Pagbantay sa “Kalinaw ug Kasegurohan” nga Minugna sa Kanasoran
“Sa diha nga sila magaingon: ‘Kalinaw ug kasegurohan!’”—1 TESALONICA 5:3.
ANG tibuok kalibotan wala pa gayod mobati sa kapeligrohan sukad masukad kay sa karong adlawa. Anaa ang pagbati sa kahadlok bahin sa ikatulong gubat sa kalibotan nga maglambiggit sa militarisado kaayong mga nasod nga nagbaton karon sa daw kinalabwang mga armas—ang bombang nukleyar. Ang katakos sa mga nasod sa paggamit sa uyok mismo sa mga atomo diha sa pangagpas sa gubat nagdala kanila kutob sa maabot nila sa masang pagpatayg tawo. Busa, ang kalinaw nahimong mas maalamon.
1, 2. (a) Nganong ang kalinaw mahimong mas maalamon? (b) Busa, unsay pagauyonan sa nagkasupak politikanhong mga sistema?
2 Oo, sa tinuoray, kay sa atong panahon ang ikatulong gubat sa kalibotan nga magagamit nianang maong mga armas magkahulogan gayod sa paghikog sa kalibotan, kay ang mga tawo mobuto ngadto sa pagkahanaw o mangamatay gumikan sa mga epekto sa nukleyar nga sunog. Ang hait-ug-panan-awng mga politiko ug mga komandante militar nakasabot nianang kamatuorana. Dili nila gustong mahimong responsable nianang tibuok-yutang katalagman. Busa, ang bug-os nagkasupak politikanhong mga sistema makadiskobre nga mas maayong mahidangat sa panag-uyon, oo, nga sundon ang maalamon-sa-kalibotang pilosopiya nga “magkinabuhi sumala sa imong gusto ug pasagdi ang kinabuhi sa uban.”
3. Tungod sa unsang hinungdan ang kanasoran mopahayag sa “Kalinaw ug kasegurohan”?
3 Bisan pa niana, ang kanasoran dili bug-os mosalig sa usag usa. Ingong panagana, ilang mentenahon ang bug-os nga kusog sa ilang militaryong mga katukoran. Busa, tungod ba unya sa tim-os, tiunayng gugma sa usag usa ingong mga sakop sa samang tawhanong banay nga ang mga magmamando magkahiusa sa pagpahayag sa “Kalinaw ug kasegurohan” alang sa tibuok kalibotan sa katawhan? Dili, apan kana unya maoy sa paghupay sa makataronganong mga kahadlok sa katawhan.—1 Tesalonica 5:3.
Reaksiyon sa Klero ug Publiko sa Umaabot nga Pahayag
4, 5. (a) Unsang publikong reaksiyon sa umaabot nga pahayag ang atong madahom? (b) Bisan pa sa pagpaluyo sa klero sa umaabot nga pahayag, unsang mga pangutana ang motungha kon kaha ang Diyos mopaluyo niini?
4 Sa dihang sa kataposan himoon kining maong pahayag, maayo unya ang reaksiyon sa publiko sa tibuok yuta. Ang mga lider sa relihiyon sa kalibotan, apil ang mga klerigo sa Kakristiyanohan, Katoliko ug Protestante, modayeg unya sa maong internasyonal nga buhat. Kon asa mohuyop ang hangin, ang klero mokuyog aron magpabiling inuyonan sa kadaghanan ug makabatog politikanhong tabang ug konsiderasyon.
5 Ugaling, ang pagpaluyo sa klero sa kusog-ipahayag nga politikanhong kahikayan wala magkahulogan nga ang Diyos sa uniberso, apil sa atong yuta, mopaluyo niana. Diha sa ilang relihiyosong mga tinukod, ang klero tingali motanyag sa tag-as ug kusog nga mga pag-ampo nga madungog sa ilang relihiyosong mga tigpasiugda ug mangayo sa panalangin sa Diyos diha sa mga lakang nga himoon sa politikanhong elemento alang sa internasyonal nga kalinaw ug kasegurohan. Apan kana bang tanang solemneng pag-ampo, nga niana ang namating mga kongregasyon modugang sa kusog nga “Amen,” dalawaton sa Diyos niining uniberso? Siya ba makigdait sa kalibotan nga nabahin sa relihiyon, nga ang mga pag-ampo niana alang sa kalinaw ug kasegurohan gipasukad sa wala-magkauyong relihiyosong mga sekta ug denominasyon?
6, 7. (a) Unsang dalan ang gisubay sa Kakristiyanohan, sama sa mga Hudiyo sa karaang mga panahon? (b) Unsay mosangpot sa pagpaluyo sa klero sa pahayag nga “Kalinaw ug kasegurohan”?
6 Ang pangangkon nga ang Diyos nagapaluyo labing kusog diha sa kanasoran sa Kakristiyanohan. Apan ang Diyos sa uniberso dili mao ang Usa nga nagamando sa Kakristiyanohan. Gisunod niini ang dalan sa karaang mga Israelinhon. Sa dihang wala sila matagbaw sa kahikayan ni Jehova alang sa ilang kagamhanan ug naghunahuna nga maayo ang politikanhong kahikayan sa paganong mga nasod alirong kanila, sila nangadto sa propeta sa Diyos si Samuel ug mihangyo nga iyang ipatindog ang usa ka hari ibabaw kanila. Si Samuel wala gayod mahimuot ug nasubo tungod niadto. Labaw pa ang Diyos nga iyang gialagaran ingong propeta.
7 Matarong nga nasakit si Jehova sa maong hangyo sa pagbulag sa iyang teokratikanhong kahikayan ibabaw sa Israel. Sumala sa iyang giingon sa iyang propetang si Samuel: “Dili ikaw ang ilang gisalikway, kondili ako ang ilang gisalikway gikan sa pagkahari ibabaw kanila.” (1 Samuel 8:4-9) Kini naglandong sa dalan nga gisubay sa Kakristiyanohan niining ika-20ng siglo. Busa ang umaabot nga pagdayeg sa klero sa pahayag nga “Kalinaw ug kasegurohan” dili makabatog maayong resulta, dili panalanginan sa Diyos.
Wala Magpabantay sa Katawhan
8. Unsang papel ang lagmit dulaon sa Hiniusang Kanasoran sa umaabot nga pahayag, ug nganong kining organisasyona wala magpabantay sa katawhan?
8 Ang Hiniusang Kanasoran tingali magpasigarbo sa 159 ka membro karong adlawa, nga nagasakop sa halos tanang nasod. Pihong sa nahaigong panahon ang Hiniusang Kanasoran magapanguna kon bahin sa umaabot nga pahayag sa “Kalinaw ug kasegurohan!” Ikasubong isulti, ang maong tibuok-kalibotang organisasyon wala magpabantay sa binilyong katawhan. Ngano man? Kay ang maong kalinaw, bisan pag gipaluyohan sa tanang relihiyosong organisasyon niining kalibotana, apil kadtong iya sa Kakristiyanohan, wala magkahulogan sa kalinaw uban sa Maglalalang sa uniberso, kinsa may gahom sa paghatag kinabuhi ug pagkuha niana sumala sa iyang paghukom sa bililhong mga butang sa mga langit ug sa yuta.
9 Sa tagna ni Isaias, ang Maglalalang tin-awng nagaingon: “Ang mga langit mao ang akong trono, ug ang yuta mao ang tumbanan sa akong tiil.” (Isaias 66:1) Ang kanasoran dinhi sa tumbanan sa iyang tiil wala magdayandayan niini pinaagi sa ilang Hiniusang Kanasoran nga organisasyon. Sila nakigbisog sa politikanhong paagi sa paghupot sa tibuok-yutang kalinaw ug kasegurohan ug sa ingon ipadayon ang paglungtad sa Hiniusang Kanasoran. Ang dedikadong mga Saksi ni Jehova sa yuta dili makaduyog sa kalibotan sa pagsalig sa ginamag-tawong mga lakang nga ginahimo alang sa kalinaw ug kasegurohan sa kanasoran sa kalibotan. Ilang gibutang sa kasingkasing ang mga pulong sa Santiago 4:4: “Mga mananapaw, wala ba kamo mahibalo nga ang pagpakighigala sa kalibotan maoy pagpakig-away sa Diyos? Busa, si bisan kinsang buot mahimong higala sa kalibotan nagahimo sa iyang kaugalingon nga kaaway sa Diyos.”
9, 10. Unsa ang baroganan sa mga Saksi ni Jehova mahitungod sa “Kalinaw ug kasegurohan” nga minugna sa kanasoran, ug nganong ingon man?
10 Bisan tuod dili aktibong mosupak sa kalinaw ug kasegurohan nga minugna sa kanasoran, ang mga Saksi ni Jehova dili makasugyot niini ngadto sa milyonmilyong tawo nga nagapangitag luwas nga dapit dihang moulbo ang kinadak-ang kasakitan sa kalibotan ug maglaglag niining sistema sa mga butang. (Mateo 24:21) Kay ang bag-ong sistema sa mga butang sa Diyos mao ang magpatungha sa tibuok-kalibotang kasegurohan ilalom sa “Prinsipe sa Pakigdait,” si Jesu-Kristo.—Isaias 9:6, 7.
11. Unsa ang pag-isip sa klero sa sugyot nga ipatindog ang Liga sa Kanasoran tapos sa Gubat sa Kalibotan I?
11 Ang kasaysayan nagahatag pamatuod sa pagkapakyas sa ginamag-tawong mga laraw alang sa kalinaw. Atong mahinumdoman nga sa pagkatapos sa Gubat sa Kalibotan I niadtong 1918, ang Liga sa Kanasoran gisugyot ingong usa ka santa sa gubat sa kalibotan. Ang Pederal nga Konsilyo sa mga Iglesya ni Kristo sa Amerika nagdayeg sa sugyot ug miingon: “Ang maong Liga dili lamang politikanhong kinahanglanon; kini hinuon mao ang politikanhong pahayag sa Gingharian sa Diyos sa yuta.” Apan kadto bang giingong politikanhong pahayag sa yutan-ong gingharian sa Diyos nagpatunghag malungtarong kalinaw ug kasegurohan alang sa yuta?
12. (a) Sa unsang paagi natuman ang Pinadayag 17:8? (b) Kinsay nagapadayon sa pagkabayo sa “mapulang mapintas nga mananap,” ug sa unsang gidugayon?
12 Sama sa simbolikong “mapulang mapintas nga mananap” sa Pinadayag kapitulo 17, nga gikabay-an sa karaang bigaon, ang “Dakong Babilonya,” ang Liga sa Kanasoran miadto sa “bung-aw” sa pag-ulbo sa Gubat sa Kalibotan II niadtong 1939. Tungod niadto ang nagsakay niining bigaon naobligar sa pagkawas. Sa pagkatapos sa Gubat sa Kalibotan II niadtong 1945, ang Hiniusang Kanasoran natukod ingong sumusunod sa nalaglag nga Liga sa Kanasoran. Kini nagbaton ug mas daghang membro kay sa Liga, busa angay nga kini mas lig-ong organisasyon ug angay sa dugang pagsalig sa bahin sa katawhan sa kalibotan. Busa maoy niadtong 1945 nga ang simbolikong “mapulang mapintas nga mananap” migula “sa bung-aw,” ug ang simbolikong bigaon, ang “Dakong Babilonya,” mikabayo na usab niini, diin siya sa kawalay-ulaw nagasakay hangtod niining adlawa. (Pinadayag 17:3, 5, 8) Apan kana dili na magdugay, sumala sa gitagna sa Pinadayag 17:16–18:24. Nganong dili man?
13. (a) Unsa ang Hiniusang Kanasoran? (b) Sa unsang paagi kini gilandongan kanhi?
13 Ang Hiniusang Kanasoran sa aktuwal maoy usa ka kalibotanong kapunongan batok kang Jehova nga Diyos ug sa iyang dedikadong mga Saksi sa yuta. Kini sa pagkamatuod usa ka sabutsabot, nga ang kalibotanong mga nasod nagapatigom sa ilang mga pangulo ug nagalaraw kon unsa tingali ilang buhaton batok sa makitang organisasyon ni Jehova nga Diyos sa yuta. Panahon niining “konklusyon sa sistema sa mga butang,” kini gilandongan sa usa ka sabutsabot nga gitumong sa Isaias 8:12.—Mateo 24:3.
Pagsalig Kang Jehova Alang sa Kalinaw ug Kasegurohan
14. Nganong ang napulog-tribong gingharian sa Israel nakig-anib sa Sirya, ug unsang pangutana ang giatubang sa gingharian sa Juda?
14 Una pa sa panahon ni Isaias ang nasod sa 12 ka tribo sa Israel nabungkag tungod sa isyu sa pagkahari. Kadto maoy pagkatapos sa mahimayaong pagmando ni Haring Solomon. Ang mibulag nga napulo ka tribo sa amihanan nagtukod sa gitawag gingharian sa Israel, nga ang kaulohan mao ang Samaria. Ang duha ka nahibiling tribo, ang mga tribo sa Juda ug Benjamin, nagpabiling maunongon sa harianong dinastiya ni Haring David sa kaulohang siyudad sa Jerusalem. Ang napulog-tribong gingharian sa Israel mikontra sa duhag-tribong gingharian sa Juda. Sa nahaigong panahon, ang gingharian sa Israel nakig-anib sa gingharian sa Sirya, nga ang kaulohan mao ang Damasco. Ang ideya mao ang pagpukan sa gingharian sa Juda ug sakopon kana. Ang gingharian sa Juda ba sa ingon angay makig-anib sa laing lig-ong nasod aron makasagubang sa pag-atake sa nasod sa Israel nga nakig-anib sa paganong nasod sa Sirya?—Isaias 7:3-6.
15. (a) Unsay giuyonan sa pila ka tawo sa gingharian sa Juda, ug unsay gipadayag sa maong tinamdan? (b) Sa unsang paagi si propeta Isaias mipahayag batok sa maong tinamdan?
15 Dihay nawad-ag pagtuo sa nasodnong Diyos si Jehova sa gamayng gingharian sa Juda. Sila miuyon sa pagpakig-anib, o sabutsabot, uban sa gamhanang paganong gingharian niining kalibotana. Sa pagpaluyo nianang maluibong pagpakig-anib sa gingharian ni Jehova sa Juda uban sa usa ka gingharian sa dili-diyosnong kalibotan, ang pipila nag-ingon, “Usa ka sabutsabot!” ngadto sa mga wala makahukom diha sa gingharian sa Juda. Sa ingon sila nagpadayag sa ilang kakulang sa pagtuo ug pagsalig sa Diyos kansang templo maoy didto sa Jerusalem. Si propeta Isaias gidasig sa pagsulti batok sa maong sabutsabot, nga nag-ingon sa kapitulo 8, bersikulo 12: “Kamo dili magaingon, ‘Usa ka sabutsabot!’ mahitungod sa tanan nga bahin niana kining katawhan nagapadayon sa pag-ingon, ‘Usa ka sabutsabot!’ ug ang tumong sa ilang kahadlok ayaw ninyo pagkahadloki, ni kamo mangurog tungod niana.”
16, 17. Unsay nagkahulogan sa matuod nga kalinaw ug kasegurohan alang sa karaang katawhan ni Jehova, ug sa unsang paagi kini gipasundayag dihang gihulga sa Asiryanong Haring Senakerib ang Jerusalem?
16 Ang pagkauban ni Jehova sa katawhan diha sa relasyong may pakigtugon nagkahulogan sa kalinaw ug kasegurohan alang kanila. Kini gipasundayag dihang ang Asiryanong haring Senakerib nagpadalag komite sa tulo ka hataas nga opisyales aron makigkita kang Haring Ezekias ug sa katawhan sa Jerusalem aron magpasakop kang Senakerib. Ang Asiryanong opisyal ug tigpamaba, si Rabsaces, mibarog atubangan sa mga kuta sa Jerusalem ug nagtamay kang Jehova nga Diyos aron paluyahon o daoton ang pagsalig sa mga Hudiyo diha Kaniya. Kay naguol tungod sa maong pagtamay sa buhi ug matuod nga Diyos si Jehova ug kay tukmang mibati nga nameligro ang Jerusalem atubangan niadtong dako kaayong panon sa mga Asiryano, si Haring Ezekias miadto sa templo ug giatubang kana kang Jehova nga Diyos. Kay nahimuot nianang pahayag sa kinalabwang pagtuo ug pagdangop kaniya alang sa usa ka pasundayag sa iyang unibersohanong pagkasoberano, si Jehova mihatag ug paborableng tubag. Si propeta Isaias midugang sa iyang mga pulong sa pag-uyon. Walay gihatag nga tubag ngadto sa mabaharong Asiryanong Rabsaces, sumala sa gimando ni Haring Ezekias.—2 Hari 18:17-36; 19:14-34.
17 Kay pihong natingala kaayo niini, si Rabsaces mibalik sa kampo ni Senakerib, kinsa niadto nakigbugno batok sa Libna. (2 Hari 19:8) Tapos makadungog sa taho ni Rabsaces, si Senakerib nagpadalag mabaharong mga sulat kang Ezekias, nga nagpasidaan: “Ayaw pagpalimbong sa imong Diyos nga imong gisaligan, nga nagaingon: ‘Ang Jerusalem dili igahatag ngadto sa kamot sa hari sa Asirya.’” (2 Hari 19:9, 10) Sa pagtikyop sa kagabhion, si Jehova nga Diyos ang mitubag sa Asiryanong tigpamaba, si Rabsaces, ug Siya mismo nagtubag sa mabaharong mga sulat ni Senakerib sa pagpamatuod nga Siya labaw kay sa imperyal nga diyos sa mga Asiryano. Ang kataposan sa asoy bahin niining hitaboa, sumala sa gihatag sa 2 Hari 19:35, nagaingon: “Ug nahitabo niadtong gabhiona nga ang manulonda ni Jehova migula ug gipamatay ang usa ka gatos ug kawaloag-lima ka libo sa kampo sa mga Asiryano. Sa pagbangon sa mga tawo sayo sa pagkabuntag, ania karon, silang tanan mga minatay na.” Sa pagkakaadlawon dihang ang nahibiling mga Asiryano, apil si Haring Senakerib ug lagmit si Rabsaces, mibangon, ilang nakita ang makalilisang nga talan-awon sa palibot nga mao ang mga nangamatay sa pagpakig-away batok kang Jehova nga Diyos.
18. (a) Unsa ang gisangpotan sa ambisyosong Senakerib? (b) Unsang panig-ingnan ang ginahatag niining makasaysayanhong asoy alang sa mga Saksi ni Jehova karong adlawa?
18 Kay napildi sa iyang ambisyosong mga laraw batok sa organisasyon ni Jehova ug naulawan sa labihan, si Senakerib nagdali sa pagpauli “uban ang maulawong nawong” ngadto sa kaulohan sa iyang nasod, ang Nineve, nga gipatay lamang sa duha sa iyang mga anak. (2 Cronicas 32:21; 2 Hari 19:36, 37) Wala na gayod makadaot pag-usab ang Asiryanhong imperyo sa makitang organisasyon ni Jehova. Ania, gayod, ang labawng pagbayaw sa unibersohanong pagkasoberano sa Labing Hataas nga Diyos. Dugang pa, ang paghupot sa Jerusalem sa kasegurohan maoy ekselenteng panig-ingnan nga nagapakita kon kinsa ang bug-os saligan sa mga Saksi ni Jehova karong adlawa alang sa mapinadayonon, dili-matugawng kalinaw ug kasegurohan, dili ang usa ka politikanhong sabutsabot kondili si Jehova nga Diyos.
Pagpadayon sa Pagbantay
19. Unsay ipadayon sa pagbuhat sa Watch Tower Society?
19 Sa pagtabang kaninyo sa pagpadayon sa pagbantay, ang Watch Tower Society mopadayon sa pagluwat diha sa mga basahon niini sa tukma-panahong mga pasidaan ngadto sa mga magbabasa, aron sila dili hisakpang dili makabantay sa umaabot nagpakaaron-ingnong pahayag sa “Kalinaw ug kasegurohan,” ingon nga gimugna sa kanasoran niining daang sistema sa mga butang.
20. Nganong ang mga Saksi ni Jehova dili gayod mopasiugda sa pagsalig sa umaabot nga “Kalinaw ug kasegurohan,” ug busa karon mao ang panahon alang sa unsa?
20 Ang dedikadong mga Saksi ni Jehova dili gayod makapasiugda sa pagsalig sa “Kalinaw ug kasegurohan” nga masaligong ipahayag sa kalibotanong kanasoran; ni sila makapahalipay sa mga magmumugna sa maong internasyonal nga “Kalinaw ug kasegurohan” ug, sa samang panahon, si Jehova nga Diyos magauban kanila. Sila nagabantay nga dili makig-anib sa kanasoran niining daang sistema sa mga butang. Sila walay pakyas magapahinumdom sa ilang kaugalingon nga ang usa ka bag-ong “nasod,” nga bulag ug lahi sa Liga sa Kanasoran, gipakatawo sa tapos-gubat nga tuig sa 1919. Kining bag-ong “nasod” nagapadayon sa pagtuo ug pag-uswag sa tibuok yuta, sumala sa gitagna sa Isaias 60:22: “Ang diyutay mismo mahimong usa ka libo, ug ang gamay usa ka gamhanang nasod. Ako mismo, si Jehova, magapadali niini sa iyang kaugalingong panahon.” Oo, karon mao na ang panahon nga ang tanan magbantay batok sa umaabot nga “Kalinaw ug kasegurohan” nga minugna sa kanasoran.
Unsay Imong Tubag?
◻ Lagmit unsa ang reaksiyon sa publiko sa pahayag sa “Kalinaw ug kasegurohan”?
◻ Unsay gilandongan sa “sabutsabot” sa Isaias 8:12?
◻ Sa unsang paagi wala pabantaya sa HK ang katawhan?
◻ Nganong ang mga Saksi ni Jehova dili hisakpang dili makabantay?
[Hulagway sa panid 18]
Pihong ang HK magauna unya sa umaabot nga pahayag sa “Kalinaw ug kasegurohan!”
[Hulagway sa panid 21]
Ang Asiryanong opisyal si Rabsaces nagtamay sa Diyos sa Israel, apan ang sangpotanan nagpakitang ang matuod nga kalinaw ug kasegurohan magagikan lamang ni Jehova nga Diyos