Ang Kristohanong Tinghugyaw Mosangko sa Milenyo

BISAN sa Republika sa Israel (nga natukod sa 1948), ang daghang Hudiyong nagaisip nga sila ilalom pa sa Moisesnong Kasugoan wala makapasig-uli sa pagsaulog sa tuig sa Tinghugyaw. Ug daghan unya ang mga komplikasyon kon ilang sulayan kana. Mosangpot ang dagkong mga sulirang ekonomikanhon, kay nalangkit ang mga katungod sa propiedad. Ang Republika sa Israel wala mag-okupar sa tibuok yuta nga gipuy-an sa karaang 12 ka tribo. Walay templo nga may hataas nga saserdote sa tribo ni Levi, wala ang mga ilhanan sa tribo sa katawhan.

2. Sa unsang paagi ang pila ka Kristohanon misugod na sa pagsaulog sa Tinghugyaw nga gilandongan sa iya sa karaang Israel?

² Nan, kon bahin sa mga panalangin sa pagsaulog sa Tinghugyaw unsay atong kahimtang? Atong mahinumdoman nga ang karaang Tinghugyaw maoy pangiling tuig sa kagawasan​—ang mga Israelinhon nga nagbaligya sa ilang kaugalingon sa kaulipnan gipahigawas ug giuli ang mga yutang panulondon. (Levitico 25:8-54) Sa nag-unang artikulo, atong nasabtan nga ang maong kahikayan natapos duyog sa pakigtugon sa Moisesnong Kasugoan sa 33 K.P. (Roma 7:4, 6; 10:4) Unya ang usa ka bag-ong pakigtugon gipatuman diin ang Diyos makapasaylo sa mga sala sa mga magtutuo, makadihog kanila sa balaang espiritu, ug makasagop kanila ingong mga anak aron dad-on sa langit. (Hebreohanon 10:15-18) Apan kadtong makabenepisyo sa maong paagi gikan niining kahikayan sa bag-ong pakigtugon mao ang “gamay nga panon” sa 144,000 “nga gipalit gikan sa yuta.” Busa sa unsang paagi ang minilyon nga ubang maunongong Kristohanon makabaton ug kagawasan nga gilandongan sa Tinghugyaw?​—Lucas 12:32; Pinadayag 14:1-4.

Usa ka Halad Alang sa Tanan!

³ Sa una-Kristohanong panahon, ang mga kaayohan sa tinuig nga Adlaw sa Pagtabon sa Sala milungtad sa usa lamang ka tuig. Ang mga kaayohan sa halad lukat sa Ginoong Jesu-Kristo maoy mapinadayonon, walay kataposan. Busa ang antitipikal Hataas nga Saserdote, si Jesus, dili na kinahanglang mahimong tawo pag-usab, ihalad ang iyang kaugalingon, ug unya mobalik sa langit sa pagtanyag sa bili sa maong halad sa tuigtuig sa Labing Balaan ni Jehova nga Diyos. Sumala sa ginaingon sa Kasulatan: “Si Kristo, karon nga siya nabanhaw na gikan sa mga patay, dili na mamatay; ang kamatayon wala nay kagahom batok kaniya.”​—Roma 6:9; Hebreohanon 9:28.

4, 5. (a) Unsa ang sangpotanan sa pagpadapat sa halad ni Jesus sukad sa Pentekostes 33 K.P.? (b) Atong nabatonan ang unsang ilhanan nga ang iyang halad ipadapat pang mas kaylap?

⁴ Busa, sa katuigan sukad sa Pentekostes 33 K.P., samtang ang mga magtutuo nahimong inanak-sa-espiritung mga tinun-an sa hinimayang Ginoong Jesus, sila nagsugod sa pagsaulog sa Kristohanong Tinghugyaw. Dihang ‘nahigawas sa kasugoan sa sala ug kamatayon,’ ilang natagamtam ang makapabaskog nga kagawasan. (Roma 8:1, 2) Ilang gimantala usab ang Kristohanong kagawasan aron ang uban mapasaylo sa ilang mga sala, madihogan, ug mahimong espirituwal nga mga anak sa Diyos. Apan, kini nagkahulogan ba nga kon ang usa dili sakop nianang pundok nga limitado sa 144,000, siya dili makasinatig makapalipay nga kagawasan karon?

⁵ Makahuloganon niining bahina mao ang mga pulong ni apostol Pablo sa Roma 8:19-21: “Ang maikagong pagpaabot sa kalalangan nagapaabot sa pagpadayag sa mga anak sa Diyos. Kay ang kalalangan nailalom sa kakawangan [kay makasasala ug dili makahanaw sa sala].” Unya gipasiugda ni Pablo nga adunay “paglaom nga ang kalalangan usab mapahigawas sa kaulipnan sa kadunotan ug makabaton sa mahimayaong kagawasan sa mga anak sa Diyos.” Busa, ang maong kagawasan dili limitado niadtong mahimong “mga anak sa Diyos” sa langit. Ang sinating mga pulong sa Juan 3:16 nagapamatuod niana. Ug, sumala sa nahisgotan na, ang dinihogang apostol Juan miingon nga si Kristo namatay “alang sa atong mga sala, apan dili lamang alang sa atoa kondili alang usab sa iya sa tibuok kalibotan.”​—1 Juan 2:2.

1919—Unang Kagawasan

6, 7. Sukad sa 1919, unsang matang sa kagawasan ang gimantala, ug nganong ilabina sukad niadto?

⁶ Sa modernong panahon ang mga dinihogan nga nagasaulog sa Kristohanong Tinghugyaw nagamantala sa mopahigawas nga maayong balita, ilabina sukad sa 1919. ‘Nganong sukad man nianang tuiga?’ tingali mahibulong ka kon ikaw natawo sa dili pa dugay. Atong tan-awon, nga ibutang sa hunahuna nga nalangkit ang imong pagtagamtam sa kagawasan.

⁷ Sa mga dekada una pa nianang petsaha, ang mga dinihogan ni Jehova nagpatik sa mga kamatuoran sa Bibliya, sama sa diha sa bantog nga seryeng Studies in the Scriptures (1886-1917). Nanagtag usab silag daghang matulon-anong mga pulyeto ug tracts. Panahon sa Gubat sa Kalibotan I, miabot ang pagsupak, pagsulay ug pag-alig-ig, ug paghinay sa ilang mga kalihokan. Apan sa 1919 ang dinihogang nahibilin nanglakaw uban ang bag-ong kadasig sa pagmantala sa mga kamatuoran sa Bibliya. Sumala sa giingon ni Jesus sa 30 K.P. nga siya gidihogan sa pagwali sa “usa ka kagawasan ngadto sa mga binihag ug sa pagpasig-uli sa panan-aw ngadto sa mga buta,” mao usab kining modernong-adlawng mga dinihogan. Tapos sa makapaukyab nga kombensiyon sa Septiyembre 1-7, 1919,a nangusog sila sa pagpadayon sa pagsangyaw sa mga kamatuoran nga nagpahigawas sa dili-maihap nga katawhan.​—Lucas 4:18.

8, 9. Sa unsang kahulogan daghan ang gipahigawas, ug unsang mga tabang ang gigamit sa pagmantala sa maong kagawasan?

⁸ Tagda, pananglitan, ang tabang sa pagtuon sa Bibliya nga The Harp of God (1921), nga nagpahayag sa bililhong mga kamatuoran nga daw kana samag napulo ka kuwerdas sa alpa. Ang basahon miila nga “daghan ang nahadlok sa pagtuon sa Bibliya” tungod sa doktrina nga “ang silot sa mga daotan . . . mao ang walay-kataposang pagsakit o pagpaantos sa impiyernong nagdilaab sa dili-mapalong nga kalayo ug asupre.” Ang mga magbabasa sa duolag 6,000,000 nga kopya niining basahona nahibalo nga kining doktrinaha “dili matuod tungod sa labing menos upat ka separado ug linaing hinungdan: (1) kay kini dili makataronganon; (2) kay kini dili uyon sa hustisya; (3) kay kini supak sa prinsipyo sa gugma; ug (4) kay kini bug-os dili kasulatanhon.” Makahanduraw ka kon unsa ka makapahigawas kana alang sa mga tawong nagdako sa kahadlok sa walay-kataposang pagsakit sa impiyerno o sa pag-antos sa purgatoryo!

⁹ Oo, ang madasigong pagsangyaw sa kamatuoran sa Bibliya pinaagi niining mga dinihogan nagpahigawas sa mga tawo sa tibuok yuta nga naulipon sa bakak nga mga pagtulon-an, mga patuotuo, ug dili-kasulatanhong mga buhat (sama sa pagsimba sa katigulangan, kahadlok sa mga multo o daotang mga espiritu, ug pinansiyal nga pagpanghimulos sa klero). Ang mga titulo mismo sa pila ka basahong tabang sa pagtuon sa Bibliya nagabanaag sa makapahigawas nga impluwensiya niana sa minilyon.b Sa ingon ang mga pulong ni Jesus nakitang matuod, sa miingon siya nga ang iyang mga tinun-an ‘mobuhat sa mga buhat nga labaw’ kay sa iyang gibuhat. (Juan 14:12) Kon itandi sa pasiunang buluhaton sa espirituwal nga pagpahigawas nga gibuhat ni Jesus sa pagwali sa “kagawasan alang sa mga binihag,” ang modernong-adlawng mga alagad sa Diyos nakabuhat ug labaw pa​—ang pag-abot sa minilyon sa tibuok yuta.

10. Nganong kita makadahom nga ang dugang ug labaw nga kagawasan maagoman?

¹⁰ Ugaling, hinumdomi nga sa unang siglo ang dugang pagpahigawas misugod sa Pentekostes 33 K.P. Niadto ang Kristohanong Tinghugyaw nagsugod alang sa “gamay nga panon” nga gipasaylo sa ilang mga sala, nga mitultol sa ilang pagkahimong “mga anak sa Diyos” sa langit. Komosta sa atong panahon? Ang minilyon bang ubang debotadong Kristohanon mapahigawas sa kaulipnan sa sala ug sa ingon makasaulog sa dakong Tinghugyaw? Oo, ug si apostol Pedro nagpaila niini dihang siya naghisgot sa “mga panahon sa pagpasig-uli sa tanang butang nga gipamulong sa Diyos pinaagi sa baba sa iyang balaang mga manalagna sa karaang panahon.”​—Buhat 3:21.

Usa ka Tinghugyaw Alang sa Minilyon

11. Sa unsang paagi ang Levitico kapitulo 25 nagasugyot nga kita makapanglantaw sa kagawasan nga saylo pa sa espirituwal nga Israel?

¹¹ Mamatikdang kaduha sa Levitico kapitulo 25 ang mga Israelinhon gipahinumdoman nga sa panglantaw ni Jehova sila maoy iyang “mga ulipon” nga iyang gipagawas gikan sa Ehipto. (Bersikulo 42 ug 55) Ang maong kapitulo bahin sa Tinghugyaw nagahisgot usab sa “mga dumuloong” ug sa ‘mga langyaw sa ilang taliwala.’ Kadto sila katumbas karong adlawa sa “dakong panon” nga nakigduyog sa espirituwal nga mga Israelinhon sa pagmantala sa Kristohanong maayong balita.

12. Sukad sa 1935, unsang malipayong kaugmaran ang nagapadayon?

¹² Sukad sa 1935 ang “maayong magbalantay” si Jesu-Kristo nagadala ngadto sa aktibong pakig-uban sa dinihogang nahibilin niadtong iyang gitawag “ubang mga karnero.” Kini sila iyang “pagadad-on,” ug sila mahimong “usa ka panon” ilalom sa “usa ka magbalantay.” (Juan 10:16) Ang gidaghanon sa “ubang mga karnero” karon maoy minilyon na. Kon ikaw sakop nianang malipayong panon, ikaw giisip nang matarong ingong higala sa Diyos, ug ingong bahin sa tawhanong kalalangan, ikaw nagapanglantaw nga “mapahigawas sa kaulipnan sa kadunotan” panahon sa umaabot nga “mga panahon sa pagpasig-uli sa tanang butang” sa yuta. Kini paglaom nga wala masayop pagkapahimutang.​—Roma 8:19-21; Buhat 3:20, 21.

13. Unsang panalangin sa linain ang atong pagamatikdan ingong mahitabo tapos sa “dakong kasakitan”?

¹³ Human makita ni apostol Juan ang 144,000 nga nagapahimulos sa Kristohanong Tinghugyaw uban ang langitnong dulnganan, iyang gibatbat ang usa ka “dakong panon,” nga nag-ingon: “Kini sila mao ang nanggula gikan sa dakong kasakitan, ug ilang gilabhan ang ilang biste ug gipaputi sa dugo sa Kordero. Kana ang hinungdang sila anaa sa atubangan sa trono sa Diyos; ug sila nagahatag kaniyag balaang pag-alagad sa adlaw ug sa gabii sa iyang templo.”​—Pinadayag 7:14, 15.

¹⁴ Bisan karon, sa wala pa ang dakong kasakitan, kini sila nagtuo sa inulang dugo ni Kristo ug sa ingon nakabatog kaayohan gikan sa iyang haladnong kamatayon. Sila nagakalipay usab tungod kay nahigawas sa Dakong Babilonya, nagbaton ug maayong konsensiya atubangan ni Jehova nga Diyos, ug sa ilang pribilehiyo sa pagpakig-ambit sa katumanan sa Mateo 24:14 pinaagi sa pagsangyaw sa maayong balita sa Gingharian una moabot ang kataposan.

14, 15. Nganong kadtong sakop sa “dakong panon” may linaing katarongan sa pagsadya karon?

¹⁵ Ugaling, komosta ang kalaoman sa dakong panon sa pagkagawas sa kinaiyanhong sala ug pagkadili-hingpit? Haduol na ba kanang panahona? Kita may maayong katarongan sa pagtuo nga uban pa kanato ang pipila sa kaliwatan sa katawhan nga gitagna ni Jesu-Kristo dili mahanaw hangtod matuman ang tanang butang gitagna. (Mateo 24:34) Busa, ang dakong kataposan sa “konklusyon sa sistema sa mga butang” haduol na gayod kaayo.​—Mateo 24:3.

Mga Bahin nga Magpurongpurong sa Kristohanong Tinghugyaw

16. Asa kita magabarog sa pagpalampos sa katuyoan sa Diyos ug unsay anaa sa unahan?

¹⁶ “Ang gubat sa dakong adlaw sa Diyos nga Makagagahom sa Tanan” nagadali, ug ang nahibilin sa “gamay nga panon,” ingon man ang “dakong panon” sa ilang matinumanon, maunongong kauban naghupot sa integridad ngadto kang Jehova nga Diyos ug nagapanglantaw nga panalipdan sa Diyos. Sila maikagong nagapaabot sa bug-os nga kaparotan sa tanang puwersa sa kaaway, sa kabayawan niya ingong Unibersohanong Soberano. Talagsaon unya kanang purongpurong sa ilang pagtagamtam sa Kristohanong kagawasan!​—Pinadayag 16:14; 19:19-21; Habakuk 2:3.

17. Sa unsang paagi ang minilyon magadawat pa sa kagawasan sa dakong Tinghugyaw?

¹⁷ Mosunod ang paghari sa madaogong Hari si Jesu-Kristo ibabaw sa nahinloang yuta, uban sa pagkalig-on sa unibersohanong pagkasoberano ni Jehova, ug bug-os nga paggahom ni Jesu-Kristo sa yuta ingong Hari sa mga hari ug Ginoo sa mga ginoo. Unya laktud niyang ipadapat ang merito sa iyang halad ngadto sa minilyong tawo, apil ang gibanhaw nga patay, kinsa magtuo ug kinabubut-ong magadawat sa kapasayloan sa mga sala nga itagana sa Diyos pinaagi kang Kristo. Kini pamatud-an unya sa pagpahid sa Diyos “sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa.” (Pinadayag 21:3, 4) Kon kana dili matuod nga kagawasan, unsa man diay?

18. Kon itandi sa usa ka bahin sa karaang Tinghugyaw, unsay mahitabo sa yuta sa bag-ong sistema?

¹⁸ Dugang pa, ang yuta dili na gamhan, hugawan, ug daoton sa hakog nga mga tawo, mga korporasyon, ug tawhanong mga gobyerno. (Pinadayag 11:18) Hinunoa, kini ipasig-uli ngadto sa matuod nga mga magsisimba. Isalig kanila ang nindot nga trabaho sa pag-apil sa literal nga pagkatuman sa tagna ni Isaias: “Sila magatukod ug mga balay ug magapuyo niana; sila dili magatanom ug lain ang magakaon . . . Sila dili magahago sa walay kapuslanan, ni manganak sila alang sa kasamok; tungod kay sila mao ang mga kaliwat nga mao ang mga binulahan ni Jehova.” (Isaias 65:21-25) Sa pagkatapos sa Milenyong Pagmando, ang tanang ilhanan sa napanunod nga sala ug pagkadili-hingpit mapapas na ug ang mga maunongon sa Diyos sa yuta magasaulog sa kabug-osang tayuktok nga mao ang kataposan sa Tinghugyaw. Busa ang kagawasan nga gilandongan sa Tinghugyaw natuman na.​—Efeso 1:10.

Human sa Milenyong Tayuktok nga Bahin sa Tinghugyaw

19, 20. Sa unsang paagi si Satanas ug ang mga demonyo maningkamot sa pagbalda sa mga panalangin nga mosangpot sa Milenyong Tinghugyaw, apan uban ang unsang sangpotanan?

¹⁹ Ang Pinadayag 20:1-3 nagatagna nga si Satanas nga Yawa, ang magmamando sa mga panon sa demonyo, mahanaw sa talan-awon sulod sa usa ka libo ka tuig nga pagmando ni Kristo sa katawhan. Dihang, sa pagkatapos sa Milenyo, ang Yawa ug ang iyang mga demonyo tugotan sa makadiyut sa paggawas, kining daotang mga espiritu makakita sa yuta, dili diha sa kahimtang nga ilang gibiyaan kana, kondili ingong matahom nga dili ikahubit, tibuok-yutang paraiso. Ilang makita ang yuta nga puy-an sa matinumanong “dakong panon” ug sa binilyong gibanhaw nga mga tawong patay nga alang kanila si Jesu-Kristo namatay ingong halad lukat. Sa pagkatapos sa Milenyo, ang Kristohanong Tinghugyaw makakab-ot na sa katuyoan niana nga mao ang bug-os nga pagpahigawas sa katawhan gikan sa mga epekto sa sala. (Roma 8:21) Makauulaw ug yawan-on gayod nga si bisan kinsa mosulay sa pagdaot nianang maayong kahimtang! Apan tungod sa pagtugot sa Diyos nga makagagahom sa tanan, ang Yawa mohimog kataposang paningkamot sa pagbuhat niini, ug sa labihang kayugot siya mohasmag. Sa maong katuyoan kini nahisulat sa Pinadayag 20:7-10, 14:

²⁰ “Ug inigkatapos sa usa ka libo ka tuig, si Satanas pagabuhian gikan sa iyang bilanggoan, ug siya mogula sa pagpahisalaag sa mga nasod sa upat ka suok sa yuta, sa Gog ug Magog, sa pagtigom kanila alang sa gubat. Ang ilang gidaghanon maoy ingon sa balas sa dagat. Ug sila nanlakaw ibabaw sa gilapdon sa yuta ug gilibotan ang kampo sa mga balaan ug ang siyudad nga hinigugma. Apan ang kalayo mikunsad gikan sa langit ug milamoy kanila. Ug ang Yawa nga nagpahisalaag kanila gitambog ngadto sa linaw nga kalayo ug asupre.”

21. Sa dihang matapos ang Kristohanong Tinghugyaw sa Milenyo, unsa ang sanong sa langitnong mga anak sa Diyos nga magpahinumdom sa Job 38:7?

²¹ Ang matuod nga kagawasan, nga gipatungha sa kahikayan sa Tinghugyaw, magpadayong pahimuslan sa bisan diin; ang tanang linalang mahigawas ug magpasidungog sa Usa nga mao lamay nagadala sa ngalang Jehova. (Salmo 83:18) Kana magmatuod samtang ipadayon ni Jehova ang pagtuman sa iyang mga katuyoan sa tibuok uniberso. Sa paglalang sa yuta, una ibutang niana ang katawhan, “ang mga bituon sa kabuntagon nagdungan sa pag-awit, ug ang tanang anak sa Diyos misugod sa pagsinggit sa kalipay” tungod sa matahom nga talan-awon. (Job 38:7) Labi pa gayod nilang buhaton kana sa pagkakitang ang yuta pagapuy-an sa mga lalaki ug mga babaye nga nagpasundayag ug nagpamatuod sa ilang bug-os nga pagpahinungod ug integridad ngadto sa Diyos nga makagagahom sa tanan.

22. Angay unsa ang atong tinamdan, nga nahiuyon sa awhag nga anaa sa Salmo 150:1-6?

²² Sa pagtagad sa tanang butang sa sulaw nga kahayag nga gihatag nganha sa Kasulatan, kita kinaiyanhong magmasadya duyog sa mga langit ug magaingon, Hallelujah! Kini ang giawhag kanato nga pinaagi niana natapos ang basahong Salmo: “Hallelujah. Dayega ang Diyos nga anaa sa Iyang sangtuwaryo; dayega Siya diha sa langit, ang Iyang kuta. Dayega Siya tungod sa Iyang Gamhanang mga buhat; dayega Siya tungod sa Iyang pagkadako. Dayega Siya pinaagi sa mga honi sa trompeta; dayega Siya pinaagi sa alpa ug salterio. Dayega Siya pinaagi sa tambor ug sayaw; dayega Siya pinaagi sa subing ug plawta. Dayega Siya pinaagi sa malanog nga mga piyangpiyang; dayega Siya pinaagi sa kusog ug tingog nga mga piyangpiyang. Pasagding ang tanan nga may gininhawa magadayeg sa GINOO. Hallelujah.”​—Salmo 150:1-6, Tanakh Bible, (1985), Jewish Publication Society of America.

[Mga footnote]

Unsaon Nimo Pagtubag?

◻ Gikan sa unsa nga ang mga tinun-an ni Jesus gipagawas sa Pentekostes 33 K.P., nga nagtimaan sa unsa alang kanila?

◻ Nganong may katarongan sa pagdahom sa labaw nga kagawasan kay sa nahitabo sa unang siglo?

◻ Unsang matang sa pagpahigawas ang nagakahitabo sukad sa 1919?

◻ Sa unsang paagi ug kanus-a ang “ubang mga karnero” makabatog kaayohan gikan sa usa ka dakong Tinghugyaw?

◻ Tapos sa tayuktok sa Tinghugyaw, unsa ang dagway sa yuta?

1. Unsay wala paningkamoti sa pagpasig-uli sa mga Hudiyo sa Republika sa Israel, ug ngano man?

3. Unsa ka epektibo ug kamalungtaron ang halad ni Jesus?

[Hulagway sa panid 25]

Kagawasan gimantala sa Cedar Point, 1919

[Hulagway sa panid 26]

“Ubang mga karnero” makaambit sa Milenyong Tinghugyaw