Si Jehova Mao ang Akong Magtatabang

“Magmaisogon ug magaingon: ‘Si Jehova ang akong magtatabang; ako dili mahadlok. Unsa may arang mahimo sa tawo kanako?’”—HEBREOHANON 13:6.

1, 2. (a) Ang salmista ug si apostol Pablo mipahayag ug unsang pagsalig kang Jehova? (b) Unsang mga pangutana ang mobangon?

SI Jehova nga Diyos maoy dili-mapakyas nga tuboran sa tabang. Ang salmista nahibalo niini gikan sa naagian ug nakaingon: “Si Jehova dapig kanako; ako dili mahadlok. Unsay arang mahimo sa tawo kanako?” (Salmo 118:6) Ang samang mga sentimento ang gipahayag ni apostol Pablo sa dihang iyang gisulat ang iyang balaang pagkadasig nga sulat ngadto sa Hebreohanong mga Kristohanon.

² Dayag nga nagkutlo sa mga pulong sa salmista gikan sa Greek Septuagint, gisultihan ni Pablo ang mga Hebreohanong isigkamagsisimba: “Magmaisogon ug magaingon: ‘Si Jehova ang akong magtatabang; ako dili mahadlok. Unsa may arang mahimo sa tawo kanako?’” (Hebreohanon 13:6) Nganong misulat ang apostol niining paagiha? Ug unsay atong makat-onan gikan sa konteksto?

Nagkinahanglan sa Tabang ni Jehova

3. (a) Ubos sa unsang mga kahimtang nga si Jehova napamatud-ang Magtatabang kang Pablo? (b) Nganong ang Hebreohanong mga Kristohanon nagkinahanglan gayod kang Jehova ingong ilang Magtatabang?

³ Si Pablo maoy masakripisyohon sa kaugalingon nga saksi nga may pamatuod nga si Jehova maoy iyang Magtatabang. Ang Diyos mitabang sa apostol atubangan sa daghang mga kalisod. Si Pablo nabilanggo, gibunalan, ug gibato. Sa iyang mga biyahe ingong usa ka Kristohanong ministro, iyang naagian ang pagkalunod sa barko ug daghan pang ubang mga kapeligrohan. Sinati kaayo siya sa pagpangabudlay, sa masubsob nga pagtukaw sa kagabhion, sa kagutom, sa kauhaw, ug sa kahubo. “Ug gawas pa sa gawasnong mga butang,” matud pa niya, “anaa ang adlaw-adlaw nga pagpiit kanako, tungod sa kabalaka alang sa tanang mga kongregasyon.” (2 Corinto 11:24-29) Aduna nianang matanga sa kabalaka si Pablo alang sa Hebreohanong mga Kristohanon. Ang mga adlaw sa Jerusalem maihap na lang, ug ang Hudiyohanong mga igsoong lalaki ug babaye sa apostol sa Judea magaatubang ug dakong pagsulay sa pagtuo. (Daniel 9:24-27; Lucas 21:5-24) Busa gikinahanglan nila si Jehova ingong ilang Magtatabang.

4. Unsang sukaranong tambag ang gipadayag sa tibuok nga sulat ngadto sa mga Hebreohanon?

⁴ Sa pagbukas sa iyang sulat ngadto sa Hebreohanong mga Kristohanon, gipakita ni Pablo nga ang balaang tabang mabatonan lamang kon mamati sila sa Anak sa Diyos, si Jesu-Kristo. (Hebreohanon 1:1, 2) Kining puntoha ang gipasiugda diha sa sulat. Pananglitan, aron paluyohan kining tambaga, gipahinumdoman sa apostol ang iyang mga magbabasa nga ang mga Israelitas gisilotan tungod sa pagkamasinupakon didto sa kamingawan. Unsa pa kaha nga dili makaikyas ang Hebreohanong mga Kristohanon sa silot kon ilang isalikway ang gipamulong sa Diyos kanila pinaagi ni Jesus ug mahimong mga apostata nga mohawid gihapon sa Moisesnong Kasugoan nga giwakli na pinaagi sa halad ni Kristo!​—Hebreohanon 12:24-27.

Inigsoong Gugma nga Nagalihok

5. (a) Unsay laing tambag ang gitagana sa sulat ngadto sa mga Hebreohanon? (b) Unsay giingon ni Pablo bahin sa gugma?

⁵ Ang sulat ngadto sa mga Hebreohanon naghatag sa umaabot nga mga manununod sa langitnong Gingharian ug tambag kon unsaon nila sa pagsunod sa ilang Sulondan, si Jesu-Kristo, sa ‘paghatag balaang pag-alagad uban ang diyosnong kahadlok ug pagtahod,’ ug makabaton kang Jehova ingong ilang Magtatabang. (Hebreohanon 12:1-4, 28, 29) Giagda ni Pablo ang mga isigkamagtutuo sa pagtigom kanunay ug ‘magdinasigay sa usa ug usa sa paghigugma ug sa maayong binuhatan.’ (Hebreohanon 10:24, 25) Karon siya mitambag: “Himoa nga ang gugmang inigsoon magpadayon diha kaninyo.”​—Hebreohanon 13:1.

6. Sa unsang diwa nga gihatagan ni Jesus ang iyang mga sumusunod ug “usa ka bag-ong sugo” bahin sa gugma?

⁶ Gikinahanglan ni Jesus ang maong gugma diha sa iyang mga sumusunod, kay siya miingon: “Ako magahatag kaninyog bag-ong sugo, nga kamo maghigugmaay sa usa ug usa; maingon nga ako nahigugma kaninyo, nga kamo usab maghigugmaay sa usa ug usa. Pinaagi niini ang tanan mahibalo nga kamo akong mga tinun-an, kon kamo adunay gugma sa inyong taliwala.” (Juan 13:34, 35) Kini maoy “usa ka bag-ong sugo” sa pagkaagi nga kini nagkinahanglan ug labaw pa kay sa Kasugoan ni Moises, nga nagaingon: “Higugmaon mo ang imong isigkatawo [o, silingan] sama sa imong kaugalingon.” (Levitico 19:18) Ang “bag-ong sugo” nagkinahanglag labaw pa alang sa usa ka tawo sa paghigugma lamang sa iyang silingan sama sa paghigugma niya sa iyang kaugalingon. Kini nanginahanglag masinakripisyohon sa kaugalingong gugma hangtod sa punto nga ihatag niya ang iyang kaugalingong kinabuhi alang sa uban. Ang kinabuhi ug kamatayon ni Jesus naglarawan nianang matanga sa gugma. Si Tertullian mihisgot niining maong ilhanan sa dihang iyang gikutlo ang mga komento sa kalibotanong mga tawo mahitungod sa mga Kristohanon ug miingon: “‘Tan-awa,’ sila miingon, ‘kon unsa kadako sa ilang gugma sa usa ug usa . . . ug pagkaandam nilang mamatay alang sa usag-usa.’”​—Apology, kapitulo XXXIX, 7.

7. Sa unsang paagi ang inigsoong gugma nakita tapos sa Pentekostes 33 K. P.?

⁷ Ang inigsoong gugma makita taliwala sa mga tinun-an ni Jesus human sa Pentekostes 33 K.P. Maoy hinungdan nga daghan sa bag-ong nabawtismohang mga magtutuo nga gikan sa halayong mga dapit nagpabilin una sa Jerusalem ug nagtuon pag dugang bahin sa tagana sa Diyos alang sa kaluwasan pinaagi ni Kristo, “ang tanan nga nahimong magtutuo nag-usa sa pag-ambit sa usa ka butang, ug gibaligya nila ang ilang mga nabatonan ug mga kabtangan ug ang halin giapod-apod ngadto sa tanan, sumala sa gikinahanglan sa usag usa.”​—Buhat 2:43-47; 4:32-37.

8. Unsay pamatuod nga naglungtad ang inigsoong gugma taliwala sa mga Saksi ni Jehova karong adlawa?

⁸ Ang maong inigsoong gugma naglungtad taliwala sa mga Saksi ni Jehova sa atong panahon. Pananglitan, human sa Gubat Kalibotan II, ang maong gugma nagpalihok sa katawhan sa Diyos sa pagbuhat sa duha-ug-tunga ka tuig nga kampanya sa hinabang. Ang mga Saksi sa Canada, sa Sweden, Switzerland, sa Tinipong Bansa ug sa ubang mga kayutaan mihatag ug mga besti ug salapi aron ipalit ug pagkaon alang sa isigkamagtutuo diha sa gigusbat-sa-gubat nga mga nasod sa Austria, Belgium, Bulgaria, Tsina, Czechoslovakia, Denmark, Inglatera, Pinlandiya, Pransiya, Alemanya, Gresya, Hungariya, Italya, sa Netherlands, Norway, sa Pilipinas, Polandiya, ug Romanya. Kini maoy pananglitan lamang, kay ang mga alagad sa Diyos sa dili pa dugay nagpakita sa maong gugma alang sa Kristohanong mga biktima sa mga linog sa Peru ug Mexico, sa mga bagyo sa Jamaica, ug sa susamang mga katalagman sa ubang dapit. Kini ug sa daghan pang ubang mga paagi, ang katawhan ni Jehova ‘nagpadayon sa pagpakita sa ilang inigsoong gugma.’

Magmaabiabihon

9. (a) Unsang diyosnong hiyas ang gihisgotan diha sa Hebreohanon 13:2? (b) Sa unsang paagi ang pipila wala mahibalo nga ‘nakaabiabi ug mga manulonda’?

⁹ Sunod gihisgotan ni Pablo ang laing hiyas nga gipakita niadtong nagasundog kang Kristo, sa ‘paghatag balaang pag-alagad uban ang diyosnong kahadlok ug pagtahod,’ ug nakabaton kang Jehova ingong ilang Magtatabang. Siya miawhag: “Ayaw kamo pagkalimot sa pag-abiabi, kay tungod niini ang pipila, nga wala lang mahibalo, nakaabiabi ug mga manulonda.” (Hebreohanon 13:2) Kinsa ang wala-mahibalo nga “nakaabiabi ug mga manulonda”? Buweno, ang patriarkang si Abraham mao ang miabiabi sa tulo ka manulonda. (Genesis 18:1-22) Ang duha kanila milakaw, ug ang iyang pag-umangkong si Lot midapit niini mismong mga dumuloong sa iyang balay sa Sodoma. Sa wala pa sila matulog, hinunoa, ang balay ni Lot gilibotan sa dakong panon sa mga tawo, “gikan sa batang lalaki ngadto sa tigulang nga lalaki.” Gipangayo nila nga ihatag ni Lot ang iyang mga bisita alang sa imoral nga katuyoan, apan siya kusganong midumili. Bisan pa nga si Lot wala mahibalo niini sa sinugdan, siya nakaabiabi ug mga manulonda, kinsa mitabang kaniya ug sa iyang mga anak nga babaye sa pag-ikyas sa kamatayon sa dihang ‘gipaulanan ni Jehova sa kalayo ug asupre nga gikan sa langit ang Sodoma ug Gomorra.’​—Genesis 19:1-26.

10. Unsang mga panalangin ang gitagamtam sa maabiabihong mga Kristohanon?

¹⁰ Ang maabiabihong mga Kristohanon nagatagamtam ug daghang panalangin. Madunggan nila ang makapadasig nga mga kasinatian nga isugilon sa ilang mga bisita ug makapahimulos sa ilang magantihong espirituwal nga pag-ubanay. Si Gayo gidayeg sa maabiabihong pagdawat sa mga isigkamagtutuo, “ug mga dumuloong pa,” sama sa daghang katawhan ni Jehova karon nga nagaabiabi sa nagapanaw nga mga magtatan-aw. (3 Juan 1, 5-8) Ang pagkamaabiabihon maoy usa ka kuwalipikasyon aron matudlo ingong usa ka ansiano. (1 Timoteo 3:2; Tito 1:7, 8) Bililhon usab nga si Jesus misaad sa mga panalangin sa Gingharian ngadto sa samag-karnero nga mga indibiduwal kinsa maabiabihong nagabuhat ug maayo ngadto sa iyang dinihogang “mga igsoon.”​—Mateo 25:34-40.

Hinumdomi Kadtong Ginalutos

11. Nganong tukma ang tambag sa Hebreohanon 13:3?

¹¹ Kadtong nagatinguha nga makabaton sa tabang ni Jehova ug sa ‘paghatag kaniya ug balaang pag-alagad uban ang diyosnong kahadlok ug pagtahod’ kinahanglang dili makalimot sa isigkamagtutuo nga nagaantos. Nakasabot si Pablo sa mga kalisod nga giantos sa dinaogdaog nga mga Kristohanon. Sayo pa niana, ang mga tinun-an nagkatibulaag tungod sa paglutos, ug ang iyang isigkamagbubuhat nga si Timoteo mao pay pagkagawas gikan sa bilanggoan. (Hebreohanon 13:23; Buhat 11:19-21) Ang Kristohanong mga misyonaryo nagalakbay usab sa pagtukod ug bag-ong mga kongregasyon o nagapalig-on sa espirituwal sa mga natukod na. Sanglit daghan sa mga igsoong lalaki ug babaye niadto nga nagalakbay mga Hentil man, ang pipila ka Hebreohanong mga Kristohanon tingali walay igong kabalaka kanila. Nan, tukma gayod ang tambag: “Hinumdomi ninyo sila nga anaa sa bilanggoan nga daw nabilanggo usab kamo uban kanila, ug silang dinaogdaog, sanglit kamo anaa man usab sa lawas.”​—Hebreohanon 13:3.

12. Sa unsang paagi atong ikapadapat ang tambag nga hinumdoman ang dinaogdaog nga mga isigkamagtutuo?

¹² Ang mga Hebreohanon “mipakitag kaluoy niadtong nabilanggo” apan gisugo sa dili pagkalimot sa matinumanong isigkamagsisimba, kon sila man mga Hudiyo o mga Hentil. (Hebreohanon 10:34) Apan unsa man ang mahitungod kanato? Sa unsang paagi mapakita nato nga anaa sa atong hunahuna ang dinaogdaog nga mga Kristohanon? Sa pila ka kaso tingali maoy tukma alang kanato sa paghangyo sa mga awtoridad sa kagamhanan pinaagig sulat sa tinguha nga matabangan ang isigkamagtutuo nga nabilanggo tungod sa ilang pagtuo diha sa mga yuta nga gidili ang buluhatong pagsangyaw sa Gingharian. Ilabina nga atong hinumdoman sila sa atong mga panalangin, hisgotan ang pipila sa ilang ngalan, kon mahimo. Ang ilang paglutos dulot nga nagaapektar kanato, ug si Jehova mopatalinghog sa atong tim-os nga mga pangamuyo alang kanila. (Salmo 65:2; Efeso 6:17-20) Bisag wala kita diha sa samang selda sa bilanggoan, kita ingon sa daw nabilanggo uban kanila ug makahimo sa pagtanyag ug tabang ug pagdasig. Ang inanak sa espiritung mga Kristohanon sa pagkamatuod may pagbati sa dinaogdaog nga mga dinihogan. (Itandi ang 1 Corinto 12:19-26.) Sila dunay samang kabalaka alang sa ilang ginalutos nga kaubanan nga dunay yutan-ong paglaom, kinsa nag-antos usab sa pagdaogdaog sa daghang matang diha sa mga kamot sa mga maglulutos. Ang maong pagkamabination sa isigkaingon tukma, sanglit kitang tanan anaa pa sa usa ka tawhanong lawas ug may kalagmitan nga makaagom ug mga pag-antos ug mga paglutos ingong mga magsisimba ni Jehova.​—1 Pedro 5:6-11.

Ang Kaminyoon Kinahanglang Madungganon

13. Sa katibuk-an, unsay giingon ni Pablo diha sa Hebreohanon 13:4?

¹³ Ang pagsunod sa panig-ingnan ni Kristo ug sa ‘paghatag balaang pag-alagad kang Jehova uban ang diyosnong kahadlok ug pagtahod’ angay makaapekto sa atong kabalaka alang sa uban sa daghang paagi. Mipahayag nga “kamo anaa man usab sa lawas,” si Pablo naghisgot sa usa ka relasyon nga lawasnon, o pisikal, nga bahin nga makahatag higayon nga ipakita ang hustong pagtagad sa uban. (Hebreohanon 13:3) Siya mihatag sa Hebreohanong mga Kristohanon niining tambaga: “Himoa ninyo nga ang kaminyoon madungganon sa tanan, ug ang higdaanan sa panagtiayon dili mahugawan, kay ang Diyos magasilot sa mga makihilawason ug sa mga mananapaw.” (Hebreohanon 13:4) Pagkatukma niining tambaga, sanglit kaylap ang seksuwal nga imoralidad sa Romanhong Imperyo! Ang presenteng-adlaw nga mga Kristohanon angay usab nga magpatalinghog niining mga pulonga tungod sa ubos nga mga sukdanan sa moral sa kalibotan ug sa kamatuoran nga linibo matag tuig ang napalagpot sa kongregasyon tungod sa seksuwal nga imoralidad.

14. Sa unsang paagi imong ikaingon nga ang kaminyoon dungganon?

¹⁴ Taliwala niadtong walay hataas nga pagtamod sa kaminyoon mao ang mga Essene sa panahon ni Pablo. Sila kasagaran maoy dili-minyo, sama sa pipila sa kaklerohan karon kinsa sayop nga nag-isip nga ang pagkadili-minyo mas balaan kay sa minyo. Sumala sa gisulti ni Pablo sa Hebreohanong mga Kristohanon, hinunoa, iyang gipatin-aw nga ang kaminyoon dungganon. Ang hataas nga pagtamod niana nakita sa dihang gipahayag ni Noemi kining tinguhaa alang sa iyang nabalo nga mga umagad, si Ruth ug Orpa: “Hinaot si Jehova magahatag gasa kaninyo, ug ang matag-usa kaninyo makakaplag pahulay diha sa balay sa iyang bana.” (Ruth 1:9) Sa laing dapit, gipunting ni Pablo nga ‘sa kaulahiang mga panahon adunay managpamiya gikan sa pagtuo, nga nanagdili sa pagpangasawa.’​—1 Timoteo 4:1-5.

15. Kinsa ang ginganlag mga makihilawason ug mga mananapaw diha sa Hebreohanon 13:4, ug sa unsang paagi ang Diyos magasilot kanila?

¹⁵ Ang mga Hebreohanon nga niadto ilalom sa Kasugoan apan gipagawas ngadto sa bag-ong pakigtugon nahibalo sa sugo: “Dili kamo manapaw.” (Exodo 20:14) Apan sila anaa sa imoral nga kalibotan ug nagkinahanglan sa pasidaan: “Himoa . . . nga ang higdaanan sa panagtiayon dili mahugawan, kay ang Diyos magasilot sa mga makihilawason ug mga mananapaw.” Apil sa mga makihilawason mao ang mga tawong dili-minyo nga nagabuhat sa seksuwal nga relasyon. Ang mga mananapaw mao ilabina ang minyong mga indibiduwal nga nakigloon uban sa mga tawo nga dili nila mga kapikas, nga nagahugaw sa ilang kaugalingong higdaanan sa panagtiayon. Sanglit ang dimahinulsolong mga makihilawason ug mananapaw takos man sa silot sa Diyos, sila dili pagadawaton ngadto sa Bag-ong Jerusalem ni makapahimulos sa walay kataposang kinabuhi sa yuta ubos sa pagmando sa Gingharian. (Pinadayag 21:1, 2, 8; 1 Corinto 6:9, 10) Kining pasidaana sa dili paghugaw sa higdaanan sa panagtiayon angay mopahimo usab sa minyong mga Kristohanon sa paglikay nga dili mahugawan ang seksuwal nga buhat uban sa ilang mga kapikas, bisan pag walay butang nga mahugaw maylabot sa hustong pisikal nga panagsuod sulod sa kaminyoon.​—Tan-awa ang The Watchtower, Marso 15, 1983, panid 27-31.

Magmakontento sa Presenteng mga Butang

16, 17. Unsay giingon sa Hebreohanon 13:5, ug nganong gikinahanglan sa mga Hebreohanon kining tambaga?

¹⁶ Kita makakaplag ug katagbawan kon atong sundon ang atong Sulondan ug ‘maghatag balaang pag-alagad uban ang diyosnong kahadlok ug pagtahod,’ masaligon nga si Jehova mao ang atong Magtatabang. Ang dulot nga pagkalangkit sa materyalistikong mga tinguha maoy usa ka pagsulay niana. Apan ang mga Kristohanon kinahanglang dili magpadaog niana. Ang mga Hebreohanon gisultihan: “Himoa nga ang inyong paagi sa pagkinabuhi mahigawas sa pagkamahigugmaon sa salapi, samtang kamo matagbawon sa presenteng mga butang. Kay siya miingon: ‘Dili ko gayod ikaw pagahikabsan ni pagabiyaan’” (Hebreohanon 13:5) Nganong ang mga Hebreohanon nagkinahanglan niining tambaga?

¹⁷ Tingali ang mga Hebreohanon sobrang nabalaka mahitungod sa salapi tungod kay ilang nahinumdoman ang “dakong kagutom” nga nahitabo sa pagmando ni Claudio Cesar (41-54 K.P.). Ang kagutom grabe kaayo nga tungod niana ang mga Kristohanon sa ubang dapit nagpadalag gikinahanglang hinabang sa ilang mga igsoon sa Judea. (Buhat 11:28, 29) Sumala sa Hudiyohanong historyador nga si Josephus, ang kagutom mikabat ug tulo ka tuig o kapin pa, nga nagpahinabog grabeng pagkakabus sa Judea ug Jerusalem.​—Antiquities of the Jews, XX, 2, 5; 5, 2.

18. Ang tambag sa Hebreohanon 13:5 naghatag unsang leksiyon alang kanato?

¹⁸ Aduna bay leksiyon niini alang kanato? Oo, kay bisan unsa man kita ka pobre, dili gayod nato higugmaon ang salapi o sobrang mabalaka mahitungod niana. Inay mabalaka sa materyal nga kasegurohan, nga tingali mahimong maibogon, kita kinahanglang “magmatagbaw sa mga butang nabatonan karon.” Si Jesus miingon: “Nan, padayon sa pagpangita pag-una sa gingharian ug ang pagkamatarong sa [Diyos], ug kining tanang ubang mga butang igadugang ra kanimo.” (Mateo 6:25-34) Iyang gipakita usab nga kita kinahanglang magmaikagon sa pagkahimong “bahandianon ngadto sa Diyos” tungod kay ang ‘atong kinabuhi wala diha sa mga butang nga atong nabatonan.’ (Lucas 12:13-21) Kon ang paghigugma sa salapi nakapameligro sa atong espirituwalidad, nan, atong patalinghogan ang tambag ni Pablo ngadto sa mga Hebreohanon ug usab hinumdoman nga ang “diyosnong pagkamahinalaron nga inubanan sa pagbati sa katagbaw” maoy “usa ka paagi sa pagbatog dakong ginansiya.”​—1 Timoteo 6:6-8.

Salig Kang Jehova

19. Unsang pasalig ang gihatag sa Diyos kang Josue, ug sa unsang paagi kini nagaapektar kanato?

¹⁹ Ingong mga sumusunod ni Jesus nga nagatinguha sa ‘paghatag balaang pag-alagad uban ang diyosnong kahadlok ug pagtahod,’ angay natong ibutang ang atong pagsalig dili sa salapi kondili sa atong langitnong Amahan, kansang tabang hinungdanon. Bisan unsa pang mga suliran ang atong atubangon, atong hinumdoman ang iyang pasalig: “Dili ko gayod ikaw pagatalikdan ni pagabiyaan.” (Hebreohanon 13:5) Dinhi gihisgotan ni Pablo ang mga pulong sa Diyos kang Josue: “Ikaw dili ko gayod pagatalikdan ni pagabiyaan.” (Josue 1:5; itandi ang Deuteronomio 31:6, 8.) Wala gayod talikdi ni Jehova si Josue, ug Siya dili gayod mobiya kanato kon kita mosalig Kaniya.

20. (a) Unsa ang tinuig nga teksto alang sa 1990? (b) Sa walay kahadlok, unsay angay natong ipadayon nga buhaton?

²⁰ Ang dili-mapakyas nga tabang sa Diyos mapasiugda diha sa mga Saksi ni Jehova sa umaabot nga mga bulan, kay ang ilang tinuig nga teksto sa 1990 mabasa: “Magmaisogon ug magaingon: ‘Si Jehova mao ang akong magtatabang.’” Kining mga pulonga makita diha sa Hebreohanon 13:6, diin si Pablo mikutlo sa salmista ug gisultihan ang mga Hebreohanon: “Magmaisogon ug magaingon: ‘Si Jehova ang akong magtatabang; ako dili mahadlok. Unsa may arang mahimo sa tawo kanako?’” (Salmo 118:6) Bisag ginalutos, kita dili mahadlok, kay ang tawo walay igong mahimo kay sa itugot sa Diyos. (Salmo 27:1) Bisan kon kita mamatay ingong mga maghuhupot sa integridad, kita adunay paglaom sa pagkabanhaw. (Buhat 24:15) Busa magpadayon kita sa pagsunod sa atong Sulondan sa ‘paghatag balaang pag-alagad uban ang diyosnong kahadlok ug pagtahod,’ masaligon nga si Jehova mao ang atong Magtatabang.

Unsaon Nimo sa Pagtubag?

◻ Nganong ang Hebreohanong mga Kristohanon ilabinang nagkinahanglan sa tabang ni Jehova?

◻ Sa unsang paagi ang katawhan ni Jehova ‘nagapadayon sa ilang inigsoong gugma’?

◻ Nganong magmaabiabihon?

◻ Unsay atong buhaton aron atong ikapakita nga kita nahinumdom sa dinaogdaog nga kaubang mga magtutuo?

◻ Nganong angay huptan nga dungganon ang kaminyoon?