Ang Paglaom sa Pagkabanhaw—Unsay Kahulogan Niini Alang Kanimo?

“Imong ginabukhad ang imong kamot ug ginatagbaw ang tinguha sa tanang buhing butang.”—SALMO 145:16.

1-3. Unsang paglaom ang gihambin sa pipila alang sa umaabot? Iilustrar.

GIGUGOL sa nuybe-anyos nga si Christopher ug sa iyang magulang nga lalaki kadtong buntaga, kauban sa ilang uyoan, iyaan, ug duha ka ig-agaw nga mga lalaki, sa pagduaw sa balay-balay sa ilang Kristohanong ministeryo duol sa Manchester, Inglaterra. Ang magasing Pagmata! misaysay sa nahitabo. “Pagkahapon, sila nagkuyog sa pagbiyahe aron mopaseyo sa lainlaing mga dapit sa Blackpool, nga usa ka duol rang dapit-lulinghayawan sa baybayon. Silang unom naapil sa 12 ka tawo nga deretsong namatay tungod sa usa ka pagbanggaay sa haywey, nga gibatbat sa kapolisan ingong ‘dakong trahedya.’”

² Sa gabii una pa sa trahedya, ang pamilya mitambong sa Pagtuon sa Libro sa Kongregasyon, diin ang kamatayon mao ang ulohang gihisgotan. “Si Christopher maoy bata nga tighunahuna,” asoy pa sa iyang amahan. “Niadtong gabhiona, siya tin-awng naghisgot sa bag-ong kalibotan ug sa iyang paglaom sa umaabot. Unya, samtang kami nagpadayon sa among panaghisgot, takulahaw nga miingon si Christopher: ‘Ang nakaayo sa pagka-Saksi ni Jehova mao nga bisag makaguol ang kamatayon, kita nahibalo nga may adlaw rang kita magkita pag-usab dinhi sa yuta.’ Walay bisan usa kanamo nga presente ang nakaamgo nga kadtong mga pulonga halandomon kaayo.”a

³ Daghang tuig nga sayosayo niana, ang usa ka taga-Austria nga Saksi nga ginganlag Franz nahibalo nga siya punggotan ug ulo tungod kay siya midumili sa pagtalikod kang Jehova. Si Franz misulat sa iyang inahan gikan sa bilanggoan sa Berlin: “Sumala sa akong nahibaloan, kon ako nanumpa pa [isip sundalo], nakasala na unta ako nga takos sa kamatayon. Kana daotan alang kanako. Wala na akoy pagkabanhaw. . . . Ug karon, minahal kong Inahan ug tanan kong mga igsoong lalaki ug babaye, karong adlawa gitug-anan ako sa akong sentensiya, ug ayaw kamog kalisang, kini maoy kamatayon, ug ako pagapatyon ugma sa buntag. May kusog ako gikan sa Diyos, nga susama kanunay sa kahimtang sa tanang matuod nga mga Kristohanon dugay na kanhi. . . . Kon magpabilin kamong lig-on hangtod sa kamatayon, magkita ra kita pag-usab sa pagkabanhaw. . . . Hangtod sa atong pagkita pag-usab.”b

 4. Unsay epekto sa mga kasinatiang giasoy dinhi diha kanimo, ug unsay sunod natong hisgotan?

⁴ Ang paglaom sa pagkabanhaw dako ug kahulogan alang kang Christopher ug Franz. Tinuod kana alang kanila. Kining mga asoya seguradong makapatandog sa atong mga kasingkasing! Aron molalom ang atong gugma ug pagpasalamat kang Jehova ug magmalig-on ang atong paglaom sa pagkabanhaw, hisgotan nato kon nganong mahitabo ang pagkabanhaw ug kon sa unsang paagi apektado kita sa personal sa maong kahibalo.

Panan-awon Bahin sa Yutan-ong Pagkabanhaw

5, 6. Unsay gibutyag sa panan-awon nga gitala ni apostol Juan sa Pinadayag 20:12, 13?

⁵ Sa usa ka panan-awon bahin sa mga panghitabo panahon sa Milenyong Paghari ni Kristo Jesus, si apostol Juan nakakita sa pagkahitabo sa yutan-ong pagkabanhaw. “Nakita ko ang mga patay, ang dagko ug ang gagmay,” siya mitaho. “Ug ang dagat mitugyan sa mga patay nga diha niini, ug ang kamatayon ug ang Hades mitugyan sa mga patay nga diha kanila.” (Pinadayag 20:12, 13) Bisan kon unsay ranggo o posisyon—bisan “dagko” o “gagmay”—pagawson ang tanang nabilanggo sa Hades (Sheol), ang komong lubnganan sa katawhan. Kadtong nangamatay sa dagat mabuhi pag-usab nianang panahona. Kining talagsaong panghitabo maoy bahin sa katuyoan ni Jehova.

⁶ Inigsugod sa usa ka libo ka tuig nga paghari ni Kristo, si Satanas iyang gaposon ug itambog sa kahiladman. Walay usa sa mga binanhaw ni sa mga makalabang-buhi sa dakong kasakitan ang mapahisalaag ni Satanas panahon sa maong paghari, kay siya dili na makalihok. (Pinadayag 20:1-3) Ang usa ka libo ka tuig tingali hataas nga panahon alang kanimo, apan sa pagkatinuod, kini giisip ni Jehova “ingon sa usa ka adlaw.”—2 Pedro 3:8.

 7. Unsa unya ang pasikaranan sa paghukom panahon sa Milenyong Paghari ni Kristo?

⁷ Sumala sa panan-awon, ang Milenyong Paghari ni Kristo maoy usa ka panahon sa paghukom. Si apostol Juan misulat: “Nakita ko ang mga patay, ang dagko ug ang gagmay, nga nagbarog sa atubangan sa trono, ug gibuksan ang mga linukot nga basahon. Apan gibuksan ang laing linukot nga basahon; mao kini ang linukot nga basahon sa kinabuhi. Ug ang mga patay gihukman pinasukad sa mga butang nga nahisulat sa mga linukot nga basahon sumala sa ilang mga buhat. . . . Ug gihukman ang matag usa sumala sa ilang mga buhat.” (Pinadayag 20:12, 13) Matikdi nga ang pasikaranan sa maong paghukom dili mao ang gibuhat o wala buhata sa usa ka tawo sa wala pa siya mamatay. (Roma 6:7) Hinunoa, kini may kalabotan sa “mga linukot nga basahon” nga pagabuksan. Ang mga buhat sa usa ka tawo human niya makat-oni ang mga unod sa mga linukot nga basahon maoy pasikaranan unya sa pagtino kon ang iyang ngalan mahisulat ba diha sa “linukot nga basahon sa kinabuhi.”

“Pagkabanhaw sa Kinabuhi” o “Pagkabanhaw sa Paghukom”

 8. Unsa unyay duha ka posibleng sangpotanan sa mga pagabanhawon?

⁸ Sa sayong bahin sa panan-awon ni Juan, gibatbat si Jesus ingong nakabaton sa “mga yawi sa kamatayon ug sa Hades.” (Pinadayag 1:18) Siya nag-alagad ingong “Pangulong Ahente sa kinabuhi” nga tinudlo ni Jehova, nga gihatagan ug gahom sa paghukom sa “mga buhi ug sa mga patay.” (Buhat 3:15; 2 Timoteo 4:1) Unsaon niya paghimo kini? Pinaagi sa pagbuhi pag-usab niadtong nangatulog diha sa kamatayon. “Ayaw kahibulong niini,” si Jesus miingon ngadto sa mga panon sa katawhan nga iyang giwalihan, “tungod kay ang takna nagsingabot diin ang tanan nga anaa sa handomanang mga lubnganan makadungog sa iyang tingog ug manggula.” Unya siya midugang pag-ingon: “Ang mga nagbuhat ug maayong mga butang ngadto sa pagkabanhaw sa kinabuhi ug ang mga nagbuhat ug mangil-ad nga mga butang ngadto sa pagkabanhaw sa paghukom.” (Juan 5:28-30) Busa, unsay palaaboton sa matinumanong mga lalaki ug mga babaye sa karaang panahon?

 9. (a) Sa pagbalik sa kinabuhi diha a pagkabanhaw, sa walay duhaduha unsay masayran sa daghan? (b) Unsang dako kaayong edukasyonal nga buluhaton ang pagahimoon?

⁹ Sa dihang kining karaang mga tawong matinumanon mahibalik sa pagkabanhaw, sila makadiskobre sa dili madugay nga ang mga saad nga ilang gisaligan natuman na nianang panahona. Interesado gayod unya silang mahibalo kon kinsa ang Binhi sa babaye sa Diyos, nga gihisgotan sa unang tagna diha sa Bibliya, sa Genesis 3:15! Malipayon gayod unya sila nga makadungog nga ang maong sinaad nga Mesiyas, si Jesus, nagmatinumanon hangtod sa kamatayon, sa ingon niana naghatag sa iyang kinabuhi ingong halad lukat! (Mateo 20:28) Ang mga mag-abiabi kanila sa ilang paghibalik sa kinabuhi malipay kaayo nga motabang kanila aron sila makasabot nga kining tagana sa lukat maoy usa ka pagpahayag sa dili-takos nga kalulot ug kaluoy ni Jehova. Sa dihang ang mga binanhaw mahibalo kon unsay ginahimo sa Gingharian sa Diyos ingong pagtuman sa katuyoan ni Jehova alang sa yuta, walay duhaduhang ang mga pahayag sa pagdayeg kang Jehova magaawas sa ilang mga kasingkasing. Dako unya ang ilang kahigayonan nga ipasundayag ang ilang pagkamaunongon ngadto sa ilang mahigugmaong langitnong Amahan ug sa iyang Anak. Ang tanan nga buhi malipay unya nga makigbahin sa dako kaayong edukasyonal nga buluhaton nga gikinahanglan sa pagtudlo sa bilyonbilyong mahibalik gikan sa lubnganan, kinsa kinahanglang motuo usab sa tagana sa Diyos nga lukat.

10, 11. (a) Unsang kahigayonan ang ihatag sa Milenyo alang sa tanang mabuhi unya sa yuta? (b) Sa unsang paagi apektado gayod kita niini?

¹⁰ Ang binanhaw nga si Abraham makabaton ug dakong kahupayan sa pagtagamtam sa tinuod nga kinabuhi ubos sa pagmando niadtong “siyudad” nga iyang gipaabot. (Hebreohanon 11:10) Dako unya ang kalipay ni Job sa kakaraanan sa dihang iyang masayran nga ang iyang pagkinabuhi nakapalig-on sa ubang mga alagad ni Jehova nga nagsagubang sa mga pagsulay sa ilang integridad! Ug interesado kaayo unya si Daniel nga mahibalo bahin sa katumanan sa mga tagna nga iyang gisulat ubos sa inspirasyon!

¹¹ Sa pagkatinuod, ang tanang makabaton ug kinabuhi sa matarong nga bag-ong kalibotan, kon pinaagi sa pagkabanhaw o sa paglabang-buhi sa dakong kasakitan, daghag makat-onan bahin sa katuyoan ni Jehova alang sa yuta ug sa mga molupyo niini. Tungod sa paglaom nga mabuhi sa walay kataposan ug magdayeg kang Jehova hangtod sa kahangtoran, ang edukasyonal nga programa sa Milenyo seguradong makapahimuot kaayo. Bisan pa niana, ang ginabuhat sa matag usa kanato samtang makat-onan nato ang mga unod sa mga linukot nga basahon mao unyay labing hinungdanon. Ipadapat ba nato ang atong makat-onan? Palandongon ba nato ug ipadapat ang hinungdanong impormasyon nga makapalig-on kanato aron makasukol sa kataposang pagsulay ni Satanas sa pagpatalikod kanato sa kamatuoran?

12. Unsay makatabang sa matag usa aron bug-os nga makapakigbahin sa edukasyonal nga buluhaton ug sa paghimo sa yuta nga usa ka paraiso?

¹² Kinahanglang dili nato kalimtan ang kahibulongang mga panalangin nga moresulta sa pagpadapat sa mga kaayohan sa halad lukat ni Kristo. Ang mga nahibalik sa kinabuhi diha sa pagkabanhaw wala nay mga kaluyahon o mga depekto nga giantos karon. (Isaias 33:24) Tungod sa mahimsog nga lawas ug sa gilaomang hingpit nga panglawas, ang tanang molupyo sa bag-ong kalibotan bug-os makaambit sa edukasyonal nga buluhaton sa pagtudlo sa bilyonbilyong gibanhaw diha sa dalan sa kinabuhi. Ang maong mga molupyo makigbahin usab sa labing dakong proyekto nga gipaningkamotan sukad nga buhaton dinhi sa yuta—nga mao ang paghimo sa tibuok planeta nga usa ka paraiso alang sa kadayeganan ni Jehova.

13, 14. Unsa ang katuyoan sa pagbuhi kang Satanas sa kataposang pagsulay, ug unsang sangpotanan ang posible unya alang sa matag usa kanato?

¹³ Sa dihang si Satanas buhian gikan sa kahiladman alang sa kataposang pagsulay, siya manlimbasog na usab sa pagpahisalaag sa mga tawo. Sumala sa Pinadayag 20:7-9, ang tanang ‘napahisalaag nga kanasoran’ o mga pundok sa katawhan, kinsa mailalom sa daotang impluwensiya ni Satanas hukman nga takos sa kalaglagan: ‘Manaog ang kalayo gikan sa langit ug molamoy kanila.’ Sa mga binanhaw sulod sa Milenyo nga nahiapil kanila, ang maong kalaglagan maghimo sa ilang pagkabanhaw nga pagkabanhaw alang sa paghukom. Ingong kaatbang niana, ang binanhaw nga mga tighupot sa integridad makadawat sa gasa nga kinabuhing walay kataposan. Sa pagkatinuod, ang ilang pagkabanhaw mao unyay “pagkabanhaw sa kinabuhi.”—Juan 5:29.

¹⁴ Sa unsang paagi ang paglaom sa pagkabanhaw makahatag kanatog kahupayan bisan karon? Sa pagkatinuod, unsay kinahanglan natong buhaton aron segurado natong madawat ang mga kaayohan niini sa umaabot?

Mga Pagtulon-an nga Makat-onan Karon

15. Sa unsang paagi ang pagtuo sa pagkabanhaw makatabang karon?

¹⁵ Ikaw tingali bag-o pang namatyag usa ka minahal ug nagpasibo pa sa imong kinabuhi sa maong dakong trahedya. Ang paglaom sa pagkabanhaw makatabang kanimo sa pagbati ug kalinaw sa kahiladman ug kalig-on nga wala maangkon sa mga tawo nga wala mahibalo sa kamatuoran. “Dili namo buot nga kamo mawalay-alamag mahitungod kanilang nangatulog sa kamatayon,” gihupay ni Pablo ang mga taga-Tesalonica, “aron dili kamo masubo ingon sa uban usab nga mga walay paglaom.” (1 Tesalonica 4:13) Napanan-aw mo ba ang imong kaugalingon nga atua sa bag-ong kalibotan, nga imong makita ang pagpamanhaw? Kon mao, batoni ang kahupayan karon pinaagi sa pagpalandong sa palaaboton nga imong makita pag-usab ang imong mga minahal.

16. Unsay lagmit nimong bation sa dihang mahitabo na ang pagkabanhaw?

¹⁶ Sa pagkakaron basin ikaw nag-antos ug grabeng sakit nga mosangko sa kamatayon ingong pisikal nga mga sangpotanan sa pagrebelde ni Adan. Ayaw itugot nga tungod sa kagul-anan nga ipahinabo niini, makalimot ka sa makapalipayng palaaboton nga makasinati sa personal sa pagkabanhaw ug pagkabuhi pag-usab uban ang bag-ong maayong panglawas ug kabaskog didto sa bag-ong kalibotan. Unya inigbuka nimo sa imong mga mata ug imong makita ang ngaya nga mga nawong nga maikag moduyog sa imong kalipay tungod sa imong pagkabanhaw, seguradong magpasalamat ka sa Diyos tungod sa iyang mahigugmaong-kalulot.

17, 18. Unsang duha ka hinungdanong mga pagtulon-an ang angay natong hinumdoman?

¹⁷ Kasamtangan, tagda ang duha ka pagtulon-an nga angay natong hinumdoman. Ang usa mao ang kahinungdanon sa bug-os-kalag nga pag-alagad kang Jehova pagkakaron. Agig pagsundog sa atong Agalon, si Kristo Jesus, ang atong nagasakripisyo-sa-kaugalingong kinabuhi magpasundayag sa gugma kang Jehova ug sa atong mga silingan. Kon kita mawad-an sa atong panginabuhi o kagawasan tungod sa pagsupak o sa paglutos, modesisyon kita nga magpabiling lig-on sa pagtuo bisan pag unsang mga pagsulay ang mahimo natong atubangon. Kon ugaling ang mga magsusupak mobahad sa pagpatay kanato, nan ang paglaom sa pagkabanhaw maghupay ug magpalig-on kanato sa pagpabiling maunongon kang Jehova ug sa iyang Gingharian. Oo, ang atong kasibot sa pagwali sa Gingharian ug sa buluhaton sa paghimog tinun-an mohatag kanatog paglaom sa walay-kataposang mga panalangin nga gitagana ni Jehova alang sa mga matarong.

¹⁸ Ang ikaduhang pagtulon-an may kalangkitan sa paagi sa pag-atubang nato sa mga tentasyon gumikan sa atong pagkadili-hingpit. Ang atong kahibalo bahin sa paglaom sa pagkabanhaw ug ang atong pagpabili sa dili-takos nga kalulot ni Jehova makapalig-on sa atong desisyon nga magpabiling malig-on sa pagtuo. “Ayaw ninyo higugmaa ang kalibotan o ang mga butang nga anaa sa kalibotan,” nagpasidaan si apostol Juan. “Kon adunay mahigugma sa kalibotan, ang gugma sa Amahan wala diha kaniya; tungod kay ang tanan nga anaa sa kalibotan—ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa—wala magagikan sa Amahan, apan nagagikan sa kalibotan. Dugang pa, ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:15-17) Ang panghaylo sa materyalismo sa kalibotan dili kaayo makapaikag kanato kon itandi nato kana sa “tinuod nga kinabuhi.” (1 Timoteo 6:17-19) Kon kita tentalon sa paghimog imoralidad, kita lig-ong modumili. Nakaamgo kita nga kon ugaling mamatay kita sa wala pay Armagedon, tungod sa panggawi nga dili makapahimuot kang Jehova, ang atong kahimtang mahisama niadtong walay kalaoman sa pagkabanhaw.

19. Unsang dakong pribilehiyo ang dili angay natong kalimtan?

¹⁹ Labaw sa tanan, dili gayod nato kalimtan ang dakong pribilehiyo sa paglipay sa kasingkasing ni Jehova karon ug hangtod sa kahangtoran. (Proverbio 27:11) Ang atong pagkamatinumanon hangtod sa kamatayon o ang atong padayong paghupot sa integridad hangtod sa kataposan niining daotang sistema magpakita kang Jehova kon diin kita nagbarog bahin sa isyu sa unibersohanong pagkasoberano. Unya pagkamakalipay gayod nga mabuhi sa yutan-ong Paraiso pinaagi sa paglabang-buhi sa dakong kasakitan o pagkasinati sa milagrosong pagkabanhaw!

Pagtagbaw sa Atong mga Tinguha

20, 21. Unsay makatabang kanato aron kita magpabiling matinumanon bisan pag kita adunay mga pangutana bahin sa pagkabanhaw nga wala pa matubag? Isaysay.

²⁰ Adunay pipila pa ka pangutana nga wala matubag sa atong paghisgot bahin sa pagkabanhaw. Unsay mga kahikayan ni Jehova alang niadtong mga minyo sa dihang sila namatay? (Lucas 20:34, 35) Ang mga pagbanhaw mahitabo ba diha sa dapit diin namatay ang mga tawo? Ang mga banhawon mabuhi ba pag-usab duol sa mga pinuy-anan sa ilang mga pamilya? Daghang ubang pangutana bahin sa kahikayan sa pagkabanhaw ang wala pa matubag. Bisan pa niana, kinahanglan natong hinumdoman ang mga pulong ni Jeremias: “Maayo si Jehova alang sa usa nga naglaom kaniya, alang sa kalag nga nagpadayon sa pagpangita kaniya. Maayo nga ang usa ka tawo maghulat, nga mahilom gayod, alang sa kaluwasan ni Jehova.” (Lamentaciones 3:25, 26) Sa gitakdang panahon ni Jehova, ang tanang pangutana matubag sa atong bug-os nga katagbawan. Nganong makaseguro kita niini?

²¹ Palandonga ang inspiradong mga pulong sa salmista sa dihang siya miawit bahin kang Jehova: “Imong ginabukhad ang imong kamot ug ginatagbaw ang tinguha sa tanang buhing butang.” (Salmo 145:16) Samtang magkatigulang kita, ang atong mga tinguha mausob. Ang atong gilaoman sa dihang mga bata pa kita dili na sama sa atong gitinguha karon. Ang atong panglantaw sa kinabuhi apektado sa atong nasinati ingon man sa atong mga gilaoman. Bisan pa niana, bisan kon unsay atong angayang mga tinguha sa bag-ong kalibotan, kana seguradong tagbawon ni Jehova.

22. Nganong kita adunay balidong katarongan sa pagdayeg kang Jehova?

²² Ang butang nga mahinungdanon sa matag usa kanato karon mao ang pagkamatinumanon. “Ang gipangita diha sa mga piniyalan mao nga ang usa ka tawo makaplagang matinumanon.” (1 Corinto 4:2) Kita mga piniyalan sa mahimayaong maayong balita sa Gingharian sa Diyos. Ang atong pagkamakugihon sa pagmantala niining maayong balita sa tanan nga atong mahibalag makatabang nga kita magpabilin sa dalan paingon sa kinabuhi. Hinumdomi kanunay nga “ang panahon ug ang wala damhang panghitabo” modangat kanatong tanan. (Ecclesiastes 9:11) Aron mamenosan ang way-hinungdang kabalaka gumikan sa kawalay-kasegurohan sa kinabuhi, pangupot nga hugot sa mahimayaong paglaom sa pagkabanhaw. Tuohi gayod nga kon ugaling ikaw mamatay sa dili pa mosugod ang Milenyong Paghari ni Kristo, mahimo kang magkalipay sa kahupayan nga seguradong moabot. Sa gitakdang panahon ni Jehova ikaw makapahayag usab sa mga pulong ni Job nga gitumong sa Maglalalang: “Ikaw motawag, ug ako motubag kanimo.” Ang tanang pagdayeg moadto kang Jehova, kinsa nangandoy sa pagbuhi pag-usab sa tanang anaa sa iyang panumdoman!—Job 14:15.

[Mga footnote]

Nahinumdom Ka Ba?

• Unsay pasikaranan sa paghukom sa katawhan panahon sa Milenyo?

• Nganong ang pipila makabaton sa “pagkabanhaw sa kinabuhi” ug ang uban sa “pagkabanhaw sa paghukom”?

• Sa unsang paagi ang paglaom sa pagkabanhaw makahatag kanatog kahupayan karon?

• Sa unsang paagi ang mga pulong sa Salmo 145:16 makatabang kanato sa pag-atubang sa mga pangutana bahin sa pagkabanhaw nga wala pa matubag?

[Mga hulagway sa panid 21]

Sa unsang paagi ang pagtuo sa pagkabanhaw makatabang kanato karon?