Mga Halad sa Pagdayeg nga Makapahimuot Kang Jehova
‘Itugyan ang inyong mga lawas nga usa ka halad nga buhi, balaan, dalawaton sa Diyos.’—ROMA 12:1.
1. Unsay giingon sa Bibliya bahin sa relatibong bili sa mga halad ilalom sa Moisesnong Balaod?
‘SANGLIT ang Balaod may anino man sa maayong mga butang nga moabot, apan dili ang matuod nga dagway mismo sa mga butang, pinaagi sa sama rang mga halad tuig-tuig nga padayon nilang ginahalad ang mga tawo dili gayod arang makahingpit niadtong magapanuol.’ (Hebreohanon 10:1) Diha nianang prangka kaayong mga pulong, si apostol Pablo nagpamatuod nga ang tanang halad nga gitanyag ilalom sa Moisesnong Balaod walay malungtarong bili kon bahin sa kaluwasan sa tawo.—Colosas 2:16, 17.
2. Nganong dili kawang ang pagsulay sa pagsabot sa detalyadong impormasyon sa Bibliya bahin sa mga halad sa Balaod?
2 Nagkahulogan ba kini nga ang impormasyon diha sa Pentateuch mahitungod sa mga halad dili hinungdanon sa mga Kristohanon karon? Sa pagkamatuod, halos usa ka tuig, ang mga indibiduwal nga nagpalista sa Tunghaan sa Teokratikanhong Ministeryo sa mga kongregasyon sa mga Saksi ni Jehova sa tibuok-kalibotan dili pa dugayng nakatapos sa pagbasa sa unang lima ka basahon sa Bibliya. Ang uban nagkugi sa pagbasa ug sa pagsabot sa tanang detalye. Kawang ba ang ilang tanang paningkamot? Dili gayod, kay ‘ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.’ (Roma 15:4) Nan, ang pangutana mao, Unsang ‘pagtudlo’ ug “paghupay” ang atong mahipos gikan nianang hugpong sa impormasyon sa Balaod mahitungod sa mga halad?
Alang sa Pagtudlo ug Paghupay Kanato
3. Unsay atong pangunang gikinahanglan?
3 Bisag wala kinahanglana ang pagtanyag ug literal nga mga halad sumala sa gitakda sa Balaod, kita nagkinahanglan gihapon pag-ayo ug mga halad sama sa nahimo niini sa gamayng sukod alang sa mga Israelinhon, nga mao, aron ang atong mga sala mapasaylo ug matagamtam ang kahimuot sa Diyos. Sanglit dili na kita kinahanglang magtanyag ug literal nga mga halad, sa unsang paagi madawat nato ang maong mga kaayohan? Human sa paghisgot sa mga limitasyon sa mga halad nga hayop, si Pablo miingon: ‘Sa pag-anhi [ni Jesus] sa kalibotan siya miingon: “Ang halad ug gasa wala nimo tinguhaa, apan ikaw nag-andam ug lawas alang kanako. Wala nimo uyoni ang tibuok nga mga halad-nga-sinunog ug ang halad-sa-sala.” Unya ako miingon, “Tan-awa! Ako mianhi (sa linukot nga basahon kini nahisulat bahin kanako) aron sa pagbuhat sa imong kabubut-on, Oh Diyos.”’—Hebreohanon 10:5-7.
4. Sa unsang paagi gipadapat ni Pablo ang Salmo 40:6-8 ngadto kang Jesu-Kristo?
4 Nagkutlo gikan sa Salmo 40:6-8, si Pablo miingon nga si Jesus wala moanhi aron ipadayon ang “halad ug gasa,” ang ‘tibuok nga mga halad-nga-sinunog ug ang halad-sa-sala,’ diin ang tanan niini sa panahon sa pagsulat ni Pablo wala na kahimut-i sa Diyos. Hinunoa, si Jesus mianhi uban sa usa ka lawas nga giandam sa iyang langitnong Amahan, usa ka lawas nga managsama sa tanang bahin sa usa ka lawas nga giandam sa Diyos sa dihang Iyang gilalang si Adan. (Genesis 2:7; Lucas 1:35; 1 Corinto 15:22, 45) Ingong hingpit nga Anak sa Diyos, si Jesus nagdula sa papel sa “binhi” sa babaye, sumala sa gitagna sa Genesis 3:15. Siya mohimog mga lakang sa ‘pagsamad sa ulo ni Satanas,’ bisan tuod si Jesus mismo ‘pagasamaran sa tikod.’ Niining paagiha, si Jesus nahimong kasangkapan nga gitagana ni Jehova alang sa kaluwasan sa katawhan, nga maoy gipaabot sa mga tawo sa pagtuo sukad pa sa panahon ni Abel.
5, 6. Unsang kinalabwang paagi sa pagduol sa Diyos ang magamit sa mga Kristohanon?
5 Naghisgot bahin niining talagsaong papel nga gidula ni Jesus, si Pablo nag-ingon: ‘Ang usa nga wala makaila ug sala gihimo [sa Diyos] nga sala alang kanato, aron kita mahimong pagkamatarong sa Diyos pinaagi kaniya.’ (2 Corinto 5:21) Ang mga pulong “gihimo nga sala” mahubad usab nga ‘gihimo ingong halad-sa-sala.’ Si apostol Juan nag-ingon: ‘Siya usa ka halad pasig-uli alang sa atong mga sala, apan dili lamang sa atoa kondili usab nianang sa tibuok kalibotan.’ (1 Juan 2:2) Busa, bisan tuod ang mga Israelinhon dunay temporaryong kasangkapan sa pagduol sa Diyos pinaagi sa ilang mga halad, ang mga Kristohanon dunay kinalabwang paagi sa pagduol sa Diyos—ang halad ni Jesu-Kristo. (Juan 14:6; 1 Pedro 3:18) Kon kita magpasundayag ug pagtuo sa halad lukat nga gitagana sa Diyos ug magmasinugtanon Kaniya, mapasaylo usab ang atong mga sala ug matagamtam ang kahimuot ug panalangin sa Diyos. (Juan 3:17, 18) Dili ba tuboran kana sa paghupay? Apan, sa unsang paagi ikapasundayag nato nga kita dunay pagtuo sa halad lukat?
6 Human sa pagpatin-aw nga ang mga Kristohanon dunay kinalabwang paagi sa pagduol sa Diyos, si apostol Pablo naglatid, ingon sa atong mabasa diha sa Hebreohanon 10:22-25, sa tulo ka paagi diin ikapasundayag nato ang atong pagtuo ug pagpabili sa mahigugmaong tagana sa Diyos. Bisan tuod ang tambag ni Pablo gitumong sa panguna niadtong dunay ‘agianan pasulod sa balaang dapit’—sa ato pa, sa dinihogang mga Kristohanon nga may langitnong pagtawag—sa pagkatinuod ang tanang tawo kinahanglang mamati sa dinasig nga mga pulong ni Pablo kon buot nilang matagamtam ang kaayohan sa halad pasig-uli ni Jesus.—Hebreohanon 10:19.
Pagtanyag ug mga Halad nga Mahinlo ug Wala Mahugawi
7. (a) Sa unsang paagi ang Hebreohanon 10:22 nagpabanaag sa gihimo diha sa paghalad? (b) Unsay kinahanglang himoon sa pagtino nga ang halad dalawaton sa Diyos?
7 Una, giawhag ni Pablo ang mga Kristohanon: ‘Manuol kita uban ang matinuoron nga kasingkasing diha sa bug-os nga pagsalig sa pagtuo, kay nawisikan na man ang atong mga kasingkasing gikan sa usa ka daotang tanlag ug ang atong mga lawas nadigo na pinaagi sa mahinlong tubig.’ (Hebreohanon 10:22) Ang mga pulong nga gigamit dinhi tin-awng nagpabanaag kon unsay ginahimo diha sa usa ka naandang halad ilalom sa Balaod. Haom kini tungod kay aron mahimong dalawaton ang halad, kinahanglang itanyag kini uban ang hustong motibo ug gikan sa usa ka butang nga mahinlo ug wala mahugawi. Ang halad nga hayop maoy gikan sa panon sa kahayopan, sa ato pa gikan sa mahinlo nga mga hayop, ug “himsog,” walay depekto. Kon ang halad maoy gikan sa mga pak-an, kini kinahanglang mga tukmo o piso nga mga salampati. Kon kining mga kinahanglanona makab-ot, “kini mapuangorong dawaton aron siya makahimog pagtabon sa sala alang kaniya.” (Levitico 1:2-4, 10, 14; 22:19-25) Ang halad nga lugas walay sambog nga lebadura, nga simbolo sa pagkadunot; ni may sambog kini nga dugos, lagmit ang duga sa prutas, nga may kalagmitang moaslom. Sa dihang ang mga halad—hayop o lugas—itanyag diha sa halaran, dugangan kinig asin, nga usa ka preserbatibo.—Levitico 2:11-13.
8. (a) Unsay gikinahanglan diha sa tawo nga nagtanyag ug halad? (b) Sa unsang paagi makatino kita nga ang atong pagsimba dalawaton kang Jehova?
8 Komosta ang tawo nga nagtanyag sa halad? Ang Balaod nag-ingon nga ang si bisan kinsa nga moduol atubangan kang Jehova kinahanglang mahinlo ug wala mahugawi. Ang usa ka tawo nga nahugawan sa bisan unsang katarongan kinahanglang magtanyag una ug halad sa sala o halad sa pagkasad-an aron mapasig-uli ang iyang mahinlong baroganan atubangan ni Jehova aron ang iyang halad nga sinunog o halad sa panag-ambit dalawaton Kaniya. (Levitico 5:1-6, 15, 17) Busa, kita ba nagpabili sa kahinungdanon sa pagbaton sa tanang panahon ug hinlong baroganan atubangan ni Jehova? Aron ang atong pagsimba dalawaton sa Diyos, kinahanglang tul-iron dayon nato ang bisan unsang kalapasan nga mahimo diha sa balaod sa Diyos. Angayng pahimuslan dayon nato ang hinatag-sa-Diyos nga mga kasangkapan sa tabang—“ang mga ansiyano sa kongregasyon” ug ang ‘halad pasig-uli alang sa atong mga sala,’ si Jesu-Kristo.—Santiago 5:14; 1 Juan 2:1, 2.
9. Unsa ang dakong kalainan tali sa mga halad nga gihimo ngadto kang Jehova ug niadtong gitanyag ngadto sa bakak nga mga diyos?
9 Ang paghatag ug pasiugda sa halad nga wala mahugawi sa bisan unsang matang, sa pagkamatuod, mao ang dakong kalainan tali sa mga halad nga gitanyag ngadto kang Jehova ug niadtong gitanyag ngadto sa bakak nga mga diyos sa mga tawo sa nasod sa palibot sa Israel. Nagkomento bahin niining lahi nga kinaiyahan sa mga halad sa Moisesnong Balaod, usa ka reperensiyang basahon nag-ingon: “Mahitungod sa mga halad, atong matikdan nga walay koneksiyon kini sa diwata o pagpanag-an; walay relihiyosong pagsalimuang, pagdaot sa mga parte sa kaugalingong lawas, o balaang prostitusyon, makapukaw sa gana sa sekso ug mahilayong mga rituwal sa pertilidad nga bug-os nga gidili; walay tawhanong mga halad; walay mga halad alang sa patay.” Kining tanan nagpasiugda sa usa ka kamatuoran: si Jehova balaan, ug dili siya mokonsentir o mouyon sa sala o kahugawan sa bisan unsang matang. (Habacuc 1:13) Ang pagsimba ug mga halad nga itanyag ngadto kaniya kinahanglang hinlo ug wala mahugawi—sa pisikal, moral, ug espirituwal.— Levitico 19:2; 1 Pedro 1:14-16.
10. Sumala sa tambag ni Pablo nga narekord sa Roma 12:1, 2, unsang pagsusi sa kaugalingon ang angay natong himoon?
10 Tungod niini, angay natong susihon ang atong kaugalingon sa tanang bahin sa kinabuhi aron matino nga ang atong pag-alagad kang Jehova dalawaton kaniya. Dili kita angayng maghunahuna nga basta nagapakigbahin kita sa Kristohanong mga tigom ug sa ministeryo, walay sapayan kon unsay atong buhaton sa atong pribadong kinabuhi. Dili usab kita angayng maghunahuna nga ang pagpakigbahin sa Kristohanong mga kalihokan magpalingkawas kanato sa gikinahanglang pagsunod sa balaod sa Diyos sa ubang bahin sa atong kinabuhi. (Roma 2:21, 22) Dili nato mapaabot ang panalangin ug kahimuot sa Diyos kon tugotan nato ang bisan unsang mahugaw o kadunotan sa iyang mga mata nga magdaot sa atong panghunahuna ug mga lihok. Hinumdomi ang mga pulong ni Pablo: ‘Ako nangaliyupo kaninyo pinaagi sa kaluoy sa Diyos, mga igsoon, nga itugyan ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarungan. Ug hunong na sa pagpaumol sumala niining sistemaha sa mga butang, apan mag-usab pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.’—Roma 12:1, 2.
Pagtanyag ug mga Halad sa Pagdayeg nga Kinasingkasing
11. Unsay nalakip sa terminong “pagpahayag sa dayag,” nga gihisgotan sa Hebreohanon 10:23?
11 Sa pagsulat ngadto sa mga Hebreohanon, sunod nga gihatagan ug pagtagad ni Pablo ang usa ka hinungdanong bahin sa matuod nga pagsimba: ‘Atong panguptan pag-ayo ang pagpahayag sa dayag bahin sa atong paglaom nga walay pagkatarog, kay kasaligan siya nga misaad.’ (Hebreohanon 10:23) Ang ekspresyon “pagpahayag sa dayag” sa literal nagkahulogang “pagsugid,” ug si Pablo naghisgot usab bahin sa “halad sa pagdayeg.” (Hebreohanon 13:15) Kini magpahinumdom kanato sa matang sa halad nga gitanyag sa mga tawo sama kang Abel, Noe, ug Abraham.
12, 13. Unsay giila sa usa ka Israelinhon sa dihang nagtanyag siya ug halad nga sinunog, ug unsay atong himoon aron mapasundayag ang samang espiritu?
12 Sa dihang ang usa ka Israelinhon magtanyag ug halad nga sinunog, kini iyang itanyag nga “kinabubut-on atubangan ni Jehova.” (Levitico 1:3) Pinaagi niining halara, siya kinabubut-ong nagpahayag sa dayag, o nag-ila, sa dagayang mga panalangin ug mahigugmaong-kalulot ni Jehova sa iyang katawhan. Hinumdomi nga usa ka lahi nga bahin sa halad nga sinunog mao nga ang tibuok halad gikaon sa kalayo diha sa halaran—usa ka tukmang simbolo sa bug-os nga debosyon ug dedikasyon. Sa susama, atong ipasundayag ang atong pagtuo sa halad lukat ug ang atong pasalamat alang sa maong tagana sa dihang kinabubut-on ug kinasingkasing kitang motanyag sa atong “halad sa pagdayeg, nga mao, ang bunga sa mga ngabil,” ngadto kang Jehova.
13 Bisan tuod ang mga Kristohanon dili magtanyag ug literal nga mga halad—hayop o utanon—sila dunay responsibilidad sa pagpamatuod sa maayong balita sa Gingharian ug sa paghimog tinun-an ni Jesu-Kristo. (Mateo 24:14; 28:19, 20) Imo bang gipahimuslan ang mga higayon sa pagpakigbahin sa pagsangyaw sa dayag sa maayong balita sa Gingharian sa Diyos aron daghan pang mga tawo ang makahibalo sa katingalahang mga butang nga gitagana sa Diyos alang sa masinugtanong katawhan? Ikaw ba andam sa paggugol sa imong panahon ug kusog sa pagtudlo sa mga interesado ug sa pagtabang kanila nga mahimong mga tinun-an ni Jesu-Kristo? Ang atong madasigong pagpakigbahin sa ministeryo, sama sa makahupay nga kahumot sa halad nga sinunog, makapahimuot gayod sa Diyos.—1 Corinto 15:58.
Kalipayi ang Pagpakig-uban sa Diyos ug sa Tawo
14. Sa unsang paagi ang mga pulong ni Pablo sa Hebreohanon 10:24, 25 kaamgid ug ideya sa halad sa panag-ambit?
14 Sa kataposan, gipasiugda ni Pablo ang atong relasyon uban sa mga isigka-Kristohanon samtang nagasimba kita sa Diyos. ‘Magtinagdanay kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang inyong makita nga ang adlaw nagkaduol na.’ (Hebreohanon 10:24, 25) Ang mga ekspresyong ‘aron sa pagdasig ngadto sa paghigugma ug sa maayong mga buhat,’ ‘ang pagtigom sa usag usa kanato,’ ug “magdinasigay sa usag usa” tanan nagpahinumdom kanato kon unsay nahimo sa halad sa panag-ambit sa Israel alang sa katawhan sa Diyos.
15. Unsay atong makitang kaamgiran tali sa halad sa panag-ambit ug sa Kristohanong mga tigom?
15 Ang terminong “mga halad sa panag-ambit” usahay gihubad nga “mga halad sa pakigdait.” Ang Hebreohanong pulong alang sa “pakigdait” dinhi maoy sa pormang dinaghan, tingali nagpasabot nga ang pag-ambit sa maong mga halad mosangpot ug pakigdait uban sa Diyos ug pakigdait uban sa mga isigkamagsisimba. Mahitungod sa halad sa panag-ambit, ang usa ka eskolar miingon: “Kini, sa pagkatinuod, maoy usa ka panahon sa malipayong pag-ubanay uban sa Diyos sa Pakigtugon, diin Siya nagpaubos aron mahimong Dinapit sa Israel diha sa pangaon sa halad, bisan pag Siya kanunay ang ilang Tig-abiabi.” Kini magpahinumdom kanato sa saad ni Jesus: ‘Kay diin gani adunay duha o tulo nga nagkatigom sa akong ngalan, anaa ako sa ilang taliwala.’ (Mateo 18:20) Matag panahong motambong kita sa Kristohanong tigom, kita makapahimulos gikan sa makapalig-ong pag-ubanay, sa makapadasig nga pagtudlo, ug sa paghunahuna nga ang atong Ginoong Jesu-Kristo anaa uban kanato. Kana maghimo sa Kristohanong tigom nga tinuod gayod nga malipayon ug makapalig-on-sa-pagtuo nga okasyon.
16. Anaa sa hunahuna ang halad sa panag-ambit, unsay magpahimo sa Kristohanong mga tigom nga malipayon kaayo nga okasyon?
16 Diha sa halad sa panag-ambit, ang tanang tambok—nga anaa sa ginhawaan, sa mga amimislon, nianang nagtapot sa atay, ug sa dapidapi, maingon man ang daghag-tambok nga ikog sa karnero—gitanyag kang Jehova pinaagi sa pagsunog, nga gipaaso diha sa halaran. (Levitico 3:3-16) Ang tambok giisip nga labing sustansiyado ug labing maayong bahin sa hayop. Ang pagtanyag niini diha sa halaran nagsimbolo sa paghatag sa labing maayo ngadto kang Jehova. Ang magpahimo sa Kristohanong mga tigom nga malipayong okasyon mao nga dili lamang kita makadawat ug pagtudlo kondili makatanyag usab kita ug pagdayeg ngadto kang Jehova. Atong himoon kini pinaagi sa pagpakig-ambit—uban sa atong makasaranganon apan labing maayong paningkamot—sa pag-awit nga kinasingkasing, pagpamatig maayo, ug pagkomento kon mahimo. “Dayega ninyo si Jah!” mipatugbaw ang salmista. “Pag-awit kang Jehova ug usa ka bag-ong awit, ang iyang pagdayeg diha sa kongregasyon sa mga maunongon.”—Salmo 149:1.
Dagayang mga Panalangin Gikan ni Jehova Naghulat Kanato
17, 18. (a) Unsang dakong halad ang gitanyag ni Solomon sa inagurasyon sa templo sa Jerusalem? (b) Unsang mga panalangin ang natagamtam gikan sa seremonyas sa inagurasyon sa templo?
17 Sa inagurasyon sa templo sa Jerusalem, sa ikapitong bulan sa tuig 1026 W.K.P., si Haring Solomon nagtanyag ug “dakong halad sa atubangan ni Jehova,” nga dunay “halad nga sinunog ug halad nga lugas ug tambok nga mga bahin sa mga halad sa panag-ambit.” Dugang pa nianang gitanyag diha sa mga halad nga lugas, ang bug-os nga gidaghanong 22,000 ka baka ug 120,000 ka karnero gihalad niadtong okasyona.—1 Hari 8:62-65.
18 Mahanduraw ba nimo ang gastos ug ang trabahong nalangkit nianang dako kaayong seremonyas? Bisan pa, ang mga panalangin nga nadawat sa Israel dayag nga mas dako pa kay sa nagasto. Sa kataposan sa kapistahan, “gipapauli [ni Solomon] ang katawhan; ug ilang gibulahan ang hari ug namauli sa ilang mga balay, nga nagmaya ug nagmalipayon sa kasingkasing tungod sa tanang pagkamaayo nga gihimo ni Jehova kang David nga iyang alagad ug sa Israel nga iyang katawhan.” (1 Hari 8:66) Sa pagkatinuod, ingon sa pagkapamulong ni Solomon niana, “ang panalangin ni Jehova—mao ang makapadato, ug siya walay idugang nga kasakit uban niana.”—Proverbio 10:22.
19. Unsay atong mahimo aron madawat ang dagkong mga panalangin ni Jehova karon ug hangtod sa walay kataposan?
19 Kita nagkinabuhi na sa panahon nga ang ‘anino sa maayong mga butang nga moabot’ gipulihan sa ‘dagway mismo sa mga butang.’ (Hebreohanon 10:1) Si Jesu-Kristo, sa papel sa dakong antitipikal nga Hataas nga Saserdote, misulod na sa langit mismo ug nagtanyag sa bili sa iyang kaugalingong dugo aron sa pagtabon sa sala sa tanang nagpasundayag ug pagtuo sa iyang halad. (Hebreohanon 9:10, 11, 24-26) Pinasukad nianang dakong halad ug pinaagi sa kinasingkasing nga pagtanyag ngadto sa Diyos sa atong mga halad sa pagdayeg nga mahinlo ug wala mahugawi, kita usab makapadayon nga ‘magmaya ug malipayon sa kasingkasing,’ nga magpaabot sa dagayang mga panalangin gikan ni Jehova.—Malaquias 3:10.
Unsaon Nimo Pagtubag?
• Unsang pagtudlo ug paghupay ang atong mahipos gikan sa impormasyon sa Balaod bahin sa mga halad?
• Unsa ang unang kinahanglanon aron ang halad mahimong dalawaton, ug unsay kahulogan niana alang kanato?
• Unsay atong ikatanyag nga ikatandi sa kinabubut-ong halad nga sinunog?
• Sa unsang mga paagi ang Kristohanong mga tigom mahimong ikatandi sa halad sa panag-ambit?
[Hulagway sa panid 18]
Ang halad lukat ni Jesus gitagana ni Jehova alang sa kaluwasan sa katawhan
[Hulagway sa panid 20]
Aron mahimong dalawaton kang Jehova ang atong pag-alagad, kinahanglang wala kitay kahugawan sa bisan unsang matang
[Hulagway sa panid 21]
Atong giila sa dayag ang pagkamaayo ni Jehova sa dihang makigbahin kita sa ministeryo