Usa ka Matarong nga Kalibotan Dili Usa ka Damgo!
“ANG inhustisya mao ang dakong interes sa tawo dinhi sa yuta,” miingon ang Amerikanong estadista nga si Daniel Webster. Ug ang Bibliya nag-ingon: “Si Jehova mahigugmaon sa hustisya.” (Salmo 37:28) Gihimo sa dagway sa Diyos, ang unang tawhanong magtiayon may diyosnong mga hiyas, lakip ang pagbati sa hustisya.—Genesis 1:26, 27.
Ang Kasulatan naghisgot usab bahin sa ‘mga tawo sa mga nasod nga walay balaod apan nagabuhat nga kinaiyanhon sa mga butang sa balaod.’ Busa sila “nagapasundayag sa mga butang labot sa balaod nga nahisulat diha sa ilang mga kasingkasing, samtang ang ilang tanlag nagapanaksi duyog kanila ug, tali sa ilang kaugalingong mga panghunahuna, sila ginasumbong o gani ginapalingkawas.” (Roma 2:14, 15) Oo, ang tawo gitugahan ug kapasidad sa tanlag—ang pagkaamgo bahin sa husto ug sayop. Tin-aw, ang panginahanglan alang sa hustisya maoy kinaiyanhon sa tawo.
Suod nga nalangkit sa panginahanglan alang sa hustisya mao ang pagtinguha sa tawo sa kalipay, kay ang Salmo 106:3 nag-ingon: “Malipayon kadtong nagabantay sa hustisya, nga nagabuhat sa pagkamatarong sa tanang panahon.” Apan, nganong ang tawo wala makapatunghag usa ka matarong nga kalibotan?
Nganong ang Tawo Napakyas?
Ang pangunang katarongan sa pagkapakyas nga makab-ot ang usa ka matarong nga kalibotan mao ang lama nga atong napanunod gikan sa atong unang mga ginikanan, si Adan ug Eva. Ang Bibliya misaysay: “Pinaagi sa usa ka tawo ang sala misulod sa kalibotan ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala.” (Roma 5:12) Ang lama mao ang sala. Bisag gilalang nga walay kasaypanan, si Adan ug Eva mihukom sa pagrebelde batok sa Diyos ug busa naghimo sa ilang kaugalingon nga mga makasasala. (Genesis 2:16, 17; 3:1-6) Tungod niini, gipasa nila ngadto sa ilang mga anak ang kabilin sa makasasala, sayop nga mga hilig.
Dili ba ang maong mga hiyas sa pagkatawo sama sa kadalo ug pagpihig maoy sangpotanan sa makasasalang mga hilig? Ug dili ba kining maong mga hiyasa nakaamot sa mga inhustisya sa kalibotan? Aw, ang kadalo mao ang gamot sa tinuyong mga pag-abuso sa kalikopan ug panglupig sa ekonomiya! Ang pagpihig maoy tinong nagpaluyo sa etnikong panag-away ug mga inhustisya sa rasa. Ang maong mga hiyas nagtukmod usab sa mga tawo sa pagpangawat, pagpanglimbong, ug paglihok sa paagi nga magdaot sa uban.
Bisan ang maayog-tuyong mga paningkamot sa pagpakitag hustisya ug sa pagbuhat ug maayo sagad mapakyas tungod sa atong makasasalang mga hilig. Si apostol Pablo mismo miangkon: “Ang maayo nga buot ko wala ko buhata, apan ang daotan nga dili ko buot mao ang akong ginabuhat.” Siya nagpadayon sa pagsaysay sa pakigbugno, nga nag-ingon: “Ako nahimuot gayod sa balaod sa Diyos sumala sa akong pagkatawo sa sulod, apan akong nakita sa akong mga sangkap ang laing balaod nga nagapakigbugno batok sa balaod sa akong kaisipan ug nagadala kanakong bihag ngadto sa balaod sa sala nga ania sa akong mga sangkap.” (Roma 7:19-23) Lagmit, kita karong adlawa adunay samang pakigbugno. Maoy hinungdan nga ang mga inhustisya nahitabo nga subsob kaayo.
Ang paagi sa tawo sa pagmando nakaamot usab sa inhustisya sa kalibotan. Sa matag nasod, adunay mga balaod ingon man kadtong mga tigpatuman niana. Ug siyempre, adunay mga maghuhukom ug mga korte. Tino, ang pipila ka may prinsipyong mga tawo naningkamot sa pagtuboy sa tawhanong mga katungod ug pagseguro nga adunay timbang nga hustisya alang sa tanan. Sa gihapon, ang kadaghanan nilang mga paningkamot napakyas. Ngano? Sa paglaktod sa nagkalainlaing mga katarongan nga nalangkit sa ilang kapakyasan, ang Jeremias 10:23 nagpunting: “Ako nasayod, Oh Jehova, nga ang dalan sa yutan-ong tawo wala diha sa iyang kaugalingon. Wala diha sa tawo nga nagalakaw ang pagtultol sa iyang lakang.” Nahimulag gikan sa Diyos, ang tawo sa yano walay katakos sa pagtukod ug usa ka matarong ug matul-id nga kalibotan.—Proverbio 14:12; Ecclesiastes 8:9.
Ang dakong babag sa paningkamot sa tawo sa pagtukod ug usa ka matarong nga kalibotan mao si Satanas nga Yawa. Ang Bibliya tin-awng nag-ingon nga ang rebelyosong manulonda nga si Satanas mao ang orihinal nga ‘mamumuno’ ug “bakakon” ug nga “ang tibuok kalibotan nahimutang diha sa gahom sa tuman-kadaotang usa.” (Juan 8:44; 1 Juan 5:19) Si apostol Pablo nagpaila kaniya ingong “ang diyos niini nga sistema sa mga butang.” (2 Corinto 4:3, 4) Kay nagadumot sa pagkamatarong, gibuhat ni Satanas ang tanan sa pagpalambo sa pagkadaotan. Samtang siya ang nagkontrolar sa kalibotan, ang mga inhustisya sa tanang matang ug ang kaalaotan nga epekto niini magaulipon sa katawhan.
Nagpasabot ba kining tanan nga ang inhustisya dili malikayan sa tawhanong katilingban? Ang usa ka matarong nga kalibotan ba usa ka imposibleng damgo?
Usa ka Matarong nga Kalibotan Usa ka Katinuoran—Sa Unsang Paagi?
Aron ang paglaom sa usa ka matarong nga kalibotan mahimong usa ka katinuoran, ang katawhan kinahanglang molantaw sa usa ka tuboran nga makawagtang sa mga hinungdan sa inhustisya. Apan kinsay makaluka sa sala ug makawagtang kang Satanas ug sa iyang pagmando? Tin-aw, walay tawo ni bisan unsang tawhanong ahensiya ang makahimo sa maong dakong tahas. Si Jehova nga Diyos lamang ang makahimo! Labot kaniya, ang Bibliya nag-ingon: “Ang Bato, hingpit ang iyang buhat, kay ang tanan niyang mga dalan maoy hustisya. Usa ka Diyos nga matinumanon, nga kaniya walay inhustisya; matarong ug matul-id siya.” (Deuteronomio 32:4) Ug kay “usa ka mahigugmaon sa hustisya,” buot ni Jehova nga ang katawhan makatagamtam sa kinabuhi diha sa usa ka matarong nga kalibotan.—Salmo 37:28.
Naghisgot bahin sa kahikayan sa Diyos sa pagpatunghag usa ka matarong nga kalibotan, si apostol Pedro misulat: “Apan adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini nila magapuyo ang pagkamatarong.” (2 Pedro 3:13) Kining “bag-ong mga langit” dili bag-ong pisikal nga mga langit. Hingpit ang pagkahimo sa Diyos sa atong pisikal nga mga langit, ug kini naghatag kaniyag himaya. (Salmo 8:3; 19:1, 2) Ang “bag-ong mga langit” maoy usa ka bag-ong pagmando ibabaw sa yuta. Ang presenteng “mga langit” naglangkob sa hinimog-tawong mga kagamhanan. Sa dili madugay, sa gubat sa Diyos sa Armagedon, kini mohatag ug dalan ngadto sa “bag-ong mga langit”—iyang langitnong Gingharian, o kagamhanan. (Pinadayag 16:14-16) Ang Hari niana nga Gingharian mao si Jesu-Kristo. Magdalag permanenteng kataposan sa tawhanong pagmando, kini nga kagamhanan magmando sa panahong walay tino.—Daniel 2:44.
Nan, unsa ang “bag-ong yuta”? Dili kini usa ka bag-ong planeta, kay gihimo sa Diyos ang yuta nga angayan gayong puy-an sa tawo, ug iyang kabubut-on nga kini magpabilin sa walay kataposan. (Salmo 104:5) Ang “bag-ong yuta” nagtumong sa usa ka bag-ong katilingban sa katawhan. (Genesis 11:1; Salmo 96:1) Ang “yuta” nga malaglag naglangkob sa mga tawong naghimo sa ilang kaugalingon nga bahin niining daotang sistema sa mga butang. (2 Pedro 3:7) Ang “bag-ong yuta” nga mopuli kanila pagalangkoban sa matuod nga mga alagad sa Diyos, nga nagadumot sa pagkadaotan ug nahigugma sa pagkamatarong ug hustisya. (Salmo 37:10, 11) Busa, mawala na ang kalibotan ni Satanas.
Apan unsay nagpaabot kang Satanas? Si apostol Juan mitagna: “Iyang [Kristo-Jesus] gidakop ang dragon, ang orihinal nga halas, kinsa mao ang Yawa ug Satanas, ug gigapos siya sulod sa usa ka libo ka tuig. Ug iyang gitambog siya sa kahiladman ug gisirhan kini ug gitimbrehan kini sa ibabaw kaniya, aron nga dili na niya mapahisalaag pa ang kanasoran.” (Pinadayag 20:1-3) Ang impluwensiya sa gigapos nga si Satanas diha sa katawhan sama ra gayod nianang sa usa ka binilanggo diha sa usa ka lawom nga atob. Pagkadakong kahupayan unya kana alang sa katawhan, nga mangabot ingong mag-uuna sa usa ka matarong nga kalibotan! Ug sa kataposan sa usa ka libo ka tuig, si Satanas pagalaglagon sa bug-os.—Pinadayag 20:7-10.
Nan, komosta ang napanunod nga sala? Gitagana na ni Jehova ang pasukaranan sa pagluka sa sala. “Ang Anak sa tawo [si Jesu-Kristo] mianhi . . . sa paghatag sa iyang kalag nga usa ka lukat baylo sa daghan.” (Mateo 20:28) Ang pulong “lukat” nagsimbolo sa bayad nga gikinahanglan sa paglukat sa mga nabihag. Si Jesus nagbayad sa iyang hingpit tawhanong kinabuhi ingong lukat sa pagluwas sa katawhan.—2 Corinto 5:14; 1 Pedro 1:18, 19.
Ang halad lukat ni Jesus makabenepisyo kanato bisan karon. Pinaagi sa pagpakitag pagtuo diha niana, kita makapahimulos ug mahinlong baroganan atubangan sa Diyos. (Buhat 10:43; 1 Corinto 6:11) Ubos sa pagmando sa Gingharian sa Diyos, ang lukat magpaposible sa katawhan sa bug-os nga pagkahiuli gikan sa sala. Ang kataposang basahon sa Bibliya nagbatbat sa usa ka mahulagwayong “suba sa tubig sa kinabuhi” nga nagadagayday gikan sa trono sa Diyos, ug sa mga daplin niini mao ang simbolikong mga kahoyng nagapamunga nga may mga dahon “alang sa pag-ayo sa kanasoran.” (Pinadayag 22:1, 2) Ang gihulagway sa Bibliya dinhi naghawas sa kahibulongang mga tagana sa Maglalalang alang sa pagpahiuli sa katawhan gikan sa sala tungod sa halad lukat ni Jesus. Ang bug-os nga kapadapatan niini nga tagana magpahigawas sa masinugtanong katawhan gikan sa sala ug kamatayon.
Kinabuhi sa Usa ka Matarong nga Kalibotan
Hunahunaa kon sama sa unsa unya ang kinabuhi ubos sa pagmando sa Gingharian. Ang krimen ug kapintasan mahimong mga butang sa nangagi. (Proverbio 2:21, 22) Mawala na ang inhustisya sa ekonomiya. (Salmo 37:6; 72:12, 13; Isaias 65:21-23) Ang tanang timailhan sa sosyal, rasanhon, tribonhon, ug etnikong pagpihig mapapas. (Buhat 10:34, 35) Ang mga gubat ug mga hinagiban sa panaggubat mawala na. (Salmo 46:9) Minilyon sa mga patay pagabanhawon sa usa ka kalibotan nga walay inhustisya. (Buhat 24:15) Ang tanan makatagamtam sa hingpit ug mahimsog nga panglawas. (Job 33:25; Pinadayag 21:3, 4) “Sa pagkamatinud-anon,” ang Bibliya nagpasalig kanato, “igapadala [ni Jesu-Kristo] ang hustisya.”—Isaias 42:3.
Kasamtangan, ang inhustisya modangat kanato, apan hinaot nga kita sa baylo dili mahimong mabintahaon. (Miqueas 6:8) Bisan kon kinahanglang antoson ang inhustisya, hinaot nga mahuptan nato ang malaomong panghunahuna. Ang gisaad nga matarong nga kalibotan sa dili madugay mahimong katinuoran. (2 Timoteo 3:1-5; 2 Pedro 3:11-13) Ang Diyos nga Labing Gamhanan nagsaad, ug kini “mamatuman.” (Isaias 55:10, 11) Karon na ang panahon nga mangandam alang sa kinabuhi diha nianang matarong nga kalibotan pinaagi sa pagkakat-on kon unsa ang mga gikinahanglan sa Diyos kanato.—Juan 17:3; 2 Timoteo 3:16, 17.
[Hulagway sa panid 7]
Ang tanang timailhan sa inhustisya mapapas diha sa gisaad nga bag-ong kalibotan sa Diyos