Pagsaksi Alang Kang Jehova ug Dili Managkataka
“Suod nga palandonga ninyo ang usa nga miantos sa masinupakong mga sulti sa mga makasasala . . . aron kamo dili matak-an ug mangaluya ang inyong mga kalag.”—HEBREOHANON 12:3.
1, 2. Unsang makapakabig nga kamatuoran ang gihatag ni Jesus sa iyang mga tinun-an nga siya nabanhaw?
“NAKITA ko ang Ginoo!” Uban niadtong makapakurat nga mga pulong, si Maria Magdalena nagbutyag sa balita sa pagkabanhaw ni Jesus. (Juan 20:18) Kini nagtimaan sa sinugdanan sa 40 ka adlaw nga puno sa maukyabong mga hitabo alang sa mga tinun-an ni Kristo, nga naguol sa iyang kamatayon.
2 Buot ni Jesus nga dili magduhaduha ang iyang mga tinun-an nga siya gayod buhi. Busa, ingon sa gipahayag ni Lucas: “Pinaagi sa daghang pamatuod si [Jesus] nagpakita nga buhi tapos sa iyang pag-antos, nakita nila sulod sa kap-atan ka adlaw.” (Buhat 1:3) Sa pagkamatuod, diha sa usa ka okasyon “siya mipakita sa kapin sa lima ka gatos ka mga igsoon sa usa ka higayon.” (1 Corinto 15:6) Siyempre, karon wala nay luna alang sa pagduhaduha. Si Jesus buhi!
3. Unsang pangutana mahitungod sa Gingharian ang gibangon sa mga tinun-an ni Jesus kaniya, ug nganong nakurat sila sa iyang tubag kanila?
3 Ang mga tinun-an ni Jesus niadto nagtuo lamang ug usa ka yutan-ong “gingharian sa Diyos,” nga ipasig-uli sa Israel. (Lucas 19:11; 24:21) Busa sila nangutana kang Jesus: “Ginoo, niini bang panahona karon nga igapahiuli mo ang gingharian ngadto sa Israel?” Tino nga ang iyang tubag nakapahibulong kanila, kay siya miingon: “Dili alang kaninyo ang pagkasayod sa mga panahon o kahigayonan nga gitudlo sa Amahan pinaagi sa iyang kaugalingong kagahom; apan kamo magadawat hinoon ug gahom sa diha nga kakunsaran na kamo sa balaang espiritu, ug kamo unya ang akong mga saksi sa Jerusalem ug sa tibuok Judea ug Samaria ug hangtod sa kinatumyang bahin sa yuta.” (Buhat 1:6-8) Pagkadakong hagit ang gibutang karon atubangan sa mga tinun-an! Ug pagkadako nga responsabilidad! Sa unsang paagi ilang matapos ang maong buluhaton? Ang tubag sa wala magdugay miabot sa makapakurat nga paagi.
Ang Pagdawat sa Hagit
4. Hubita kon unsay nahitabo sa adlaw sa Pentekostes.
4 Si Lucas misaysay: “Samtang gisaulog pa ang adlaw sa piyesta sa Pentekostes silang tanan nagkatigom sa usa ka dapit, ug sa kalit may miabot nga dahunog gikan sa langit ingon sa huros sa makusog nga hangin, ug kini mipuno sa tibuok balay diin didto sila nanglingkod. Ug ilang nakita ang mga dila nga daw kalayo ug nagtinagsaay sa pagpatong sa ibabaw sa matag-usa kanila, ug silang tanan napuno sa balaang espiritu ug misugod sa pagsulti sa nagkalainlaing mga pinulongan, sumala sa ipalitok kanila sa espiritu.” Pagkadako sa dahunog nga kini nakakuha sa pagtagad sa panon sa mga Hudiyo nga miestar sa Jerusalem alang sa piyesta. Sila nahibulong sa pagkadungog sa ‘ilang kaugalingong pinulongan ang mahitungod sa kahibulongang mga buhat sa Diyos.’—Buhat 2:1-11.
5. Sa unsang sukod nga natuman sa wala madugay ang panagna ni Jesus diha sa Buhat 1:8?
5 Si Pedro wala mag-usik ug panahon sa paghatag ug puwersadong pakigpulong, nga nagpamatuod sa tino nga si “Jesus nga Nazaretnon,” nga ilang gilansang, mao ang “Ginoo” nga gitagna ni David diha sa mga pulong: “Si Jehova miingon sa akong Ginoo: ‘Lumingkod ka sa akong tuo nga kamot, hangtod nga ibutang ko ang imong mga kaaway ingong tumbanan sa imong mga tiil.’” Gisakitan sa kasingkasing, ang mga mamiminaw ni Pedro nangutana: “Mga igsoon, unsa may among pagabuhaton?” Sa pagtubag giagda sila ni Pedro: “Paghinulsol kamo, ug pabawtismo ang matag-usa kaninyo diha sa ngalan ni Jesu-Kristo alang sa kapasayloan sa inyong mga sala.” Ang resulta? Tulo ka libo ang gibawtismohan! (Buhat 2:14-41) Ang pagpanaksi gikahatag na sa Jerusalem. Sa ulahi, gipakaylap kini ngadto sa tibuok Judea, dayon sa Samaria, ug sa kataposan “hangtod sa kinatumyang bahin sa yuta.” Busa kusog ang pag-uswag sa buluhatong pagsangyaw sa Gingharian nga sa mga 60 K.P. si apostol Pablo nakaingon nga ang maayong balita “giwali ngadto sa tanang mga binuhat sa silong sa langit.”—Colosas 1:23.
Ang Pag-uswag sa Gingharian ug Paglutos
6, 7. (a) Sa unsang paagi ang pag-uswag sa Gingharian ug paglutos sa mga Kristohanon nagduyog sa unang siglo? (b) Unsang dinaliang panginahanglan ang mitungha tali sa mga Kristohanon sa Jerusalem, ug giunsa pagpuno kini nga panginahanglan?
6 Wala magdugay human sa Pentekostes 33 K.P., ang mga tinun-an ni Jesus adunay katarongan sa paghinumdom sa iyang mga pulong: “Ang ulipon dili labaw sa iyang agalon. Kon ako ilang gilutos, kamo usab ilang pagalutoson.” (Juan 15:20) Ang Hudiyohanong mga lider nasuko sa dihang “ang pulong sa Diyos mikaylap, ug ang gidaghanon sa mga tinun-an sa Jerusalem mitubo sa hilabihan gayod.” Tungod sa bakak nga mga sumbong, ang tinun-ang si Esteban gibato hangtod sa kamatayon. Mopatim-aw nga kadto maoy usa ka timaan nga gipaabot sa daghan, kay “sa maong adlaw ang dakong paglutos miabot batok sa kongregasyon nga atua sa Jerusalem; ang tanan gawas sa mga apostoles nagkatibulaag sa tibuok Judea ug Samaria.”—Buhat 6:7; 7:58-60; 8:1.
7 Ang paglutos temporaryong miundang. Apan wala madugay human niadto, gipatay ni Herodes Agrippa I ang apostol nga si Santiago. Si Pedro gibilanggo apan gipagawas pinaagi sa usa ka manulonda. Sa ulahi, ang mga igsoon sa Jerusalem naglisod, ug gipadad-an sila ug tabang pinaagi sa mga isigkamagtutuo sa ubang dapit. (Buhat 9:31; 12:1-11; 1 Corinto 16:1-3) Sa panahon sa pagduaw ni apostol Pablo sa Jerusalem, tataw ang relihiyosong pagkapanatiko sa dihang ang panon sa mga tawo misinggit: “Wagtanga kanang matanga sa tawo gikan sa yuta, kay dili siya angay mabuhi!” (Buhat 22:22) Sa pagkamatuod, ang mga Kristohanon nga nagpuyo sa Jerusalem ug Judea nagkinahanglag dakong pagdasig aron makapadayon nga matinumanong magwali mahitungod sa Gingharian. Si Jesus misaad sa iyang mga tinun-an nga “ang balaang espiritu, nga ipadala sa Amahan pinaagi sa akong ngalan,” molihok ingong usa ka “magtatabang.” (Juan 14:26) Apan sa unsang paagi itagana karon sa Amahan ang maong gikinahanglang tabang o paglipay? Ang tubag, sa usa ka bahin, maoy pinaagi kang apostol Pablo.
Ang Sulat ni Pablo sa mga Hebreohanon
8. (a) Unsay nakaagda kang Pablo sa pagsulat sa iyang sulat ngadto sa mga Hebreohanon? (b) Diha sa unsang bahin sa iyang sulat nga ato karong hatagan ug pagtagad, ug ngano?
8 Niadtong mga 61 K.P., si Pablo nabilanggo sa Roma, apan siya nahibalo sa nagakahitabo sa iyang mga igsoon sa Jerusalem. Busa, ubos sa paggiya sa espiritu ni Jehova, iyang gisulat ang iyang tukma sa panahong sulat ngadto sa mga Hebreohanon. Kini puno sa iyang mahigugmaong kabalaka alang sa iyang Hebreohanong mga igsoong lalaki ug babaye. Si Pablo nasayod kon unsay ilang gikinahanglan aron nga ang ilang pagtuo ug pagsalig matukod diha kang Jehova ingong ilang Magtatabang. Sa ingon niana sila ‘makadagan nga malahutayon sa lumba nga gibutang sa ilang atubangan’ ug masaligong moingon: “Si Jehova mao ang akong magtatabang; Ako dili mahadlok. Unsay arang mahimo sa tawo kanako?” (Hebreohanon 12:1; 13:6) Niining bahina sa sulat ni apostol Pablo ngadto sa mga Hebreohanon (kapitulo 11-13) nga ato karong hatagan ug pagtagad. Ngano? Tungod kay ang kahimtang nga giatubang niadtong unang mga Kristohanon managsama sa ginaatubang sa mga Saksi ni Jehova karong adlawa.
9. Unsang isyu ang naatubang sa mga Kristohanon sa unang siglo ang giatubang sa mga Kristohanon karong adlawa, ug sa unsa lamang nga paagi nga kini mabuntog?
9 Sa atong kaliwatan, daghan ang misanong nga positibo sa balita sa Gingharian pinaagi sa pagpahinungod sa ilang kaugalingon kang Jehova ug nagpabawtismo ingong iyang mga Saksi. Apan, duyog niining pag-uswag sa matuod nga pagsimba miabot ang mabangis nga paglutos, daghang Kristohanon nawad-an sa ilang mga kinabuhi sama kang Esteban, Santiago, ug uban pang matinumanon unang-siglong mga saksi. Busa, ang isyu karon sama gihapon kaniadto: Kinsay makabarog sa pagsulay sa ilang integridad atubangan sa nagatubong pagsupak sa balita sa Gingharian? Dugang pa, kinsay makaatubang sa makahahadlok nga mga hitabo samtang ang dihitupngang “dakong kasakitan” sa dili madugay ipakanaog niining presenteng kaliwatan? (Mateo 24:21) Ang tubag mao, kadtong andam nga “makig-away sa maayong pakig-away sa pagtuo,” kadtong kinsa “lig-on sa pagtuo.” Kini sila sa kataposan mao ang makaingon: “Mao kini ang pagdaog nga nagadaog sa kalibotan, ang atong pagtuo.”—1 Timoteo 6:12; 1 Pedro 5:9; 1 Juan 5:4.
Pagkuhag Kaayohan Gikan sa Matinumanong Panig-ingnan
10. (a) Unsa ang pagtuo? (b) Unsay pagbati sa Diyos mahitungod sa mga lalaki ug babaye sa pagtuo sa karaang mga panahon?
10 Unsa ang pagtuo? Si Pablo mitubag: “Ang pagtuo mao ang tinong pagpaabot sa mga butang nga gilaoman, ang tin-aw nga pasundayag sa mga kamatuoran bisan pag wala makita. Kay tungod niini ang mga tawo sa karaan gipanghimatud-an.” (Hebreohanon 11:1, 2) Unya gisuportahan ni Pablo ang iyang pagbatbat sa pagtuo pinaagi sa pagpakita sa pagtuo nga nagalihok. Iyang gikutlo ang tagsaong bahin sa mga kinabuhi sa pipila ka “mga tawo sa karaan,” apil ang mga babaye nga sama kang Sarah ug Rahab. Pagkamakapadasig ang pagkakaplag nga “Ang Diyos dili maulaw nga pagaingnon siya nga ilang Diyos”! (Hebreohanon 11:16) Ikaingon ba sa Diyos ang sama niana kanato tungod sa atong pagtuo? Hinaot nga dili nato hatagan siyag hinungdan nga maulaw kanato sa dihang matapos ang matag usa ka adlaw.
11. Sa unsang paagi kita karong adlawa makabenepisyo gikan sa “panganod sa mga saksi nga nagalibot kanato”?
11 Human sa asoy mahitungod niining matinumanong mga lalaki ug babaye, si Pablo miingon: “Busa, karon, sanglit ginalibotan man kita sa ingon ka bagang panganod sa mga saksi, iwakli ta ang tanang kabug-at ug ang sala nga nagapiit sa paglikos kanato, ug dalaganon ta nga malahutayon ang lumba nga gibutang sa atong atubangan.” (Hebreohanon 12:1) Bisan pa nga natulog na karon sa lubnganan, kini bang dalayegon matinumanong mga saksi buhi sa atong hunahuna? Nakaila ka ba gayod kanila ug sa ilang mga kasinatian nga igong makatubag ug oo? Kini maoy usa sa daghang ganti sa regular nga pagtuon sa Bibliya, nga gamiton ang tanan natong mga sentido sa pagbuhi pag-usab sa kulbahinam nga mga kasinatian niining “panganod sa mga saksi.” Sa pagkamatuod, ang pagsilsil diha sa kasingkasing sa ilang matinumanong mga panig-ingnan makatabang kanatog dako sa pagbuntog sa bisan unsang kakulang sa pagtuo. Sa baylo, kini makatabang kanato sa paghatag ug maisogon ug walay-kahadlok nga pagpamatuod sa kamatuoran ilalom sa tanang mga kahimtang.—Roma 15:4.
Dili Managkataka
12. (a) Sa unsang paagi ang panig-ingnan ni Jesus makatabang kanato nga dili ‘matak-an ug mangaluya ang atong mga kalag’? (b) Unsa ang pipila ka presenteng-adlawng mga panig-ingnan niadtong wala matak-i?
12 Ang atong labing dakong panig-ingnan sa pagtuo mao si Jesus. Si Pablo miagda: “Dalaganon ta nga malahutayon ang lumba nga gibutang sa atong atubangan, samtang nagatutok kita nga maikagon sa Pangulong Ahente ug Maghihingpit sa atong pagtuo, si Jesus. . . . Sa pagkamatuod, suod nga palandonga ninyo ang miantos sa masinupakong mga sulti sa mga makasasala batok sa ilang kaugalingong kaayohan, aron nga kamo dili matak-an ug mangaluya ang inyong mga kalag.” (Hebreohanon 12:1-3) Unsa ka “suod” ang imong pagpalandong sa panig-ingnan ni Jesus? Unsa ikaw ka “maikagon” nga nagatutok kaniya? (1 Pedro 2:21) Buot ni Satanas nga kita ‘matak-an ug mangaluya ang atong mga kalag.’ Buot niya nga mohunong kita sa pagbuhat sa buluhatong pagsangyaw. Sa unsang paagi iyang buhaton kini? Usahay pinaagi sa direkta nga pagsupak gikan sa relihiyoso ug kalibotanong mga awtoridad, sama sa unang siglo. Sa miaging tuig, ang buluhatong pagwali sa Gingharian gidili sa 40 ka nasod. Apan kana ba nakapaluya sa atong mga igsoon? Wala! Ang ilang matinumanong pagsangyaw miresultag 17,000 ug kapin pa nga nabawtismohan niadtong mga yutaa sa 1988. Pagkamaayong padasig kini alang sa tanan niadtong nanagpuyo sa mga nasod nga adunay kagawasan! Dili gayod nato tugotang matak-an kita sa pagsangyaw sa maayong balita sa Gingharian!
13. (a) Unsa ang pipila ka malalangong mga butang nga makapaluya kanato sa buluhatong pagsangyaw? (b) Unsa ‘ang kalipay nga gibutang sa atubangan ni Jesus,’ ug sa unsang paagi kita makabaton sa samang malipayong tinamdan?
13 Bisan pa niana, adunay laing mas malipotong mga butang nga mopaluya kanato. Kini nag-apil sa pagsupak sa nabahin nga panimalay, kaguol sa hunahuha, mga suliran sa panglawas, pagpiit sa isigkaingon, pagkawala sa kadasig tungod sa kakulang sa positibong mga resulta sa atong buluhatong pagsangyaw, o tingali bation ang kalaay tungod kay ang kataposan ning sistema sa mga butang wala pa moabot. Buweno, unsay nakatabang kang Jesus sa paglahutay sa mental ug pisikal nga kalisdanan? Kadto mao “ang kalipay nga gibutang sa iyang atubangan.” (Hebreohanon 12:2) Si Jesus gipalig-on sa kalipay nga mapahimut-an ang kasingkasing sa iyang Amahan pinaagi sa pagbayaw Kaniya ug sa pagpaabot sa kalipay sa ulahi nga iyang matagamtaman sa pagpakanaog sa kahibulongang mga panalangin sa Mesiyanikong Gingharian. (Salmo 2:6-8; 40:9, 10; Proverbio 27:11) Kita ba makasunod nga labi pang maikagon niining malipayong tinamdan ni Jesus? Ug hinumdomi ang pasalig ni Pedro sa 1 Pedro 5:9: “Ang samang mga pag-antos masinati sa tanan nga kapunongan sa inyong mga igsoon sa kalibotan.” Kay nasayod nga si Jehova nakasabot, ang mainit nga pagbati sa tibuok-yutang panag-igsoonay, ug ang atong pagtutok sa mga kalipay nga anaa sa atong unahan ubos sa pagmando sa Gingharian—kining tanan makatabang nga dili kita matak-an sa pag-alagad kang Jehova diha sa pagtuo ug sa pagsangyaw sanglit ang kataposan duol na kaayo.
Nganong Nagadisiplina si Jehova
14. Unsang mga kaayohan ang moresulta gikan sa mga pagsulay ug mga pag-antos nga hayan atong pagalahutayon?
14 Karon gipunting ni Pablo ang hinungdan kon nganong lahutayon nato ang mga pagsulay ug mga pag-antos. Siya nagasugyot nga lantawon nato kana ingong matang sa disiplina. Si Pablo nangatarongan: “Anak ko, ayaw pagtamaya ang disiplina nga gikan kang Jehova, ni maluya ka sa dihang ikaw pagabadlongon niya; kay ginadisiplina ni Jehova ang iyang gihigugma.” (Hebreohanon 12:5, 6) Bisan si Jesus “nakakat-on sa pagkamasinundanon gikan sa mga butang iyang giantos.” (Hebreohanon 5:8) Sa pagkatinuod, kita nagkinahanglan usab nga makakat-on sa pagsunod. Matikdi ang mapuslanong mga epekto sa pagtugot sa disiplina nga moumol kanato. Si Pablo miingon: “Kadtong nabansay niana magapamunga ug malinawong bunga, nga mao, ang pagkamatarong.” Pagkamakapadasig kana!—Hebreohanon 12:11.
15. Sa unsang paagi ipadapat nato ang tambag ni Pablo nga ‘himoang matul-id ang agianan sa atong mga tiil’?
15 Kon kita modawat sa “disiplina nga gikan kang Jehova” niining kahayag, atong isilsil sa atong kasingkasing ang maayong tambag ni Pablo: “Busa iisa ang inyong nahoyhoy nga mga kamot ug lig-ona ang inyong mahuyang nga mga tuhod, ug himoang matul-id ang pagaagian sa inyong mga tiil.” (Hebreohanon 12:12, 13) Usahay dali kaayong mahitipas gikan sa ‘hiktin nga dalan padulong sa kinabuhi.’ (Mateo 7:14) Dihay panahon nga si apostol Pedro ug ang uban sa Antoqiua sad-an niini. Ngano? Kay “sila wala managlakaw nga matul-id sumala sa kamatuoran sa maayong balita.” (Galacia 2:14) Karong adlawa, kita angay nga magpadayon sa pagpatalinghog sa atong Dakong Instruktor, si Jehova nga Diyos. Angay natong gamiton sa bug-os ang mga tabang nga gitagana pinaagi sa “matinumanon ug maalamong ulipon.” Kini tino nga mohatag ug ‘matul-id nga agianan’ alang sa atong mga tiil.—Mateo 24:45-47; Isaias 30:20, 21.
16. (a) Sa unsang paagi ang “makahilong gamot” makahawid sa kongregasyon? (b) Nganong gilangkit ni Pablo ang imoralidad uban sa kakulag apresasyon sa balaang mga butang, ug sa unsang paagi atong maampingan ang atong kaugalingon batok sa maong kapeligrohan?
16 Sunod nagpasidaan si Pablo nga kita angay nga “mag-amping nga walay usa ang mohikaw kanato sa pagkab-ot sa dili-takos nga kalulot sa Diyos; nga walay makahilong gamot ang mogitib ug mohatag kasamok ug tungod niini daghan ang matakdan sa kahugaw.” (Hebreohanon 12:15) Ang kasuko, pagkawalay-kahimuot, pagpangitag sayop sa paagi sa pagpalakaw sa mga butang sa kongregasyon mahisama sa usa ka “makahilong gamot” nga daling mokanat ug mohilo sa maayong mga panghunahuna sa uban diha sa kongregasyon. Atong masanta kanang maong negatibong mga panghunahuna pinaagi sa pagpamalandong sa dili-maisip nga mga panalangin nga nahatag sa kamatuoran diha sa atong kinabuhi. (Salmo 40:5) Ang laing kapeligrohan mao kanang pagbaton ug imoral nga kiling o ‘kakulang sa apresasyon sa balaang mga butang, sama kang Esau.’ (Hebreohanon 12:16) Gilangkit ni Pablo kining duha ka kapeligrohan, sanglit ang usa daling mosangpot sa lain. Dili kinahanglan nga ang Kristohanon magpadaog sa maong hakog nga mga kailibgon kon iyang ipadapat ang mga pulong ni Pablo: “Managpanukol kamo batok [sa Yawa], magmalig-on diha sa pagtuo.”—1 Pedro 5:9.
“Mga Kamatuoran Bisag Wala Makita”
17. Itandi ang makalilisang nga mga hitabo sa Bukid sa Sinai uban niadtong ginaatubang sa mga Kristohanon karong adlawa.
17 Ang atong pagtuo nagadepende gayod sa “mga kamatuoran bisag wala makita.” (Hebreohanon 11:1) Ang pipila niining wala-makitang mga kamatuoran gipadayon ni Pablo sa paghisgot diha sa Hebreohanon 12:18-27. Iyang gibatbat ang kahibulongang mga hitabo sa Bukid sa Sinai sa dihang ang Diyos direktang nakigsulti sa Israel ug sa dihang si Moises miingon: “Ako nangurog sa kalisang.” Dayon ang apostol midugang: “Apan kamo nakaduol sa Bukid sa Sion ug sa siyudad sa buhi nga Diyos, ang langitnong Jerusalem, ug sa panon sa mga manulonda, nga nanagtigom.” Mahitungod sa karaang mga Israelitas sa Bukid sa Sinai, ang tingog sa Diyos nakapatay-og sa yuta, matud ni Pablo, apan karon Siya misaad, nga nagaingon: “Apan sa makausa pa pagatay-ogon ko dili lamang ang yuta kondili ang langit usab.” Bisan tuod kining mga pulonga gipahayag alang sa dinihogang mga Kristohanon, ang “dakong panon” sa ubang mga karnero madasig usab niini. (Pinadayag 7:9) Bug-os ba nimong nasabtan ang gipamulong ni Pablo? Kita nagbarog atubangan sa nagkatigom nga tinagpulo ka libong mga manulonda. Siyempre, kita usab nagabarog atubangan kang Jehova. Sa iyang tuo nga kamot mao si Jesu-Kristo. Sa pagkamatuod, kita anaa sa mas makalilisang nga kahimtang ug ubos sa labi pa ka dakong responsabilidad kay sa karaang mga Hebreohanon niadto diha sa Bukid sa Sinai! Ug hinumdomi, ang pagtay-og sa umaabot nga gubat sa Armageddon mopawagtang sa presente daotang langit ug yuta. Sa tino dili na karon panahon sa “pagpamalibad” sa pagpatalinghog sa Pulong sa Diyos ug sa pagsunod niana!
18. Sa unsang paagi lamang nga kita makapadayon sa pagsaksi alang kang Jehova, nga dili matak-an?
18 Nan, sa pagkatinuod kita nagkinabuhi na sa labing makalilisang nga panahon sa tawhanong kasaysayan. Ingong mga Saksi ni Jehova, kita gipadala ngadto sa kinatumyang bahin sa yuta aron isangyaw ang maayong balita sa natukod na nga Gingharian sa Diyos. Sa pagbuhat niini, kita kinahanglan nga adunay pagtuo nga dili matarog, usa ka pagtuo nga dili matak-an, usa ka pagtuo nga mohimo kanatong madinawaton sa disiplina ni Jehova. Kon kita aduna nianang maong pagtuo, kita hikaplagan taliwala niadtong kinsa “nagapadayon sa pagbaton sa dili-takos nga kalulot, nga pinaagi niana kita makahatag balaang pag-alagad nga kahimut-anan sa Diyos uban ang diyosnong kahadlok ug pagtahod.” (Hebreohanon 12:28) Oo, ug kita magpadayon sa pagsaksi alang kang Jehova ug dili managkataka.
Unsaon Nimo sa Pagtubag?
◻ Nganong ang sulat ni Pablo sa mga Hebreohanon mapuslanon kanato?
◻ Unsang isyu ang angay atubangon sa mga Kristohanon karong adlawa?
◻ Sa unsang paagi kita makabenepisyo gikan sa matinumanong mga saksi sa karaan?
◻ Nganong gidisiplina ni Jehova kadtong iyang gihigugma?
◻ Unsa ang yawi sa pagsangyaw nga dili matak-an?