Nagakaon Ka bag Maayo sa Espirituwal?
“Ang maayong pagkaon mao ang labing pangunang panginahanglan sa tawo. . . . Kon walay hustong pagkaon, kita mamatay.”
—Food and Nutrition.
KANANG pasukaranang kamatuoran tatawng gipakita sa naghugo nga mga lawas sa gigutom nga mga lalaki, babaye, ug mga bata nga gihikawan niining “labing pangunang panginahanglan sa tawo.” Ang uban makaarang man sa pagtagana niini nga panginahanglan sa usa ka sukod apan kulang gayod gihapon nga pagkapakaon. Bisan pa niana, daghan ang makakaon ug maayo nga sagad kontento na sa ilang kaugalingon sa mga pagkaong walay sustansiya nga motaganag diyutayng tinuod nga kahimsog. “Ang pagkaon,” nag-ingon ang Healthy Eating, “mopatim-aw nga mao ang usa sa labing giabusohan sa atong mga nabatonan.”
Walay kalainan kini sa espirituwal nga pagkaon—ang kamatuoran nga makaplagan diha sa Pulong sa Diyos, ang Bibliya. Ang pipila ka tawo kulang bisan sa labing pangunang espirituwal nga pagkaon; sila gigutom sa espirituwal. Ang uban yanong wala magtagad sa pagpahimulos sa espirituwal nga pagkaon nga mabatonan. Komosta ka man? Ikaw ba sa personal nagakaon ug maayo sa espirituwal? O mahimo ba kahang gihikawan nimo ang imong kaugalingon sa espirituwal nga pagkaon? Hinungdanon nga magmatinud-anon sa atong kaugalingon niining butanga sanglit kita nagkinahanglan ug espirituwal nga pagkaon nga labaw pa kay sa atong panginahanglan ug pisikal nga pagkaon.—Mateo 4:4.
Pagkaon Alang sa Espirituwal nga Pagtubo
Ang Food and Nutrition, usa ka teksbok nga naghisgot sa kahinungdanon sa pagbatog hustong pagkaon, naghatag kanato sa tulo ka maayong katarongan sa pagkaon ug maayo. Ang usa mao nga kita nagkinahanglan ug pagkaon “aron mapalambo ang pagtubo ug aron maulian ang nangadaot nga mga selula sa lawas.” Nahibalo ka ba nga sa matag adlaw sa imong kinabuhi, usa ka trilyon sa imong mga selula sa lawas ang nangadaot ug kinahanglang pulihan? Ang hustong pagtubo ug pagmentinar sa lawas nagkinahanglan ug maayong pagkaon.
Tinuod usab kana sa espirituwal. Sa dihang si apostol Pablo misulat sa kongregasyon sa Efeso, pananglitan, gipasiugda niya kon sa unsang paagi ang matag Kristohanon nagkinahanglan ug maayong espirituwal nga pagkaon aron mahimong “hingkod nga tawo.” (Efeso 4:11-13) Kon husto natong ginapakaon ang atong kaugalingon sa sustansiyadong espirituwal nga pagkaon, kita dili mahisama sa luyang mga bata, nga dili makaarang sa pag-atiman sa atong kaugalingon, nga mahimong biktima sa tanang matang sa kapeligrohan. (Efeso 4:14) Hinunoa, kita motubo sa pagkahimong kusgang mga hamtong, makahimo sa pagpakig-away ug maayo alang sa pagtuo tungod kay kita “inamuma sa mga pulong sa pagtuo.”—1 Timoteo 4:6.
Tinuod ba kana kanimo? Hingkod ka na ba sa espirituwal? O ikaw ba sama gihapon sa usa ka espirituwal nga bata—talandogon, bug-os nga nagsalig sa uban, ug dili makahimo sa pagpas-an nga bug-os sa Kristohanong mga responsabilidad? Masabot, ang pipila kanato daling makaingon nga kita sa espirituwal sama sa usa ka bata, apan ang matinud-anong pagsusi sa kaugalingon gikinahanglan. Ang ubang dinihogang mga Kristohanon sama niana sa unang siglo. Bisag sila angay na untang “mga magtutudlo” sa ilang kaugalingon, nga makahimo ug andam sa pagtudlo sa uban kon unsay ginaingon sa Pulong sa Diyos, si apostol Pablo misulat: “Kamo nanginahanglan na usab nga may motudlo kaninyo gikan sa sinugdan sa paninugdan nga mga butang sa sagradong mga kapahayagan sa Diyos; ug nahisama kamo nianang nanginahanglag gatas, dili sa gahing pagkaon.” Kon buot ka nga motubo sa espirituwal, ugmara ang kaikag sa maayo, gahing espirituwal nga pagkaon. Ayaw kakontento uban sa espirituwal nga pagkaon sa bata!—Hebreohanon 5:12.
Gikinahanglan usab nato kining gahing espirituwal nga pagkaon sa pag-ayo sa bisan unsang kadaot nga gipahinabo sa matag adlaw nga mga pagsulay nga atong ginaatubang sa usa ka mapintas nga kalibotan. Kini makatiti sa atong espirituwal nga kalig-on. Apan ang Diyos makapabag-o niana nga kusog. Si Pablo nag-ingon: “Wala kami moangka, apan bisan pa kon ang among pagkatawo sa gawas nagakahugo, tino nga ang among pagkatawo sa sulod ginabag-o sa adlaw-adlaw.” (2 Corinto 4:16) Sa unsang paagi kita “ginabag-o sa adlaw-adlaw”? Sa bahin, pinaagi sa regular nga pagkaon sa Pulong sa Diyos pinaagi sa personal ug ginurupong pagtuon sa Kasulatan ug sa pinasukad-sa-Bibliya nga mga publikasyon.
Pagkaon Alang sa Espirituwal nga Kusog
Ang pagkaon gikinahanglan usab “aron magpatunghag kainit ug kusog.” Ang pagkaon nagtaganag sugnod alang sa atong mga lawas aron makalihok ug maayo. Kon kita menos nga mokaon, diyutay lamang ang atong kusog. Ang kakulang ug iron diha sa atong pagkaon mopabati kanatong gikapoy ug dili ganahang molihok. Ingon ba niana usahay ang imong gibati labot sa espirituwal nga kalihokan? Naglisod ka ba sa pagtuman sa mga obligasyon nga dala sa pagkahimong usa ka Kristohanon? Ang pipila nga nag-angkong mga sumusunod ni Jesu-Kristo nangaluya sa pagbuhat ug maayo, ug sila nawad-ag kusog alang sa Kristohanong mga buluhaton. (Santiago 2:17, 26) Kon imong nakita nga tinuod kini sa imong kahimtang, ang sulbad mahimong sa dakong bahin nag-agad sa pagpauswag sa imong espirituwal nga pagkaon o sa imong pagkaon ug daghan sa espirituwal nga pagkaon.—Isaias 40:29-31; Galacia 6:9.
Ayawg palimbong sa pag-ugmad ug dili-maayong mga batasan sa pagkaon sa espirituwal nga pagkaon. Usa sa kinadak-ang mga panglimbong nga gigamit ni Satanas latas sa kasiglohan mao kanang pagkombinsir sa mga tawo nga sila dili na kinahanglang mobasa sa Bibliya ug mokuhag tukmang kahibalo gikan niini. Siya nagagamit sa dugay na kaayong taktika nga gisagop sa misulong nga mga sundalo sa pagbuntog sa mga siyudad sa kaaway—maghikaw kanila sa pagkaon ug magpagutom kanila aron mosurender. Apan gigamit niya kining taktikaha nga labaw pa. Siya nagalimbong niadtong iyang “ginaatake” sa pagpagutom sa ilang kaugalingon samtang sila ginalibotan sa dagaya lamiang pagkaon sa espirituwal. Walay duhaduha daghan kaayo ang nabiktima sa iyang mga pag-atake!—Efeso 6:10-18.
Pagkaon Alang sa Espirituwal nga Kahimsog
Ang ikatulong katarongan nga kita nagkinahanglan ug pagkaon, nag-ingon ang Food and Nutrition, maoy “aron mapalambo ang kahimsog sa lawas . . . ug mapugngan ang sakit.” Ang mga kaayohan sa panglawas sa maayong pagkaon dili makita dihadiha. Sa dihang nakakaon kita sa maayong pagkaon, kita talagsa ra nga maghunahuna, ‘Kana dakog nahimo sa akong kasingkasing (o sa akong mga rinyon o kaunoran, ug uban pa) sa ikaayo sa akong lawas.’ Apan, sulayi ang pagbuhat nga walay pagkaon sa taas nga yugto sa panahon, ug mahimong dayag ang mga sangpotanan sa imong panglawas. Unsa nga mga sangpotanan? “Ang labing komon nga epekto sa malnutrisyon,” nag-ingon ang usa ka medikal nga basahon, “maoy usa nga makadaot: dili makatubo, dili makasukol sa diyutay nga impeksiyon, kawalay-kusog o kawalay-ganang molihok.” Ang susamang matang sa espirituwal nga sakit nakaapektar sa karaang Israel sa usa ka panahon. Ang manalagnang Isaias nag-ingon bahin kanila: “Ang tibuok ulo nagamasakiton, ug ang tibuok nga kasingkasing nagakaluya. Gikan sa lapalapa sa tiil bisan hangtod sa ulo walay maayo diha niana.”—Isaias 1:5, 6.
Ang maayong espirituwal nga pagkaon mohatag kanato sa kusog sa pagsukol sa maong espirituwal nga kakulian ug sa mga sangpotanan sa espirituwal nga impeksiyon. Ang kahibalo gikan sa Diyos motabang kanato nga magpabilin diha sa maayong kahimtang sa espirituwal—kon kita nagakaon diha niana! Si Jesu-Kristo naghisgot kon sa unsang paagi ang kinabag-an sa mga tawo sa iyang adlaw wala magpakakat-on gikan sa kawalay-pagtagad sa ilang mga katigulangan labot sa hustong pagkaon sa espirituwal. Sila usab midumili sa pagkaon sa mga kamatuoran nga iyang gitudlo. Uban sa unsang resulta? Si Jesus miingon: “Ang kasingkasing niini nga katawhan nahimong dili-madinawaton, ug pinaagi sa ilang mga dalunggan sila nakadungog nga walay pagsanong, ug ilang gipiyong ang ilang mga mata; aron dili gayod sila makakita pinaagi sa ilang mga mata ug makapaminaw pinaagi sa ilang mga dalunggan ug makasabot sa diwa niini pinaagi sa ilang mga kasingkasing ug makapamalik, ug ayohon ko sila.” (Mateo 13:15) Ang kinabag-an wala gayod makabenepisyo gikan sa makaayong gahom sa Pulong sa Diyos. Sila nagpabiling masakiton sa espirituwal. Bisan ang pipila ka dinihogang mga Kristohanon nahimong “maluya ug masakiton.” (1 Corinto 11:30) Hinaot nga dili kita magtamay sa espirituwal nga pagkaon nga ginatagana sa Diyos.—Salmo 107:20.
Nahugawan sa Espirituwal
Gawas pa sa kapeligrohan sa pagkagutom sa espirituwal, adunay laing kapeligrohan nga angay natong mahibaloan—ang matang sa pagkaon nga atong ginakaon mahimong nahugawan mismo. Ang pagkaon sa mga pagtulon-an nga nahugawan sa peligroso demonyohanong mga ideya makahilo kanato sama sa pagkahilo sa pagkaon sa pisikal nga pagkaon nga nahugawan sa mga kagaw o mga hilo. (Colosas 2:8) Dili kanunayng sayon ang pag-ila sa makahilong pagkaon. “Ang pagkaon,” nag-ingon ang usa ka awtoridad, “usahay mopatim-aw nga maayo ug bisan pa may mga bakterya nga makahatag ug sakit.” Busa maayong atong susihon ang tuboran sa atong mahulagwayong pagkaon, nga naghunahuna nga ang pipila ka literatura, sama sa apostatang mga sinulat, tingali nahugawan pinaagi sa pagpailaila sa dili-Kasulatanhong mga pagtulon-an ug mga pilosopiya. Ang ubang mga tiggama ug pagkaon nagagamit gani ug malimbongong mga etiketa sa paglimbong sa ilang mga kustomer labot sa sulod sa ilang produkto. Kita tinong makadahom kang Satanas, ang dakong tiglimbong, nga mobuhat sa ingon. Busa, paneguroa nga makuha mo ang maong mahulagwayong pagkaon gikan sa kasaligang tuboran, aron ikaw magpabiling “mamahimsog sa pagtuo.”—Tito 1:9, 13.
Si Thomas Adams, ika-17ng siglo nga magwawali, nag-ingon bahin sa mga tawo sa iyang panahon: “Sila nagkalot sa ilang mga lubnganan pinaagi sa ilang mga ngipon.” Sa laing pagkasulti, ang ilang gikaon nakamatay kanila. Paneguroa nga ang imong ginakaon sa espirituwal dili makamatay kanimo. Pangitaa ang maayong espirituwal nga mga abiyo sa pagkaon. “Nganong kamo nagagasto ug salapi alang nianang dili tinapay?” nangutana si Jehova nga Diyos sa dihang kadtong nag-angkon nga iyang katawhan miliso sa bakak nga mga magtutudlo ug mga manalagna. “Pamati pag-ayo kanako, ug kan-a kon unsa ang maayo, ug pasagding ang inyong kalag magakalipay sa katambok niini. Ikiling ang inyong igdulungog ug umari kanako. Pamati, ug ang inyong kalag mabuhi.”—Isaias 55:2, 3; itandi ang Jeremias 2:8, 13.
Usa ka Kadagaya sa Espirituwal nga Pagkaon
Tinong wala gayoy kanihit sa maayong espirituwal nga pagkaon. Sama sa gitagna ni Jesu-Kristo, siya karon may usa ka kasaligan ug mabuot nga ulipon nga matang nga puliki sa pagtagana ug “pagkaon sa hustong panahon” alang kang bisan kinsa nga buot niini. (Mateo 24:45) Pinaagi sa manalagnang Isaias, si Jehova nagsaad: “Tan-awa! Ang akong kaugalingong mga alagad magakaon, apan kamo pagagutomon. . . . Ang akong kaugalingong mga alagad mopatugbaw nga mangayaon tungod sa maayong kahimtang sa kasingkasing.” Sa pagkatinuod, siya nagsaad ug usa ka kombira alang niadtong kinsa buot nga mokaon niana. “Si Jehova sa mga panon magahimo gayod alang sa tanang katawhan . . . ug usa ka kombira sa matambok nga mga pagkaon, usa ka kombira sa bino nga pinalugdang, sa matambok nga mga pagkaon nga puno sa utok.”—Isaias 25:6; 65:13, 14.
Apan, hunahunaa kini: Kita mamatay sa kagutom diha sa usa ka kombira! Nga gilibotan sa pagkaon, kita sa gihapon mosangpot nga kulang nga pagkapakaon kon kita sa pagkatinuod dili maningkamot sa atong kaugalingon sa pagkaon sa pipila niini. Ang Proverbio 26:15 nagtagana niining literal nga kahubitan: “Ang tapolan nagalubong sa iyang kamot diha sa pinggan sa kombira; siya kapoyan na kaayo sa pagdalag balik niini ngadto sa iyang baba.” Pagkasubo nga kahimtang! Kita usab mahimong tapolan kaayo sa pagpaningkamot sa atong kaugalingon diha sa personal nga pagtuon sa Pulong sa Diyos ug sa mga publikasyon sa Bibliya nga gidisenyo sa pagtabang kanato sa pagkaon sa espirituwal nga pagkaon. O kita mahimong kapoyan na kaayo sa pag-andam o sa pagpakigbahin diha sa mga tigom sa Kristohanong kongregasyon.
Maayong mga Batasan sa Pagkaon
Nan, kita nakabaton sa tanang katarongan sa pag-ugmad ug maayong mga batasan sa espirituwal nga pagkaon. Apan, ang kamatuoran mao nga daghan ang nagakaon ug diyutay sa ilang espirituwal nga pagkaon, nga gipagutman pa gani sa pipila ang ilang kaugalingon sa bug-os. Sila mahisama sa mga indibiduwal nga wala masayod sa kahinungdanon sa hustong pagkaon hangtod nga sila mag-antos sa mga sangpotanan sa ulahing kinabuhi. Ang Healthy Eating naghatag niini nga katarongan kon nganong kita tingali nagpasagad sa atong mga batasan sa pagkaon, bisag kita nahibalo nga ang maayong pagkaon hinungdanon sa kinabuhi: “Ang problema mao nga [ingong sangpotanan sa dili maayong mga batasan sa pagkaon] walay kusog nga pagkadaot sa panglawas, walay dihadiha nga resulta sama sa mahitabo sa walay popanaganang pagtabok sa nagsangang dalan. Hinunoa, tingali adunay hinay kaayo, dili makitang pagkadaot sa panglawas sa usa, ang mga impeksiyon mahimong dali nga motakboy, ang mga bukog mahimong mas humok, ang pagkaayo sa mga samad ug pagkamaulian gikan sa sakit tingalig hinay.”
Sa grabeng mga kahimtang ang usa tingali mahimong sama sa usa ka dalaga nga nag-antos gumikan sa pagkawalay-gana nga mokaon. Siya kombinsido sa iyang kaugalingon nga diyutay ra ang gikinahanglan niyang pagkaon, nga siya maayo ra sa bug-os, bisan pa sa kamatuoran nga siya nagkadaot sa pisikal. Sa kataposan siya mawad-an sa tanang kaikag sa pagkaon. “Peligroso kini nga kahimtang,” matod sa usa ka medikal nga basahon. Ngano? “Bisag ang pasyente talagsa rang mamatay nga literal tungod sa kagutom siya mahimong grabeng mawad-ag sustansiya ug mahimong daling takboyan sa naandang gagmay nga mga impeksiyon.”
Usa ka Kristohanong babaye miadmitir: “Sa daghang tuig nakigbisog ako sa pagkahibalo sa panginahanglan sa regular nga pagpangandam sa tigom ug personal nga pagtuon ug bisan pa wala makahimo niana.” Siya sa kataposan naghimog mga kausaban aron siya mahimong usa ka maayong estudyante sa Pulong sa Diyos, apan diha lamang nga siya bug-os nga nakaamgo sa pagkadinalian sa iyang kahimtang.
Nan, ibutang sa kasingkasing ang tambag nga gihatag ni apostol Pedro. Mahimong sama sa “bag-o pang nahimugso,” ug “ugmara ang pagpangandoy sa walay-sambog nga gatas nga iya sa pulong, aron nga pinaagi niini managtubo kamo ngadto sa kaluwasan.” (1 Pedro 2:2) Oo, “ugmara ang pagpangandoy”—ugmara ang kusganong tinguha—nga pun-on ang imong hunahuna ug kasingkasing sa kahibalo sa Diyos. Ang mga hamtong sa espirituwal usab nagkinahanglan nga magpadayon sa pagbaton niana nga pagpangandoy. Ayaw pasagdi nga ang espirituwal nga pagkaon mahimong ‘usa nga labing giabusohan sa imong mga nabatonan.’ Kaon ug maayo sa espirituwal, ug batoni ang kaayohan sa bug-os gikan sa tanang “makapahimsog nga mga pulong” nga makaplagan diha sa Pulong sa Diyos, ang Bibliya.—2 Timoteo 1:13, 14.
[Hulagway sa panid 28]
Nagkinahanglan ka ba sa pagpauswag sa imong pagkaon?