Pagbuhat sa Atong Labing Maarangan sa Pagmantala sa Maayong Balita
“Buhata ang imong labing maarangan sa pagpakita sa imong kaugalingon nga giuyonan sa Diyos, usa ka magbubuhat nga walay igakaulaw.”—2 TIMOTEO 2:15.
“SA MIAGING pila ka tuig, daghan kanato ang naghunahunang kadto lamang may espesyal nga mga sirkumstansiya ang makapayunir,” misulat ang usa ka payunir, o bug-os-panahong ministro, sa Hapon. “Morag kita nasayop. Atong nasayrang kadto lamang may espesyal nga mga sirkumstansiya ang dili makapayunir.”
1, 2. Unsang pag-uswag sa ranggo sa bug-os-panahong mga ministro ang imong napanid-an? Unsay nakatabang niana?
2 Kanang positibong panglantaw misangpot sa usa sa labing katingalahang mga pag-uswag sa ranggo sa bug-os-panahong mga ministro sa mga Saksi ni Jehova sa katuigang dili pa dugay. Karong adlawa sa Hapon, duha sa matag lima ka magmamantala sa Gingharian nagahimo sa usa ka matang sa bug-os-panahong ministeryo. Apan kining masibotong espiritu dili lamang iya sa Hapon. Sa miaging tuig sa pag-alagad, ang gidaghanon sa mga magmamantala sa tibuok kalibotan miuswag ug 5 porsiento, samtang ang gidaghanon sa bug-os-panahong mga ministro miuswag ug 22 porsiento. Tin-aw, ang katawhan ni Jehova nagbutang sa kasingkasing sa mga pulong ni apostol Pablo: “Buhata ang imong labing maarangan sa pagpakita sa imong kaugalingon nga giuyonan sa Diyos, usa ka magbubuhat nga walay igakaulaw.” (2 Timoteo 2:15) Matuod ba kini kanimo?
“Kini ang Kahulogan sa Paghigugma sa Diyos”
3 Kon pangutan-on ang mga payunir nganong sila misulod sa bug-os-panahong ministeryo, sa walay sipyat ang ilang tubag mao nga tungod sa ilang paghigugma kang Jehova nga Diyos. (Mateo 22:37, 38) Kini, siyempre, mao ang angay, kay kon wala ang gugma ingong tukmang motibo, ang bisan unsang paningkamot makawang. (1 Corinto 13:1-3) Tinuod nga dalayegon nga daghan kaayo sa atong isigka-Kristohanon—sa pagkamatuod, ang aberids nga kapin sa 7 ka magmamantala sa matag kongregasyon sa tibuok kalibotan—ang naghatag luna sa ilang mga kinabuhi sa pagpasundayag sa ilang paghigugma sa Diyos niining paagiha.
4. Nganong kita nahigugma sa Diyos? (Roma 5:8)
4 Hinuon, kitang tanan nga nagpahinungod sa atong mga kinabuhi kang Jehova nagbuhat niana tungod kay ato siyang gihigugma. Dihang atong nasayran ang gugma nga nabatonan ni Jehova ug sa iyang Anak, si Jesu-Kristo alang kanato, ug ang kahibulongang mga panalangin nga ipatungha sa iyang Gingharian, ang atong mga kasingkasing natandog sa pagbalos pinaagi sa paghigugma kaniya. Kini ang pagpahayag niini ni apostol Juan: “Kita nahigugma, tungod kay siya unang nahigugma kanato.” (1 Juan 4:19) Kinaiyanhon kitang mosanong nianang paagiha tungod kay kana ang atong pagkagama. Apan ang mao bang mainitong pagbati sa atong mga kasingkasing mao lamay nalangkit sa paghigugma sa Diyos?
5. Unsay nalangkit sa paghigugma sa Diyos? (1 Juan 2:5)
5 Dili, ang paghigugma sa Diyos nagkahulogan ug labaw pa. Si apostol Juan nagasulti kanato: “Kini ang kahulogan sa paghigugma sa Diyos, nga atong pagabantayan ang iyang mga sugo; ug ang iyang mga sugo dili mabug-at.” (1 Juan 5:3) Oo, ang matuod nga gugma, sama sa matuod nga pagtuo, ipahayag sa aksiyon. (Itandi ang 2 Corinto 8:24.) Buot kining mopahimuot ug makaangkon sa pag-uyon sa usang gihigugma. Labing maayo gayod nga paagi ang napili niadtong anaa sa bug-os-panahong ministeryo sa pagpasundayag sa ilang paghigugma kang Jehova ug kang Jesu-Kristo!
6. (a) Unsang matang sa mga tawo ang nakapayunir? Unsay nakapaposible sa ilang pagbuhat niana? (b) May nahibaloan ka bang ingon nga mga panig-ingnan?
6 Nagkalainlain ang mga sirkumstansiya sa matag usa, ug kinahanglan kanang tagdon. Apan kon molantaw kita niadtong anaa sa bug-os-panahong ministeryo, atong makita nga naapil kanila ang katawhan sa tanang posibleng kahimtang—batag tigulang, tagsaanon ug minyo, may maayo ug dili-maayong panglawas, aduna ug walay pamilyahanong mga responsabilidad, ug padayon. Ang kalainan mao nga, inay tugotang mahimong mga babag kining mga butanga, sila, sama kang apostol Pablo, nakakat-on sa paglikay kanila o sa pagkinabuhi uban kanila. (2 Corinto 11:29, 30; 12:7) Pananglitan, palandonga ang usa ka kasagarang pamilya.
Si Eiji usa ka ansiano sa iyang kongregasyon. Siya ug ang iyang asawa kaubang nagpayunir sulod na sa 12 anyos samtang nagpadako sa ilang tulo ka anak. Giunsa nila pagbuhat kana? “Kinahanglang kami magkinabuhing yano,” matud ni Eiji. Bisan ang mga bata kinahanglang makatuon sa pagdawat sa dili alang sa daghang butang ilang gusto. “Bisan tuod naagian namo ang pila ka lisod nga panahon, si Jehova sa kanunay nagtagana sa among panginahanglan.”
Takos ba ang mga pagsakripisyo? “Sa matag gabii una namo pagngon ang mga suga, akong tan-awon ang akong asawa nga magsulat sa iyang taho sa pagsangyaw alang sa adlaw,” matud ni Eiji. “Dihang akong makita nga ginabutang sa akong pamilya ang espirituwal nga intereses sama niini, akong bation nga ang tanang butang maoy sumala sa angay gayod, ug akong bation ang kalamposan. Ako dili makahanduraw nga kaming duha dili magpayunir.” Unsay pagbati sa iyang asawa bahin niini? “Si Eiji nag-atiman pag-ayo kanamo,” matud niya. “Dihang ako siyang makita nga puliki sa espirituwal nga mga butang, bation ko ang halalom nga katagbawan sa kahiladman. Ako nagalaom nga kami makapadayon.”
Tungod kay ang amahan ug inahan nagagugol ug daghan kaayong panahon diha sa buluhatong pagsangyaw kada adlaw, unsa ang epekto niini diha sa mga anak? Ang mas magulang nga anak lalaki karon nagatrabaho sa upat-ka-tuig nga proyekto sa konstruksiyon sa sangang buhatan sa Watch Tower Society. Ang anak babaye maoy regular payunir, ug ang anak lalaki nga nagatungha pa may tumong nga mahimong espesyal payunir. Silang tanan nalipay nga ang ilang mga ginikanan maoy mga payunir.
7. (a) Paghatag ug mga panig-ingnan sa mga indibiduwal nga imong nailhan nga nakabuntog sa kababagan aron mosulod sa bug-os-panahong pag-alagad. (b) Unsang tambag sa Bibliya ang ilang gibutang sa kasingkasing?
7 Ang mga pamilyang sama niini hikaplagan taliwala sa mga Saksi ni Jehova sa daghang nasod sa tibuok kalibotan. Sila naningkamot pag-ayo sa pagpahimulos sa labing maayo sa ilang mga sirkumstansiya aron mosulod ug unya magpabilin sa bug-os-panahong pag-alagad. Pinaagi sa ilang mga lihok ilang ginapasundayag kon unsay kahulogan alang kanila sa paghigugma sa Diyos. Sa madasigon, sila nagapamati sa tambag ni Pablo: “Buhata ang imong labing maarangan sa pagpakita sa imong kaugalingon nga giuyonan sa Diyos, usa ka magbubuhat nga walay igakaulaw.”—2 Timoteo 2:15.
“Usa ka Magbubuhat nga Walay Igakaulaw”
8. Nganong giawhag ni Pablo si Timoteo sa ‘pagbuhat sa iyang labing maarangan’ ug unsay kahulogan niana?
8 Sa misulat si Pablo nianang mga pulonga ngadto kang Timoteo, sa mga 65 K.P., si Timoteo nag-alagad na sa kasaligan kaayong katungdanan sa Kristohanong kongregasyon. Si Pablo nagtawag kaniyang “usa ka maayong sundalo ni Kristo Jesus” ug balikbalik nga nagpahinumdom kaniya sa iyang responsabilidad sa pagtudlo ug pagpahimangno sa uban. (2 Timoteo 2:3, 14, 25; 4:2) Bisan pa niana, iyang giawhag si Timoteo: “Buhata ang imong labing maarangan sa pagpakita sa imong kaugalingon nga giuyonan sa Diyos.” Ang mga pulong “buhata ang imong labing maarangan” gihubad gikan sa usa ka Gregong pulong nga nagkahulogan “pagpadali kanimo.” (Tan-awa ang Kingdom Interlinear Translation.) Sa laing mga pulong, si Pablo nagsulti kang Timoteo nga aron mabatonan ang pag-uyon sa Diyos kinahanglang iyang padalion ang iyang kalihokan, bisan pag gipas-an na niya ang bug-at nga lulan sa responsabilidad. Ngano? Aron siya mahimong “usa ka magbubuhat nga walay igakaulaw.”
9. Unsang sambingay ni Jesus ang makatabang nato sa pagsabot sa mga pulong ni Pablo mahitungod sa “usa ka magbubuhat nga walay igakaulaw”?
9 Kining naulahing mga pulong nagapahinumdom kanato sa tulo ka ulipon sa sambingay ni Jesus sa mga talanton, sumala sa nahitala sa Mateo 25:14-30. Sa paghibalik sa agalon, kadto panahon na nga sila mopakita sa ilang trabaho ngadto sa agalon alang sa iyang pag-uyon. Ang mga ulipon nga gihatagag lima ug duha ka talanton gidayeg sa agalon tungod sa ilang gibuhat sa mga butang gisalig kanila. Sila gidapit nga ‘mosulod sa kalipay sa ilang agalon.’ Apan ang ulipon nga gisaligan sa usa ka talanton nakaplagang nakulangan. Ang iyang nabatonan gikuha, ug sa iyang kaulawan, siya gilabay “ngadto sa kangitngitan sa gawas.”
10. Nganong ang ulipon nga gihatagag usa ka talanton gipakaulawan ug gisilotan?
10 Ang unang duha ka ulipon nagbudlay ug nagpadako sa intereses sa ilang agalon. Sila tinuod nga mga magbubuhat “nga walay igakaulaw.” Apan nganong ang ikatulong ulipon gipakaulawan ug gisilotan bisan pag siya wala mawad-i sa gihatag kaniya? Kadto tungod kay wala siyay gibuhat nga maayo niadto. Sumala sa gipunting sa agalon, labing menos iya untang gideposito ang salapi sa bangko. Apan ang nakadaot sa panguna mao nga siya walay tinuod nga gugma alang sa iyang agalon. “Ako nahadlok ug milakaw ug nagtago sa imong talanton sa yuta,” siya misugid sa agalon. (Mateo 25:25; itandi ang 1 Juan 4:18.) Iyang giisip ang iyang agalon nga usa ka isog, “matig-a nga tawo” ug ang iyang asaynment ingong usa ka kabug-at. Gibuhat niya ang labing diyutay nga mahimo aron basta may mabuhat lang inay sa pagbuhat sa iyang “labing maarangan” aron maangkon ang pag-uyon sa agalon.
11. Sa unsang paagi ang maong sambingay mapadapat kanato karong adlawa?
11 Karong adlawa kanang sambingaya nagakatuman. Ang Agalon, si Jesu-Kristo, mibalik ug nagasusi sa buhat sa iyang “ulipon” nga matang, ingon man sa iya sa ilang mga kauban, ang “dakong panon” sa mga karnerohon. (Mateo 24:45-47; Pinadayag 7:9, 15) Unsay nakaplagan sa Agalon? Kon kita matagbaw sa basta lamang nga pag-alagad, nan mahimong kita unya hikaplagang nahiapil niadtong naulawan ug gilabay “ngadto sa kangitngitan sa gawas.” Sa laing bahin, kon atong ‘buhaton ang atong labing maarangan,’ nga mao, ‘padalion’ ang atong buluhaton ingong sanong sa pagkadinalian sa panahon, kita hikaplagang giuyonan ingong ‘mga magbubuhat nga walay igakaulaw’ ug makaambit sa ‘kalipay sa atong agalon.’
Gikinahanglan ang Disiplina ug Pagsakripisyo-sa-Kaugalingon
12. Unsang mga hinungdan ang nakapaarang sa hataas nga porsiento sa mga magmamantala sa Hapon sa pagsulod sa bug-os-panahong ministeryo?
12 Ang padayong pag-uswag sa ranggo sa payunir sa sunodsunod nga nasod sa tibuok kalibotan maoy tin-awng ebidensiya nga ang katawhan ni Jehova sa katibuk-an ‘nagabuhat sa ilang labing maarangan’ aron sa pagpamatuod sa ilang kaugalingon nga ‘mga magbubuhat nga walay igakaulaw.’ Apan nakahunahuna ka ba nganong sa pila ka nasod ang porsiento sa atong mga igsoon nga nakaarang sa pagsulod sa bug-os-panahong pag-alagad labaw kay sa diha sa ubang nasod? Kining makaiikag nga pangutana gisukna sa pila ka payunir sa Hapon. Palandonga kining mga tubag:
“Sa akong hunahuna kini wala magkahulogan nga ang pagtuo, o ang gugma kaha, sa Hapones nga mga Saksi labaw kay sa iya sa ilang mga igsoon sa ubang nasod,” matud sa usa ka trabahante sa Bethel nga diha na sa bug-os-panahong pag-alagad sulod sa mga 30 anyos. “Apan ako nagtuo nga ang Hapones nga pagkatawo may kalabotan niana. Sa katibuk-an, ang mga Hapones masinugtanon; sila daling mosanong sa pagdasig.”
“Tungod kay adunay daghan kaayong payunir sa halos tanang kongregasyon,” mikomento ang usa ka ansiano, “ang malangkobong ideya mao nga si bisan kinsa makahimo niini.” Ang mga Hapones buot mobuhat sa mga butang nga ginuropo. Sila may ekselenteng espiritu sa tem o pundok.
Kini tinong mga komento nga makapukaw sa hunahuna, ug kon kita seryoso sa pagpauswag sa atong pag-alagad kang Jehova, dunay ubay-ubayng tatawng punto nga takos natong tagdon nga mainampingon.
13. Sa unsang paagi kita makabatog kaayohan gikan sa pagkamasinugtanon ug pagkaandam mosunod sa pagdasig?
13 Una sa tanan, anaa ang bahin sa pagkamasinugtanon ug andam mosanong sa pagdasig. Kon ang pagtultol ug pagdasig nagagikan sa tukmang tinubdan, matarong lamang nga kita mosanong dayon. Sa ingon, inay isipon ang maong mga hiyas nga nasodnong mga kinaiya lamang, atong ibutang sa hunahuna ang mga pulong ni Jesus: “Ang akong mga karnero nagapatalinghog sa akong tingog, ug ako nakaila kanila, ug sila nagasunod kanako.” (Juan 10:27) Atong mahinumdoman usab nga ang usa ka hiyas sa “kaalam gikan sa itaas” maoy pagka “andam mosunod.” (Santiago 3:17) Kini maoy mga hiyas nga gidasig nga isul-ob sa tanang Kristohanon. Tungod sa kagikan ug pagkamatuto, ang pipila tingali mas makiling sa independenteng panghunahuna ug dili magpabuot sa uban kay sa uban. Tingali kini usa ka natad diin kinahanglang atong disiplinahon ang atong kaugalingon ug ‘bag-ohon ang atong hunahuna’ aron masabtan natong mas tin-aw kon unsa ang “kabubut-on sa Diyos.”—Roma 12:2.
14. Unsang pagdapit ang gidawat sa tanang nagpahinungod nga mga Kristohanon, ug unsay nalangkit?
14 Ingong nagpahinungod nga mga Kristohanon, atong gidawat ang pagdapit ni Jesus: “Kon adunay buot mosunod kanako, padumilia siya sa iyang kaugalingon ug ipapas-an ang iyang kahoy sa pagsakit ug padayong mosunod kanako.” (Mateo 16:24) Ang “pagdumili” sa kaugalingon sa literal nagkahulogan nga ‘bug-os ipalimod ang kaugalingon’ ug human niana kinabubut-ong ipadawat nga siya gipanag-iya ni Jehova nga Diyos ug ni Jesu-Kristo, nga itugot nga sila maoy magabuot sa atong mga kinabuhi ug mosulti kanato kon unsay angay ug dili angay natong buhaton. Unsa pa ang mas maayong paagi sa pagpasundayag nga atong gidumilian ang atong kaugalingon kay sa pagsunod sa mga lakang ni Jesus diha sa bug-os-panahong ministeryo?
15. (a) Sa unsang paagi ang pagkatagbaw sa diyutayng materyal nalangkit sa pagsunod kang Jesus? (b) Unsay sanong sa unang mga tinun-an sa pagdapit ni Jesus nga mosunod kaniya?
15 Unya anaa ang bahin sa pagkatagbaw sa menos nga materyal. Kini tin-awng kaatbang sa malangkobong kiling sa kalibotan, nga nagapasiugda sa “pangibog sa unod ug sa pangibog sa mga mata ug sa mapagawalong pasundayag sa pangabuhian sa usa.” (1 Juan 2:16) Apan si Jesus miingong mapasiugdahon: “Kamo makatino, walay mausa kaninyo nga dili manamilit sa tanan niyang katigayonan ang mahimong akong tinun-an.” (Lucas 14:33) Nganong matuod man kini? Tungod kay ang pagkahimong tinun-an ni Jesus nagkahulogan nga labaw pa kay sa pagkamagtutuo lamang. Sa gitawag ni Jesus si Andres, Pedro, Santiago, Juan, ug ang uban aron mahimong iyang mga tinun-an sa ikaduhang tuig sa iyang ministeryo, siya wala lamang mag-awhag kanila sa pagtuo kaniya ingong ang Mesiyas. Siya nagdapit kanila sa ulahi sa pagsunod kaniya ug sa pagbuhat sa buluhatong iyang gibuhat, nga mao, ang bug-os-panahong buluhaton sa pagsangyaw. Unsa ang ilang sanong? “Dihadiha ilang gibiyaan ang ilang mga pukot ug misunod kaniya.” Si Santiago ug si Juan “mibiya gani sa ilang amahang si Zebedeo sa sakayan uban sa mga tawong sinuholan ug milakaw aron mosunod kaniya.” (Marcos 1:16-20) Ilang gibiyaan ang ilang negosyo ug kanhing mga kauban ug gibuhat ang pagsangyaw sa bug-os nga panahon.
16. Ingong nagpahinungod nga mga Kristohanon, diha sa unsa angay natong gamiton ang atong panahon ug kusog? (Proverbio 3:9)
16 Busa, sayon ang pagsabot nganong ang pagkatagbaw sa diyutay maoy dako kaayong butang sa pagbuhat sa atong labing maarangan sa pag-alagad kang Jehova. Kon kita mabug-atan kaayo sa daghang materyal nga butang o obligasyon, kita basin mahisama sa datong batan-ong magmamando nga mibalibad sa pagdapit ni Jesus nga mahimong iyang sumusunod, dili tungod kay siya dili makahimo niana, kondili tungod kay siya dili buot mobiya sa iyang “daghang katigayonan.” (Mateo 19:16-22; Lucas 18:18-23) Busa inay usikan ang atong panahon ug kusog sa pagpangagpas sa mga butang nga duol nang ‘mahanaw,’ buot natong gamiton ang maong bililhong mga katigayonan alang sa atong malungtarong kaayohan.—1 Juan 2:16, 17.
17. Sa unsang gidak-on mahimong positibong impluwensiya ang espiritu sa tem o pundok?
17 Sa kataposan, anaa ang bahin sa espiritu ingong tem o pundok. Si Andres, Pedro, Santiago, ug Juan pihong nag-impluwensiyahay sa usag usa sa ilang hukom sa pagdawat sa pagdapit ni Jesus sa pagsunod kaniya. (Juan 1:40, 41) Sa susama, ang kamatuoran nga daghan kaayo sa atong mga igsoon makahatag luna sa ilang puliking mga kinabuhi sa pagsulod sa bug-os-panahong pag-alagad angay magdasig kanato sa pagpalandong nga ugdang sa atong kahimtang. Sa laing bahin, kadtong si kinsa sa atong taliwala nagpahimulos na niining pribilehiyoa makapaambit sa ilang makapalipayng mga kasinatian sa uban, sa ingon magdasig usab kanila sa pagkuyog sa ilang ranggo. Ug, siyempre, ang bug-os-panahong mga ministro makatabang sa usag usa sa kaayohan nilang tanan.—Roma 1:12.
18. Sa unsang paagi kitang tanan makaamot sa espiritu sa pagpayunir?
18 Bisan kadtong kansang mga sirkumstansiya karon dili motugot nga sila mosulod sa bug-os-panahong ministeryo dakog mahimo sa pagdugang sa espiritu sa payuniring. Sa unsang paagi? Pinaagi sa pagsuportar ug pagdasig niadtong nagapayunir, pinaagi sa pagpakitag aktibong interes niadtong may natagong-kagahom sa paghimo niana, pinaagi sa paghikay nga labing menos usa ka membro sa ilang pamilya magpayunir, pinaagi sa pag-apil sa buluhaton sa auxiliary payunir kon posible, ug pinaagi sa pagpaningkamot sa pagsulod sa bug-os-panahong pag-alagad sa labing madaling panahong posible. Sa pagbuhat niana, kitang tanan makapakitang atong ‘ginabuhat ang atong labing maarangan’ sa pag-alagad kang Jehova kon kaha karon nahatala na sa bug-os-panahong ministeryo o wala pa.
Lumahutay sa Pagbuhat sa Atong Labing Maarangan
19. Unsay atong ihukom nga buhaton tungod sa panahon?
19 Sa pagkamatuod, maingong si Jehova nagapadali sa buluhaton, karon na ang panahon nga atong ‘buhaton ang atong labing maarangan’ aron mahimong ‘mga magbubuhat nga walay igakaulaw.’ Ingong maayong mga sundalo ni Jesu-Kristo, kinahanglan usab nga atong ihiklin ang tanang walay-hinungdang mga kabug-at aron kita makaalagad nga epektibo ug makaangkon sa iyang pag-uyon. (2 Timoteo 2:3-5) Samtang kita manlimbasog sa pagpadako sa atong bahin sa pag-alagad sa Gingharian, kita makasalig nga ang atong mga paningkamot tugob pagabaslan. (Hebreohanon 6:10; 2 Corinto 9:6) Busa, inay nga mobarog sa daplin, ingnon ta, lumahutay ta sa pagbuhat sa atong labing maarangan sa pagsangyaw sa maayong balita, ingong tubag sa pagdapit sa salmista: “Alagara si Jehova uban ang pagsadya. Dumuol sa iyang atubangan uban ang pag-awit.”—Salmo 100:2.
Kahon sa Pagsubli
◻ Unsay nalangkit sa paghigugma sa Diyos?
◻ Unsa ang tinuod nga suliran sa ikatulong ulipon sa ilustrasyon ni Jesus sa mga talanton?
◻ Unsay kahulogan sa pagdumili sa kaugalingon?
◻ Nganong ang mga sumusunod ni Jesus kinahanglang ‘manamilit sa ilang materyal nga katigayonan’?
◻ Sa unsang paagi kitang tanan makaamot ngadto sa espiritu sa pagpayunir?
3. Unsa ang panukmod nga gahom luyo sa maong pag-uswag?
[Hulagway sa panid 18]
‘Ilabay ang walay pulos nga ulipon sa gawas’