Sanong sa mga Saad sa Diyos Pinaagi sa Pagpakitag Pagtuo

“Siya [Jehova nga Diyos] dagayang naghatag kanato sa bililhon ug halangdon kaayong mga saad.”​—2 PEDRO 1:4.

 1. Unsay nagpaarang kanato sa pagpakitag matuod nga pagtuo?

BUOT ni Jehova nga kita magpakitag pagtuo sa iyang mga saad. Bisan pa, “dili ang tanan adunay pagtuo.” (2 Tesalonica 3:2) Kining hiyasa maoy usa ka bunga sa balaang espiritu sa Diyos, o aktibong gahom. (Galacia 5:22, 23) Busa, kadto lamang gitultolan sa espiritu ni Jehova ang makapakitag pagtuo.

 2. Giunsa pagbatbat ni apostol Pablo ang “pagtuo”?

² Apan unsa ang pagtuo? Gitawag kana ni apostol Pablo nga “ang dayag nga pamatuod sa pagkaanaa sa mga butang nga dili makita.” Ang pamatuod niining dili makita nga mga butang malig-on kaayo nga kini gipakasama sa pagtuo. Ang pagtuo ginaingon usab nga “ang kasegurohan sa mga butang nga ginalaoman” tungod kay kadtong aduna niining hiyasa adunay garantiya nga ang tanang butang nga gisaad ni Jehova nga Diyos kasaligan kaayo nga kini sama nga natuman na.​—Hebreohanon 11:1.

Pagtuo ug ang mga Saad ni Jehova

 3. Unsay maeksperyensiyahan sa dinihogang mga Kristohanon kon sila magpakitag pagtuo?

³ Aron mapahimut-an si Jehova, kita kinahanglang magpakitag pagtuo sa iyang mga saad. Gipakita kini ni apostol Pedro diha sa iyang ikaduhang dinasig nga sulat, nga gisulat sa mga 64 K.P. Siya miingon nga kon ang iyang isigka-dinihogang mga Kristohanon magpakitag pagtuo, ilang makita ang katumanan sa “bililhon ug halangdon kaayong mga saad” sa Diyos. Ingong sangpotanan, sila “mahimong mga mag-aambit sa balaang kinaiya” ingong kaubang mga manununod ni Jesu-Kristo diha sa langitnong Gingharian. Pinaagi sa pagtuo ug sa tabang ni Jehova nga Diyos, sila nakaikyas gikan sa pagkaulipon sa dunot ug daotang mga pamatasan ug mga buhat niining kalibotana. (2 Pedro 1:2-4) Ug hunahunaa lang! Tagamtamon niadtong nagapakitag tinuod nga pagtuo ang samang bililhong kagawasan karong adlawa.

 4. Unsang mga hiyas ang angay natong idugang sa atong pagtuo?

⁴ Ang pagtuo sa mga saad ni Jehova ug pagkamapasalamaton alang sa atong hinatag-sa-Diyos nga kagawasan angay mopalihok kanato sa pagbuhat kutob sa atong mahimo aron mahimong sulondang mga Kristohanon. Si Pedro miingon: “Pinaagi sa inyong pag-amot ingon nga pagsanong sa tanang tim-os nga paningkamot, idugang ninyo sa inyong pagtuo ang kaligdong, sa kaligdong idugang ninyo ang kahibalo, sa inyong kahibalo idugang ang pagpugong sa kaugalingon, sa inyong pagpugong sa kaugalingon idugang ang pagkamainantoson, sa inyong pagkamainantoson idugang ang diyosnong debosyon, sa inyong diyosnong debosyon idugang ang inigsoong pagbati, sa inyong inigsoong pagbati ang gugma.” (2 Pedro 1:5-7) Busa gihatagan kita ni Pedro ug listahan nga maayong atong sag-ulohon. Atong susihon ug maayo kining mga hiyasa.

Hinungdanong mga Bahin sa Pagtuo

 5, 6. Unsa ang kaligdong, ug sa unsang paagi atong ikadugang kini diha sa atong pagtuo?

⁵ Si Pedro miingon nga ang kaligdong, kahibalo, pagpugong sa kaugalingon, pagkamainantoson, diyosnong debosyon, inigsoong pagbati, ug gugma kinahanglang idugang sa usag usa ug diha sa atong pagtuo. Kinahanglang maningkamot gayod kita sa paghimo niining mga hiyasa nga mahimong hinungdanong bahin sa atong pagtuo. Pananglitan, ang kaligdong dili maoy usa ka hiyas nga atong ipasundayag nga bulag gikan sa pagtuo. Ang leksikograpo nga si W. E. Vine miingon nga diha sa 2 Pedro 1:5, “ang kaligdong ipuno ingong usa ka hinungdanong hiyas sa pagpakitag pagtuo.” Ang matag usa sa ubang mga hiyas nga gihisgotan usab ni Pedro himoong bahin sa atong pagtuo.

⁶ Una, kinahanglang atong idugang ang kaligdong diha sa atong pagtuo. Ang pagkahimong maligdong nagkahulogan sa pagbuhat ug maayo sa panan-aw sa Diyos. Alang sa Gregong pulong nga gihubad dinhi nga “kaligdong,” gigamit sa ubang mga bersiyon ang “pagkamaayo.” (New International Version; The Jerusalem Bible; Today’s English Version) Ang kaligdong mopalihok kanato sa paglikay sa pagbuhat ug daotan ug sa paghimog kadaot sa isigkatawo. (Salmo 97:10) Kini mopukaw usab ug maisogong buhat sa paghimog maayo alang sa espirituwal, pisikal, ug emosyonal nga kaayohan sa uban.

 7. Nganong idugang nato ang kahibalo diha sa atong pagtuo ug kaligdong?

⁷ Nganong giagda kita ni Pedro sa pagdugang ug kahibalo diha sa atong pagtuo ug kaligdong? Aw, samtang atubangon nato ang bag-ong mga hagit sa atong pagtuo, gikinahanglan nato ang kahibalo aron kita makaila sa husto gikan sa sayop. (Hebreohanon 5:14) Pinaagi sa pagtuon sa Bibliya ug kasinatian sa pagpadapat sa Pulong sa Diyos ug sa pagpakitag praktikal nga kaalam diha sa adlaw-adlaw nga kinabuhi, atong madugangan ang atong kahibalo. Sa baylo, kini makatabang kanato sa pag-amping sa atong pagtuo ug sa pagpadayon sa pagbuhat ug maayo kon kita pagasulayan.​—Proverbio 2:6-8; Santiago 1:5-8.

 8. Unsa ang pagpugong sa kaugalingon, ug sa unsang paagi gilangkit kini sa pagkamainantoson?

⁸ Aron kita matabangan sa pag-atubang sa mga pagsulay sa atong pagtuo, kinahanglang atong idugang sa atong kahibalo ang pagpugong sa kaugalingon. Ang Gregong pulong alang sa “pagpugong sa kaugalingon” nagkahulogan sa katakos sa pagkontrolar sa atong kaugalingon. Kini nga bunga sa espiritu sa Diyos motabang kanato sa pagpakitag pagpugong sa hunahuna, sa pulong, ug sa paggawi. Pinaagi sa mapinadayonon nga pagpakitag pagpugong sa kaugalingon, atong ikadugang niini ang pagkamainantoson. Ang Gregong termino alang sa “pagkamainantoson” nagkahulogang maisogong pagkamalahutayon, dili subo-ug-nawong nga moampo na lang sa dili-kaikyasang kalisod. Tungod sa kalipay nga gibutang sa iyang atubangan giantos ni Jesus ang kahoy sa pagsakit. (Hebreohanon 12:2) Ang hinatag-sa-Diyos nga kusog nga nalangkit sa pagkamainantoson molig-on sa atong pagtuo ug makatabang kanato sa pagkalipay diha sa kasakitan, sa pagsukol sa pagsulay, ug sa paglikay sa pagkompromiso kon pagalutoson.​—Filipos 4:13.

 9. (a) Unsa ang diyosnong debosyon? (b) Nganong atong idugang ang inigsoong pagbati diha sa atong diyosnong debosyon? (c) Sa unsang paagi atong ikadugang ang gugma diha sa atong inigsoong pagbati?

⁹ Sa atong pagkamainantoson kinahanglang atong idugang ang diyosnong debosyon​—pagtahod, pagsimba, ug pag-alagad kang Jehova. Ang atong pagtuo motubo samtang atong batasanon ang diyosnong debosyon ug sa pagtan-aw kon sa unsang paagi si Jehova nakiglabot sa iyang katawhan. Bisan pa, aron mapasundayag ang pagkadiyosnon, gikinahanglan nato ang inigsoong pagbati. Gawas pa, “siya nga wala mahigugma sa iyang igsoon nga iyang nakita, wala mahigugma sa Diyos nga wala niya makita.” (1 Juan 4:20) Ang atong mga kasingkasing angay mopalihok kanato sa pagpakitag tinuod nga pagbati sa ubang mga alagad ni Jehova ug sa pagpangita alang sa ilang kaayohan sa tanang panahon. (Santiago 2:14-17) Apan nganong kita gisugo nga idugang ang gugma diha sa atong inigsoong pagbati? Dayag nga ang gipasabot ni Pedro nga kita kinahanglang magpakita ug gugma alang sa tanang katawhan, dili lamang sa atong mga igsoon. Kining maong gugma ikapakita ilabina pinaagi sa pagsangyaw sa maayong balita ug sa pagtabang sa mga tawo sa espirituwal.​—Mateo 24:14; 28:19, 20.

Magkalahi nga mga Epekto

10. (a) Unsay atong paglihok kon ang kaligdong, kahibalo, pagpugong sa kaugalingon, pagkamainantoson, diyosnong debosyon, inigsoong pagbati, ug gugma idugang diha sa atong pagtuo? (b) Unsay mahitabo kon ang usa ka nagaangkong Kristohanon kulang niining mga hiyasa?

¹⁰ Kon idugang nato ang kaligdong, kahibalo, pagpugong sa kaugalingon, pagkamainantoson, diyosnong debosyon, inigsoong pagbati, ug paghigugma sa atong pagtuo, kita maghunahuna, mosulti, ug molihok sa mga paagi nga giuyonan sa Diyos. Sa bali, kon ang usa ka nagaangkong Kristohanon mapakyas sa pagpasundayag niining mga hiyasa, siya mabuta sa espirituwal. Iyang ‘gipiyong ang iyang mga mata sa kahayag’ gikan sa Diyos ug nakalimot nga siya nahinloan na gikan sa iyang nangaging kasal-anan. (2 Pedro 1:8-10; 2:20-22) Kinahanglang dili gayod kita mapakyas nianang paagiha ug mawad-ag pagtuo sa mga saad sa Diyos.

11. Unsa ang angay natong mapaabot gikan sa maunongong mga dinihogan?

¹¹ Ang maunongon dinihogang mga Kristohanon nagtuo sa mga saad ni Jehova ug naningkamot pag-ayo sa paghimo sa iyang pagtawag ug pagpili kanila nga malig-on. Bisan pa sa mga babag sa ilang dalan, kita makalaom kanila nga magpasundayag ug diyosnong mga hiyas. Alang sa matinumanong mga dinihogan sila ‘maabiabihong pasudlon ngadto sa walay kataposang gingharian ni Jesu-Kristo’ pinaagi sa ilang pagkabanhaw ngadto sa espiritu nga kinabuhi sa langit.​—2 Pedro 1:11.

12. Unsay atong pagsabot sa mga pulong sa 2 Pedro 1:12-15?

¹² Si Pedro nahibalo nga sa dili madugay siya mamatay, ug siya naglaom nga makadawat ug pagkabanhaw sa ulahi ngadto sa langitnong kinabuhi. Apan samtang buhi pa siya “niini nga tabernakulo”​—iyang tawhanong lawas—​siya naningkamot sa paglig-on sa pagtuo sa isigkamagtutuo ug gipukaw sila pinaagi sa pagpahinumdom kanila sa mga butang nga gikinahanglan aron makabaton sa pag-uyon sa Diyos. Human sa iyang pagpanaw diha sa kamatayon, ang espirituwal nga mga igsoong lalaki ug babaye ni Pedro nakapalig-on sa ilang pagtuo pinaagi sa paghinumdom sa iyang mga pulong.​—2 Pedro 1:12-15.

Pagtuo Diha sa Matagnaong Pulong

13. Sa unsang paagi ang Diyos mitaganag makapalig-on sa pagtuo nga pamatuod bahin sa pag-abot ni Kristo?

¹³ Ang Diyos mismo naghatag ug makapalig-on sa pagtuo nga pamatuod bahin sa katinoan sa pag-abot ni Jesus “uban sa kagahom ug dakong himaya.” (Mateo 24:30; 2 Pedro 1:16-18) Kay walay ebidensiya, ang paganong mga saserdote naghatag ug bakak nga mga sugilanon bahin sa ilang mga diyos, samtang si Pedro, Santiago, ug Juan maoy mga saksi mismo sa kahalangdon ni Kristo diha sa pagkausab sa dagway. (Mateo 17:1-5) Ilang nakita siya nga gihimaya ug nakadungog sa kaugalingong tingog sa Diyos nga miila kang Jesus nga Iyang pinalanggang Anak. Kana nga pag-ila ug ang dan-ag nga panagway nga gihatag kang Kristo maoy pagtuga sa pasidungog ug himaya diha kaniya. Tungod niining pagpadayag sa Diyos, gitawag ni Pedro ang lugar, lagmit diha sa tagaytay sa Hermon, “ang balaang bukid.”​—Itandi ang Exodo 3:4, 5.

14. Sa unsang paagi ang atong pagtuo maapektohan pinaagi sa pagkausab sa dagway ni Jesus?

¹⁴ Sa unsang paagi ang pagkausab sa dagway ni Jesus nakaapekto sa atong pagtuo? Si Pedro miingon: “Ania kanamo ang matagnaong pulong nga gihimo nga labi pang seguro; ug maayo nga mamati kamo niini ingon sa usa ka suga nga nagdan-ag sa usa ka mangitngit nga dapit, hangtod nga mobanagbanag ang adlaw ug mosubang diha sa inyong kasingkasing ang bituong kabugason.” (2 Pedro 1:19) “Ang matagnaong pulong” dayag naglakip dili lamang sa mga tagna sa Hebreohanong Kasulatan bahin sa Mesiyas kondili sa mga pulong usab ni Jesus nga siya moabot “uban sa kagahom ug dakong himaya.” Sa unsang paagi ang pulong “gihimo nga labi pang seguro” pinaagi sa pagkausab sa dagway? Kana nga hitabo nagpamatuod sa matagnaong pulong bahin sa mahimayaong pag-abot ni Kristo sa gahom sa Gingharian.

15. Unsa ang nalangkit sa pagpamati sa matagnaong pulong?

¹⁵ Aron molig-on ang atong pagtuo, kinahanglang mamati kita sa matagnaong pulong. Nalangkit niini ang pagtuon nianang pulonga, sa paghisgot niana diha sa Kristohanong mga tigom, ug sa pagpadapat sa tambag niana. (Santiago 1:22-27) Kinahanglang himoon nato kini nga “usa ka suga diha sa mangitngit nga dapit,” nga nagadan-ag diha sa atong mga kasingkasing. (Efeso 1:18) Diha lamang nga kini makagiya kanato hangtod ang “kabugason,” o, “ang mahayag nga bituon sa kabuntagon,” si Jesu-Kristo, magpadayag sa iyang kaugalingon diha sa himaya. (Pinadayag 22:16) Kana nga pagpadayag magkahulogan sa kalaglagan sa walay-pagtuo ug mga panalangin alang niadtong nagapakitag pagtuo.​—2 Tesalonica 1:6-10.

16. Nganong kita makatuo nga ang tanang matagnaong mga saad sa Pulong sa Diyos matuman?

¹⁶ Ang mga manalagna sa Diyos dili lamang mahait ug salabotan nga naghimog maalamong mga tagna, kay si Pedro miingon: “Walay tagna sa Kasulatan nga miabot pinaagi sa kinaugalingong paghubad. Tungod kay walay tagna nga miabot pinaagi sa kabubut-on sa tawo, kondili ang mga tawo nagsulti gikan sa Diyos sa diha nga gimandoan sa balaang espiritu.” (2 Pedro 1:20, 21) Pananglitan, si David miingon: “Ang espiritu ni Jehova ang misulti pinaagi kanako.” (2 Samuel 23:1, 2) Ug si Pablo misulat: “Ang tibuok nga Kasulatan dinasig sa Diyos.” (2 Timoteo 3:16) Sanglit gidasig man ang mga manalagna sa Diyos pinaagi sa iyang espiritu, kita makasalig nga ang tanang mga saad diha sa iyang Pulong matuman.

Sila Nagtuo sa mga Saad sa Diyos

17. Unsa ang saad nga maoy pasukaranan sa pagtuo ni Abel?

¹⁷ Ang mga saad ni Jehova maoy basehanan sa pagtuo sa ‘bagang panganod’ sa iyang una-Kristohanong mga saksi. (Hebreohanon 11:1–​12:1) Pananglitan, si Abel nagtuo sa saad sa Diyos bahin sa “binhi” nga magasamad sa ulo sa “bitin.” Dihay pamatuod sa katumanan sa hukom sa Diyos diha sa mga ginikanan ni Abel. Sa gawas sa Eden, si Adan ug ang iyang pamilya mikaon ug tinapay pinaagi sa singot sa ilang mga nawong tungod kay ang tinunglo nga yuta nagpaturok ug mga sampinit ug mga kadyapa. Tingali nakamatikod si Abel sa pangandoy ni Eva sa iyang bana ug nakakita nga gimandoan siya ni Adan. Siyempre iyang gihisgotan ang bahin sa kasakit sa iyang pagsabak. Ug ang ganghaan sa tanaman sa Eden gibantayan sa mga kerubin ug sa nagsigang sulab sa espada. (Genesis 3:14-19, 24) Kining tanan maoy “dayag nga pamatuod” nga nagpasalig kang Abel nga moabot ang kaluwasan pinaagi sa gisaad nga Binhi. Milihok diha sa pagtuo, mitanyag si Abel sa Diyos ug usa ka halad nga napamatud-ang mas maayo kay sa kang Cain.​—Hebreohanon 11:1, 4.

18, 19. Sa unsang mga paagi nga si Abraham ug Sarah nagpakitag pagtuo?

¹⁸ Ang mga patriarkang Abraham, Isaac, ug Jacob mituo usab sa mga saad ni Jehova. Si Abraham mituo sa saad sa Diyos nga ang tanang mga pamilya sa yuta pagapanalanginan pinaagi kaniya ug nga ang iyang binhi hatagan ug yuta. (Genesis 12:1-9; 15:18-21) Ang iyang anak nga si Isaac ug apo nga si Jacob maoy “mga manununod sa mao ra nga saad uban kaniya.” Pinaagi sa pagtuo si Abraham “mipuyo ingong usa ka langyaw sa yutang saad” ug nagpaabot sa “siyudad nga adunay tinuod nga mga patukoranan,” ang langitnong Gingharian sa Diyos nga ilalom niini siya pagabanhawon sa kinabuhi dinhi sa yuta. (Hebreohanon 11:8-10) Ikaw ba adunay sama nga pagtuo?

¹⁹ Ang asawa ni Abraham, si Sarah, mga 90 anyos ang edad ug lapas na sa panuigon sa pagpanganak sa dihang nagpakita siyag pagtuo sa saad sa Diyos ug nakadawat ug gahom “sa pagpanamkon” ug nanganak kang Isaac. Busa, gikan sa 100-anyos nga edad nga Abraham, “nga sama sa patay na” labot sa pagsanay, sa kataposan “nanganak nga sama kadaghan sa mga bituon sa kalangitan.”​—Hebreohanon 11:11, 12; Genesis 17:15-17; 18:11; 21:1-7.

20. Bisan tuod wala makakita ang mga patriarka sa bug-os nga katumanan sa mga saad sa Diyos kanila, unsay ilang gibuhat?

²⁰ Ang matinumanong mga patriarka nangamatay nga wala makakita sa bug-os nga katumanan sa mga saad sa Diyos kanila. Bisan pa, “ilang nakita [ang gisaad nga mga butang] gikan sa halayo ug nahinangop sila niini ug miila nga sila mga dumuloong ug temporaryong mga molupyo lamang sa yuta.” Milabay una ang daghang kaliwatan ayha pa napanag-iya sa mga kaliwat ni Abraham ang Yutang Saad. Apan, sa tibuok nilang mga kinabuhi, ang mahinadlokon-sa-Diyos nga mga patriarka nagpakitag pagtuo sa mga saad ni Jehova. Sanglit sila wala man gayod kawad-ig pagtuo, sila sa dili madugay pagabanhawon sa kinabuhi diha sa yutan-ong dominyo sa “siyudad” nga giandam sa Diyos alang kanila, ang Mesiyanikong Gingharian. (Hebreohanon 11:13-16) Sa samang paagi, ang pagtuo makahimo kanatong maunongon kang Jehova bisan pa kon dili nato makita ang dihadiha nga katumanan sa tanan niyang katingalahang mga saad. Ang atong pagtuo mopalihok usab kanato sa pagsunod sa Diyos, sama sa gihimo ni Abraham. Ug samtang iyang gipasa ang espirituwal nga panulondon ngadto sa iyang kaliwat, sa ingon kita makatabang sa atong mga anak sa pagpakitag pagtuo sa bililhong mga saad ni Jehova.​—Hebreohanon 11:17-21.

Pagtuo Hinungdanon sa mga Kristohanon

21. Aron madawat sa Diyos karong adlawa, unsa ang angay ilakip diha sa atong pagpakitag pagtuo?

²¹ Apan, adunay labaw pa sa pagtuo kay sa pagbaton ug pagsalig sa katumanan sa mga saad ni Jehova. Sa tibuok nga kasaysayan sa tawo, gikinahanglan ang pagpakitag pagtuo sa Diyos sa nagkalainlaing paagi kon buot natong matagamtam ang iyang pag-uyon. Si Pablo miingon nga kon “walay pagtuo dili gayod mahimo ang pagpahimuot [kang Jehova nga Diyos], kay ang bisan kinsa nga moduol sa Diyos kinahanglang motuo sa iyang pagkaanaa ug nga siya moganti niadtong masingkamotong nagapangita kaniya.” (Hebreohanon 11:6) Aron madawat ni Jehova karong adlawa, kinahanglang magpakitag pagtuo ang tawo kang Jesu-Kristo ug sa halad lukat nga gitagana sa Diyos pinaagi kaniya. (Roma 5:8; Galacia 2:15, 16) Si Jesus mismo ang miingon: “Kay gihigugma gayod sa Diyos ang kalibotan [sa katawhan] nga tungod niana iyang gihatag ang iyang bugtong Anak, aron nga ang tanan nga mopakitag pagtuo kaniya dili malaglag kondili makabaton ug kinabuhing walay kataposan. Ang mopakitag pagtuo sa Anak adunay kinabuhing walay kataposan; ang mosupak sa Anak dili makakitag kinabuhi, kondili ang kapungot sa Diyos magpabilin diha kaniya.”​—Juan 3:16, 36.

22. Ang Mesiyanikong Gingharian mopatungha ug katumanan sa unsang saad?

²² Gidula ni Jesus ang hinungdanong papel sa katumanan sa mga saad sa Diyos bahin sa Gingharian nga maoy ginaampo sa mga Kristohanon. (Isaias 9:6, 7; Daniel 7:13, 14; Mateo 6:9, 10) Sama sa gipakita ni Pedro, ang pagkausab sa dagway nagpamatuod sa matagnaong pulong bahin sa pag-abot ni Jesus diha sa gahom ug himaya sa Gingharian. Ipatungha sa Mesiyanikong Gingharian ang katumanan sa laing saad sa Diyos, kay si Pedro misulat: “Adunay bag-ong mga langit ug usa ka bag-ong yuta diin nagapuyo ang pagkamatarong.” (2 Pedro 3:13) Usa ka susamang tagna ang natuman sa dihang ang Hudiyohanong mga bihag sa Babilonya gipabalik sa ilang yuta sa 537 W.K.P. ilalom sa usa ka kagamhanan diin si Zerubbabel mao ang gobernador ug si Josue mao ang hataas nga saserdote. (Isaias 65:17) Apan si Pedro nagpunting sa usa ka umaabot nga panahon diin ang “bag-ong mga langit”​—ang langitnong Mesiyanikong Gingharian—​magmando ibabaw sa “usa ka bag-ong yuta,” sa matarong tawhanong katilingban nga nagpuyo niining kalibotana.​—Itandi ang Salmo 96:1.

23. Unsa nga mga pangutana bahin sa kaligdong ang atong sunod nga hisgotan?

²³ Ingong maunongong mga alagad ni Jehova ug mga sumusunod sa iyang pinalanggang Anak, si Jesu-Kristo, ginapangandoy nato ang gisaad sa Diyos nga bag-ong kalibotan. Kita nahibalo nga kana haduol na, ug kita nagtuo nga ang tanang bililhong mga saad ni Jehova matuman. Aron makalakaw nga inuyonan sa atubangan sa atong Diyos, kinahanglang palig-onon nato ang atong pagtuo pinaagi sa pagdugang niini ug kaligdong, kahibalo, pagpugong sa kaugalingon, pagkamainantoson, diyosnong debosyon, inigsoong pagbati, ug gugma.a Niining puntoha, mahimong ipangutana, Sa unsang paagi atong ikapasundayag ang kaligdong? Ug sa unsang paagi ang atong pagkahimong maligdong makahatag kanato ug kaayohan ug sa uban, ilabina sa atong Kristohanong mga kauban, kinsa misanong sa mga saad sa Diyos pinaagi sa pagpakitag pagtuo?

Unsay Imong mga Tubag?

◻ Sa unsang paagi ang “pagtuo” mahubit?

◻ Sumala sa 2 Pedro 1:5-7, unsang mga hiyas ang idugang diha sa atong pagtuo?

◻ Unsa ang epekto sa pagkausab sa dagway ni Jesus diha sa atong pagtuo?

◻ Unsang mga pananglitan sa pagtuo ang gihatag ni Abel, Abraham, Sarah, ug uban pa sa unang mga panahon?

[Hulagway sa panid 15]

Nahibalo ka ba sa unsang paagi ang pagkausab sa dagway ni Jesus makaapektar sa pagtuo sa tawo?