Ayaw Paghunong sa Lumba Alang sa Kinabuhi!

“Atong daganon nga may pag-agwanta ang lumba nga gibutang atubangan nato.”​—Hebreohanon 12:1.

1, 2. Unsang makapaukyab nga mga hitabo ang nakapalipay sa mga alagad ni Jehova niining kataposang mga adlaw?

NABUHI kita sa makapaukyab ug malisod nga kapanahonan. Kapig 80 ka tuig nga miagi, sa 1914, si Jesus gipalingkod ingong Hari sa langitnong Gingharian sa Diyos. “Ang adlaw sa Ginoo” ug duyog niana “ang panahon sa kataposan” niining sistema sa mga butang nagsugod na. (Pinadayag 1:​10; Daniel 12:9) Sukad niadto ang lumba sa Kristohanon alang sa kinabuhi misamot ka dinalian. Ang mga alagad sa Diyos nanlimbasog pag-ayo aron makasagnunot sa langitnong karo ni Jehova, ang iyang langitnong organisasyon, nga nagdagang way-hunong aron matuman ang mga katuyoan ni Jehova.​—Ezequiel 1:​4-28; 1 Corinto 9:24.

² Nakakaplag bag kangaya ang katawhan sa Diyos samtang ‘gidagan nila ang lumba’ paingon sa walay-kataposang kinabuhi? Tinuod gayod! Sila nalipay nga nakakita sa pagkatigom sa mga nahibilin sa mga igsoon ni Jesus, ug sila nagmaya sa pagkaamgo nga ang kataposang pagtimre sa mga nahibilin sa 144,000 duol nang matapos. (Pinadayag 7:​3, 4) Dugang pa, sila nahinam sa pagkaila nga ang tinudlong Hari ni Jehova nagbakyaw sa iyang galab aron pag-ani sa “anihon sa yuta.” (Pinadayag 14:​15, 16) Ug pagkadako kini nga anihon! (Mateo 9:37) Sa pagkakaron, kapig lima ka milyong kalag ang natigom na​—“usa ka dakong panon sa katawhan, nga walay tawong makaihap, gikan sa tanang kanasoran ug mga tribo ug mga katawhan ug mga dila.” (Pinadayag 7:9) Walay usang makaingon kon unsa unya ka dako ang maong panon sa kataposan, sanglit walay tawong makaihap niini.

 3. Bisan pa sa unsang kababagan nga paningkamotan nato kanunay ang pag-ugmad sa mangayaong espiritu?

³ Tinuod, si Satanas naningkamot nga pandolon kita o pahinayon kita samtang kita tuling nagpadayon sa lumba. (Pinadayag 12:17) Ug dili sayong ipadayon ang lumba atubangan sa mga gubat, mga kagutmanan, mga kamatay, ug tanang ubang kalisdanan nga maoy timaan sa panahon sa kataposan. (Mateo 24:​3-9; Lucas 21:​11; 2 Timoteo 3:​1-5) Bisan pa niana, ang atong mga kasingkasing molukso sa kalipay samtang nagkaduol na ang kinutbanan sa lumba. Naningkamot kita nga ipabanaag ang espiritung giagda ni Pablo nga batonan sa isigka-Kristohanon sa iyang adlaw: “Pagmaya kanunay diha sa Ginoo. Sa makausa pa ako magaingon, Pagmaya!”​—Filipos 4:4.

 4. Unsang matanga sa espiritu ang gipadayag sa mga Kristohanong taga-Filipos?

⁴ Walay duhaduha nga ang mga Kristohanong gitumong ni Pablo sa maong mga pulong nagmaya na sa ilang pagtuo, kay si Pablo miingon kanila: “Padayon sa pagmaya diha sa Ginoo.” (Filipos 3:1) Ang mga taga-Filipos maoy mahinatagon, mahigugmaong kongregasyon nga nag-alagad uban ang kasibot ug kadasig. (Filipos 1:​3-5; 4:​10, 14-20) Apan dili tanang Kristohanon sa unang siglo ang nakabaton nianang espirituha. Pananglitan, ang pipila sa Hudiyong mga Kristohanon nga gisulatan ni Pablo sa basahong Mga Hebreohanon maoy usa ka hinungdan sa kabalaka.

‘Paghatag ug Labaw pa kay sa Kasagarang Pagtagad’

 5. (a) Unsang espirituha ang nabatonan sa Hebreohanong mga Kristohanon sa dihang naporma ang unang Kristohanong kongregasyon? (b) Batbata ang espiritu sa pipila ka Hebreohanong mga Kristohanon sa mga 60 K.P.

⁵ Ang unang Kristohanong kongregasyon sa kasaysayan sa kalibotan gisakopan sa kinaiyanhong mga Hudiyo ug sa mga proselita ug natukod sa Jerusalem sa 33 K.P. Unsang matanga sa espiritu ang ilang nabatonan? Kinahanglang basahon lang ang unang mga kapitulo sa basahong Mga Buhat aron hisayran ang kadasig ug pagmaya niini, bisan sa atubangan sa paglutos. (Buhat 2:​44-47; 4:​32-34; 5:​41; 6:7) Sa paglabay sa tinagpulo ka katuigan, hinunoa, nausob ang kahimtang, ug daghang Hudiyong mga Kristohanon dayag nga naghinayhinay na sa lumba alang sa kinabuhi. Usa ka reperensiyang basahon nag-ingon niini bahin sa ilang kahimtang ingong naglungtad kini sa mga 60 K.P.: “Usa ka kahimtang sa pagkatapolan ug kalaay, sa pakyas nga mga panahom, nalangan nga mga paglaom, hiamgohan nga kapakyasan ug kawalay-pagtuo sa adlaw-adlawng kalihokan. Sila mga Kristohanon apan diyutay ug pagpabili sa kahimayaan sa ilang pagkatinawag.” Naunsa bang naingon niana ang dinihogang mga Kristohanon? Ang pagpalandong sa mga bahin sa sulat ni Pablo ngadto sa mga Hebreohanon (nga gisulat sa mga 61 K.P.) moabag kanato sa pagtubag nianang pangutanaha. Ang maong pagpalandong motabang kanatong tanan karong adlawa sa paglikay nga mabalhog ngadto sa susamang espirituwal nga kaluya.

 6. Unsay pipila ka kalainan tali sa pagsimba ubos sa Balaod ni Moises ug sa pagsimbang gipasukad sa pagtuo kang Jesu-Kristo?

⁶ Ang Hebreohanong mga Kristohanon migawas sa Hudaismo, usa ka sistema nga nangangkong nagsugot sa Balaod nga gihatag ni Jehova pinaagi ni Moises. Kadtong Balaora maorag nagpadayong madanihon alang sa daghang Hudiyong mga Kristohanon, tingali tungod kay sa daghang siglo kadto lamang ang bugtong dalan sa pagduol kang Jehova, ug kadto usa ka talagsaong sistema sa pagsimba, nga may mga saserdote, panapanahong mga halad, ug bantog-sa-kalibotang templo sa Jerusalem. Lahi ang Kristiyanidad. Nanginahanglan kinig espirituwal nga panglantaw, sama nianang iya ni Moises, kinsa ‘nagtutok ngadto sa bayad sa [umaabot pa nga] ganti’ ug ‘nagpabiling lig-on nga daw sa nakita ang Usa kinsa dili-makita.’ (Hebreohanon 11:​26, 27) Daghang Hudiyong mga Kristohanon lagmit nga nakulangan nianang espirituwal nga panglantaw. Sila nagkiangkiang inay nagdagan sa may-katuyoan nga paagi.

 7. Sa unsang paagi ang sistema nga atong gigawsan makaapektar sa paagi sa atong pagdagan sa lumba alang sa kinabuhi?

⁷ Aduna bay susamang kahimtang karong adlawa? Aw, ang kahimtang dili gayod eksaktong pareho. Bisan pa niana, ang mga Kristohanon migawas sa usa ka sistema sa mga butang nga naghimog dagkong mga pasiatab. Ang kalibotan nagtanyag ug makapaukyab nga mga kahigayonan, apan sa samang panahon, nagbutang kinig bug-at nga mga responsibilidad diha sa katawhan. Dugang pa, daghan kanato nagpuyo sa mga nasod diin ang maduhaduhaong tinamdan maoy kasagaran ug diin ang katawhan dunay mahakogon, ako-una nga kaisipan. Kon itugot natong maimpluwensiyahan sa maong sistema, ang ‘mga mata sa atong kasingkasing’ daling mahanap. (Efeso 1:18) Unsaon nato pagdagan ug maayo sa lumba alang sa kinabuhi kon dili na kita tin-awng makaila kon asa kita nagpadulong?

 8. Unsay pipila ka paagi nga ang Kristiyanidad labaw kay sa pagsimba ubos sa Balaod?

⁸ Aron pagdasig sa Hudiyong mga Kristohanon, si Pablo nagpahinumdom kanila nga ang Kristohanong sistema labaw kay sa Moisesnong Balaod. Tinuod, sa dihang ang nasod sa unodnong Israel gilangkoban sa katawhan ni Jehova ubos sa Balaod, si Jehova nakigsulti niana pinaagig dinasig nga mga propeta. Apan, sumala ni Pablo, karong adlawa siya nakigsulti “pinaagi sa usa ka Anak, si kinsa gitudlo niya nga manununod sa tanang butang, ug pinaagi kang kinsa iyang gihimo ang mga sistema sa mga butang.” (Hebreohanon 1:2) Dugang pa, si Jesus labaw kay sa tanang hari sa banay ni David, ang iyang “mga kauban.” Siya taas pa gani kay sa mga manulonda.​—Hebreohanon 1:​5, 6, 9.

 9. Nganong kita, sama sa Hudiyong mga Kristohanon sa adlaw ni Pablo, kinahanglang mohatag ug “labaw pa kay sa kasagarang pagtagad” nganha sa ginasulti ni Jehova?

⁹ Busa, gitambagan ni Pablo ang Hudiyong mga Kristohanon: “Gikinahanglan nato nga mohatag ug labaw pa kay sa kasagarang pagtagad sa mga butang nga atong nadungog, aron dili gayod kita maanod.” (Hebreohanon 2:1) Bisan tuod ang pagkakat-on bahin kang Kristo maoy talagsaong panalangin, labaw ang gikinahanglan. Gikinahanglang sila mohatag ug suod nga pagtagad sa Pulong sa Diyos aron pagsumpo sa impluwensiya sa Hudiyonhong kalibotan alirong nila. Kita usab kinahanglang mohatag ug “labaw pa kay sa kasagarang pagtagad” nganha sa ginasulti ni Jehova tungod sa way-puas nga propaganda nga niana kita naladlad gikan niining kalibotana. Nagpasabot kini sa pag-ugmad ug maayong mga batasan sa pagtuon ug pagpadayon sa pagbatog maayong eskedyul sa pagbasa sa Bibliya. Sumala sa giingon ni Pablo sa ulahi diha sa iyang sulat ngadto sa mga Hebreohanon, nagpasabot usab kini sa pagkaregular sa mga tigom ug sa pagsangyaw sa atong pagtuo ngadto sa uban. (Hebreohanon 10:​23-25) Kanang kalihokana motabang kanato nga magpabiling igmat sa espirituwal aron dili mawala sa atong panan-aw ang atong mahimayaong paglaom. Kon ang atong mga kaisipan pun-on nato sa mga hunahuna ni Jehova, dili kita mabug-atan o mawad-ag panimbang sa bisan unsay mahimong himoon kanato niining kalibotana.​—Salmo 1:​1-3; Proverbio 3:​1-6.

“Padayon nga Maawhagong Magtinambagay sa Usag Usa”

10. (a) Unsay mahimong mahitabo ngadto sa usang dili mohatag ug labaw pa kay sa kasagarang pagtagad sa Pulong ni Jehova? (b) Sa unsang paagi kita ‘makapadayon sa maawhagong pagtinambagay sa usag usa’?

¹⁰ Kon dili kita mohatag ug suod nga pagtagad sa espirituwal nga mga butang, ang mga saad sa Diyos mahimong daw dili na tinuod. Nahitabo gani kini sa unang siglo sa dihang ang mga kongregasyon bug-os nga gilangkoban sa dinihogang mga Kristohanon ug ang pipila ka apostol buhi pa niadto. Si Pablo nagpasidaan sa mga Hebreohanon: “Pagbantay, mga igsoon, kay basin ug may maugmad diha kang bisan kinsa kaninyo nga usa ka tuman-kadaotang kasingkasing nga walay pagtuo pinaagi sa pagpahilayo gikan sa buhi nga Diyos; apan padayon nga maawhagong magtinambagay sa usag usa sa matag adlaw, samtang matawag pa nga ‘Karong adlawa,’ kay basin ug may si bisan kinsa kaninyo nga motig-a pinaagi sa malimbongong gahom sa sala.” (Hebreohanon 3:​12, 13) Ang pulong ni Pablo nga “pagbantay” nagpasiugda sa panginahanglan nga magmaigmat. Naghulga ang kapeligrohan! Ang kawalay-pagtuo​—“sala”​—basin maugmad diha sa atong mga kasingkasing, ug kita makapahilayo sa Diyos inay nga mas maduol kaniya. (Santiago 4:8) Si Pablo nagpahinumdom kanato nga “padayon nga maawhagong magtinambagay sa usag usa.” Gikinahanglan nato ang kainit sa inigsoong panag-uban. “Ang usang magpalain sa iyang kaugalingon magtinguha sa iyang kaugalingong mahakogong pangandoy; batok sa tanang mapuslanong kaalam siya mosupak.” (Proverbio 18:1) Ang panginahanglan sa maong panag-uban nagtukmod sa mga Kristohanon karong adlawa nga mahimong regular sa pagtambong sa mga tigom sa kongregasyon, mga asembliya, ug mga kombensiyon.

11, 12. Nganong angayng dili kita matagbaw nga mahibalo lamang sa paninugdang Kristohanong mga doktrina?

¹¹ Sa ulahi sa iyang sulat, si Pablo naghatag niining dugang nga bililhon kaayong tambag: “Bisan tuod angay na kamong mahimong mga magtutudlo tungod sa panahon, kamo nanginahanglan na usab nga may motudlo kaninyo gikan sa sinugdan sa paninugdan nga mga butang sa sagradong mga kapahayagan sa Diyos; ug nahisama kamo nianang nanginahanglag gatas, dili sa gahing pagkaon. . . . Ang gahi nga pagkaon ilaha sa hamtong nga mga tawo, kanilang kinsa pinaagi sa pagginamit nakabansay sa ilang kagahom sa pag-ila nga mailhan ang husto ug ang sayop.” (Hebreohanon 5:​12-14) Dayag, ang pipila ka Hudiyong mga Kristohanon wala mouswag sa pagsabot. Sila hinay sa pagdawat sa mausbawong kahayag bahin sa Balaod ug sa sirkunsisyon. (Buhat 15:​27-29; Galacia 2:​11-14; 6:​12, 13) Ang pipila tingali dako pag pagtamod sa tradisyonal nga mga batasan sama sa senemanang Igpapahulay ug sa balaanong tinuig nga Adlaw sa Pagtabon sa Sala.​—Colosas 2:​16, 17; Hebreohanon 9:​1-14.

¹² Busa, si Pablo nag-ingon: “Karon nga ato nang gibiyaan ang pang-una nga doktrina bahin sa Kristo, manag-uswag kita ngadto sa pagkahamtong.” (Hebreohanon 6:1) Ang usa ka maglulumba sa layong distansiya nga magtagad pag-ayo sa iyang diyeta mas makaagwanta sa dugay, lisod nga lumba. Sa susama, ang usa ka Kristohanon nga magtagad pag-ayo sa espirituwal nga pagkaon​—nga dili lamang siya matagbaw sa paninugdan, ‘pang-una nga mga doktrina’​—mas makaagwanta sa pagpabilin sa lumbaanan ug pagtapos niana. (Itandi ang 2 Timoteo 4:7.) Nagkahulogan kini sa pag-ugmad ug kaikag diha sa “gilapdon ug gitas-on ug gihabogon ug giladmon” sa kamatuoran, sa ingon mouswag ngadto sa pagkahamtong.​—Efeso 3:18.

“Kamo Nanginahanglan ug Pag-agwanta”

13. Giunsa pagpasundayag sa Hebreohanong mga Kristohanon ang ilang pagtuo sa nangaging kapanahonan?

¹³ Sa yugto pagkahuman gayod sa Pentekostes 33 K.P., ang Hudiyong mga Kristohanon mibarog nga lig-on bisan pa sa mabangisong pagsupak. (Buhat 8:1) Tingali kini maoy gihunahuna ni Pablo sa misulat siya: “Padayong hinumdomi ang kanhing mga adlaw diin, human kamo malamdagi, inyong giagwanta ang usa ka dakong sangka ilalom sa mga pag-antos.” (Hebreohanon 10:32) Ang maong matinumanong pag-agwanta nagpasundayag sa ilang gugma sa Diyos ug naghatag kanilag kagawasan sa pagsulti sa iyang atubangan. (1 Juan 4:17) Giawhag sila ni Pablo nga dili isalibay kana tungod sa kawalay-pagtuo. Iyang giawhag sila: “Kamo nanginahanglan ug pag-agwanta, aron nga, human ninyo mabuhat ang kabubut-on sa Diyos, kamo makadawat sa katumanan sa saad. Kay ‘diyutay kaayong panahon’ na lang, ug ‘siya nga moanhi moabot na ug dili maglangan.’”​—Hebreohanon 10:​35-37.

14. Unsang mga kamatuoran ang angay motabang kanato sa pag-agwanta bisan human sa daghang katuigan sa pag-alagad kang Jehova?

¹⁴ Komosta man kita karong adlawa? Kadaghanan kanato masiboton sa una natong nakat-onan ang Kristohanong kamatuoran. Nabatonan pa ba nato ang maong kasibot? O ato nang ‘gibiyaan ang atong gugma sa sinugdan’? (Pinadayag 2:4) Nabugnaw ba kita, tingali nahigawad ug diyutay o gikapoy sa pagpinaabot sa Armagedon? Ugaling, hunong ug pamalandong. Ang kamatuoran maoy talagsaon gihapon sama sa nangagi. Si Jesus gihapon ang atong langitnong Hari. Kita naglaom gihapon sa kinabuhing walay kataposan sa usa ka paraisong yuta, ug sa gihapon kita may relasyon kang Jehova. Ug ayaw gayod kalimti: “Siya nga moanhi moabot na ug dili maglangan.”

15. Sama kang Jesus, sa unsang paagi ang pipila ka Kristohanon miagwanta sa grabeng paglutos?

¹⁵ Busa, ang mga pulong ni Pablo nga natala sa Hebreohanon 12:​1, 2 nahiangay kaayo: “Tangtangon usab nato ang tanang kabug-at ug ang sala [kawalay-pagtuo] nga daling makalambod kanato, ug atong daganon nga may pag-agwanta ang lumba nga gibutang atubangan kanato, samtang kita nagatutok sa Pangulong Ahente ug Maghihingpit sa atong pagtuo, si Jesus. Tungod sa kangaya nga gibutang atubangan kaniya siya miagwanta ug sakitanang estaka, nagpakawalay-bili sa kaulaw, ug milingkod na sa tuong kamot sa trono sa Diyos.” Adunay daghang butang nga giagwanta sa mga alagad sa Diyos niining kataposang mga adlaw. Sama kang Jesus, kinsa nagmatinumanon hangtod sa punto sa sakit nga kamatayon, ang pipila sa atong mga igsoong lalaki ug mga babaye matinumanong nag-agwanta sa labing mabangis nga paglutos​—mga kampong bilanggoan, pagpaantos, panglugos, bisan kamatayon. (1 Pedro 2:21) Dili ba mosugwak ang gugma sa atong kasingkasing alang kanila sa dihang atong palandongon ang ilang integridad?

16, 17. (a) Unsang mga hagit sa ilang pagtuo ang gipakigbisogan sa kadaghanang mga Kristohanon? (b) Ang paghinumdom sa unsa ang makatabang kanato sa pagpadayon pagdagan sa lumba alang sa kinabuhi?

¹⁶ Hinuon, ang dugang mga pulong ni Pablo mapadapat ngadto sa kadaghanan: “Sa inyong pagpakigsangka batok sa sala kamo wala pa gayod makasukol hangtod sa dugo.” (Hebreohanon 12:4) Bisan pa niana, niining sistemaha ang dalan sa kamatuoran dili masayon alang kang bisan kinsa kanato. Ang pipila maluya tungod sa “sukwahing sulti sa mga makasasala” diha sa sekular nga trabaho o sa eskuylahan, nga nag-agwanta sa pagbugalbugal o pagsukol sa pamit-os sa pagpakasala. (Hebreohanon 12:3) Ang kusog nga tentasyon nakapahuyang sa determinasyon sa pipila nga mamentinar ang tag-as nga mga sukdanan sa Diyos. (Hebreohanon 13:​4, 5) Ang mga apostata nakaapektar sa espirituwal nga panimbang sa pipila nga namati sa ilang makahilong propaganda. (Hebreohanon 13:9) Ang mga kabingkilan sa personalidad naghikaw sa uban sa kangaya. Ang sobrang pagpasiugda sa lulinghayaw ug mga kalihokang lingawlingaw nakapaluya sa pipila ka Kristohanon. Ug ang kadaghanan mibating nabug-atan sa mga suliran sa pagkinabuhi niining sistema sa mga butang.

¹⁷ Tinuod, walay usa niining mga kahimtanga maoy ‘pagsukol hangtod sa dugo.’ Ug ang pipila ka kahimtang basin masubay ngadto sa sayop nga mga desisyon nga ato mismong nahimo. Apan kanang tanan maoy hagit sa atong pagtuo. Kanay hinungdan nga angayng itutok nato ang atong mata sa talagsaon kaayong panig-ingnan ni Jesus sa pag-agwanta. Hinaot dili gayod nato hikalimtan ang pagkatalagsaon sa atong paglaom. Hinaot dili gayod kita mawad-an sa atong pagtuo nga si Jehova “maoy tigganti sa mga matinuorong nagapangita kaniya.” (Hebreohanon 11:6) Unya, kita makabaton sa espirituwal nga kusog sa pagpadayon pagdagan sa lumba alang sa kinabuhi.

Kita Makahimo sa Pag-agwanta

18, 19. Unsang makasaysayanhong mga panghitabo ang nagpailang ang Hebreohanong mga Kristohanon sa Jerusalem namati sa dinasig nga tambag ni Pablo?

¹⁸ Unsay sanong sa Hudiyong mga Kristohanon ngadto sa sulat ni Pablo? Mga unom ka tuig human masulat ang sulat ngadto sa mga Hebreohanon, ang Judea may pakiggubat. Sa 66 K.P., giliyokan sa Romanong kasundalohan ang Jerusalem, nga nagtuman sa mga pulong ni Jesus: “Inigkakita ninyo sa Jerusalem nga malibotan sa nagkampong kasundalohan, nan hibaloi nga ang paghimong awaaw niya haduol na.” (Lucas 21:20) Hinuon, sa kaayohan sa mga Kristohanon nga anaa unya sa Jerusalem nianang panahona, si Jesus miingon: “Nan silang anaa sa Judea pakalagiwa na ngadto sa kabukiran, ug kadtong anaa sa iyang taliwala pabiyaa, ug kadtong anaa sa banikang mga dapit ayaw na pasudla ngadto kaniya.” (Lucas 21:21) Busa, ang pakiggubat batok sa Roma maoy usa ka pagsulay: Kadtong Hudiyong mga Kristohanon mobiya kaha sa Jerusalem, ang sentro sa Hudiyohanong pagsimba ug ang dapit sa matahom nga templo?

¹⁹ Sa hinanali, ug sa wala lamay hinungdan, ang mga Romano nangatras. Lagmit, ang relihiyosong mga Hudiyo nag-isip nga kadto maoy pamatuod nga ang Diyos nagpanalipod sa ilang balaang siyudad. Komosta ang mga Kristohanon? Ang kasaysayan nagtug-an kanato nga sila nangalagiw. Unya, sa 70 K.P., ang mga Romano namalik ug bug-os nga naglaglag sa Jerusalem uban sa makalilisang nga kapildihan sa kinabuhi. Ang “adlaw ni Jehova” nga gitagna ni Joel midangat sa Jerusalem. Apan wala na didto ang matinumanong mga Kristohanon. Sila ‘nakalingkawas.’​—Joel 2:​30-32; Buhat 2:​16-21.

20. Sa unsang mga paagi kita madasig sa kahibalo nga duol na ang dakong “adlaw ni Jehova”?

²⁰ Karong adlawa, kita nahibalo nga ang laing dakong “adlaw ni Jehova” sa dili madugay magatandog niining tibuok nga sistema sa mga butang. (Joel 3:​12-14) Wala kita mahibalo kon kanus-a moabot kanang adlawa. Apan gipasaligan kita sa Pulong sa Diyos nga kini moabot gayod! Si Jehova nag-ingon nga kini dili maulahi. (Habacuc 2:​3; 2 Pedro 3:​9, 10) Busa, atong ‘ihatag ang labaw pa kay sa kasagarang pagtagad sa mga butang nga nadungog.’ Likayi ang kawalay-pagtuo, “ang sala nga daling makalambod kanato.” Ihukom nga moagwanta kutob sa gikinahanglan niini. Hinumdomi, ang dakong samag-karo nga langitnong organisasyon ni Jehova nagaabante. Magtuman kini sa katuyoan niini. Busa hinaot kitang tanan magpadayon sa pagdagan ug dili mohunong sa lumba alang sa kinabuhi!

Nahinumdom Ka Ba?

◻ Ang pagpamati sa unsang awhag ni Pablo ngadto sa mga taga-Filipos ang motabang kanato sa pag-agwanta sa lumba alang sa kinabuhi?

◻ Unsay motabang kanato sa pagsumpo sa hilig niining kalibotana sa pagpalinga kanato?

◻ Sa unsang paagi kita mahimong magtinabangay sa usag usa aron makaagwanta sa lumba?

◻ Unsay pipila ka butang nga makapahinay sa usa ka Kristohanon?

◻ Sa unsang paagi ang panig-ingnan ni Jesus makatabang kanato sa pag-agwanta?

[Hulagway sa panid 8, 9]

Ang mga Kristohanon, samag mga maglulumba, dili gayod magtugot nga adunay makapalinga kanila

[Hulagway sa panid 10]

Walay makapugong sa dakong langitnong karo ni Jehova sa pagtuman sa katuyoan sa Diyos