Mahimayaong Kagawasan Duol na Alang sa mga Anak sa Diyos

“Ang kalalangan gipailalom sa pagkawalay-pulos . . . pinasukad sa paglaom aron nga ang kalalangan mismo usab igapagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”​—ROMA 8:​20, 21.

 1. Sa unsang paagi gilandongan ang halad ni Jesus sa Adlaw sa Pagtabon sa Sala?

GIHATAG ni Jehova ang iyang bugtong nga Anak isip halad lukat nga maoy nagbukas sa dalan ngadto sa langitnong kinabuhi alang sa 144,000 ka tawo ug sa walay-kataposang yutan-ong mga palaaboton alang sa nahibiling katawhan. (1 Juan 2:​1, 2) Sumala sa gipahayag sa nag-unang artikulo, ang halad ni Jesus alang sa gianak-sa-espiritung mga Kristohanon gilandongan sa dihang ang hataas nga saserdote sa Israel naghalad ug usa ka laking baka isip halad-sa-sala alang sa iyang kaugalingon, iyang panimalay, ug sa tribo ni Levi sa tinuig nga Adlaw sa Pagtabon sa Sala. Sa mao rang adlaw, siya naghalad ug usa ka kanding isip halad-sa-sala alang sa tanang ubang Israelinhon, ingon nga ang halad ni Kristo mohatag ug benepisyo sa katawhan sa katibuk-an. Ang usa ka buhing kanding sa simbolikong paagi nagdala sa natingob nga mga sala sa katawhan sa miaging tuig, nga nahanaw sa kamingawan.a​—Levitico 16:​7-15, 20-22, 26.

2, 3. Unsay gipasabot sa pahayag ni Pablo nga natala sa Roma 8:​20, 21?

² Human ilatid ang paglaom sa mga tawong mahimong langitnong “mga anak sa Diyos,” si apostol Pablo miingon: “Ang maikagong pagpaabot sa kalalangan nagahulat sa pagpadayag sa mga anak sa Diyos. Kay ang kalalangan gipailalom sa pagkawalay-pulos, dili pinaagi sa kaugalingong kabubut-on niini apan pinaagi kaniya nga nagsakop niini, pinasukad sa paglaom aron nga ang kalalangan mismo usab igapagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:​14, 17, 19-21) Unsay kahulogan niining mga pulonga?

³ Sa dihang ang atong katigulangang si Adan gilalang isip hingpit nga tawo, siya maoy “anak sa Diyos.” (Lucas 3:38) Tungod sa pagpakasala, siya nailalom sa “pagkaulipon sa pagkadunot” ug nagpasa niining kondisyona ngadto sa tawhanong banay. (Roma 5:12) Gitugotan sa Diyos nga ang mga tawo ipanganak uban sa “pagkawalay-pulos” nga nag-atubang kanila tungod sa ilang napanunod nga kadili-hingpit, apan gihatag niya ang paglaom pinaagi sa “binhi,” si Jesu-Kristo. (Genesis 3:​15; 22:​18; Galacia 3:16) Ang Pinadayag 21:​1-4 nagpunting sa panahong ‘ang kamatayon, pagbangotan, pagtiyabaw, ug kasakit mawala na.’ Sanglit kini usa ka saad alang sa “katawhan,” kini nagpasalig kanatong ang usa ka bag-ong yutan-ong katilingban sa mga tawo nga magpuyo ubos sa pagmando sa Gingharian makasinatig kapasig-ulian sa hunahuna ug lawas ngadto sa bug-os nga kahimsog ug sa kinabuhing walay kataposan isip yutan-ong “mga anak sa Diyos.” Sulod sa Usa ka Libo ka Tuig nga Pagmando ni Kristo, ang mga tawong masinugtanon igapagawas gikan sa “pagkaulipon sa pagkadunot.” Human makapamatuod nga maunongon kang Jehova panahon sa kataposang pagsulay, sila mapagawas sa walay kataposan gikan sa napanunod nga sala ug kamatayon. (Pinadayag 20:​7-10) Ang anaa unya sa yuta nianang panahona “makabaton sa mahimayaong kagawasan sa mga anak sa Diyos.”

Sila Nagaingong “Umari Ka!”

 4. Unsay kahulogan nga ‘mokuha sa tubig sa kinabuhi nga libre’?

⁴ Kahibulongan gayod ang paglaom nga gibutang atubangan sa katawhan! Dili katingad-ang ang gianak-sa-espiritung mga Kristohanon nga anaa pa sa yuta masibotong nagapanguna sa pagsulti sa uban bahin niini! Sama niadtong mahimong bahin sa “pangasaw-onon” sa hinimayang Kordero, si Jesu-Kristo, ang dinihogang nahibilin nalangkit sa katumanan niining matagnaong mga pulong: “Ang espiritu ug ang pangasaw-onon padayong nagaingon: ‘Umari ka!’ Ug si bisan kinsa nga nagapaminaw paingna: ‘Umari ka!’ Ug si bisan kinsa nga giuhaw paaria; ang si bisan kinsa nga buot pakuhaa sa tubig sa kinabuhi nga libre.” (Pinadayag 21:​2, 9; 22:​1, 2, 17) Dili, ang mga benepisyo sa halad lukat ni Jesus dili lamang alang sa 144,000 ka dinihogan. Ang espiritu sa Diyos padayong naglihok pinaagi sa mga nahibilin sa pangasaw-onong matang sa yuta sa pag-ingong “Umari ka.” Si bisan kinsang nagapaminaw nga ginauhaw alang sa pagkamatarong gidapit sa pag-ingong “Umari ka,” nga magpahimulos sa dagayang tagana ni Jehova alang sa kaluwasan.

 5. Kinsay gikalipayan sa mga Saksi ni Jehova nga anaa sa ilang taliwala?

⁵ Ang mga Saksi ni Jehova nagtuo sa tagana sa Diyos alang sa kinabuhi pinaagi ni Jesu-Kristo. (Buhat 4:12) Sila nalipay nga anaa sa ilang taliwala ang mga matinud-anog-kasingkasing nga matinguhaong makakat-on bahin sa mga katuyoan sa Diyos ug mobuhat sa iyang kabubut-on. Ang ilang mga Kingdom Hall abli sa tanan nga buot ‘moadto ug mokuha sa tubig sa kinabuhi nga libre’ niining “panahon sa kataposan.”​—Daniel 12:4.

Mga Kausaban Paglabay sa Panahon

 6. Sa unsang paagi ang espiritu sa Diyos naglihok diha sa mga alagad ni Jehova sulod sa nagkalainlaing mga yugto?

⁶ Ang Diyos adunay usa ka panahon sa pagtuman sa iyang mga katuyoan, ug nag-apektar kini sa iyang mga pagpakiglabot sa mga tawo. (Ecclesiastes 3:​1; Buhat 1:7) Bisan pag ang espiritu sa Diyos mikunsad sa iyang mga alagad sa una-Kristohanong panahon, wala sila ipanganak isip iyang espirituwal nga mga anak. Hinunoa, sugod kang Jesus miabot na ang panahon ni Jehova nga gamiton ang balaang espiritu aron ipanganak ang dedikadong mga lalaki ug mga babaye alang sa langitnong panulondon. Ug komosta sa atong adlaw? Ang mao rang espiritu nagalihok diha sa “ubang mga karnero” ni Jesus, apan wala kini magpukaw diha kanila sa paglaom ug tinguha alang sa langitnong kinabuhi. (Juan 10:16) Uban sa kinabuhing dayon sa usa ka paraisong yuta isip ilang hinatag-sa-Diyos nga paglaom, malipayon silang nagapaluyo sa dinihogang nahibilin sa pagpanaksi sulod niining yugtoa sa kausaban gikan sa daang kalibotan ngadto sa matarong nga bag-ong kalibotan sa Diyos.​—2 Pedro 3:​5-13.

 7. Unsang buluhatong pagpangani ang gikabalak-an sa mga Estudyante sa Bibliya, apan unsay ilang nahibaloan bahin sa paraiso?

⁷ Gisugdan sa Diyos ‘ang pagdala ug daghang anak ngadto sa himaya’ pinaagi sa pagbubo sa balaang espiritu panahon sa Pentekostes 33 K.P., ug dayag nga gitakda niya ang usa ka panahon aron makompleto ang espirituwal nga “Israel sa Diyos” nga mokabat ug 144,000. (Hebreohanon 2:​10; Galacia 6:​16; Pinadayag 7:​1-8) Sugod sa 1879, usa ka buluhatong pagpangani nga naglangkit sa dinihogang mga Kristohanon ang kanunayng gihisgotan niining magasina. Apan ang mga Estudyante sa Bibliya (karon gitawag ug mga Saksi ni Jehova) nahibalo usab nga ang Kasulatan nagpadayag sa paglaom nga kinabuhing dayon sa usa ka paraisong yuta. Pananglitan, ang isyung Hulyo 1883 sa Watch Tower nag-ingon: “Sa dihang matukod na ni Jesus ang iyang gingharian, malaglag ang pagkadaotan, ubp., kining yutaa mahimong usa ka paraiso, . . . ug ang tanang anaa sa ilang mga lubnganan mosulod niana. Ug pinaagi sa pagkahimong masinugtanon sa mga balaod niini sila mabuhing walay kataposan niini.” Paglabay sa panahon, ang pag-ani sa mga dinihogan nagkahinay, ug sa inanay ang mga tawo nga wala makabaton sa langitnong paglaom giani pasulod sa organisasyon ni Jehova. Kasamtangan, ang Diyos naghatag sa iyang dinihogang mga alagad, ang gipakatawo-pag-usab nga mga Kristohanon, ug talagsaong salabotan.​—Daniel 12:​3; Filipos 2:​15; Pinadayag 14:​15, 16.

 8. Sa unsang paagi naugmad ang pagsabot bahin sa yutan-ong paglaom sa sinugdan sa katuigang 1930?

⁸ Sukad ilabina sa 1931 nga kadtong may yutan-ong paglaom nakig-uban sa Kristohanong kongregasyon. Nianang tuiga, si Jehova naglamdag sa nahibilin sa gianak-sa-espiritung mga Kristohanon sa pagkasabot nga ang Ezequiel kapitulo 9 nagtumong niining yutan-ong matang, kinsa gipatikan aron makalabang ngadto sa bag-ong kalibotan sa Diyos. Sa 1932 nasabtan nga ang presenteng-adlawng mga karnerohon gilandongan sa kauban ni Jehu nga si Jonadab (Jehonadab). (2 Hari 10:15-17) Sa 1934 gitin-aw nga ang “mga Jonadab” angayng “magkonsagrar,” o magpahinungod, sa ilang kaugalingon ngadto sa Diyos. Sa 1935 ang “dakong pundok,” o “dakong panon”​—nga sa nangagi gihunahunang ikaduhang espirituwal nga matang nga mahimong “mga kaabay” sa pangasaw-onon ni Kristo sa langit​—nailhan isip ubang mga karnero nga may yutan-ong paglaom. (Pinadayag 7:​4-15; 21:​2, 9; Salmo 45:​14, 15) Ug sukad ilabina sa 1935 ang mga dinihogan nanguna sa pagpangita sa matul-id nga mga tawo nga nangandoyng mabuhing walay kataposan sa usa ka paraisong yuta.

 9. Human sa 1935, nganong ang pipila ka Kristohanon mihunong sa pagpakig-ambit sa mga emblema panahon sa Panihapon sa Ginoo?

⁹ Human sa 1935 ang pipila ka Kristohanong nakig-ambit sa tinapay ug bino panahon sa Panihapon sa Ginoo mihunong sa pagpakig-ambit. Ngano? Kay ilang naamgohang ang ilang paglaom maoy yutan-on, dili langitnon. Matod sa usa ka babayeng nabawtismohan sa 1930: “Bisan tuod [ang pagpakig-ambit] giisip nga angayang butang nga buhaton, ilabina alang sa masibotong bug-os-panahong mga ministro, wala gayod ako magtuo nga ako may langitnong paglaom. Unya, sa 1935, gipatin-aw kanamo nga may ginatigom nga dakong panon nga may paglaom nga mabuhing walay kataposan sa yuta. Daghan kanamo ang nalipay sa pagkasabot nga kami bahin nianang dakong panon, ug kami mihunong sa pagpakig-ambit sa mga emblema.” Bisan ang unod sa Kristohanong mga publikasyon nausob. Samtang ang mga publikasyon sa nangaging katuigan gidisenyo alang ilabina sa gianak-sa-espiritung mga sumusunod ni Jesus, sukad sa 1935 paunahan Ang Bantayanang Torre ug ubang literatura sa ‘matinumanong ulipon’ nagtaganag espirituwal nga pagkaon nga angay sa mga panginahanglan sa dinihogan ug sa ilang mga kaubang may yutan-ong paglaom.​—Mateo 24:​45-47.

10. Sa unsang paagi ang usa ka dili-matinumanong dinihogan pulihan?

¹⁰ Pananglit kon dili magmatinumanon ang usa ka dinihogan. May kapuli ba? Kanay gipasabot ni Pablo sa iyang paghisgot sa simbolikong kahoyng olibo. (Roma 11:​11-32) Kon kinahanglang pulihan ang usa ka gianak-sa-espiritu, lagmit ihatag sa Diyos ang langitnong pagkatinawag nganha sa usa kansang pagtuo maoy sulondan sa paghatag ug sagradong pag-alagad kaniya sulod sa daghang tuig.​—Itandi ang Lucas 22:​28, 29; 1 Pedro 1:​6, 7.

Daghang Katarongan nga Magmapasalamaton

11. Bisan kon unsay matang sa atong paglaom, unsay gipasalig kanato sa Santiago 1:17?

¹¹ Bisan kon diin kita nag-alagad nga matinumanon kang Jehova, iyang tagbawon ang atong mga panginahanglan ug matarong nga mga tinguha. (Salmo 145:​16; Lucas 1:​67-74) Kon kita adunay tinuod nga langitnong paglaom o yutan-on ang atong mga palaaboton, kita adunay daghang maayong mga katarongan nga magmapasalamaton sa Diyos. Siya kanunayng nagbuhat sa kaayohan gayod niadtong nahigugma kaniya. Ang tinun-ang si Santiago miingon nga “ang matag maayong gasa ug matag hingpit nga hatag maoy gikan sa itaas, kay nagakunsad kini gikan sa Amahan sa langitnong mga kahayag,” si Jehova nga Diyos. (Santiago 1:17) Atong tagdon ang pipila sa maong mga gasa ug mga panalangin.

12. Nganong makaingon kita nga si Jehova naghatag ug kahibulongang paglaom sa matag usa sa iyang matinumanong mga alagad?

¹² Si Jehova naghatag ug kahibulongang paglaom sa matag usa sa iyang matinumanong mga alagad. Gitawag niya ang pipila alang sa langitnong kinabuhi. Ngadto sa iyang una-Kristohanong mga saksi, gihatag ni Jehova ang talagsaong paglaom sa pagkabanhaw ngadto sa kinabuhing walay kataposan sa yuta. Pananglitan, si Abraham nagtuo sa pagkabanhaw ug nagpaabot sa “siyudad nga may tinuod nga mga patukoranan”​—ang langitnong Gingharian nga ubos niana siya banhawon ngadto sa yutan-ong kinabuhi. (Hebreohanon 11:​10, 17-19) Sa makausa pa, niining panahon sa kataposan, ang Diyos naghatag sa milyonmilyon sa paglaom nga kinabuhing walay kataposan sa usa ka paraisong yuta. (Lucas 23:​43; Juan 17:3) Segurado, si bisan kinsang gihatagan ni Jehova nianang talagsaong paglaom angayng dulot magmapasalamaton niana.

13. Sa unsang paagi ang balaang espiritu sa Diyos naglihok diha sa iyang katawhan?

¹³ Si Jehova naghatag sa iyang balaang espiritu ingong usa ka gasa alang sa iyang katawhan. Ang mga Kristohanong gihatagan ug langitnong paglaom gidihogan sa balaang espiritu. (1 Juan 2:​20; 5:​1-4, 18) Apan, ang mga alagad sa Diyos nga may yutan-ong kalaoman nakabaton sa tabang ug paggiya sa espiritu. Apil kanila mao si Moises, kinsa nakabaton sa espiritu ni Jehova, sama sa 70 ka lalaking gitudlo sa pag-ayuda kaniya. (Numeros 11:​24, 25) Ubos sa impluwensiya sa balaang espiritu, si Bezalel nag-alagad isip usa ka batid nga artesano may kalabotan sa tabernakulo sa Israel. (Exodo 31:​1-11) Ang espiritu sa Diyos mikunsad kang Gideon, Jepte, Samson, David, Elias, Eliseo, ug uban pa. Bisan pag kining mga tawhana sa karaang panahon dili gayod dad-on ngadto sa langitnong himaya, sila gigiyahan ug gitabangan sa balaang espiritu, sama ra sa ubang mga karnero ni Jesus karong adlawa. Busa, ang pagbaton diay sa espiritu sa Diyos wala magpasabot nga nabatonan gayod nato ang langitnong pagkatinawag. Hinunoa, ang espiritu ni Jehova nagtaganag giya, nagtabang kanato sa pagsangyaw ug pagtuman sa ubang hinatag-sa-Diyos nga mga asaynment, naghatag kanatog gahom nga labaw kay sa kasagaran, ug nagpatungha diha kanato sa mga bunga niini nga gugma, kangaya, pakigdait, taas-nga-pailob, kalulot, pagkamaayo, pagtuo, kalumo, ug pagpugong-sa-kaugalingon. (Juan 16:​13; Buhat 1:​8; 2 Corinto 4:​7-10; Galacia 5:​22, 23) Dili ba angayng magmapasalamaton kita tungod niining kinaluoy nga gasa gikan sa Diyos?

14. Sa unsang paagi makabenepisyo kita gikan sa mga gasa sa Diyos nga kahibalo ug kaalam?

¹⁴ Ang kahibalo ug kaalam maoy mga gasa gikan sa Diyos nga angay natong pasalamatan, bisan kon ang atong paglaom langitnon o yutan-on. Ang tukmang kahibalo bahin kang Jehova motabang kanato nga “matino ang mas hinungdanong mga butang” ug “magalakaw nga takos kang Jehova sa katuyoan nga makapahimuot kaniya sa bug-os.” (Filipos 1:​9-11; Colosas 1:​9, 10) Ang diyosnong kaalam magasilbing usa ka panalipod ug giya sa kinabuhi. (Proverbio 4:​5-7; Ecclesiastes 7:12) Ang matuod nga kahibalo ug kaalam gipasukad sa Pulong sa Diyos, ug ang pipila nga nahibiling mga dinihogan ilabinang madani sa ginasulti niini bahin sa ilang langitnong paglaom. Bisan pa niana, ang gugma alang sa Pulong sa Diyos ug talagsaong pagsabot niini dili maoy paagi sa Diyos sa pagpaila nga kita gitawag alang sa langitnong kinabuhi. Ang mga lalaking sama kang Moises ug Daniel misulat pa ganig mga bahin sa Bibliya, apan sila banhawon alang sa kinabuhi sa yuta. Kon kaha ang atong paglaom maoy langitnon o yutan-on, kitang tanan nagdawat ug espirituwal nga pagkaon pinaagi sa inuyonang ‘matinumanon ug maalamong ulipon’ ni Jehova. (Mateo 24:​45-47) Pagkamapasalamaton natong tanan tungod sa kahibalong nabatonan sa ingon nga paagi!

15. Unsa ang usa sa labing talagsaong mga gasa sa Diyos, ug unsay imong pag-isip niini?

¹⁵ Usa sa labing talagsaong mga gasa sa Diyos mao ang mahigugmaong tagana nga halad lukat ni Jesus, nga makabenepisyo kanato kon kaha kita adunay langitnong kalaoman o yutan-ong paglaom. Gihigugma ‘pag-ayo sa Diyos ang kalibotan sa katawhan nga iyang gihatag ang iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.’ (Juan 3:16) Ug ang gugma ni Jesus nagtukmod kaniya “sa paghatag sa iyang kalag nga usa ka lukat baylo sa daghan.” (Mateo 20:28) Sumala sa gisaysay ni apostol Juan, si Jesu-Kristo “pangpasig-uli nga halad alang sa atong mga sala [sa iya sa mga dinihogan], apan dili lamang alang sa atoa apan usab alang nianang sa tibuok kalibotan.” (1 Juan 2:​1, 2) Busa, kitang tanan angayng dulot magmapasalamaton tungod niining mahigugmaong tagana alang sa kaluwasan ngadto sa kinabuhing dayon.b

Atua Ka ba Unya Didto?

16. Unsang halandomong hitabo ang handomon human sa pagsalop sa adlaw sa Abril 11, 1998, ug kinsay angay nga mapresente?

¹⁶ Ang pagkamapasalamaton tungod sa lukat nga gitagana sa Diyos pinaagi sa iyang Anak angayng magtukmod kanato nga mapresente diha sa mga Kingdom Hall o sa ubang mga lugar diin ang mga Saksi ni Jehova magtigom human sa pagsalop sa adlaw sa Abril 11, 1998, aron paghandom sa kamatayon ni Kristo. Sa gisugdan niya ang maong saulog kauban sa iyang matinumanong mga apostoles sa kataposang gabii sa iyang yutan-ong kinabuhi, si Jesus miingon: “Padayong buhata kini sa paghandom kanako.” (Lucas 22:​19, 20; Mateo 26:​26-30) Ang pipila nga nahibiling mga dinihogan moambit sa walay-lebadurang tinapay, nga naghawas sa walay-salang tawhanong lawas ni Jesus, ug sa walay-sambog nga pulang bino, nga nagkahulogan sa iyang dugo nga gibubo diha sa paghalad. Ang gianak-sa-espiritu lamang nga mga Kristohanon ang angayng moambit tungod kay sila lamang ang nahiapil sa bag-ong pakigsaad ug sa pakigsaad sa Gingharian ug nakabaton sa dili-malalis nga pamatuod sa balaang espiritu sa Diyos nga ang ilaha maoy langitnong paglaom. Ang milyonmilyong uban pa atua unya didto ingong matinahorong mga maniniid nga mapasalamaton tungod sa gugmang gipakita sa Diyos ug ni Kristo may kalabotan sa halad ni Jesus nga makapaposible sa kinabuhing dayon.​—Roma 6:23.

17. Unsay angay natong hinumdoman kon bahin sa pagdihog sa espiritu?

¹⁷ Ang kanhing relihiyosong mga pagtuo, tumang kagul-anan gumikan sa pagkamatay sa usa ka minahal, mga kalisdanang nalangkit karon sa yutan-ong kinabuhi, o ang pagbating nakadawat ug espesyal nga panalangin gikan ni Jehova basin moagak sa pipila sa sayop nga pagtuo nga ang langitnong kinabuhi maoy alang kanila. Apan kitang tanan angayng mahinumdom nga ang Kasulatan wala magsugo kanato sa pag-ambit sa mga emblema sa Memoryal aron pagpakita sa atong pagpasalamat sa halad lukat ni Kristo. Dugang pa, ang pagdihog sa espiritu “nagaagad, dili sa usa nga nagatinguha ni sa usa nga nagadagan, apan sa Diyos,” ang Usa nga nag-anak kang Jesus ingong espirituwal nga Anak ug magadala lamang sa 144,000 ka ubang mga anak ngadto sa himaya.​—Roma 9:​16; Isaias 64:8.

18. Alang sa kadaghanan niadtong nag-alagad kang Jehova karong adlawa, unsang mga panalangin ang anaa sa unahan?

¹⁸ Ang kinabuhing walay kataposan sa usa ka paraisong yuta mao ang hinatag-sa-Diyos nga paglaom sa kinabag-ang mga tawo nga nag-alagad kang Jehova niining kataposang mga adlaw. (2 Timoteo 3:​1-5) Sa dili na madugay, ilang matagamtam kining kahibulongang paraiso. Ang mga prinsipe unya maoy magdumala sa yutan-ong mga kahikayan ubos sa langitnong pagmando. (Salmo 45:16) Ang malinawong mga kahimtang magalungtad samtang ang mga molupyo sa yuta mosunod sa mga balaod sa Diyos ug makakat-on ug dugang bahin sa mga dalan ni Jehova. (Isaias 9:​6, 7; Pinadayag 20:12) Aduna unyay daghang buluhaton nga buhaton, ang pagpanukod ug mga balay ug ang pagdaog sa yuta. (Isaias 65:​17-25) Ug palandonga ang malipayong mga reunyon sa pamilya samtang ang mga patay mahibalik sa kinabuhi! (Juan 5:​28, 29) Human sa kataposang pagsulay, ang tanang pagkadaotan mawala na. (Pinadayag 20:​7-10) Sa walay kataposan human niana, ang yuta mapunog hingpit nga mga tawo nga ‘gipagawas gikan sa pagkaulipon sa pagkadunot ug nakabaton sa mahimayaong kagawasan sa mga anak sa Diyos.’

[Mga footnote]

Unsaon Nimo Pagtubag?

◻ Unsay kahulogan nga ‘mokuha sa tubig sa kinabuhi nga libre’?

◻ Kon kaha ang atong paglaom langitnon o yutan-on, unsay atong mga katarongan nga magmapasalamaton sa Diyos?

◻ Unsang tinuig nga saulog ang angayng tambongan natong tanan?

◻ Alang sa kadaghanan sa katawhan ni Jehova, unsay anaa sa umaabot?

[Hulagway sa panid 18]

Milyonmilyon nagsugod sa ‘pagkuha sa tubig sa kinabuhi nga libre.’ Usa ka ba kanila?