Pinadayag Ngadto Kang Juan
16 Ug nakadungog kog kusog nga tingog gikan sa sangtuwaryo+ nga miingon sa pito ka anghel: “Adto mo ug ibubo sa yuta ang pito ka panaksan sa kasuko sa Diyos.”+
2 Ang unang anghel miadto ug gibubo niya sa yuta ang iyang panaksan.+ Ug dihay ngutngot ug grabeng kabahong+ nga mitakboy sa mga tawong may marka sa pintas nga mananap+ ug nagsimba sa larawan niini.+
3 Ang ikaduhang anghel mibubo sa iyang panaksan ngadto sa dagat.+ Ug kini nahimong dugo+ nga sama nianang sa patayng tawo, ug ang tanang buhing linalang* nangamatay, oo, ang mga butang sa dagat.+
4 Ang ikatulong anghel mibubo sa iyang panaksan ngadto sa mga suba ug sa mga tubod sa tubig.+ Ug kini nahimong dugo.+ 5 Nadungog nako nga ang anghel ibabaw sa katubigan miingon: “Ikaw, ang Usa nga mao ang karon ug ang kaniadto,+ ang Usa nga maunongon,+ maoy matarong, kay imong gimando kini nga mga paghukom,+ 6 kay ilang giula ang dugo sa mga balaan ug sa mga propeta,+ ug gihatagan nimo silag dugo aron imnon;+ takos sila niini.”+ 7 Ug nadungog nako nga miingon ang halaran: “Oo, Jehova* nga Diyos, ang Labing Gamhanan,+ matuod ug matarong ang imong mga hukom.”*+
8 Ang ikaupat nga anghel mibubo sa iyang panaksan ngadto sa adlaw,+ ug ang adlaw gitugotan sa pagpagba sa mga tawo. 9 Ug ang mga tawo nangapagba sa grabeng kainit, apan sila nagpasipala sa ngalan sa Diyos, kinsa dunay awtoridad ibabaw niini nga mga hampak, ug sila wala maghinulsol ug maghimaya kaniya.
10 Ang ikalimang anghel mibubo sa iyang panaksan diha sa ibabaw sa trono sa pintas nga mananap. Ug ang gingharian niini mingitngit,+ ug gipamaak nila ang ilang dila tungod sa ilang kasakit, 11 apan gipasipalahan nila ang Diyos sa langit tungod sa ilang mga kasakit ug kabahong, ug wala sila maghinulsol sa ilang mga buhat.
12 Ang ikaunom nga anghel mibubo sa iyang panaksan ngadto sa dakong suba sa Euprates,+ ug ang tubig niini gipahubas+ aron maandam ang dalan para sa mga hari+ nga gikan sa sidlakan.*
13 Ug nakakita kog tulo ka samag baki nga hugawng mga pahayag sa espiritu* nga migula sa baba sa dragon+ ug sa baba sa pintas nga mananap ug sa baba sa bakak nga propeta. 14 Sa pagkatinuod, kini maoy mga pahayag sa mga demonyo ug kini naghimog mga ilhanan,+ ug kini nangadto sa mga hari sa tibuok gipuy-ang yuta, aron tigomon sila ngadto sa gubat+ sa dakong adlaw sa Diyos nga Labing Gamhanan.+
15 “Tan-awa! Moabot ko nga samag kawatan.+ Malipayon ang magpabiling nagtukaw+ ug magbantay sa iyang panggawas nga mga besti, aron dili siya maglakaw nga hubo ug ang mga tawo magtan-aw sa iyang kaulawan.”+
16 Ug gitigom sila niini sa dapit nga gitawag sa Hebreohanon ug Armagedon.*+
17 Ang ikapitong anghel mibubo sa iyang panaksan ngadto sa hangin. Tungod niini dihay kusog nga tingog nga migula sa sangtuwaryo+ gikan sa trono, nga miingon: “Nahitabo na!” 18 Ug dihay mga kilat ug mga tingog ug mga dalugdog, ug dihay dakong linog nga wala pa mahitabo sukad nga may mga tawo sa yuta,+ linog nga malukpanon ug kusog kaayo. 19 Ang dakong siyudad+ nasiak sa tulo ka bahin, ug ang mga siyudad sa kanasoran nangapukan; ug ang Bantogang Babilonya+ gihinumdoman sa Diyos, aron ihatag kaniya ang kopa sa bino sa iyang dakong kasuko.+ 20 Dugang pa, ang tanang isla nangalagiw, ug ang mga bukid wala na makita.+ 21 Unya dihay dagkong ulan nga yelo, nga ang matag usa may gibug-atong mga usa ka talanton,* nga nangahulog gikan sa langit ngadto sa mga tawo,+ ug ang mga tawo nagpasipala sa Diyos tungod sa hampak nga ulan nga yelo,+ kay kini nagpahinabog dako kaayong kadaot.