Salmo

37 Ayawg kalagot* tungod sa mga daotan

Ug ayawg kasina sa mga mamumuhat ug daotan.+

 2 Sila mangalaya dayon samag sagbot+

Ug malawos samag lunhaw nga sagbot.

 3 Salig kang Jehova ug buhata kon unsay maayo;+

Puyo sa yuta, ug lihok nga matinumanon.+

 4 Pagbaton ug tumang kalipay diha kang Jehova,

Ug ihatag niya kanimo ang mga tinguha sa imong kasingkasing.

 5 Itugyan* kang Jehova ang imong dalan;+

Salig kaniya, ug siya molihok alang kanimo.+

 6 Ipadan-ag niya ang imong pagkamatarong sama sa banagbanag,

Ug ang imong hustisya sama sa adlaw sa udtong tutok.

 7 Pagpakahilom sa atubangan ni Jehova+

Ug paghulat nga mapailobon.*

Ayawg kalagot sa tawo

Nga nagmalamposon sa pagtuman sa iyang mga plano.+

 8 Isalikway ang kasuko ug biyai ang kapungot;+

Ayawg kalagot ug ayaw paghimog daotan.*

 9 Kay ang mga daotan pagalaglagon,+

Apan ang mga nagalaom kang Jehova manag-iya sa yuta.+

10 Sa dili na madugay, ang daotan mawala na;+

Pangitaon nimo sila sa ilang nahimutangan,

Apan wala sila didto.+

11 Apan ang mga maaghop* manag-iya sa yuta,+

Ug mabatonan nila ang tumang kalipay tungod sa dagayang pakigdait.+

12 Ang daotan nagaplano batok sa matarong;+

Ginapakagot niya ang iyang ngipon batok kaniya.

13 Apan kataw-an siya ni Jehova,

Kay nahibalo Siya nga moabot ang adlaw nga siya laglagon.+

14 Hulboton sa mga daotan ang ilang espada ug bawogon* ang ilang busogan

Aron pukanon ang dinaogdaog ug ang kabos,

Aron patyon kadtong mga tul-id ug dalan.

15 Apan ang ilang espada molagbas sa ila mismong kasingkasing;+

Ang ilang mga busogan mangabali.

16 Maayo pa ang diyutay sa matarong

Kay sa kadagaya sa daghang daotan.+

17 Kay ang mga bukton sa daotan mangabali,

Apan sapnayon ni Jehova ang matarong.

18 Si Jehova nahibalo sa nagakahitabo sa kinabuhi* sa mga walay ikasaway,

Ug ang ilang panulondon molungtad hangtod sa hangtod.+

19 Dili sila maulawan sa panahon sa katalagman;

Sa panahon sa gutom, mabuhong sila sa pagkaon.

20 Apan ang mga daotan mangalaglag;+

Ang mga kaaway ni Jehova mahanaw samag lunhaw nga mga sibsibanan;

Mahanaw sila samag aso.

21 Ang daotan mangutang ug dili mobayad,

Apan ang matarong mahinatagon* ug mabination.+

22 Kadtong mga gipanalanginan Niya manag-iya sa yuta,

Kadtong mga gitunglo Niya pagalaglagon.+

23 Giyahan* ni Jehova ang mga lakang sa usa ka tawo+

Dihang malipay Siya sa dalan niini.+

24 Bisan pag matumba siya, dili siya malup-og,+

Kay gunitan siya ni Jehova sa kamot.*+

25 Sukad sa akong pagkabatan-on hangtod karon nga tigulang na ko,

Wala ko makakitag matarong nga gibiyaan,+

Wala usab ko makakita nga ang iyang mga anak nagpakilimos ug tinapay.*+

26 Siya andam kanunay nga magpahulam,+

Ug ang iyang mga anak makadawat ug panalangin.

27 Isalikway ang daotan ug buhata kon unsay maayo,+

Ug magpabilin ka hangtod sa hangtod.

28 Kay si Jehova nahigugma sa hustisya,

Ug dili niya biyaan ang mga maunongon kaniya.+

Bantayan niya sila kanunay;+

Apan ang mga kaliwat sa daotan pagalaglagon.+

29 Ang mga matarong manag-iya sa yuta,+

Ug sila magpuyo niini hangtod sa hangtod.+

30 Ang baba sa matarong nagasulti uban ang kaalam,*

Ug ang iyang dila nagasulti bahin sa hustisya.+

31 Ang balaod sa iyang Diyos anaa sa iyang kasingkasing;+

Ang iyang paglakaw dili magsusapinday.+

32 Ginabantayan sa daotan ang matarong,

Nga nagtinguha sa pagpatay kaniya.

33 Apan dili siya itugyan ni Jehova ngadto sa iyang kamot+

O ipahayag nga sad-an dihang siya hukman.+

34 Laom kang Jehova ug subaya ang iyang dalan,

Ug bayawon ka niya aron mapanag-iya nimo ang yuta.

35 Nakita nako ang tawong pintas ug daotan

Nga nagmalamboon samag labong nga kahoy diha sa yuta diin kini mitubo.+

36 Apan siya kalit nga namatay ug nahanaw;+

Padayon nako siyang gipangita, ug dili siya makaplagan.+

37 Bantayi ang walay ikasaway,*

Ug tan-awa kanunay ang matarong,+

Kay ang kaugmaon nianang tawhana malinawon.+

38 Apan ang malapason laglagon;

Ang kaugmaon sa mga daotan kalaglagan.+

39 Gikan kang Jehova ang kaluwasan sa mga matarong;+

Siya ang ilang kuta panahon sa kasakitan.+

Luwason niya sila gikan sa daotan,

Kay sila midangop kaniya.+