Bisan pa sa mga Pagsulay, Hawiri ang Imong Pagtuo!
“Isipa ingong bug-os kangaya, akong mga igsoon, dihang makahibalag kamo ug nagkadaiyang mga pagsulay.”—SANTIAGO 1:2.
1. Bisan pa sa unsa nga ang katawhan ni Jehova nag-alagad kaniya sa pagtuo ug uban sa “kangaya sa kasingkasing”?
ANG katawhan ni Jehova nag-alagad ingong iyang mga Saksi uban ang pagtuo kaniya ug “kangaya sa kasingkasing.” (Deuteronomio 28:47; Isaias 43:10) Gibuhat nila kini bisan pag gilibotan sila sa daghang pagsulay. Bisan pa sa ilang kalisdanan, sila makakuhag paghupay gikan sa mga pulong: “Isipa ingong bug-os kangaya, akong mga igsoon, dihang makahibalag kamo ug nagkadaiyang mga pagsulay, kay kamo nahibalo man nga kining sinulayang kalidad sa inyong pagtuo nagapatunghag pag-agwanta.”—Santiago 1:2, 3.
2. Unsay nahibaloan bahin sa magsusulat sa sulat ni Santiago?
2 Ang maong pahayag gisulat sa mga 62 K.P. sa tinun-ang si Santiago, igsoon ni Jesu-Kristo sa inahan. (Marcos 6:3) Si Santiago maoy ansiyano sa kongregasyon sa Jerusalem. Sa pagkatinuod, siya, si Cefas (Pedro), ug Juan “ang daw mga haligi”—madasigon, malig-on nga mga tigpaluyo sa kongregasyon. (Galacia 2:9) Sa dihang ang isyu bahin sa sirkunsisyon gipresentar ngadto sa “mga apostol ug mga ansiyano” sa mga 49 K.P., si Santiago misugyot pinasikad sa Kasulatan nga gisagop niadtong unang-siglo nga nagamandong lawas.—Buhat 15:6-29.
3. Unsa ang pipila sa mga suliran nga giatubang sa unang-siglong mga Kristohanon, ug sa unsang paagi makuha nato ang kinadak-ang kaayohan gikan sa sulat ni Santiago?
3 Ingong mahangawaong espirituwal nga magbalantay, si Santiago ‘nahibalo sa kahimtang sa panon.’ (Proverbio 27:23) Iyang naamgohan nga ang mga Kristohanon niadtong tungora nag-atubang ug grabeng mga pagsulay. Ang hunahuna sa pipila nagkinahanglag pagpasibo, tungod kay sila nagpakita ug paboritismo ngadto sa mga dato. Alang sa pipila, ang pagsimba maoy pagsubay lamang sa lagda. Ang uban nagpahinabog kadaot pinaagi sa ilang wala-makontrolar nga mga dila. Dihay makadaot nga mga epekto ang espiritu sa kalibotan, ug daghan ang dili mapailobon ni mainampoon. Sa pagkatinuod, ang espirituwal nga sakit nahitabo sa pipila ka Kristohanon. Ang sulat ni Santiago naghisgot sa maong mga butang sa makapalig-on nga paagi, ug ang iyang tambag sama ka praktikal karong adlawa maingon nga kana praktikal sa unang siglo K.P. Kita makabaton ug dakong kaayohan kon atong konsiderahon kining sulata ingong usa nga gisulat alang kanato mismo.a
Sa Dihang Nahiagom Kita sa mga Pagsulay
4. Unsaon nato pag-isip ang mga pagsulay?
4 Gipakita ni Santiago kanato kon sa unsang paagi isipon ang mga pagsulay. (Santiago 1:1-4) Wala maghisgot sa iyang relasyon sa Anak sa Diyos, siya mapainubsanong nagtawag sa iyang kaugalingon nga “usa ka ulipon sa Diyos ug sa Ginoong Jesu-Kristo.” Si Santiago misulat ngadto sa “napulog-duha ka tribo” sa espirituwal nga Israel nga “nangatibulaag,” sa sinugdan tungod sa paglutos. (Buhat 8:1; 11:19; Galacia 6:16; 1 Pedro 1:1) Ingong mga Kristohanon, kita usab gilutos, ug kita ‘makahibalag ug nagkadaiyang mga pagsulay.’ Apan kon atong hinumdoman nga ang mga pagsulay nga giagwanta magpalig-on sa atong pagtuo, atong ‘isipon ingong bug-os nga kangaya’ sa dihang kini modangat kanato. Kon huptan nato ang atong integridad sa Diyos panahon sa mga pagsulay, kini magdala kanato ug dumalayong kalipay.
5. Unsay mahimong malakip sa atong mga pagsulay, ug unsay mahitabo sa dihang malamposon natong maagwanta kana?
5 Ang atong mga pagsulay naglakip sa mga kalisod nga kasagaran sa tawo. Pananglitan, ang sakit mahimong motakboy kanato. Ang Diyos dili mohimo karon ug milagrosong mga pagpang-ayo, apan tubagon niya ang atong mga pag-ampo alang sa kaalam ug kalig-on nga gikinahanglan sa pagsagubang sa balatian. (Salmo 41:1-3) Nag-antos usab kita alang sa pagkamatarong ingong ginalutos nga mga Saksi ni Jehova. (2 Timoteo 3:12; 1 Pedro 3:14) Sa dihang malamposon natong ginaantos ang maong mga pagsulay, mapamatud-an ang atong pagtuo, nga mahimong usa nga “sinulayang kalidad.” Ug sa dihang magmadaogon ang atong pagtuo, kini “nagapatunghag pag-agwanta.” Ang pagtuo nga gihimong mas lig-on pinaagi sa mga pagsulay makatabang kanato sa paglahutay sa umaabot nga mga pagsulay.
6. Sa unsang paagi “ipabug-os sa pag-agwanta ang buluhaton niini,” ug unsang mapuslanong mga lakang ang mahimong buhaton sa dihang mailalom kita sa pagsulay?
6 “Apan,” matod ni Santiago, “ipabug-os sa pag-agwanta ang buluhaton niini.” Kon tugotan nato ang usa ka pagsulay nga magpadayon nga dili mosulay sa pagtapos dayon niana pinaagi sa dili-kasulatanhong mga paagi, ang pag-agwanta mobuhat sa “buluhaton” sa paghimo kanatong bug-os nga mga Kristohanon, nga wala makulangi sa pagtuo. Siyempre, kon ang usa ka pagsulay magpadayag ug usa ka kahuyangan, kinahanglang mangayo kita sa tabang ni Jehova aron sa pagbuntog niana. Komosta kon ang pagsulay mao ang tentasyon nga malangkit sa seksuwal nga imoralidad? Mag-ampo kita bahin sa suliran ug unya molihok nga kaharmonya sa atong mga pag-ampo. Basin kinahanglan natong bag-ohon ang atong dapit nga gitrabahoan o mohimog ubang mga lakang sa paghupot sa atong integridad ngadto sa Diyos.—Genesis 39:7-9; 1 Corinto 10:13.
Ang Pagpangitag Kaalam
7. Sa unsang paagi matabangan kita sa pagsagubang sa mga pagsulay?
7 Gipakita ni Santiago kanato kon unsay buhaton kon wala kita masayod kon unsaon pagsagubang ang usa ka pagsulay. (Santiago 1:5-8) Si Jehova dili mobadlong kanato gumikan sa kakulang sa kaalam ug pag-ampo alang niana sa pagtuo. Siya motabang kanato nga isipon ang pagsulay sa hustong paagi ug agwantahon kana. Ang mga Kasulatan mahimong ipatagad kanato sa atong isigkamagtutuo o panahon sa pagtuon sa Bibliya. Ang mga panghitabo nga gimaniobra pinaagi sa giya sa Diyos mahimong makapaarang kanato sa pagtino kon unsay angay natong buhaton. Mahimong giyahan kita sa espiritu sa Diyos. (Lucas 11:13) Aron mapahimuslan ang maong mga kaayohan, siyempre kinahanglang magpabilin kitang suod sa Diyos ug sa iyang katawhan.—Proverbio 18:1.
8. Nganong ang usa ka maduhaduhaon walay madawat gikan kang Jehova?
8 Si Jehova naghatag kanato ug kaalam sa pagsagubang sa mga pagsulay kon kita ‘padayon nga mangayo diha sa pagtuo, nga wala gayoy pagduhaduha.’ Ang maduhaduhaon “samag balod sa dagat nga ginahandos sa hangin ug ginapadpad-padpad” nga walay katinoan. Kon kita ingon niana ka huyang sa espirituwal, ‘dili gayod kita maghunahuna nga makadawat kita ug bisan unsa gikan kang Jehova.’ Hinaot nga dili kita mahimong “maduhaduhaon” ug “mabalhinon” sa pag-ampo o sa ubang mga paagi. Hinunoa, batonan nato ang pagtuo kang Jehova, ang Tuboran sa kaalam.—Proverbio 3:5, 6.
Ang Dato ug Kabos Mahimong Magsadya
9. Nganong may katarongan kita nga magsadya ingong mga magsisimba ni Jehova?
9 Bisan pag ang kakabos maoy usa sa atong mga pagsulay, hinumdoman nato nga ang dato ug kabos nga mga Kristohanon mahimong magsadya. (Santiago 1:9-11) Sa wala pa mahimong mga sumusunod ni Jesus, kadaghanan sa mga dinihogan diyutay rag nabatonan sa materyal nga paagi ug gitamay sa kalibotan. (1 Corinto 1:26) Apan mahimo silang magsadya tungod sa ilang “pagkabayaw” sa kahimtang ingong mga manununod sa Gingharian. (Roma 8:16, 17) Sa kaatbang, ang mga dato nga kanhi gipasidunggan nakasinatig “pagkapaubos” ingong mga sumusunod ni Kristo tungod kay gitamay sa kalibotan. (Juan 7:47-52; 12:42, 43) Apan, ingong mga alagad ni Jehova kitang tanan mahimong magsadya tungod kay ang katigayonan ug taas nga posisyon sa kalibotan walay pulos kon itandi sa espirituwal nga mga bahandi nga atong napahimuslan. Ug pagkamapasalamaton nato nga taliwala kanato walay dapit ang garbo maylabot sa sosyal nga kahimtang!—Proverbio 10:22; Buhat 10:34, 35.
10. Sa unsang paagi isipon sa usa ka Kristohanon ang materyal nga katigayonan?
10 Gitabangan kita ni Santiago sa pagkasabot nga ang atong kinabuhi wala magdepende sa katigayonan ug kalibotanong mga kalamposan. Maingon nga ang katahom sa bulak dili magsanta sa pagkamatay niini sa “naglagiting nga kainit” sa adlaw, maingon man ang bahandi sa tawong dato dili makapalugway sa iyang kinabuhi. (Salmo 49:6-9; Mateo 6:27) Mahimong mamatay siya samtang nangagpas sa iyang “mga dalan sa kinabuhi,” tingali sa pagnegosyo. Busa, ang hinungdanong butang mao ang pagkahimong “dato ngadto sa Diyos” ug ang pagbuhat sa tanan nga atong maarangan sa pagpauswag sa intereses sa Gingharian.—Lucas 12:13-21; Mateo 6:33; 1 Timoteo 6:17-19.
Malipayon Kadtong Nakaagwanta sa Pagsulay
11. Unsa ang mga palaaboton niadtong nagahawid sa ilang pagtuo atubangan sa mga pagsulay?
11 Dato o kabos, mahimo lamang kitang magmalipayon kon kita moagwanta sa mga pagsulay. (Santiago 1:12-15) Kon kita makaagwanta sa mga pagsulay nga nagpabilin ang atong pagtuo, kita ikapahayag nga malipayon, tungod kay adunay kangaya sa pagbuhat kon unsay matarong sa mga mata sa Diyos. Pinaagi sa paghawid sa ilang pagtuo hangtod sa kamatayon, ang inanak sa espiritu nga mga Kristohanon makadawat ug “purongpurong sa kinabuhi,” imortalidad didto sa kalangitan. (Pinadayag 2:10; 1 Corinto 15:50) Kon kita adunay yutan-ong mga paglaom ug naghupot sa atong pagtuo sa Diyos, kita makalantaw ngadto sa kinabuhing walay kataposan sa usa ka paraisong yuta. (Lucas 23:43; Roma 6:23) Pagkamaayo ni Jehova sa tanan nga nagbaton ug pagtuo kaniya!
12. Sa dihang makasinati ug kalisdanan, nganong dili kita angayng moingon: “Ginasulayan ako sa Diyos”?
12 Posible ba nga si Jehova mismo mosulay kanato pinaagig kalisdanan? Dili, dili gayod kita moingon: “Ginasulayan ako sa Diyos.” Si Jehova dili mosulay sa paghaylo kanato nga mohimog sala apan seguradong motabang kanato ug mohatag kanato sa kusog nga gikinahanglan sa pag-agwanta sa mga pagsulay kon kita magpabiling lig-on diha sa pagtuo. (Filipos 4:13) Ang Diyos balaan, busa dili niya kita ibutang sa mga kahimtang nga magpahuyang sa atong pagpakigbisog sa pagbuhat ug sayop. Kon nahimutang ang atong kaugalingon sa dili-balaang kahimtang ug makahimog sala, dili nato angayng basolon siya, “kay ang Diyos dili masulayan ug daotang mga butang ni siya mismo nagasulay kang bisan kinsa.” Bisan tuod si Jehova mahimong motugot sa pagsulay aron disiplinahon kita alang sa atong kaayohan, dili niya kita sulayan nga may daotang tuyo. (Hebreohanon 12:7-11) Si Satanas mahimong motental kanato sa pagbuhat ug sayop, apan ang Diyos makaluwas kanato gikan nianang daotang usa.—Mateo 6:13.
13. Unsay mahimong mahitabo kon dili nato isalikway ang sayop nga tinguha?
13 Kinahanglan kitang magmainampoon tungod kay ang usa ka kahimtang mahimong motultol sa usa ka sayop nga tinguha nga magyudyod kanato sa pagpakasala. Si Santiago miingon: “Ang matag usa ginasulayan pinaagig pagkaganoy ug pagkahaylo sa iyang kaugalingong tinguha.” Dili nato mabasol ang Diyos sa atong sala kon atong gitugotan ang atong kasingkasing nga maghambin sa makasasalang tinguha. Kon dili nato isalikway ang sayop nga tinguha, ‘kana manamkon,’ amomahon diha sa kasingkasing, ug “magpahimugso ug sala.” Sa dihang ang sala nahimo na, kini “magpahimugso ug kamatayon.” Dayag, kinahanglang bantayan nato ang atong kasingkasing ug pakigbisogan ang makasasalang mga hilig. (Proverbio 4:23) Si Cain gipasidan-an nga ang sala hapit nang modaog kaniya, apan wala siya makigbisog. (Genesis 4:4-8) Busa, komosta kon kita nagsugod sa pagtinguha sa dili-kasulatanhong dalan? Seguradong angay kitang magmapasalamaton kon ang Kristohanong mga ansiyano maningkamot sa pagpasibo kanato aron dili kita makasala batok sa Diyos.—Galacia 6:1.
Diyos—Ang Tuboran sa Maayong mga Butang
14. Sa unsang diwa ikaingon nga ang mga gasa sa Diyos maoy “hingpit”?
14 Angay natong hinumdoman nga si Jehova mao ang Tuboran, dili sa mga pagsulay, kondili sa maayong mga butang. (Santiago 1:16-18) Gitawag ni Santiago ang isigkamagtutuo ingong “hinigugmang mga igsoon” ug nagpakita nga ang Diyos mao ang Maghahatag sa ‘matag maayong gasa ug hingpit nga hatag.’ Ang espirituwal ug materyal nga mga gasa ni Jehova maoy “hingpit,” o bug-os, walay nakulang. Kini “gikan sa itaas,” gikan sa pinuy-anan sa Diyos sa kalangitan. (1 Hari 8:39) Si Jehova mao “ang Amahan sa langitnong mga kahayag”—ang adlaw, ang bulan, ug ang mga bituon. Gihatagan usab niya kita ug espirituwal nga kahayag ug kamatuoran. (Salmo 43:3; Jeremias 31:35; 2 Corinto 4:6) Dili sama sa adlaw nga makapausab sa mga landong samtang kini nagairog ug anaa lamang sa kinatayuktokan niini sa kaudtohon, ang Diyos kanunayng anaa sa iyang kinapungkayan sa pagtagana kon unsay maayo. Tinong siya magasangkap kanato sa pag-atubang sa mga pagsulay kon atong pahimuslan pag-ayo ang iyang espirituwal nga mga tagana nga gihatag pinaagi sa iyang Pulong ug sa “kasaligan ug mabuot nga ulipon.”—Mateo 24:45.
15. Unsay usa sa kinamaayohang mga gasa ni Jehova?
15 Unsay usa sa kinamaayohang mga gasa sa Diyos? Ang pagpatungha ug espirituwal nga mga anak pinaagi sa balaang espiritu, nga nagabuhat duyog sa maayong balita, o “pulong sa kamatuoran.” Kadtong nakasinatig espirituwal nga pagkahimugso maoy “usa ka matang sa mga unang-bunga,” nga gipili gikan sa katawhan aron mahimong langitnong “gingharian ug mga saserdote.” (Pinadayag 5:10; Efeso 1:13, 14) Mahimong naghunahuna si Santiago sa unang mga bunga sa sebada nga gihalad sa Nisan 16, nga mao ang petsa nga si Jesus nabanhaw, ug sa pagtanyag sa duha ka tinapay nga trigo sa adlaw sa Pentekostes, sa dihang gibubo ang balaang espiritu. (Levitico 23:4-11, 15-17) Nianang kasoha, si Jesus mao ang unang-bunga ug ang iyang kaubang mga manununod “usa ka matang sa mga unang-bunga.” Komosta kon aduna kitay yutan-ong paglaom? Aw, ang paghinumdom niana motabang kanato sa paghawid sa atong pagtuo sa Maghahatag sa “matag maayong gasa,” kinsa naghimo sa walay-kataposang kinabuhi nga posible ubos sa pagmando sa Gingharian.
Mahimong “Magbubuhat sa Pulong”
16. Nganong kita angayng ‘magmaabtik sa pagpaminaw apan magmahinay sa pagsulti ug sa kapungot’?
16 Kita man nahiagom sa mga pagsulay sa atong pagtuo karon o wala, kinahanglan kitang mahimong ‘mga magbubuhat sa pulong.’ (Santiago 1:19-25) Kinahanglan kitang “magmaabtik sa pagpaminaw” sa pulong sa Diyos, nga mahimong masinundanong magbubuhat niana. (Juan 8:47) Sa laing bahin, kinahanglan kitang “magmahinay sa pagsulti,” nga mainampingong nagtimbangtimbang sa atong mga pulong. (Proverbio 15:28; 16:23) Si Santiago mahimong nag-awhag kanato nga dili moingon dayon nga ang atong mga pagsulay naggikan sa Diyos. Gitambagan usab kita nga “magmahinay sa kapungot; kay ang kapungot sa tawo dili magpahinabo ug pagkamatarong nga iya sa Diyos.” Kon nasuko sa giingon sa lain, hinaot nga kita ‘dili magdalidali’ aron malikayan ang madumtanong tubag. (Efeso 4:26, 27) Ang mapungtanong espiritu nga mahimong magpahinabo kanato ug mga suliran ug mahimong pagsulay alang sa uban dili makapatungha sa kon unsay gikinahanglan kanato sa pagtuo sa atong matarong nga Diyos. Gawas pa, kon kita “dagaya sa salabotan,” kita “magmahinay sa kasuko,” ug ang atong mga igsoong lalaki ug babaye madani kanato.—Proverbio 14:29.
17. Unsay mapalampos sa pagwagtang sa pagkadaotan gikan sa kasingkasing ug hunahuna?
17 Tinong gikinahanglan nato nga mahigawas sa “tanang kahugawan”—tanan nga makapayugot sa Diyos ug magpalambo sa kapungot. Dugang pa, kinahanglang atong ‘isalikway kanang butang nga naghingapin, ang pagkadaotan.’ Kinahanglang wagtangon natong tanan sa atong kinabuhi ang bisan unsang kahugawan sa unod o espiritu. (2 Corinto 7:1; 1 Pedro 1:14-16; 1 Juan 1:9) Ang pagwagtang sa pagkadaotan gikan sa kasingkasing ug hunahuna motabang kanato nga ‘dawaton nga may kalumo ang pagtisok sa pulong’ sa kamatuoran. (Buhat 17:11, 12) Bisan unsa ka dugay na kita nga nahimong mga Kristohanon, kinahanglang padayon natong tugtan nga dugang Kasulatanhong kamatuoran ang matisok kanato. Ngano? Tungod kay pinaagi sa espiritu sa Diyos, ang natisok nga pulong magpatungha “sa bag-ong pagkatawo” nga mosangpot sa kaluwasan.—Efeso 4:20-24.
18. Sa unsang paagi ang usa nga tigpaminaw lamang sa pulong lahi sa usa nga magbubuhat usab niana?
18 Unsaon nato pagpakita nga ang pulong mao ang atong giya? Pinaagi sa pagkahimong masinundanong ‘mga magbubuhat sa pulong, ug dili tigpaminaw lamang.’ (Lucas 11:28) Ang ‘mga magbubuhat’ adunay pagtuo nga magpatungha ug mga buhat sama sa masibotong kalihokan diha sa Kristohanong ministeryo ug regular nga pagpakig-ambit sa mga tigom sa katawhan sa Diyos. (Roma 10:14, 15; Hebreohanon 10:24, 25) Ang tigpaminaw lamang sa pulong “sama sa usa ka tawo nga nagatan-aw sa iyang kinaiyanhong nawong diha sa salamin.” Motan-aw siya, dayon mobiya ug makalimot kon unsay kinahanglang tul-iron sa iyang panagway. Ingong ‘mga magbubuhat sa pulong,’ kita mainampingong magtuon ug mosunod sa “hingpit nga balaod” sa Diyos, nga naglakip sa tanan nga iyang gikinahanglan kanato. Sa ingon ang kagawasan nga atong mapahimuslan maoy kaatbang gayod sa pagkaulipon sa sala ug kamatayon, kay kana motultol sa kinabuhi. Busa hinaot nga kita ‘magpadayon sa hingpit nga balaod,’ padayong magsusi pag-ayo ug magsunod niana. Ug hunahunaa lang! Ingong ‘mga magbubuhat sa buluhaton, dili malimtanong mga tigpaminaw,’ nabatonan nato ang kangaya nga resulta sa pag-uyon sa Diyos.—Salmo 19:7-11.
Labaw pa kay sa Masubayon sa Lagda nga mga Magsisimba
19, 20. (a) Sumala sa Santiago 1:26, 27, unsay gikinahanglan kanato sa hinlo nga pagsimba? (b) Unsa ang pipila ka pananglitan sa wala-mahugawi nga pagsimba?
19 Aron mapahimuslan nato ang pag-uyon sa Diyos, kinahanglang hinumdoman nato nga ang tinuod nga pagsimba dili usa lamang ka pagsubay sa lagda. (Santiago 1:26, 27) Mahimong gihunahuna nato nga kita dalawatong ‘masubayon sa lagda nga mga magsisimba’ ni Jehova, apan ang iyang hunahuna sa matag usa kanato ang labing hinungdanon. (1 Corinto 4:4) Ang usa ka seryosong sayop mahimong mao ang kapakyasan sa ‘pagbusal sa dila.’ Gilimbongan nato ang atong kaugalingon kon atong gihunahuna nga ang Diyos nahimuot sa atong pagsimba kon kita mopasipala sa uban, mamakak, o mogamit sa dila sa ubang sayop nga mga paagi. (Levitico 19:16; Efeso 4:25) Tino, dili nato buot nga ang atong “dagway sa pagsimba” mahimong “walay-pulos” ug dili-dalawaton sa Diyos tungod sa bisan unsang katarongan.
20 Bisan tuod si Santiago wala maghisgot sa tanang bahin sa hinlo nga pagsimba, siya miingon nga kana naglakip sa “pag-atiman sa mga ilo ug sa mga babayeng balo diha sa ilang kasakitan.” (Galacia 2:10; 6:10; 1 Juan 3:18) Ang Kristohanong kongregasyon nagpakitag linaing interes sa pagtagana alang sa mga babayeng balo. (Buhat 6:1-6; 1 Timoteo 5:8-10) Sanglit ang Diyos mao ang Tigpanalipod sa mga babayeng balo ug sa mga wala nay amahan, makigkooperar kita Kaniya pinaagi sa pagbuhat sa atong maarangan sa pagtabang kanila sa espirituwal ug materyal nga paagi. (Deuteronomio 10:17, 18) Ang hinlo nga pagsimba nagkahulogan usab ug “pag-amping sa kaugalingon nga dili mabulingan sa kalibotan,” dili-matarong nga tawhanong katilingban nga nahimutang diha sa gahom ni Satanas. (Juan 17:16; 1 Juan 5:19) Busa huptan nato ang atong kaugalingon nga bulag sa dili-diyosnong panggawi sa kalibotan aron atong mahimaya si Jehova ug mahimong mapuslanon diha sa pag-alagad kaniya.—2 Timoteo 2:20-22.
21. May kalabotan sa sulat ni Santiago, unsang dugang nga mga pangutana ang angay natong konsiderahon?
21 Ang tambag ni Santiago nga ato pa lang nakonsiderar kinahanglang motabang kanato sa paglahutay sa mga pagsulay ug paghawid sa atong pagtuo. Angay kanang magpadako sa atong apresasyon alang sa mahigugmaong Maghahatag sa maayong mga gasa. Ug ang mga pulong ni Santiago motabang kanato sa pagtuman sa hinlo nga pagsimba. Unsa pay gipatagad niya kanato? Unsang dugang nga mga lakang ang atong makuha sa pagpamatuod nga atong nabatonan ang tinuod nga pagtuo kang Jehova?
[Mga footnote]
a Panahon sa pribado o pamilyahanong pagtuon niining artikuloha ug sa duha nga mosunod niini, makaplagan nimong ilabinang mapuslanon nga basahon ang matag kinutlo nga bahin sa makapalig-on sa pagtuo nga sulat ni Santiago.
Unsaon Nimo Pagtubag?
◻ Unsay motabang kanato nga makaagwanta sa mga pagsulay?
◻ Bisan pa sa mga pagsulay, nganong ang mga Kristohanon mahimong magsadya?
◻ Sa unsang paagi kita mahimong mga magbubuhat sa pulong?
◻ Unsay nalangkit sa hinlo nga pagsimba?
[Hulagway sa panid 9]
Sa dihang nailalom sa pagsulay, batoni ang pagtuo sa gahom ni Jehova nga motubag sa mga pag-ampo
[Hulagway sa panid 9]
Ang ‘mga magbubuhat sa pulong’ nagamantala sa Gingharian sa Diyos sa tibuok kalibotan