Ang Ipasabot sa Balita

Dili Kinaraan

Daghang tawo dugay nang nagtuo nga ang mga prinsipyo sa maayong pagkinabuhi nga gigambalay diha sa Bibliya kinaraan ug dili-moobra. Apan, ang bag-ong mga pagtuon nakahimo sa pila ka mga awtoridad sa medisina sa paghunahuna pag-usab sa bili sa tambag sa Bibliya sa paghimog maayo sa uban.

Sumala sa American Health, duha ka doktor miingon nga ang “paghimog maayo, makaayo alang sa imong kasingkasing, sa imong sistema sa pagsagang sa sakit​—ug sa imong katibuk-ang kahimsog.” Sa Michigan laing medikal tem naghimog usa ka surbi nga milawig ug napulo ka tuig sa pagtino sa sukod nga maapektohan ang panglawas sa sosyal nga mga relasyon. Ang katingalahang natukian mao ang buluntaryong pagtrabaho sa komunidad nakauswag sa gitas-on sa kinabuhi ug sa kahimsog. Ang surbi nagpakita nga ang mga lalaki ilabinang naapektohan. Kadtong wala mobuluntaryo sa pagtrabaho ginaingon nga duha ug tunga ka pilong may kalgmitang mamatay sa panahon sa yutgo sa surbi kay sa mga lalaki nga mihimog usa ka matang sa buluntaryong trabaho labing menos kas-a sa usa ka semana.

Usa ka doktor sa California mitaho sa epekto sa iyang paghikay sa duha ka pasyente nga nagkontrahay sa usag usa sa pagtinabangay sa paglaba sa ilang bulingon nga mius-os ang gidaghanon sa ilang kolesterol ug sa gibating mga sakit sa dughan.

Sa kasiglohang milabay gisultihan ni apostol Pablo si Timoteo sa “pagsugo sa mga dato niining presenteng sistema sa mga butang sa dili pagpataas sa ilang kaugalingon, ni sa pagbutang sa ilang paglaom sa walay kasegurohan nga mga bahandi,” kondili sa “pagbuhat ug maayo, sa pagpakadato sa maayong binuhatag, sa pagkamahinatagon, mapaambiton.” Iyang gipahinumdoman usab ang Hebreohanong mga Kristohanon sa dili pagkalimot “sa pagbuhat ug maayo ug sa pakigbahin sa mga butang ngadto sa uban.” Ang katarongan? “Ang himaya ug kadungganon ug kalinaw alang sa tanan nga nagabuhat ug maayo.” Dugay nang nahibaloan sa tinuod nga mga Kristohanon nga ang pagsunod niining modernong tambag mohatag mga kaayohan sa pisikal ug sa espirituwal nga paagi.​—1 Timoteo 6:17, 18; Hebreohanon 13:16; Roma 2:10.

“Labi pa ka Bug-at nga Silot”

Ang mga sakop sa General Synod sa Anglican Church dili pa dugay nahimutang sa salikwaot nga kahimtang. Mipahayag silang tanan nga pabor sa “tradisyonal nga pagtulon-an bahin sa kaputli ug kamaunongon sa personal nga mga relasyon.” Apan, sa dihang ang pari sa parokya nga si Tony Higton midusog pahayag nga naghangyo sa sinodo sa pagdeklarar nga kinahanglan ang mga klero “sulondan sa tanang bahin sa moralidad, lakip sa seksuwal nga moralidad, ingong kondisyon aron matudlo o makapabilin sa katungdanan,” kadto gisalikway. Ang rason? Ang Ecumenical Press Service mitaho nga nakita sa mga sakop sa sinodo nga ang pahayag “hingapin ra,” midugang nga si “Michael Baughen, opisbo sa Chester, misugyot nga mapugos niini ang tanang mga obispo ug ang ubang mga klero sa pagluwat dihadiha sa iglesya.”

Apan, ang sugyot ni Higton giusab sa pagsangpit sa tanang mga Kristohanon, “ilabina . . . sa Kristohanong mga pangulo,” nga mahimong panig-ingnan “diha sa tanang bahin sa moralidad, lakip sa seksuwal nga moralidad.” Ang Press Service miingon usab nga gidaog usab sa sinodo ang panawag sa “angay nga disiplina” tali sa klero sa mga kaso sa seksuwal nga imoralidad.

Sanglit ang maong mga paagi sa pagdisiplina “hingapin ra” alang sa kadaghanan sa mga klerigo karong adlawa, ang Pulong sa Diyos mitin-aw: “Palagpota gikan sa inyong taliwala ang tawong daotan.” (1 Corinto 5:13) Ang Diyos nagsugo nga ang malig-ong aksiyon himoon batok sa tanang dili-mahinulsolong mobuhat sa daotan aron sa pagpanalipod sa moral ug sa espirituwal nga kahinlo sa Kristohanong kongregasyon. Sa pagkatinuod, ang disiplina ilabinang angay alang sa Kristohanong mga pangulo, kay ang disipulong Santiago misulat: “Dili daghan kaninyo mahimong mga magtutudlo, mga igsoon ko, sa pagkasayod nga kita makadawat sa labi pang bug-at nga silot.”​—Santiago 3:1.

Nagahimaya sa Diyos

“Ang kalidad sa kahimoan sa magdudula mopadayag sa kalidad sa iyang gugma sa Diyos.” Kining pangangkon ni Wes Neal, presidente sa IAP (Institute for Athletic Perfection), sumala sa gitaho sa Christianity Today, tinuod ba? Ang IAP, usa ka ahensiya nga gigamit sa mga ebanghelikal aron sa “pagbalaan sa maindigong mga dula,” nagtuboy sa ideya nga ang mga magdudula diha sa dulaanan kinahanglan mosundog sa samang kainit nga gipakita ni Jesus sa “pagtuman sa katuyoan sa iyang Amahan.” Ang maong pangtarongan nahimong popular nga doktrina sa “locker-room nga relihiyon,” sa mga ebanghelikal, miingon ang Christianity Today. Sa pagkatinuod, gihisgotan sa artikulo ang pananglitan sa usa ka propesyonal nga magdudula sa potbol kinsa “nagpintal ug mga krus diha sa iyang sapatos ug sa bukot sa iyang bukton ingong pahinumdom nga siya nagdula aron sa paghimaya kang Kristo.”

Apan, ikaingon ba nga ang pag-apil sa sobra ka maindigon o mapintas nga dula nagahimaya sa Diyos? Dili gayod! Ang Psychology Today miingon: “Ang kinaiyahan sa kompetisyon nagkinahanglan nga ang interes sa kaugalingon temporaryong sagopon samtang nagapanlimbasog ang mga magdudula nga makadaog.” Apan ang Bibliya nag-ingon nga ang mga Kristohano kinahanglan “magtagad, dili sa [ilang] personal nga interes, kondili sa personal nga interes usab sa uban.” (Filipos 2:3, 4) Ang tinuod nga mga Kristohanon nagahimaya sa Diyos pinaagi sa pagbuhat sa iyang kabubut-on, dili sa ila.​—Itandi ang Isaias 58:13, 14.