Pakigsuod sa Diyos
Ang Usa nga Nagpabili Gayod Kanato
ANG Bibliya nag-ingon nga usahay hukman kita sa atong kasingkasing. Gani, mobati kita nga dili takos sa gugma ug pagtagad sa Diyos. Apan ang Bibliya nagpasalig kanato: “Ang Diyos mas labaw kay sa atong mga kasingkasing ug nahibalo sa tanang butang.” (1 Juan 3:19, 20) Siya mas nakaila kanato kay sa atong kaugalingon. Lagmit lahi gayod ang panglantaw sa Diyos kanato. Nan, giunsa man kita pag-isip ni Jehova nga Diyos kansang panghunahuna labawng hinungdanon? Ang tubag niini makita diha sa makapatandog nga ilustrasyon nga gigamit ni Jesus sa duha ka lainlaing higayon.
Sa usa ka higayon, si Jesus miingon nga ang ‘duha ka goryon ikabaligya sa usa ka sensilyo nga gamay ug bili.’ (Mateo 10:29, 31) Sa Lucas 12:6, 7, si Jesus nag-ingon usab: “Ang lima ka goryon ginabaligya sa duha ka sensilyong gamayg bili, dili ba? Bisan pa niana walay usa kanila nga mahikalimtan atubangan sa Diyos. . . . Ayaw kahadlok; kamo labaw pa ug bili kay sa daghang goryon.” Kining simple ug epektibo nga ilustrasyon magtudlo kanato kon giunsa pag-isip ni Jehova ang matag usa sa iyang mga magsisimba.
Ang goryon maoy usa sa kinabaratohang langgam nga mapalit aron kan-on. Posible nga nakita mismo ni Jesus ang kabos nga mga babaye—lagmit bisan ang iyang inahan—nga mopalit niining gagmayng mga langgam sa merkado aron ipakaon sa ilang pamilya. Ang usa ka sensilyong assarion, nga wala pay tres pesos ang kantidad sa atong panahon, makapalit na ug duha ka goryon. Barato gayod kaayo kining mga langgama nga sa duha ka sensilyo, dili lang upat ka goryon ang imong mapalit kondili lima, kay pakapinan mag usa.
Si Jesus nagsaysay nga walay bisan usa ka goryon “nga mahikalimtan atubangan sa Diyos” o mahulog “sa yuta nga dili mahibaloan” sa Amahan. (Mateo 10:29) Si Jehova nahibalo sa matag higayon nga mahulog ang usa ka goryon sa yuta tungod tingali kay kini nasamdan o kaha motugdon aron sa pagpangitag pagkaon. Iyang gilalang kining daw walay bili nga mga langgam ug padayong ginaatiman. Sa pagkatinuod, para kang Jehova bililhon gayod kining mga langgama. Nasabtan ba nimo ang punto sa ilustrasyon ni Jesus?
Diha sa iyang pagpanudlo, si Jesus sagad naggamit ug simpleng mga butang sa pagtudlog mas hinungdanong leksiyon. Pananglitan, si Jesus nag-ingon: “Ang mga uwak wala magpugas ug binhi ni mag-ani, ug sila walay kamalig ni balay-tipiganan, ug gani ang Diyos nagapakaon kanila. Dili ba labaw pa man kamo ug bili kay sa mga langgam?” (Lucas 12:24) Busa nasabtan nato ang punto sa gisulti ni Jesus bahin sa mga goryon: Kon si Jehova nagtagad niining gagmayng mga langgam, unsa pa kaha sa tawo nga nahigugma ug nagsimba kaniya!
Atong nasabtan diha sa mga pulong ni Jesus nga dili gayod kita angayng mobati nga kita dili takos sa pagtagad sa Diyos kinsa “mas labaw kay sa atong mga kasingkasing.” Makapahupay gayod ang pagkahibalo nga ang atong Maglalalang nag-isip kanato labaw pa sa pag-isip nato sa atong kaugalingon, dili ba?
[Picture Credit Line sa panid 9]
Sparrows: © ARCO/D. Usher/age fotostock