Ang mga Dagkong Gahom sa Kalibotan sa Kasaysayan sa Bibliya Nagamartsa Padulong sa Ilang Kataposan!
MAKAHANDURAW ka ba sa kasaysayang sinulat nga abante? ‘Imposible,’ ikaw moingon. Bisan pa niana, adunay usa ka basahon nga nagpahayag sa kasaysayan nga abante—sa ginatos, bisan linibo ka tuig una mahitabo ang mga hitabo! Kanang basahona mao ang Bibliya.
Ang Bibliya wala lang magtaho sa tukma sa karaang mga hitabo apan sa labing kahibulongang paagi kini nagtagna gani sa dakong laraw sa kasaysayan sa kalibotan maingon nga apektado niini ang katawhan sa Diyos, sukad sa panahon sa karaang Babilonya, kapin ug 2,500 ka tuig kanhi, hangtod ug saylo pa sa atong adlaw karon.
Si Daniel, usa ka propetang nagkinabuhi sa ikaunom nga siglo una sa atong Komung Panahon, gihatagag upat ka separadong pagpadayag nga naghisgot sa umaabot sa kasaysayan sa kalibotan. Diin niya kuhaa ang iyang impormasyon? Matud ni Daniel: “Adunay usa ka Diyos sa mga langit nga Magbubutyag sa mga tinago.” (Daniel 2:28) Ang mga arkeologo, nga nangutkot sa mga salin sa karaang mga gahom sa kalibotan, nakakaplag ug talagsaong pamatuod sa kamatuoran sa kasaysayan ug sa tagnang hikaplagan diha sa Bibliya.
Duha sa mga dagkong gahom sa kalibotan sa kasaysayan sa Bibliya, ang Ehipto ug Asirya, naglungtad sa dugay na una sa panahon ni Daniel. Ang Babilonya nagmando sa adlaw ni Daniel, ug ang mga ngalan sa misunod nga duha ka gahom sa kalibotan gibutyag ngadto sa propeta. (Daniel 2:47, 48; 8:20, 21) Duha pa ang mosunod kanila, nga magdala kanato sa panahon karon.
Pila Man?
Sumala sa Bibliya, pila ba unya ang maong mga gahom sa kalibotan? Ang tubag gihatag ngadto sa tigulang nga apostol Juan ug nagapakita kon diin na kita sa agos sa panahon. Ang usa ka manulonda nagtug-an kang Juan: “Adunay pito ka hari: ang lima napukan na, ang usa mao karon, ang lain umaabot pa.”—Pinadayag 17:10.
Unsang lima ka gahom sa kalibotan ang nakaabot ug nangahanaw na sa adlaw ni Juan? Ehipto, Asirya, Babilonya, Medo-Persia, ug Gresya. Hain kanila ang naglungtad pa? Roma. Ug unsang gahoma ang “wala pa moabot”? Ang Anglo-Amerikanhong Gahom sa Kalibotan sa atong adlaw. Kini sila mao ang mga gahom sa kalibotan nga ilabinang mabalak-on ang katawhan sa Diyos, ang karaan ug moderno.
Ang usa ka hinungdanon ilabina nga kamatuoran mao kini: May pagsunod sa pito lamang ka gahom sa kalibotan! Ang kadungan nga ikawalong gahom, nga mag-apil sa mga salin sa pito, gitagnang maglungtad sa makadiyut sa mga adlaw sa ikapito. (Pinadayag 17:10, 11) Kini nagkahulogang kita nagapuyo sa panahon sa kataposan sa mga dagkong gahom sa kalibotan nga gimandoan sa tawo. Wala nay motungha pa!
Sa dili na madugay karon, ang mga gahom sa kalibotan mahilapas na sa ilang kabantogan. Si Daniel nagtagna nga kining tawhanong mga sistema pagadugmokon ug ‘ipadpad sa hangin.’ (Daniel 2:35) Unsay mopuli kanila? Butang nga labi pang maayo! Si Daniel nagtaho: “Sa mga adlaw nianang mga haria ang Diyos sa langit magatukod sa usa ka gingharian nga dili gayod malaglag. . . . Kini magadugmok ug magalaglag niining tanang gingharian, ug kini mismo mobarog sa mga panahong walay katinoan,” sa walay kataposan. (Daniel 2:44) Busa ang Gingharian sa Diyos gayod ang mopuli niining tawhanong mga gahom sa kalibotan. Labing maayong kauswagan gayod sa pagmando sa kalibotan!
Pihong may nasayran ka bahin sa mga gahom sa kalibotan. Apan ang dugang bang kahibalo sa ilang mga kostumbre, ilang relihiyon, ug ilang relasyon uban sa katawhan sa Diyos ug tagna sa Bibliya motabang nimo sa pagsabot sa dugang bahin sa kasaysayan sa katawhan sa kahayag sa Kasulatan?
Tinuod gayod. Busa kami malipay sa pagpatik, sugod niining isyuha, sa serye sa walo ka artikulong maghisgot sa mga gahom sa kalibotan. Kining mga artikuloha magatabang sa pagkombinsir kanimo nga ang kasaysayang giasoy diha sa Bibliya kasaligan ug kapiyalan. Kana angay maglig-on usab sa imong pagtuo sa kamatuorang ang mga tagna sa Bibliya maoy matinumanon ug matuod!