Mabinationg Pagbantay sa Bililhong mga Karnero ni Jehova
ANG mga ansiano namati pag-ayo. Sila mibiyahe ug mga 50 kilometros gikan sa Efeso ngadto sa Mileto sa pagdawat ug mga instruksiyon gikan kang apostol Pablo. Karon sila nasubo sa pagkadungog nga kini mao na ang kataposang panahon nga ilang makita siya. Busa sila nasayod nga ang mga pulong nga mosunod hinungdanon kaayo: “Tagda ang inyong kaugalingon ug ang tibuok panon, nga niini ang balaang espiritu mao ang nagtudlo kaninyo nga mga magtatan-aw, sa pagbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.”—Buhat 20:25, 28, 38.
Ang lakbit nga paghisgot ni Pablo sa mga magbalantay tinong naghatag ug tugob nga impormasyon sa maong mga ansiano sa Efeso. Sinati sila sa buluhatong pagbantay sa mga karnero sa palibot nga kabanikanhan. Pamilyar usab sila sa daghang paghisgot bahin sa mga magbalantay sa Hebreohanong Kasulatan. Ug sila nahibalo nga gipanig-ingon ni Jehova ang iyang kaugalingon sa usa ka Magbalantay sa iyang katawhan.—Isaias 40:10, 11.
Si Pablo naghisgot bahin kanila ingong “mga magtatan-aw” taliwala “sa panon,” ug ingong “mga magbalantay” sa “kongregasyon.” Samtang ang terminong “mga magtatan-aw” nagpaila kon unsa ang ilang tinudlong buluhaton, ang pulong “magbalantay” naghubit kon sa unsang paagi tumanon nila ang maong pagbantay. Oo, ang mga magtatan-aw gisugo sa pag-atiman sa matag membro sa kongregasyon sa samang mahigugmaong paagi sa pag-atiman sa magbalantay sa iyang panon sa mga karnero.
Karong adlawa, pipila lang ka ansiano ang may kasinatian sa literal nga pagbantay sa karnero. Apan daghan kaayog gihisgotan ang Bibliya bahin sa mga karnero ug sa mga magbalantay, ilabina sa mahulagwayong diwa, nga sa ingon ang mga pulong ni Pablo adunay malungtarong epekto. Ug daghan ang makat-onan gikan sa mga asoy bahin sa mga magbalantay nga giuyonan sa Diyos sa karaang mga panahon. Ang ilang talagsaong mga panig-ingnan makatabang sa presenteng-adlawng mga ansiano sa pagkakita kon unsang mga hiyas ang angay nilang ugmaron aron makabantay sa kongregasyon sa Diyos.
Ang Walay Kahadlok nga Magbalantayng David
Kon maghunahuna kita bahin sa mga magbalantay sa panahon sa Bibliya, lagmit atong mahinumdoman si David, kay siya nagsugod ingong tigbantay sa mga karnero. Ang usa sa mga leksiyon nga atong makat-onan gikan sa kinabuhi ni David mao nga ang pagkahimong usa ka magbalantay dili usa ka posisyon sa kabantog. Ngani, sa dihang miabot ang manalagna nga si Samuel sa pagdihog sa usa ka anak nga lalaki ni Jesse ingong umaabot nga hari sa Israel, bug-os nga nasayloan sa sinugdan ang batan-ong David. Human lamang nga gisalikway ni Jehova ang iyang pito ka magulang nga lalaki nga nahisgotan si David, kinsa didto sa umahan nga “nagpasibsib sa mga karnero.” (1 Samuel 16:10, 11) Bisan pa, ang mga tuig nga nagugol ni David ingong magbalantay nag-andam kaniya alang sa mabug-at nga buluhaton sa pagbantay sa nasod sa Israel. “Si [Jehova] nagpili kang David nga iyang alagad ug nagkuha kaniya gikan sa mga toril sa karnero . . . aron mahimong magbalantay kang Jacob nga katawhan niya,” nag-ingon ang Salmo 78:70, 71. Sa kahaom, gisulat ni David ang matahom ug ilado nga ika-23 nga Salmo, nga nagsugod sa mga pulong: “Si Jehova mao ang akong Magbalantay.”
Sama kang David, ang mga ansiano sa Kristohanong kongregasyon angayng mag-alagad ingong mapainubsanon luyoluyong mga magbalantay ug dili magtinguha sa dili angay nga kabantog. Sama sa gisulat ni apostol Pablo kang Timoteo, kadtong nagapangab-ot niining kaakohan sa pagkamagbalantay “matinguhaon sa maayong buluhaton,” dili sa kabantog.—1 Timoteo 3:1.
Bisag ubos ang buluhaton ni David ingong usa ka literal nga magbalantay, may panahong kini nagkinahanglan ug dakong kaisog. Pananglitan, sa dihang sa usa ka higayon gitukob sa leyon ug sa uso sa lain nga higayon ang karnero gikan sa panon sa iyang amahan, maisogong giatubang ug gipatay ni David ang mga manunukob. (1 Samuel 17:34-36) Kini maoy usa ka talagsaong pasundayag sa kaisog kon palandongon sa usa nga ang leyon makapatay ug mga hayop nga mas dako pa kay kaniya. Ug ang kapeg-kolor nga uso sa Syria nga nabuhi sa Palestina kaniadto, nga motimbang ug 140 kilos, makapatay ug osa sa usa lang ka kamras sa kuyamoy niini.
Ang maisogong kabalaka ni David sa mga karnero sa iyang amahan maoy usa ka maayong panig-ingnan alang sa mga magbalantay sa Kristohanong kongregasyon. Gipasidan-an ni apostol Pablo ang mga ansiano sa Efeso bahin sa “mabangis nga mga lobo” nga “dili magtagad sa panon sa Diyos nga may kalumo.” (Buhat 20:29) Sa modernong panahon usab, may motungha gihapong mga higayon nga kinahanglang magpakitag kaisog ang Kristohanong mga magbalantay aron mabantayan ang espirituwal nga kaayohan sa mga karnero ni Jehova.
Samtang ang mga karnero maisogon nga panalipdan, sila kinahanglang tagdon usab uban sa dakong kalulot, sa pagsundog sa mahigugmaong magbalantayng David ug sa Maayong Magbalantay, si Jesu-Kristo. (Juan 10:11) Sanglit nasayod nga ang panon iya ni Jehova, ang mga ansiano dili gayod madaogdaogon sa mga karnero, nga “magharihari ibabaw kanila kinsa mga panulondon sa Diyos.”—1 Pedro 5:2, 3; Mateo 11:28-30; 20:25-27.
Magahatag ug Husay
Ang patriarkang Jacob maoy laing iladong magbalantay. Iyang giisip ang iyang kaugalingon mismo nga maoy responsable sa matag indibiduwal nga karnero nga gipiyal kaniya. Busa matinumanon kaayong giatiman niya ang mga panon sa iyang ugangan-nga-lalaki, si Laban, nga human sa 20 ka tuig sa iyang pag-alagad, si Jacob nakasulti: “Ang imong baye nga mga karnero ug ang imong baye nga mga kanding wala gayod kakuhai, ug wala gayod ako mokaon ug karnero nga laki gikan sa imong mga panon. Wala ako magdala kanimog mga hayop nga gikuniskunis sa ihalas nga mga mananap. Ako mismo ang nagpas-an sa kapildihan. Gikawat man ang usa sa adlaw o gikawat sa gabii, gipabayad mo ako niini.”—Genesis 31:38, 39.
Ang Kristohanong mga magtatan-aw magpasundayag ug mas dako pa nga kabalaka alang sa mga karnero nga “gipalit sa dugo sa iyang kaugalingong Anak” sa Magbalantay sa atong mga kalag, si Jehova nga Diyos. (Buhat 20:28; 1 Pedro 2:25; 5:4) Gipasiugda ni Pablo kining dakong kaakohan sa dihang iyang gipahinumdoman ang Hebreohanong mga Kristohanon nga ang mga lalaki nga nagapanguna sa kongregasyon “nagabantay sa inyong mga kalag ingon nga sila magahatag ug husay.”—Hebreohanon 13:17.
Ang panig-ingnan ni Jacob nagpakita usab nga walay limiti sa panahon ang buluhaton sa usa ka magbalantay. Kini maoy adlaw-ug-gabii nga trabaho ug sagad nagkinahanglan ug pagsakripisyo sa kaugalingon. Iyang giingnan si Laban: “Giantos ko ang kainit sa adlaw ug ang katugnaw sa kagabhion, ug ang akong katulog moikyas sa akong mga mata.”—Genesis 31:40.
Kini tinuod gayod sa daghang mahigugmaon Kristohanong mga ansiano karong adlawa, sama sa giilustrar sa mosunod nga kasinatian. Usa ka igsoon giadmit sa intensive care unit sa ospital human nga nakita sa resulta sa biopsy ang tumor sa utok nga may mga komplikasyon. Gihikay sa iyang pamilya nga magpaduol kaniya sa ospital sa adlaw ug gabii. Aron makahatag ug moral nga pagpaluyo ug pagdasig, gipasibo sa usa sa lokal nga mga ansiano ang iyang puliki nga iskedyol aron maduaw niya ang tawong masakiton ug ang iyang pamilya kada adlaw. Apan, tungod sa rutina sa pag-atiman sa intensive care unit sa ospital, dili siya makahimo sa pagduaw sa adlaw. Kini nagpasabot nga ang ansiano kasagarang anaa sa ospital sa halalom na kaayo nga gabii. Apan siya malipayong miadto didto matag gabii. “Ako nakaamgo nga kinahanglang moduaw ako sa panahong angay alang sa pasyente, dili sa panahong luag alang nako,” miingon ang ansiano. Sa dihang naulian na ang igsoon ug igo nang ikabalhin sa laing lugar sa ospital, gipadayon sa ansiano ang iyang adlaw-adlaw makapadasig nga mga pagduaw.
Kon Unsay Nakat-onan ni Moises Ingong Magbalantay
Gihubit sa Bibliya si Moises ingon nga mao “ang labing mapainubsanong tawo sa ibabaw sa yuta.” (Numeros 12:3) Apan, ang rekord nagpakita nga dili mao kini kanunay ang kahimtang. Sa batan-on pa, nakapatay siya ug usa ka Ehiptohanon tungod kay nangulata ug isigka-Israelinhon. (Exodo 2:11, 12) Dayag nga dili gayod kini lihok sa usa ka tawong mapainubsanon! Bisan pa, gigamit sa Diyos si Moises sa ulahi sa pagpanguna sa usa ka nasod sa minilyon diha sa kamingawan paingon sa Yutang Saad. Nan, tin-aw nga si Moises nagkinahanglan ug dugang pagbansay.
Samtang nakadawat na si Moises ug sekular nga pagbansay “diha sa tanang kaalam sa mga Ehiptohanon,” labaw pa ang gikinahanglan aron siya makabantay sa panon ni Jehova. (Buhat 7:22) Unsa kahang matanga sa dugang nga pagbansay kini? Aw, sa 40 ka tuig gitugotan sa Diyos si Moises sa pag-alagad ingong ubos nga magbalantay sa yuta sa Midian. Samtang iyang gibantayan ang mga karnero sa iyang ugangan-nga-lalaki, si Jetro, naugmad ni Moises ang maayong mga hiyas sa pagkamapailobon, kaaghop, pagkamapainubsanon, pagkamainantoson, kalumo sa kinaiya, ug pagpugong sa kaugalingon. Siya usab nakakat-on sa paghulat kang Jehova. Oo, ang pagbantay sa literal nga mga karnero nakapakuwalipikar kang Moises sa pagkahimong takos nga magbalantay sa nasod sa Israel.—Exodo 2:15–3:1; Buhat 7:29, 30.
Dili ba kining mga hiyasa mismo ang gikinahanglan sa usa ka ansiano sa pag-atiman sa katawhan sa Diyos karon? Oo, gipahinumdoman ni Pablo si Timoteo nga ang “ulipon sa Ginoo . . . maaghop sa tanan, kuwalipikado sa pagtudlo, mainantoson, nagamaymay nga may kalumo niadtong nagasupak.”—2 Timoteo 2:24, 25.
May mga panahon tingaling mobatig kalugda ang usa ka ansiano tungod kay naglisod siya sa pag-ugmad niining mga hiyasa sa bug-os. Bisan pa, siya angayng dili mosurender. Sama kang Moises, tingalig nagkinahanglan ug taas nga panahon nga bug-os maugmad ang mga hiyas nga gikinahanglan sa usa aron mahimong maayong magbalantay. Apan, sa ulahi ang maong tim-os nga paningkamot pagagantihan.—Itandi ang 1 Pedro 5:10.
Ingong ansiano, tingali wala ka kaayo gamita sa bug-os sama sa uban. Posible ba nga, sama kang Moises, gitugotan ka ni Jehova nga bug-os mong maugmad ang pipila ka hinungdanong mga hiyas? Ayaw ug kalimot nga si Jehova “nagatagad kanimo.” Apan, atong ibutang usab sa hunahuna ang panginahanglan sa ‘pagsul-ob sa atong kaugalingon sa pagkamapainubsanon sa hunahuna ngadto sa usag usa, tungod kay ang Diyos supak sa mga mapahitas-on apan nagahatag ug dili-takos nga kalulot sa mga mapainubsanon.’ (1 Pedro 5:5-7) Kon maningkamot ka ug ipadapat ang pagbansay nga gitugot ni Jehova, mas mapuslanon ka kaniya, sama kang Moises.
Ang Tanang Karnero ni Jehova Bililhon
Ang kasaligan, mahigugmaong mga magbalantay sa panahon sa Bibliya mibating responsable sa matag usa ka indibiduwal nga karnero. Tinuod usab kana sa espirituwal nga mga magbalantay. Kini tin-aw gikan sa mga pulong ni Pablo: “Tagda . . . ang tibuok panon.” (Buhat 20:28) Kinsa ba ang nalakip “sa tibuok panon”?
Si Jesus mihatag ug ilustrasyon mahitungod sa usa ka tawong may usa ka gatos ka karnero apan gipangita dayon ang usa nga nawala aron dalhon kini pagbalik ngadto sa panon. (Mateo 18:12-14; Lucas 15:3-7) Sa samang paagi ang usa ka magtatan-aw angay mabalaka sa matag membro sa kongregasyon. Ang pagkadili-aktibo sa ministeryo o sa pagtambong sa Kristohanong mga tigom wala magpasabot nga ang karnero dili na bahin sa panon. Siya nagapabiling bahin “sa tibuok panon” nga alang kanila ang mga ansiano “magahatag ug husay” kang Jehova.
Ang usa ka lawas sa mga ansiano nabalaka kaayo nga ang pipila nga nakig-uban niadto sa kongregasyon naanod ngadto sa pagkadili-aktibo. Ang listahan niining mga indibiduwala giandam, ug ang linain nga paningkamot gihimo sa pagduaw kanila ug sa pagtabang kanila nga mahibalik sa toril sa mga karnero ni Jehova. Pagkadako sa pasalamat ngadto sa Diyos niini nga mga ansiano nga sa kapin sa duha ug tunga ka tuig, sila nakatabang ug kapin sa 30 ka tawo nga nahimong aktibo pag-usab sa pag-alagad kang Jehova. Ang usa niadtong natabangan nahimong dili-aktibo sa mga 17 ka tuig!
Ang kabug-at niini nga responsabilidad dugang nga ginapasilsil diha sa mga magtatan-aw pinaagi sa kamatuoran nga ang mga karnero “gipalit pinaagi sa dugo sa kaugalingong Anak sa [Diyos].” (Buhat 20:28) Wala nay mas taas pa niini nga bili ang ikabayad alang niining bililhong mga karnero. Ug hunahunaa ang tanang panahon ug paningkamot nga gigugol diha sa ministeryo sa pagpangita ug sa pagtabang sa matag usa nga mga tawong karnerohon! Dili ba ang sama nga paningkamot pagahimoon sa paghupot sa tanan kanila sulod sa toril sa mga karnero sa Diyos? Siyempre, ang matag karnero sa kongregasyon bililhon.
Bisan kon ang membro sa panon nalangkit sa seryoso nga buhat nga daotan, ang kaakohan sa mga ansiano wala mausab. Sila magpadayon nga mabalak-ong mga magbalantay, nga mahigugmaon ug maaghopong maningkamot sa pagluwas sa nakahimog buhat nga daotan kutob sa mahimo. (Galacia 6:1, 2) Ikasubo, sa pila ka higayon nakita nga ang usa ka membro sa kongregasyon kulang ug diyosnong kasubo alang sa seryosong mga sala nga iyang nahimo. Nan ang mahigugmaong mga magbalantay may Kasulatanhong responsabilidad sa pagpanalipod sa nahibilin sa panon batok niining makatakod nga impluwensiya.—1 Corinto 5:3-7, 11-13.
Bisan pa, si Jehova nga Diyos naghatag ug hingpit nga panig-ingnan sa pagpakitag kaluoy sa nahisalaag nga mga karnero. Ang atong maluluy-ong Magbalantay miingon: “Pangitaon ko ang usa nga nawala, ug dad-on ko pagbalik ang natibulaag, ug bugkosan ko ang napiang ug palig-onon ko ang nagmasakiton.” (Ezekiel 34:15, 16; Jeremias 31:10) Sa pagsundog niining labing maayong panig-ingnan, usa ka mahigugmaong kahikayan gihimo alang sa modernong-adlaw espirituwal nga mga magbalantay sa pagduaw sa mga tawong napalagpot, kinsa tingali mosanong karon sa ilang tabang. Kining maluloy-ong mga paningkamot sa pagpasig-uli sa maong nawalang mga karnero nakapatunghag maayong bunga. Usa ka nahibalik nga igsoong babaye miingon: “Sa dihang miduaw ang mga ansiano, mao lang kadto nga pagdasig ang akong gikinahanglan aron makabalik.”
Walay duhaduha ang mga pulong ni Pablo sa mga ansiano sa Efeso sa Mileto punog kahulogan—alang kanila ug alang sa mga magtatan-aw karong adlawa. Ang iyang paghisgot sa mga magbalantay maoy usa ka pahinumdom sa makadaning mga hiyas nga angayng makita diha sa mga magtatan-aw—mga hiyas sama sa pagkamapainubsanon ug kaisog, ingon sa maayong panig-ingnan nga gipakita sa magbalantay-hari nga si David; ang personal nga pagbati sa responsabilidad ug mapanalipdanong pag-atiman, nga makita diha sa adlaw-ug-gabii nga pag-alagad ni Jacob; ug sa kaandam sa pagdawat ug dugang pagbansay nga mapailobon, ingon sa gipakita ni Moises. Sa pagkatinuod, kini nga mga panig-ingnan sa Bibliya motabang sa mga ansiano sa kongregasyon sa pag-ugmad ug sa pagpasundayag sa mga hiyas nga gikinahanglan aron sila sa pagkamahigugmaon “magabantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.”