabang nila sa pagpakaylap sa maayong balita. (Buh. 8:29, 39, 40; 13:1-3; 16:6; 18:24, 25) Kining basahona nagpasiugda sa tema sa Bibliya, ang pagbalaan sa ngalan sa Diyos pinaagi sa iyang Gingharian ubos sa pagmando sa Kristo, ug naghisgot sa malamposong pagpakaylap sa mensahe sa Gingharian bisan pa sa grabeng pagsupak.—Buh. 8:12; 19:8; 28:30, 31.

15. Sa unsang mga paagi makabaton tag kaayohan sa pagtuon sa basahon sa Mga Buhat?

¹⁵ Makapalipay ug makapalig-on gyod sa pagtuo ang pagtuon sa basahon sa Mga Buhat! Kon mamalandong ta sa kaisog ug kadasig sa unang mga sumusunod sa Kristo, matandog gyod ang atong kasingkasing. Madasig ta nga sundogon ang pagtuo sa atong mga igsoon sa unang siglo. Makatabang ni nato nga matuman ang sugo nga ‘adtoon ang mga tawo ug tudloan sila aron mahimong mga tinun-an.’ Kini nga publikasyon gidisenyo sa pagtabang nimo nga matun-an pag-ayo ang basahon sa Mga Buhat.

16. Unsa ang tulo ka tumong niini nga publikasyon?

¹⁶ Unsay katibuk-ang katuyoan niining basahona? Ang tulo ka tumong niini mao ang (1) pagpalig-on sa atong pagtuo nga si Jehova nagpaluyo sa pagsangyaw ug paghimog mga tinun-an pinaagi sa iyang balaang espiritu, (2) pagdasig nato nga magmakugihon sa ministeryo pinaagi sa pagtuon sa ehemplo sa mga sumusunod sa Kristo sa unang siglo, ug (3) pagpalalom sa atong pagtahod sa organisasyon ni Jehova ug sa mga nagapanguna sa buluhatong pagsangyaw ug niadtong nagdumala sa kongregasyon.

17, 18. Giunsa pagpresentar ang impormasyon niini nga publikasyon, ug unsang mga bahin niini ang makatabang sa personal nga pagtuon sa Bibliya?

¹⁷ Giunsa pagpresentar ang impormasyon niini nga publikasyon? Mamatikdan nimo nga gibahin ni sa walo ka seksiyon, ug kada seksiyon naghisgot ug usa ka bahin sa basahon sa Mga Buhat. Ang tumong sa mosunod nga mga kapitulo dili ang bersikulo por bersikulo nga paghisgot sa basahon sa Mga Buhat, kondili ang pagkuhag mga leksiyon gikan sa giasoy nga mga hitabo ug kon unsaon pagpadapat sa atong mga nakat-onan. Sa sinugdanan sa matag kapitulo, gipasiugda ang pangunang punto ug gipakita ang teksto nga magpaila kon unsang bahina sa basahon sa Mga Buhat ang hisgotan.

¹⁸ Adunay ubang bahin niini nga makatabang sa personal nga pagtuon sa Bibliya. Ang nindot nga mga hulagway nga nagpakita sa eksayting nga mga hitabo sa basahon sa Mga Buhat makatabang nimo sa pag-imagine niana samtang imo kanang pamalandongon. Daghang kapitulo ang may mga kahon nga mohatag ug dugang impormasyon. Ang pipila niana naghisgot ug usa ka karakter sa Bibliya nga ang pagtuo angay natong sundogon. Ang ubang kahon naghisgot ug dugang detalye bahin sa mga lugar, panghitabo, kostumbre, o ubang tawo nga gihisgotan sa basahon sa Mga Buhat.

19. Unsang pagsusi sa kaugalingon ang angay natong himoon matag karon ug unya?

¹⁹ Kini nga publikasyon makatabang nimo sa pagsusi sa kaugalingon. Bisag unsa ka dugay na kang nag-alagad ingong magmamantala sa Gingharian, maayong mamalandong sa matag karon ug unya aron susihon ang imong mga prayoridad ug panglantaw sa Kristohanong ministeryo. (2 Cor. 13:5) Pangutan-a ang imong kaugalingon: ‘Giisip ba nakong dinalian ang akong ministeryo? (1 Cor. 7:29-31) Sinsero ug madasigon ba kong nagsangyaw sa maayong balita? (1 Tes. 1:5, 6) Bug-os ba kong nakigbahin sa pagsangyaw ug paghimog mga tinun-an?’—Col. 3:23.

20, 21. Nganong hinungdanon ug dinalian ang buluhatong gisugo kanato, ug unsay angay natong determinasyon?

²⁰ Hinumdoman nato kanunay nga gisugo ta sa paghimog hinungdanong buluhaton—ang pagsangyaw ug paghimog mga tinun-an. Paglabay sa matag adlaw, kanang sugoa mahimong mas hinungdanon ug dinalian. Paspas nga nagsingabot ang kataposan niining sistema sa mga butang. Mas nameligro ang daghan kaayong kinabuhi karon kay sukad masukad. Wala ta mahibalo kon pila pa ka tawo nga nakiling sa pagdawat sa kamatuoran ang modawat sa atong mensahe. (Buh. 13:48) Apan responsibilidad nato nga tabangan sila sa dili pa ulahi ang tanan.—1 Tim. 4:16.

²¹ Busa importante nga sundogon nato ang ehemplo sa madasigong mga magsasangyaw sa unang siglo. Hinaot ang imong makugihong pagtuon niini nga publikasyon magdasig nimo sa pagsangyaw nga mas makugihon ug maisogon. Ug hinaot nga mahimo kang mas determinado sa pagpadayon sa “bug-os nga pagpamatuod bahin sa Gingharian sa Diyos.”—Buh. 28:23.