Kapitulo Bayente-uno
Ang Katuyoan ni Jehova Mosangko sa Mahimayaong Kalamposan
1, 2. (a) Unsa ang katuyoan ni Jehova bahin sa iyang intelihenteng mga linalang? (b) Kinsay nalakip sa nahiusang pamilya sa mga magsisimba sa Diyos?
TANANG intelihenteng mga linalang nahiusa sa pagsimba sa bugtong matuod nga Diyos ug silang tanan nagpahimulos ug mahimayaong kagawasan isip mga anak sa Diyos—kana ang mahigugmaong katuyoan ni Jehova. Kana usab ang maikagong gipangandoy sa mga nahigugma sa pagkamatarong.
2 Gisugdan ni Jehova ang pagtuman niining talagsaong katuyoan sa dihang nagsugod siya sa iyang mga pagpanglalang. Ang una niyang gilalang maoy usa ka Anak nga sukad sa iyang pagkabanhaw mao “ang aninag sa himaya [sa Diyos] ug ang tukma nga larawan sa iyang pagkamao.” (Hebreohanon 1:1-3) Linain ang maong Anak, kay siya gilalang sa Diyos mismo. Busa, pinaagi sa maong Anak nga gipatungha ang tanang ubang linalang: nahauna mao ang mga manulonda sa langit, dayon ang mga tawo sa yuta. (Job 38:7; Lucas 3:38) Silang tanan maoy naglangkob sa usa ka tibuok-kalibotang pamilya. Alang kanilang tanan, si Jehova mao ang Diyos, ang Soberano sa Uniberso, ug ang ilang mahigugmaong Amahan.
3. (a) Unsay napanunod natong tanan gikan sa atong unang mga ginikanan? (b) Unsang mahigugmaong kahikayan ang gihimo ni Jehova alang sa mga kaliwat ni Adan?
3 Sa gihukman sa kamatayon ang atong unang tawhanong mga ginikanan ingong tinuyong mga makasasala, gipalagpot sila gikan sa Eden ug gisalikway sa Diyos. Sila dili na bahin sa iyang unibersohanong pamilya. (Genesis 3:22-24; Deuteronomio 32:4, 5) Kitang tanan maoy ilang mga kaliwat, busa kita natawo nga may makasasala nga mga kiling. Apan nahibalo si Jehova nga ang pipila sa mga kaliwat ni Adan ug Eva mahigugma sa pagkamatarong. Busa Siya mahigugmaong mihimo ug usa ka kahikayan nga pinaagi niana sila modangat sa “mahimayaong kagawasan sa mga anak sa Diyos.”—Roma 8:20, 21.
Israel Nawad-an ug Inuyonang Baroganan
4. Unsang pribilehiyo ang gipaabot ni Jehova ngadto sa karaang Israel?
4 Mga 2,500 ka tuig human sa paglalang kang Adan, gipaabot ni Jehova sa pipila ka tawo ang pribilehiyong makabaton ug espesyal nga relasyon uban Kaniya. Gipili niya ang karaang Israel nga mahimong iyang katawhan ug gihatag kanila ang iyang Balaod. (Genesis 12:1, 2) Giporma niya sila nga usa ka nasod ug gigamit sila may kalangkitan sa iyang katuyoan. (Deuteronomio 14:1, 2; Isaias 43:1) Hinuon, sila naulipon gihapon sa sala ug kamatayon, busa sila wala makapahimulos sa mahimayaong kagawasan nga sa sinugdan nabatonan ni Adan ug Eva.
5. Sa unsang paagi ang mga Israelinhon nawad-an sa ilang espesyal nga baroganan uban sa Diyos?
5 Bisan pa niana, ang mga Israelinhon adunay inuyonang baroganan uban sa Diyos. Sila may responsabilidad usab nga tahoron si Jehova ingon nga ilang Amahan ug mobuhat nga nahiuyon sa iyang katuyoan. Si Jesus nagpasiugda sa kahinungdanon sa ilang pagtuman sa maong katungdanan. (Mateo 5:43-48) Ugaling, napakyas ang nasod sa Israel sa pagbuhat niana. Bisan pag kadtong mga Hudiyoha miangkon, “kami adunay usa ka Amahan, ang Diyos,” gipahayag ni Jesus nga ang ilang mga buhat ug ang espiritu nga ilang gipakita nagpanghimakak sa maong pangangkon. (Juan 8:41, 44, 47) Sa 33 K.P., ang Balaod gitapos sa Diyos, ug natapos ang espesyal nga relasyon sa Israel uban kaniya. Apan kini nagpasabot ba nga ang katawhan dili na gayod makapahimulos ug inuyonang relasyon uban sa Diyos?
Pagtigom sa “mga Butang sa mga Langit”
6. Unsa ang katuyoan sa “pagdumala” nga gihisgotan ni Pablo sa Efeso 1:9, 10?
6 Gipakita ni apostol Pablo nga ang pipila ka tawo makapahimulos ug espesyal nga relasyon uban sa Diyos. Pananglitan, bahin sa kahikayan ni Jehova nga pinaagi niana kadtong magpakitag pagtuo mahimong mga membro sa Iyang panimalay, si Pablo misulat: “Gipahibalo [sa Diyos] kanato ang sagradong tinago sa iyang kabubut-on. Sumala sa iyang gikahimut-an nga gilaraw niya sa iyang kaugalingon ang usa ka pagdumala inig-abot sa kinutoban sa tinudlong kapanahonan, nga mao, aron tigomon pag-usab ang tanang butang diha kang Kristo, ang mga butang sa mga langit ug ang mga butang sa yuta.” (Efeso 1:9, 10) Ang maong “pagdumala” nasentro kang Jesu-Kristo. Pinaagi kaniya, mahitabo nga ang mga tawo modangat sa inuyonang kahimtang atubangan sa Diyos. Ang limitadong gidaghanon nila adunay paglaom nga moadto sa langit. Ang labi pang daghan mopuyo sa yuta sa walay kataposan.
7. Kinsa “ang mga butang sa mga langit”?
7 Una, sugod sa Pentekostes 33 K.P., gihatag ang pagtagad sa “mga butang sa mga langit,” nga mao, kadtong mahimong mga kaubang manununod ni Kristo sa langitnong Gingharian. Pinasukad sa ilang pagtuo sa bili sa halad ni Jesus, sila gipahayag nga matarong sa Diyos. (Roma 5:1, 2) Ngadtongadto, gilakip ang mga Hudiyo ug mga Hentil, ug “ang mga butang sa mga langit” mokabat sa gidaghanong 144,000. (Galacia 3:26-29; Pinadayag 14:1) Ang usa lang ka nahibilin kanila ang ania pa sa yuta.
Pagtigom sa “mga Butang sa Yuta”
8. Kinsa man “ang mga butang sa yuta,” ug unsa ang ilang relasyon uban kang Jehova?
8 Ang samang pagdumala nagatigom usab sa “mga butang sa yuta.” Milyonmilyong tawo karon ginatigom nga may palaaboton nga mabuhing walay kataposan sa yuta. Nga nahiusa uban sa nahibilin sa mga manununod sa Gingharian, ilang ginadayeg ang ngalan ni Jehova ug ginatuboy ang iyang pagsimba. (Isaias 2:2, 3; Sofonias 3:9) Gitawag usab nila si Jehova nga “Amahan” tungod kay giila nila nga siya mao ang tinubdan sa kinabuhi. Ug sila nagpahimulos ug inuyonang baroganan sa iyang atubangan pinasukad sa ilang pagtuo diha sa giulang dugo ni Jesus. (Pinadayag 7:9, 14) Apan sanglit dili pa man sila hingpit, ang bug-os nga pag-ila kanila isip mga anak sa Diyos umaabot pa.
9. Unsang saad ang gipadayag sa Roma 8:21 alang sa katawhan?
9 Silang may yutan-ong palaaboton karon maikagong nagapaabot sa panahon nga ang tawhanong kalalangan “ipagawas gikan sa pagkaulipon sa pagkadunot.” (Roma 8:21) Ang maong pagpagawas mosugod human taposon ni Kristo ug sa iyang langitnong mga panon ang dakong kasakitan pinaagi sa tayuktok nga Armagedon. Kini magpasabot sa kalaglagan sa entero nga daotang sistema sa mga butang ni Satanas, nga sundan sa mga panalangin sa Usa ka Libo ka Tuig nga Paghari ni Kristo diha sa gahom sa Gingharian.—Pinadayag 19:17-21; 20:6.
10. Ang mga alagad ni Jehova moawit sa unsang alawiton sa pagdayeg?
10 Pagkasadya gayod unya sa dihang ang mga alagad ni Jehova sa yuta magkahiusa aron ipalanog ang mga pagbati sa iyang mga alagad sa langit, kinsa malipayong nagmantala: “Dako ug katingalahan ang imong mga buhat, Jehova nga Diyos, ang Labing Gamhanan. Matarong ug matuod ang imong mga dalan, Hari nga walay kataposan. Kinsa bay dili mahadlok kanimo, Jehova, ug dili maghimaya sa imong ngalan, tungod kay ikaw lamang ang maunongon? Kay ang tanang kanasoran manganhi ug mosimba kanimo, tungod kay gipadayag na ang imong matarong nga mga mando.” (Pinadayag 15:3, 4) Oo, ang tanang alagad ni Jehova maghiusa sa pagsimba sa bugtong matuod nga Diyos. Banhawon bisan ang mga patay ug hatagag kahigayonan nga moduyog sa pagpatugbaw sa ilang mga tingog sa pagdayeg kang Jehova.—Buhat 24:15.
Kahibulongang Kagawasan sa Unahan
11. Unsang kahibulongang kagawasan ang matagamtam sa mga makalabang-buhi sa dakong kasakitan?
11 Human mahinloan ang yuta sa pagkadaotan sa dakong kasakitan, pinaagi sa tayuktok niini nga Armagedon, si Satanas nga Yawa dili na mao “ang diyos niini nga sistema sa mga butang.” Ang mga magsisimba ni Jehova dili na kinahanglang makigbisog batok sa daotang impluwensiya ni Satanas. (2 Corinto 4:4; Pinadayag 20:1, 2) Ang bakak nga relihiyon dili na magmisrepresentar kang Jehova ug magsilbi nga mabahinbahinong impluwensiya sa tawhanong katilingban. Ang mga alagad sa matuod nga Diyos dili na makasinati sa inhustisya ug sa pagpanghimulos diha sa mga kamot sa tawhanong mga awtoridad. Pagkakahibulongan nga kagawasan ang matagamtam!
12. Sa unsang paagi ang tanan mapagawas gikan sa sala ug sa mga epekto niini?
12 Ingong “ang Kordero sa Diyos nga nagakuha sa sala sa kalibotan,” si Jesus magpadapat sa bili sa iyang halad aron sa pagpapas sa mga sala sa katawhan. (Juan 1:29) Sa dihang si Jesus dinhi sa yuta ug nagpasaylo sa mga sala sa usa ka tawo, siya nag-ayo sa tawong gipasaylo ingong pamatuod niana. (Mateo 9:1-7; 15:30, 31) Sa samang paagi, si Kristo Jesus, ingong langitnong Hari sa Gingharian sa Diyos, milagrosong magaayo sa buta, amang, bungol, pungkol, masakiton sa pangutok, ug kadtong may laing mga sakit. (Pinadayag 21:3, 4) Sa tanang masinugtanong mga tawo ang “balaod sa sala” dili na moepekto mao nga ang ilang mga hunahuna ug mga buhat mahimong makapahimuot, sa ilang kaugalingon ug sa Diyos. (Roma 7:21-23) Pagkatapos sa Milenyo, sila modangat na sa tawhanong kahingpitan, diha sa ‘larawan ug sa dagway’ sa bugtong matuod nga Diyos.—Genesis 1:26.
13. Sa kataposan sa Milenyong Pagmando, unsay himoon ni Kristo, ug unsay resulta?
13 Sa dihang napadangat na ni Kristo ang katawhan sa kahingpitan, unya iyang ibalik paghatag ngadto sa Amahan ang awtoridad nga gihatag kaniya alang sa maong buluhaton: “Itugyan na niya ang gingharian ngadto sa iyang Diyos ug Amahan, sa dihang iya nang mawagtang ang tanang kagamhanan ug tanang awtoridad ug gahom. Kay kinahanglan siyang magmando ingong hari hangtod ikabutang na sa Diyos ang tanang kaaway ilalom sa iyang mga tiil.” (1 Corinto 15:24, 25) Ang Milenyong Pagmando sa Gingharian bug-os na unyang makatuman sa katuyoan niini; busa dili na unya kinahanglan nga magpabilin ang maong katabang nga kagamhanan tali kang Jehova ug sa katawhan. Ug sanglit ang sala ug kamatayon bug-os nang mawagtang ug ang katawhan matubos na, ang panginahanglan kang Jesus isip Manunubos matapos na. Ang Bibliya nagpatin-aw: “Niana ang Anak magpasakop usab ngadto sa Usa nga nagpasakop sa tanang butang ngadto kaniya, aron ang Diyos mahimong tanang butang ngadto sa tanan.”—1 Corinto 15:28.
14. Ipailalom sa unsa ang nahingpit nga mga tawo, ug ngano man?
14 Human niana, ang nahingpit nga katawhan hatagag kahigayonan nga magpasundayag nga ang ilang gipili mao ang pag-alagad sa bugtong matuod nga Diyos sa walay kataposan. Busa, sa dili pa sila bug-os sagopon ingong iyang mga anak, ipailalom ni Jehova ang tanang nahingpit nga mga tawo sa kataposang pagsulay. Buhian si Satanas ug iyang mga demonyo gikan sa bung-aw. Dili kini mosangpot sa malungtarong kadaot alang niadtong tinuod nga nahigugma kang Jehova. Apan si bisan kinsang dili-maunongong magpaagak nga mahimong dili masinugtanon kang Jehova pagalaglagon sa walay kataposan, duyog sa orihinal nga rebelde ug iyang mga demonyo.—Pinadayag 20:7-10.
15. Unsang kahimtang ang molungtad pag-usab taliwala sa tanang intelihenteng kalalangan ni Jehova?
15 Unya si Jehova magsagop ingong iyang mga anak sa tanang nahingpit nga mga tawo nga nagtuboy sa pagkasoberano sa Diyos panahon sa maong kataposang pagsulay. Sukad sa maong panahon, sila bug-os magpahimulos sa mahimayaong kagawasan sa mga anak sa Diyos ingong bahin sa tibuok-kalibotang pamilya sa Diyos. Ang tanang intelihenteng kalalangan sa langit ug sa yuta magkahiusa na usab sa pagsimba kaniya ingong bugtong matuod nga Diyos. Ang katuyoan ni Jehova mosangko unya sa mahimayaong kalamposan! Gusto ba nimong mahimong bahin nianang malipayon, walay-kataposan, tibuok-kalibotang pamilya? Kon mao, gidasig ka namo sa pagsunod sa giingon sa Bibliya sa 1 Juan 2:17: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”
Repasong Panaghisgot
• Sa wala pa ang pagrebelde sa Eden, unsa ang relasyon sa tanang magsisimba ni Jehova uban kaniya?
• Unsang responsabilidad ang nahimutang niadtong mga alagad sa Diyos?
• Kinsa pa unya ang mahimong mga anak sa Diyos, ug sa unsang paagi nalangkit kini sa katuyoan ni Jehova mahitungod sa nahiusang pagsimba?
[Hulagway sa panid 190]
Ang masinugtanong mga tawo magpahimulos sa kinabuhi diha sa tibuok-yutang paraiso