Ang Diyos Dili Hinayan Labot sa Iyang Saad

“HANGTOD kanus-a, Oh Jehova, ang akong pagpakitabang, ug ikaw dili magpatalinghog?” Mao kini ang mga pulong sa Hebreohanong manalagnang si Habacuc, nga nabuhi sa ikapitong siglo W.K.P. Apan morag pamilyar kining pamation, dili ba? Tawhanong kinaiyahan nga gusto natong mabatonan ang mga butang nga dugay na natong gipangandoy dihadiha dayon o sa mas daling panahon kon mahimo. Ug tinuod kini ilabina sa atong panahon nga gustog dihadiha nga katagbawan.​—Habacuc 1:2.

Sa unang siglo, dihay pipila nga mibati nga angay untang gituman sa Diyos ang iyang mga saad sa una pa. Sila nawad-an na gayod ug pailob nga ila ganing giisip ang Diyos nga hinayan o atrasado. Tungod niini, si apostol Pedro naaghat sa pagpahinumdom kanila nga ang paglantaw sa Diyos sa panahon lahi kaayo gikan sa atoa. Si Pedro nagsulat: “Ayaw sayloi sa pagmatikod kining butanga, mga hinigugma, nga ang usa ka adlaw kang Jehova maoy ingon sa usa ka libo ka tuig ug ang usa ka libo ka tuig ingon sa usa ka adlaw.”​—2 Pedro 3:8.

Sumala niining paagiha sa pagkuwenta sa panahon, ang usa ka 80-anyos nga tawo nabuhi lamag mga duha ka oras, ug ang tibuok nga kasaysayan sa tawo milungtad lamang ug mga unom ka adlaw. Kon atong tan-awon ang mga butang sumala niining panglantawa, mas masayon na kanato ang pagsabot sa paagi sa pagpakiglabot sa Diyos kanato.

Apan, ang Diyos matinagdanon sa panahon. Ngani, siya mahunahunaon kaayo sa panahon. (Buhat 1:7) Busa, si Pedro mipadayon sa pag-ingon: “Si Jehova dili hinayan labot sa iyang saad, ingon sa pagkahinayan nga giisip sa pipila ka tawo, kundili mapailobon siya kaninyo tungod kay wala siya magatinguha nga adunay malaglag apan nagatinguha nga makakab-ot ang tanan sa paghinulsol.” (2 Pedro 3:9) Dili sama sa mga tawo, ang Diyos dili mobati nga gipugos sa paghimog mga butang nga daw siya mahutdan ug panahon. Ingong “Hari sa walay kataposan,” siya adunay katingalahang panglantaw ug makatino kon kanus-a sa pagdagan sa panahon ang iyang mga lihok makahimo sa labing maayo alang sa tanang hingtungdan.​—1 Timoteo 1:17.

Human gipatin-aw ang katarongan sa morag pagkahinayan sa Diyos, si Pedro nagpalanog niining pasidaana: “Ang adlaw ni Jehova moabot ingon sa usa ka kawatan.” Sa ato pa, ang adlaw sa panudya moabot sa panahon nga ang tawo wala magdahom niini. Unya, sa mosunod nga mga bersikulo, gihisgotan ni Pedro ang katingalahang mga palaaboton niadtong nagpasundayag ug “balaang mga buhat sa panggawi ug mga buhat sa diyosnong pagkamahinalaron,” nga mao, nga sila makalabang-buhi ngadto sa gisaad sa Diyos nga “bag-ong mga langit ug usa ka bag-ong yuta.”​—2 Pedro 3:10-13.

Angayng magpasalamat gayod kita nga wala pa moabot ang paghukom sa Diyos. Ang iyang pailob nagpaposible kanato sa pagkahibalo sa iyang katuyoan ug sa pagpasibo sa atong mga kinabuhi aron makadawat sa iyang gisaad nga mga panalangin. Dili ba angay natong lantawon ang “pailob sa atong Ginoo ingong kaluwasan,” ingon sa gipangatarongan ni Pedro? (2 Pedro 3:15) Apan, adunay laing butang sa pailob sa Diyos.

Sukod sa Kasaypanan Pagapun-on

Sa pagtuon sa mga pakiglabot sa Diyos sa mga tawo sa nangagi, kita makamatikod nga kasagaran siya nagpugong sa iyang paghukom hangtod wala nay paglaom nga sila magbag-o pa. Labot sa paghukom sa Diyos sa mga Canaanhon, pananglitan, dugay na niyang gihisgotan ang ilang mga sala ngadto kang Abraham. Apan ang panahon sa pagpahamtang sa iyang paghukom wala pa moabot niadtong tungora. Nganong wala? Ang Bibliya nag-ingon: “Tungod kay ang kasaypanan sa mga Amorihanon [mga Canaanhon] wala pa mapuno,” o ingon sa pagkapamulong niana sa Knox nga bersiyon: “Ang pagkadaotan sa mga Amorihanon wala pa moabot sa bug-os nga tagal niini.”​—Genesis 15:16.a

Apan, sa mga 400 ka tuig sa ulahi, ang paghukom sa Diyos miabot, ug ang mga kaliwat ni Abraham, ang mga Israelinhon, miokupar sa yuta. Dihay pipila ka Canaanhon, sama kang Rahab ug sa mga Gabaonhon, nga naluwas tungod sa ilang tinamdan ug mga lihok, apan alang sa kadaghanan, sila nakadangat na sa kinagrabehang sukod sa kahugawan, ingon sa makita diha sa bag-o pang mga pagpangalot sa arkeolohiya. Sila naghimog pagsimba sa kinatawo, prostitusyon sa templo, ug paghalad ug mga bata. Ang Halley’s Bible Handbook nag-ingon: “Ang mga arkeologo nga nangalot sa mga kagun-oban sa mga siyudad sa Canaan nahibulong kon nganong sila wala dayon laglaga sa Diyos.” Sa kataposan, ang ‘sukod sa sala [sa Canaanhon] puno na’; ang ilang pagkadaotan ‘nakaabot na sa bug-os nga tagal niini.’ Walay usa ang may katarongan sa pag-akusar sa Diyos nga dili-matarong sa dihang iyang gitugotan nga ang yuta mahinloan samtang giluwas kadtong nagpakitag hustong tinamdan.

Kita makakita ug samang larawan diha sa mga adlaw ni Noe. Bisan pa sa kamatuoran nga ang mga tawo sa wala pa ang Lunop mga daotan, ang Diyos sa maluluy-on mihukom nga ang ilang panahon magpadayon pa ug laing 120 ka tuig. Sulod nianang panahona, si Noe nag-alagad ingong “usa ka magwawali sa pagkamatarong.” (2 Pedro 2:5) Sa midagan ang panahon, ang ilang pagkadaotan mihinog na gayod. “Nakita sa Diyos ang yuta ug, tan-awa! kini nadaot, tungod kay ang tanang unod nagdaot sa ilang dalan sa ibabaw sa yuta.” (Genesis 6:3, 12) Ang ilang ‘sukod sa sala puno na’; sa pagdagan sa panahon ang ilang daotang mga kiling miabot na sa kinatayuktokan. Sa dihang ang Diyos milihok siya bug-os nga may katarongan. Walo lamang ka tawo ang napamatud-ang matarong sa mga mata sa Diyos, ug iyang giluwas sila.

Ang samang sumbanan nakita diha sa pagtagad sa Diyos sa Israel. Bisan pa sa ilang dili-matinumanon ug malaw-ayng kagawian, ang Diyos nagpailob kanila sa upat ka gatos ka tuig. Ang rekord nag-ingon: “Si Jehova . . . nagsigeg padala . . . sa iyang mga mensahero, daghang higayong nagpadala, tungod kay nahangawa siya sa iyang katawhan . . . Apan sila nagpadayon . . . sa pagtamay sa iyang mga pulong ug nanamastamas sa iyang mga manalagna, hangtod ang kaligutgot ni Jehova misilaob batok sa iyang katawhan, hangtod nga dili na matabang.” (2 Cronicas 36:15, 16) Ang mga tawo nakaabot na sa punto diin imposibleng sila magbag-o pa. Si Jeremias lamang ug pipila pang uban ang mahimong luwason. Ang Diyos dili matawag nga dili-matarong sa dihang siya sa kataposan nagpakanaog sa paghukom sa nahibilin.

Ang Panahon sa Paglihok sa Diyos Ania Na

Gikan niining mga pananglitan atong masabtan nga gipugngan sa Diyos ang paghukom niining presenteng sistema sa mga butang hangtod mohinog na ang panahon. Kini gipahayag diha sa sugo nga gihatag ngadto sa simbolikong tigpatay sa Diyos: “‘Ingadto na ang imong mahait nga galab ug aniha ang mga bulig sa paras sa yuta, tungod kay ang mga ubas niini nahinog na.’ Ug ang anghel mihagbas sa iyang galab ngadto sa yuta ug giani ang paras sa yuta, ug iyang gilabay kini ngadto sa dakong pug-anan sa bino sa kasuko sa Diyos.” Matikdi nga ang pagkadaotan sa katawhan “nahinog na,” sa ato pa, kini nakaabot na sa punto nga imposibleng moarang-arang pa. Sa dihang ipakanaog sa Diyos ang paghukom, tino nga ang iyang pagbalda makataronganon.​—Pinadayag 14:18, 19.

Kon palandongon ang ibabaw, tin-aw nga ang paghukom sa Diyos batok sa kalibotan duol na gayod tungod kay ang kalibotan nakabaton ug mga kinaiyahan nga angay na untang hukman sa Diyos sa una pa. Bisan asa kita motan-aw, ang yuta puno sa kapintasan, sama sa panahon sa wala pa ang Lunop sa mga adlaw ni Noe. Ang tinamdan sa mga tawo nahisama gayod nianang gihubit sa Genesis 6:5: “Ang tanang kiling sa mga hunahuna sa kasingkasing [sa tawo] daotan lamang sa tanang panahon.” Bisan ang grabeng mga sala nga maoy hinungdan nga gipahamtang sa Diyos ang paghukom batok sa mga Canaanhon sagad nga ginahimo karon.

Ilabina sukad sa Gubat sa Kalibotan I, ang katawhan nakaagom ug makalilisang nga kausaban. Kini nakakita nga ang yuta nabasa sa dugo sa minilyon. Ang panaggubat, pagpuo sa kaliwat, terorismo, krimen, ug pagkadaotan misilaob sa tibuok kalibotan. Ang gutom, sakit, ug imoralidad mikaylap sa atong globo. Ang tanang ebidensiya nagpakita nga kita karon nagkinabuhi na taliwala nianang daotang kaliwatan nga bahin niana si Jesus miingon: “Kining kaliwatana dili gayod motaliwan hangtod nga mahitabo kining tanang butanga.” (Mateo 24:34) Ang kalibotan karon nagapuno sa “sukod sa sala” niini. “Ang mga bulig sa paras sa yuta” hinog nang anihon.

Panahon Nang Molihok Ka

Si apostol Juan gisultihan nga sa magkahiduol na ang paghukom, duha ka matang sa paghinog ang mahitabo. Sa usa ka bahin, “siya nga nagabuhat ug pagkadili-matarong, pabuhata pa siya ug pagkadili-matarong; ug ang usang mahugaw magpakahugaw pa.” Apan sa laing bahin, “ang usa nga matarong pabuhata pa ug pagkamatarong, ug ang usa nga balaan magmabalaan pa.” (Pinadayag 22:10, 11) Kining ulahi nga kaugmaran nagakahitabo may kalabotan sa tibuok-kalibotan nga edukasyonal nga buluhaton sa Bibliya nga ginadumala sa mga Saksi ni Jehova. Ang tumong nianang buluhatona mao ang pagtudlo sa mga tawo kon unsay gikinahanglan sa Diyos kanila aron sila maisip nga takos sa pagkadawat sa kinabuhing walay kataposan. Kining buluhatona karon nakaabot na sa 233 ka kayutaan diha sa duolan sa 87,000 ka kongregasyon.

Ang Diyos dili mahinay. Sa mapailobon iyang gihatagan ang mga tawo ug panahon nga gikinahanglan sa ‘pagsul-ob sa bag-ong pagkatawo’ aron mahilinya alang sa iyang mga saad. (Efeso 4:24) Karon, ang Diyos naghulat gihapon, bisan pa sa nagakagrabe kanunayng mga kahimtang sa kalibotan. Ang mga Saksi ni Jehova sa tibuok kalibotan naghimo kutob sa ilang maarangan aron makapaambit sa ilang mga silingan sa kahibalo nga motultol sa kinabuhing dayon. (Juan 17:3, 17) Makapalipay, matag tuig kapin sa 300,000 ka tawo ang nagsanong ug nagpabawtismo.

Uban sa kinabuhing walay kataposan nga anaa sa unahan, karon na ang panahon, dili sa paghulat, kondili sa paglihok. Kay sa dili madugay, atong makita ang katumanan sa saad ni Jesus: “Ang matag usa nga buhi ug nagapasundayag ug pagtuo kanako dili gayod bisan kanus-a mamatay.”​—Juan 11:26.

[Footnote]

[Hulagway sa panid 6]

Ang tigpatay sa Diyos gisugo sa paghabas sa galab sa dihang mohinog na ang paras sa yuta

[Hulagway sa panid 7]

Ang mga Saksi ni Jehova sa tibuok kalibotan nagatabang sa mga tawo aron mahilinya alang sa walay kataposang mga panalangin sa Diyos