“Makangayang Mensahe” Gikan sa Apokalipsis

“Nakita ko ang laing anghel nga nagalupad sa katung-ang langit, ug siya adunay walay-kataposang maayong balita nga ipahayag ingon nga makangayang mensahe ngadto sa mga nagapuyo sa yuta.”​—PINADAYAG 14:6.

 1. Samtang ang mga Saksi ni Jehova nagtuo sa dinasig nga basahon sa Apokalipsis, nganong dili sila usa ka “apokaliptikong sekta”?

SUKWAHI sa mga akusasyon batok kanila, ang mga Saksi ni Jehova dili usa ka “apokaliptikong sekta” o usa ka “kulto sa adlaw sa panudya.” Sila, hinunoa, nagdawat sa Apokalipsis, o basahon sa Pinadayag, ingong bahin sa dinasig nga Pulong sa Diyos. Tinuod, ang Pinadayag nasudlag mga mensahe sa paghukom batok sa mga daotan. Apan sa ilang pagsangyaw sa publiko, ang mga alagad sa Diyos bug-os nga nagsentro sa pagtagad sa maanindot kaayong paglaom nga gipadayag sa Bibliya, apil na nianang sa Apokalipsis, o Pinadayag. Busa, sila dili magdugang o magkuha ug bisan unsa gikan sa matagnaong mga pulong nga makita diha niana.​—Pinadayag 22:18, 19.

Mga Magsasangyaw sa Makalipay nga Balita

 2. Unsa ang pipila ka kasulatan nga kanunayng gamiton sa mga Saksi ni Jehova sa ilang pagsangyaw nga buluhaton?

² Ang kanunayng kutloon nga Kasulatanhong basehanan alang sa publikong ministeryo sa mga Saksi ni Jehova mao ang mga pulong ni Jesus: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14, potnot) Ug unsa “kining maayong balita sa gingharian”? Daghang Saksi motubag pinaagi sa pagkutlo sa mga bersikulo gikan sa Pinadayag mga kapitulo 20 ug 21 nga naghisgot sa Usa ka Libo ka Tuig nga Pagmando ni Kristo ug sa iyang Gingharian nga kagamhanan ug sa tawhanong katilingban, diin ang kamatayon, pagbangotan, ug kasakit ‘mawala na.’​—Pinadayag 20:6; 21:1, 4.

 3. Katugbang sa unsang misyon ang publikong ministeryo sa mga Saksi ni Jehova?

³ Ingong mga magsasangyaw niining makalipay nga balita, ang mga Saksi ni Jehova mao gayod ang tigpamaba sa simbolikong langitnong mensahero kansang misyon gihubit usab sa Pinadayag. “Nakita ko ang laing anghel nga nagalupad sa katung-ang langit, ug siya adunay walay-kataposang maayong balita nga ipahayag ingon nga makangayang mensahe ngadto sa mga nagapuyo sa yuta, ug ngadto sa matag nasod ug tribo ug dila ug katawhan.” (Pinadayag 14:6) Ang “walay-kataposang maayong balita” nag-apil sa pahibalo nga “ang gingharian [o, pagmando] sa kalibotan nahimong ang gingharian sa atong Ginoo ug sa iyang Kristo” ug nga ang “tinudlong panahon” ni Jehova miabot sa ‘paggun-ob niadtong mga nagagun-ob sa yuta.’ (Pinadayag 11:15, 17, 18) Dili ba tinuod gayod kana nga maayong balita?

Kon Unsay Gitagana sa Pinadayag Kanato

 4. (a) Unsang sukaranang mga kamatuoran ang gilatid diha sa Pin kapitulo 1 sa Pinadayag? (b) Unsay gikinahanglan alang niadtong nagtinguha nga makapahimulos sa makalipay nga balita?

⁴ Ang unang kapitulo sa basahon sa Pinadayag nagpadayag kang Jehova ingong “ang Alfa ug ang Omega, . . . ang Usa kinsa mao ang karon ug ang kaniadto ug ang umaabot, ang Labing-Gamhanan.” Ug gipadayag niini ang iyang Anak, si Jesu-Kristo, ingong “ang Kasaligang Saksi,” “ang panganay gikan sa mga patay,” ug “ang Magmamando sa mga hari sa yuta.” Kini naghisgot usab bahin kang Jesus ingon nga “kaniya nga nahigugma kanato ug nagbadbad kanato gikan sa atong mga sala pinaagi sa iyang kaugalingong dugo.” (Pinadayag 1:5, 8) Busa, gikan sa sinugdanan, gipatin-aw sa Pinadayag ang sukaranang makaluwas-ug-kinabuhing mga kamatuoran. ‘Kadtong nagpuyo sa yuta’ dili makapahimulos sa makalipay nga balita nga gihatod ngadto kanila gawas kon sila moila sa pagkasoberano ni Jehova, motuo sa giula nga dugo ni Jesus, ug motuo nga gibanhaw siya ni Jehova ug nga si Kristo karon mao ang tinudlo sa Diyos nga Magmamando sa yuta.​—Salmo 2:6-8.

 5. Unsang papel nga gilarawan si Kristo diha sa mga Pin kapitulo 2 ug 3 sa Pinadayag?

⁵ Ang sunod nga duha ka kapitulo naglarawan kang Kristo Jesus ingong mahigugmaong langitnong Magtatan-aw sa mga kongregasyon sa iyang mga tinun-an sa yuta. Ang basahong linukot nga gisulat ngadto sa pinili nga pito ka Kristohanong mga kongregasyon nga naglungtad sa Asia Minor sa unang siglo K.P. naundan sa pagdasig ug malig-ong tambag nga aplikado gihapon karon. Ang mga mensahe nga gipadala ngadto sa mga kongregasyon kasagarang nagsugod sa mga pulong sama sa “nahibalo ako sa imong mga buhat” o “nahibalo ako sa imong kasakitan.” (Pinadayag 2:2, 9) Oo, si Kristo nasayod gayod kon unsay nagakahitabo sa mga kongregasyon sa iyang mga tinun-an. Iyang gihatagag komendasyon ang pipila sa ilang gugma, pagtuo, paghago sa pag-alagad, paglahutay, ug pagkamatinumanon ngadto sa iyang ngalan ug pulong. Ang uban iyang gibadlong tungod kay ilang gitugotan ang ilang gugma alang kang Jehova ug sa iyang Anak nga mobugnaw, o sila nahulog sa seksuwal nga imoralidad, idolatriya, o apostatang sektaryanismo.

 6. Ang panan-awon nga natala sa Pin kapitulo 4 makatabang sa mga tawo nga makasabot sa unsa?

⁶ Ang Pin kapitulo 4 naghatag ug makapukawg-kadasig nga panan-awon sa langitnong trono ni Jehova nga Diyos. Kini naghatag ug daklit nga pagtan-aw sa himaya sa presensiya ni Jehova ug sa langitnong gambalay sa pagmando nga iyang gamiton. Ang gipurongpurongan nga mga magmamando, kansang mga trono nag-alirong sa sentro nga trono sa uniberso, nangyukbo kang Jehova ug nagpahayag: “Takos ikaw, Jehova, nga mismo among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.”​—Pinadayag 4:11.

 7. (a) Unsay giawhag sa manulonda nga himoon sa mga molupyo sa yuta? (b) Unsa ang usa ka hinungdanong bahin sa atong edukasyonal nga buluhaton?

⁷ Kini ba dunay kahulogan sa mga tawo karon? Dayag nga aduna. Kon buot nila ang kinabuhi ilalom sa Milenyal nga Gingharian, sila kinahanglang mamati kon unsay gipahayag sa “anghel nga nagalupad sa katung-ang langit”: “Kahadloki ninyo ang Diyos ug ihatag kaniya ang himaya, tungod kay ang takna sa iyang paghukom miabot na.” (Pinadayag 14:6, 7) Ang usa sa pangunang mga katuyoan sa edukasyonal nga buluhaton sa Bibliya nga ginahimo sa mga Saksi ni Jehova mao ang pagtabang ‘niadtong nagpuyo sa yuta’ nga makahibalo ug mosimba kang Jehova, moila sa iyang pagka-Maglalalang, ug andam magpasakop sa iyang matarong nga soberanya.

Ang Kordero nga Takos Himayaon

 8. (a) Sa unsang paagi gilarawan si Kristo diha sa mga kapitulo 5 ug 6? (b) Unsay makat-onan sa tanang magpatalinghog sa makalipay nga balita gikan niini nga panan-awon?

⁸ Ang sunod nga duha ka Pin kapitulo, 5 ug 6, nagpadayag kang Jesu-Kristo ingong Kordero nga nakaplagang takos nga mobukas sa basahong linukot nga may pito ka timbri, sa ingon nagpadayag sa simbolikong pinulongan sa mga hitabo nga mahitabo sa atong adlaw. (Itandi ang Juan 1:29.) Ngadto niining simbolikong Kordero, ang mga tingog sa langit nag-ingon: “Takos ikaw sa pagkuha sa basahong-linukot ug sa pagbukas sa mga timbri niini, tungod kay ikaw giihaw ug pinaagi sa imong dugo ikaw mipalit sa mga tawo alang sa Diyos gikan sa matag tribo ug dila ug katawhan ug nasod, ug gihimo mo sila nga usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.” (Pinadayag 5:9, 10) Kini nga panan-awon nagtudlo nga pinaagi sa giula nga dugo ni Kristo, may mga tawo nga gikan sa tanang gigikanan ang gipanawag aron makauban niya sa langit ug “magamando ingong mga hari ibabaw sa yuta.” (Itandi ang Pinadayag 1:5, 6.) Ang ilang limitadong gidaghanon gipadayag sa ulahi diha sa Pinadayag.

 9. Sa unsang paagi gilarawan si Kristo diha sa Pin kapitulo 6?

⁹ Niini gihapon nga panan-awon, si Kristo gilarawan usab ingong gipurongpurongan nga magkakabayo sa puting kabayo, nga miasdang nga “nagpangdaog ug sa pagbug-os sa iyang pagpangdaog.” Makalipay, iyang dag-on ang daotang mga epekto nga gisimbolohan sa tulo pang ubang magkakabayo sa Apokalipsis, kansang makusog nga pagkabayo nakapatunghag gubat, kagutom, ug kamatayon ngadto sa katawhan sukad sa hinungdanong tuig nga 1914. (Pinadayag 6:1-8) Ang talagsaong papel ni Kristo, ang Kordero sa Diyos, sa kaluwasan sa katawhan ug sa katumanan sa maanindot kaayong mga katuyoan ni Jehova mao ang pangunang tema sa pagtudlo-sa-Bibliya nga buluhaton sa mga Saksi ni Jehova.

10. (a) Unsang hinungdanong impormasyon ang gihatag sa Pin kapitulo 7? (b) Sa unsang paagi gihisgotan ni Kristo kadtong makadawat sa Gingharian?

¹⁰ Ang Pin kapitulo 7 naundan ug tinuod gayod nga makalipay nga balita. Diha sa basahon sa Pinadayag lamang nato makita ang gidaghanon niadtong gitawag ni Jesus nga “gamayng panon” diin ngadto kanila ihatag sa Amahan sa Kordero ang Gingharian. (Lucas 12:32; 22:28-30) Kini sila gitimbrihan ni Jehova nga Diyos pinaagi sa iyang espiritu. (2 Corinto 1:21, 22) Si apostol Juan, kinsa nakadawat sa Pinadayag, nagpamatuod: “Nadungog ko ang gidaghanon niadtong mga gitimbrihan, usa ka gatos ug kap-atag-upat ka libo.” (Pinadayag 7:4) Kining eksaktong gidaghanon gilig-on sa ulahing kapitulo ingong ang kabug-osan niadtong “gipalit gikan sa katawhan” aron magmando uban sa Kordero diha sa langitnong Bukid sa Zion. (Pinadayag 14:1-4) Samtang ang mga iglesya sa Kakristiyanohan naghatag ug hanap ug dili-makapakombinsir nga mga pagpatin-aw niining gidaghanona, sa makaiikag, ang eskolar sa Bibliya nga si E. W. Bullinger nag-ingon bahin niini: “Kini maoy yanong mga pulong sa kamatuoran: usa ka tinong gidaghanon kon itandi sa walay-tino nga gidaghanon niini mismong kapituloha.”

11. (a) Unsang makalipay nga balita ang makita diha sa Pin kapitulo 7? (b) Unsang mga palaaboton ang bukas alang sa mga sakop sa “dakong panon”?

¹¹ Unsang walay-tino nga gidaghanon ang gihisgotan ni Bullinger? Diha sa Pin 7 bersikulo 9, si apostol Juan nagsulat: “Human niining mga butanga nakita ko, ug, tan-awa! usa ka dakong panon sa katawhan, nga walay tawong makaihap, gikan sa tanang kanasoran ug mga tribo ug katawhan ug mga dila.” (Pinadayag 7:9) Kinsay naglangkob niining dakong panon, unsay ilang baroganan karon atubangan sa Diyos, ug unsay gitagana sa umaabot alang kanila? Ang apokaliptikong tubag maoy maayong balita alang sa mga molupyo sa yuta. Atong mabasa: “Mao kini sila ang nanagpakagawas gikan sa dakong kasakitan, ug ilang gilabhan ang ilang mga taas-nga-bisti ug nagpaputi niini sa dugo sa Kordero.” Pinaagi sa pagtuo sa giulang dugo ni Kristo, sila panalipdan panahon sa “dakong kasakitan.” Si Kristo “magagiya kanila ngadto sa mga tuboran sa mga tubig sa kinabuhi. Ug ang Diyos magapahid sa matag luha gikan sa ilang mga mata.” (Pinadayag 7:14-17) Oo, minilyon sa mga tawo nga buhi karon mahimong bahin sa dili-maisip nga panon nga makalabang-buhi sa kataposan sa presenteng daotang sistema sa mga butang. Ingong mga sakop sa Hari nga si Jesu-Kristo panahon sa iyang Pagmando sa Milenyo, sila iyang pagatultolan ngadto sa kinabuhing dayon dinhi sa yuta. Dili ba maayong balita kana?

“Ang Iyang mga Paghukom Matuod ug Matarong”

12, 13. (a) Unsay naundan sa mga Pin kapitulo 8 hangtod sa 19? (b) Nganong ang mga tawong matinud-anon ug kasingkasing dili angay mabalaka niining mga tagnaa?

¹² Ang mga Pin kapitulo 8 ngadto sa 19 sa dakong bahin maoy responsable sa kadungganan nga naangkon sa basahong Apokalipsis, o Pinadayag, ingong usa ka basahon nga nagtagna ug makalilisang nga mga katalagman. Kini naundan sa masakit nga mga mensahe sa paghukom (gisimbolohan sa mga pagbudyong sa trompeta, mga hampak, ug mga panaksan sa kasuko sa Diyos) nga gitumong batok sa nagkalainlaing mga elemento sa sistema sa mga butang ni Satanas. Kini nga mga paghukom ipahamtang, una batok sa bakak nga relihiyon (“Dakong Babilonya”), dayon batok sa dili-diyosnong politikanhong sistema, nga gisimbolohan sa mapintas nga mga mananap.​—Pinadayag 13:1, 2; 17:5-7, 15, 16.a

¹³ Kining mga kapituloha naglarawan sa paghinlo sa mga langit, uban kang Satanas ug sa iyang mga demonyo nga gitambog dinhi sa dapit sa yuta. Kini nagtaganag bugtong makataronganong katin-awan alang sa wala pa sukad mahinabo nga kalisod sa kalibotan sukad sa 1914. (Pinadayag 12:7-12) Kini naghubit usab, sa simbolikong pinulongan, sa kalaglagan sa daotang sistema sa mga butang ni Satanas sa yuta. (Pinadayag 19:19-21) Angay bang makurat ang mga tawong matinud-anon ug kasingkasing niining makapahinuklog nga mga hitabo? Dili, kay sa panahon sa pagpahamtang sa Diyos sa mga paghukom, ang langitnong panon nanagsinggit: “Dayega ninyo si Jah! Ang kaluwasan ug ang himaya ug ang gahom iya sa atong Diyos, tungod kay ang iyang mga paghukom matuod ug matarong.”​—Pinadayag 19:1, 2.

14, 15. (a) Sa unsang paagi ang kataposan sa presenteng daotang sistema sa mga butang makapatungha ug pagkamatarong? (b) Nganong kining bahina sa Apokalipsis makahatag ug kalipay sa mga tawong matinud-anon ug kasingkasing?

¹⁴ Si Jehova dili mopatungha ug matarong nga sistema sa mga butang nga dili una paphaan ang yuta sa mga tawong nagalaglag niini. (Pinadayag 11:17, 18; 19:11-16; 20:1, 2) Apan, walay tawhanon o politikanhong kagamhanan ang may awtoridad o gahom sa paghimo niini. Si Jehova lamang ug ang iyang tinudlong Hari ug Maghuhukom, si Kristo Jesus, ang makahimo niini diha sa pagkamatarong.​—2 Tesalonica 1:6-9.

¹⁵ Ingon sa tin-aw kaayong gipakita sa Apokalipsis, katuyoan ni Jehova ang paglaglag sa presenteng daotang sistema. Kining kamatuorana angay mohatag ug kalipay sa mga lalaki ug babaye nga “nagapanghupaw ug nagaagulo sa tanang dulumtanang butang nga ginabuhat.” (Ezequiel 9:4) Kini angay makapasilsil diha sa ilang hunahuna sa dinaliang panginahanglan sa pagpamati sa pagpanawag sa manulonda pinaagi sa makalipayng balita, nga nag-ingon: “Kahadloki ninyo ang Diyos . . . tungod kay ang takna sa iyang paghukom miabot na, ug busa simbaha ang Usa nga naghimo sa langit ug sa yuta.” (Pinadayag 14:7) Hinaot nga kining mga tawhana mosimba ug moalagad kang Jehova uban sa iyang mga Saksi, ‘nga nagsunod sa mga sugo sa Diyos ug may buluhaton sa pagpanaksi bahin kang Jesus.’​—Pinadayag 12:17.

Ang Mahimayaong Pagmando sa Milenyo

16. (a) Nganong gisalikway sa mga iglesya sa Kakristiyanohan ang Milenyal nga Paglaom? (b) Nganong ang mga Saksi ni Jehova nagtuo nga ang sulondang pag-ampo pagatubagon?

¹⁶ Ang mga Pin kapitulo 20 ngadto sa 22 sa basahon sa Pinadayag naundan sa Kasulatanhong pasikaranan sa paglaom sa Milenyo. Mao lamang kining bahina sa Bibliya ang aktuwal nga naghisgot sa usa ka libo ka tuig nga yugto nga mag-una sa walay kataposang kalipay sa langit ug sa yuta. Gisalikway sa mga iglesya sa Kakristiyanohan ang Milenyal nga paglaom. Sanglit ang doktrina sa iglesya nagtudlo nga ang matarong moadto sa langit ug ang daotan moadto sa impiyerno, kini walay dapit alang sa paraisong yuta. Ang sulondang pag-ampo, nga naghangyo nga ang “kabubut-on [sa Diyos] matuman sa yuta maingon man sa langit,” nawad-an sa tanang kahulogan alang sa kadaghanang membro sa mga iglesya sa Kakristiyanohan. (Mateo 6:10, New International Version) Apan dili kana tinuod diha sa mga Saksi ni Jehova. Sila nagtuo gayod nga wala himoa ni Jehova nga Diyos ang yuta “alang sa walay kapuslanan,” kondili “aron pagapuy-an.” (Isaias 45:12, 18) Busa, ang karaang tagna, ang sulondang pag-ampo, ug ang apokaliptikong paglaom sa Milenyo tanan nagkauyon. Sa panahon sa iyang Usa ka Libo ka Tuig nga Pagmando, tinoon ni Kristo nga matuman ang kabubut-on ni Jehova sa yuta, sama nga matuman kini sa langit.

17. Unsay nagpakita nga ang “usa ka libo ka tuig” sabton nga literal?

¹⁷ Ang terminong “usa ka libo ka tuig” makita unom ka beses sa unang pito ka bersikulo sa Pinadayag kapitulo 20 bersikulo 1-7. Hinungdanong matikdan ang kamatuoran nga gigamit kini upat ka beses uban sa definite article nga “ang,” nga nagpakita nga kini naghisgot sa usa ka literal nga milenyo, dili lamang usa ka walay-tinong gidugayong yugto sa panahon, ingon sa gipatuo kanato sa daghang komentarista sa Kakristiyanohan. Unsay mahitabo panahon sa Milenyo? Una, si Satanas gaposon sa tibuok nga yugto. (Pinadayag 20:1-3; itandi ang Hebreohanon 2:14.) Pagkamaayong balita kana!

18. (a) Nganong ang Milenyo matawag nga “adlaw” sa paghukom? (b) Unsay mahitabo sa kataposan sa usa ka libo ka tuig?

¹⁸ Sanglit ang “gahom sa pagpanghukom” ihatag ngadto niadtong “magmando ingong mga hari uban kaniya [Kristo] sulod sa usa ka libo ka tuig,” kining yugtoa maoy, sa pagkatinuod, usa ka libo ka tuig nga “adlaw” sa paghukom. (Pinadayag 20:4, 6; itandi ang Buhat 17:31; 2 Pedro 3:8.) Ang mga patay pagabanhawon ug, uban sa makalabang-buhi sa “dakong kasakitan,” pagahukman nga walay pinalabi sumala sa ilang mga binuhatan, o mga lihok, niana unyang panahona. (Pinadayag 20:12, 13) Sa kataposan sa usa ka libo ka tuig, si Satanas pagabuhian sa makadiyot aron ipailalom ang katawhan sa kataposang pagsulay nga human niana siya, iyang mga demonyo, ug ang bisan kinsang mga rebelde sa yuta nga mosunod kaniya pagalaglagon sa walay kataposan. (Pinadayag 20:7-10) Ang mga ngalan sa mga tawo nga makapasar sa pagsulay malista nga dili mapala diha sa “basahon sa kinabuhi” ug pagadalhon ngadto sa usa ka walay kataposang malipayong kinabuhi, nga mag-alagad ug magsimba kang Jehova diha sa paraisong yuta. ​—Pinadayag 20:14, 15; Salmo 37:9, 29; Isaias 66:22, 23.

19. (a) Nganong makatino kita nga ang maanindot kaayong mga saad nga gihatag diha sa basahon sa Pinadayag matuman gayod? (b) Unsay pagahisgotan sa sunod nga artikulo?

¹⁹ Mao kana ang makalipay nga balita nga gipadayag sa Apokalipsis. Dili kini kawang hinimog-tawong mga saad. Si apostol Juan nagsulat: “Ang Usa nga naglingkod sa trono miingon: ‘Tan-awa! Ginabag-o ko ang tanang butang.’ Usab, siya nagaingon: ‘Isulat, tungod kay kining mga pulonga kasaligan ug matuod.’” (Pinadayag 21:5) Unsay atong kinahanglang buhaton aron makaambit sa katumanan niining makalipay nga balita? Ang basahon sa Pinadayag naundan ug daghang tambag alang niadtong buot magpahimuot sa Diyos. Ang pagsunod niining tambaga mohatag kanato ug walay-kinutobang kalipay, karon ug sa walay kataposan, ingon sa ipakita sa sunod nga artikulo.

[Footnote]

Mga Punto Agig Pagsubli

◻ Unsang sukaranang mga kamatuoran ang makita diha sa Pinadayag mga kapitulo 4 ngadto sa 6 nga nahimong usa ka hinungdanong bahin sa makalipay nga balita?

◻ Unsang makalipay nga balita ang makita diha sa Pinadayag kapitulo 7?

◻ Nganong ang mga tawong matinud-anon ug kasingkasing dili angay mabalaka sa mga mensahe sa paghukom nga makita diha sa Pinadayag?

◻ Sa unsang mga paagi ang Milenyo mahimong “adlaw” sa paghukom?

[Hulagway sa panid 10]

Bug-os nga paphaan sa Hari nga si Jesu-Kristo ang yuta ug gubat, kagutom, ug kamatayon