MESAK

Ang Babilonyanhong ngalan nga gihatag sa pangulong opisyal sa palasyo ni Nabucodonosor ngadto sa kauban ni Daniel nga si Misael. Ang kahulogan niining bag-ong ngalan wala matino, apan lagmit naglakip kini kang Aku, usa ka Sumerianhong diyos.

Naghupot sa Integridad Ingong Usa ka Batan-on. Si Mesak (Misael) gidalang binihag gikan sa Jerusalem ngadto sa Babilonya niadtong 617 W.K.P. duyog kang Jehoiakin ug sa uban pa. Unya si Misael, Azarias, Hananias, ug Daniel gipailalom sa hari sa Babilonya sa tulo-ka-tuig nga kurso sa pagbansay, nga sa kataposan niana sila nahimong mas maayo pa bisan sa mga magtatambag sa hari. (2Ha 24:​1, 6, 8, 12-16; Dan 1:1-7, 17-20) Sulod niining panahona kining upat nagpabiling malig-on sa ilang debosyon ngadto sa Diyos, midumili pa gani sa paghugaw sa ilang kaugalingon sa kinaham nga mga kalan-on sa hari.​—Dan 1:8-16.

Lagmit adunay tulo ka katarongan kon nganong giisip nila nga ‘makahugaw’ ang kinaham nga mga kalan-on sa hari: (1) Ang mga Babilonyanhon mokaon ug mga hayop nga gipahayag nga mahugaw sa Moisesnong Balaod; (2) dili sila mainampingon labot sa pagpatulo pag-ayo sa dugo sa mga hayop, nga ang pipila tingali giluok pa; (3) ang mga pagano sagad nga naghalad una sa mga hayop ngadto sa ilang mga diyos, nga nag-isip nga ang pagkaon sa maong mga hayop maoy usa ka bahin sa pagsimba niini nga mga diyos.​—Dan 1:8; itandi ang 1Co 10:18-20, 28.

Sa ulahi, human ibutang si Daniel sa usa ka hataas nga posisyon sa kagamhanan diha sa palasyo sa hari, si Nabucodonosor, tungod sa hangyo ni Daniel, nagtudlo kang Mesak, Sadrak, ug Abednego ingong tagdumala sa sakop nga mga distrito sa Babilonya.​—Dan 2:​48, 49.

Midumili sa Pagyukbo sa Larawan. Si Mesak ug ang iyang duha ka kauban namatikdan na usab sa hari tungod sa pagdumili sa pagyukbo sa dakong larawan nga gihimo ni Nabucodonosor, atubangan sa tanang ubang mga kawani sa kagamhanan. Uban sa bug-os nga pagtuo kang Jehova, ilang gisultihan si Nabucodonosor nga sila dili moduyog sa pag-alagad sa mga diyos sa hari. Dili hinungdanon kanila kon sila luwason ba sa ilang Diyos gikan sa hudno o dili; huptan gayod nila ang ilang integridad kaniya inay mokompromiso aron lang mahatagan ug kagawasan. (Sa Heb 11:​34, 35 gihisgotan kadtong “nagpahunong sa puwersa sa kalayo” ug kinsa dili “modawat ug kagawasan pinaagig lukat, aron nga makabaton sila ug mas maayong pagkabanhaw.”) Tungod sa ilang pagtuo giluwas sila ni Jehova pinaagi sa iyang manulonda. Ngani, sa ilang pagkagawas, “ang baho sa kalayo wala motapot kanila.” Si Nabucodonosor, nga nasuko pag-ayo ug gani mimando nga painiton ang hudno sa pito ka pilo nga labaw pa kay sa naandang pagpainit niini sa dili pa itambog silang tulo, karon miila sa ilang Diyos ingong usa ka manluluwas. Dugang pa, siya nagsugo nga si bisan kinsa nga magasultig daotan batok sa Diyos ni Mesak pagaputolputolon ug ang iyang balay himoong publikong kalibangan.​—Dan 3:1-30.