Kapitulo 16
Upat ka Magkakabayo Madasdasong Nagpadagan!
Panan-awon 3—Pinadayag 6:1-17
Ulohan: Ang pagdasdas sa upat ka magkakabayo, ang gipamatay ingong martir nga mga saksi sa ilalom sa halaran, ug ang dakong adlaw sa kasuko
Panahon sa katumanan: Sukad sa 1914 hangtod sa kalaglagan niining sistema sa mga butang
1. Sa unsang paagi gipadayag ni Jehova kang Juan ang kaundan sa makaiikag nga linukot nga basahon nga gibuksan ni Jesus?
NIINING panahon sa kalisdanan, dili ba interesado kaayo kita sa “mga butang nga kinahanglang mahitabo sa dili-madugay”? Siyempre, kay kita mismo nalangkit! Busa moduyog kita karon kang Juan samtang gibuksan ni Jesus ang makaiikag nga linukot nga basahon. Sa pagkatalagsaon, kini dili na kinahanglang basahon pa ni Juan. Ngano man? Tungod kay ang kaundan niini gipadayag kaniya pinaagig “mga ilhanan,” nga sunodsunod nga mga talan-awon nga buhi ug puno sa aksiyon.—Pinadayag 1:1, 10.
2. (a) Unsay nakita ug nadungog ni Juan, ug unsay gipaila sa dagway sa kerubin? (b) Kinsay gitumong sa sugo sa unang kerubin, ug nganong kana ang imong tubag?
2 Patalinghogi si Juan samtang gibuksan ni Jesus ang unang timbre sa linukot nga basahon: “Ug nakita ko sa dihang gibuksan sa Kordero ang usa sa pito ka timbre, ug nadungog ko ang usa sa upat ka buhing linalang nga nagsulti nga ang tingog ingon sa dalugdog: ‘Umari ka!’” (Pinadayag 6:1) Tingog kini sa unang kerubin. Nasabtan ni Juan nga ang samag-leyon nga dagway niini nagpaila nga ang organisasyon ni Jehova molihok nga maisogon sa pagpatuman sa Iyang matarong nga mga paghukom. Ug kinsay gitumong sa maong sugo? Dili mahimong si Juan, kay gidapit na si Juan sa pagpakigbahin niining matagnaong mga talan-awon. (Pinadayag 4:1) Ang “tingog [nga] ingon sa dalugdog” nanawag sa uban nga adunay bahin niining una sa upat ka sunodsunod nga makapaukyab nga mga talan-awon.
Ang Puti nga Kabayo ug ang Dungganong Magkakabayo Niini
3. (a) Unsay gihubit ni Juan niining tungora? (b) Nahiuyon sa simbolismo diha sa Bibliya, unsay gihulagwayan sa puti nga kabayo?
3 Si Juan, uban niya ang madasigong Juan nga matang ug ang ilang mga kauban karon, bulahan kaayo nga makakita sa punog-aksiyon nga drama! Si Juan nag-ingon: “Ug nakita ko, ug, tan-awa! usa ka puting kabayo; ug ang nagsakay niini may usa ka pana; ug gihatag kaniya ang usa ka korona, ug siya miasdang nga nagapangdaog ug sa pagtapos sa iyang pagpangdaog.” (Pinadayag 6:2) Oo, agig tubag nianang samag-dalugdog nga tingog nga nag-ingong “Umari ka!,” dihay usa ka puti nga kabayo nga midasdas. Sa Bibliya, ang kabayo sagad nagsimbolo sa gubat. (Salmo 20:7; Proverbio 21:31; Isaias 31:1) Kining maong kabayo, nga lagmit usa ka matahom nga laking kabayo, nagdan-ag sa kaputi nga nagpaila sa walay-mantsa nga pagkabalaan. (Itandi ang Pinadayag 1:14; 4:4; 7:9; 20:11.) Pagkahaom gayod niini, kay kini naghulagway sa usa ka gubat nga mahinlo ug matarong sa balaang mga mata ni Jehova!—Tan-awa usab ang Pinadayag 19:11, 14.
4. Kinsa ang Magkakabayo sa puti nga kabayo? Ipatin-aw.
4 Kinsa ang maong Magkakabayo? Siya dunay pana, usa ka hinagiban alang sa pag-atake sa gubat, apan siya gihatagan usab ug korona. Walay laing matarong nga nakitang nagsul-ob ug mga korona sa adlaw sa Ginoo kondili si Jesus ug ang grupo nga gihawasan sa 24 ka ansiyano. (Daniel 7:13, 14, 27; Lucas 1:31-33; Pinadayag 4:4, 10; 14:14)a Dili mahimong ang usa ka membro sa grupo sa 24 ka ansiyano ihulagway nga makadawat ug korona tungod sa iyang kaugalingong katakos. Busa, kining nag-inusarang magkakabayo mao gayod si Jesu-Kristo ug wala nay lain. Nakita siya ni Juan sa langit sa makasaysayanhong gutlo sa 1914 sa dihang si Jehova nagpahayag, “Ako, ako mismo, nagpahimutang sa akong hari,” ug nagsulti kaniya nga kini maoy sa tuyo nga “ikahatag ko ang mga nasod ingong imong panulondon.” (Salmo 2:6-8)b Busa, sa pagbukas sa unang timbre gibutyag ni Jesus kon sa unsang paagi siya, ingong bag-ong gikoronahan nga Hari, moasdang sa gubat sa tinudlong panahon sa Diyos.
5. Sa unsang paagi ang salmista naghubit sa Magkakabayo sa paagi nga kaamgid nianang sa Pinadayag 6:2?
5 Kining maong talan-awon nahiuyon gayod sa Salmo 45:4-7, nga gisulti ngadto sa Hari nga gientrono ni Jehova: “Ug sa imong kahalangdon magmalamposon ka; sakay sa kawsa sa kamatuoran ug sa pagkamapainubsanon ug sa pagkamatarong, ug ang imong tuong kamot magatudlo kanimo sa mga butang nga makalilisang. Ang imong mga udyong mahait—sa ilalom nimo ang mga tawo mangapukan—diha sa kasingkasing sa mga kaaway sa hari. Ang Diyos maoy imong trono hangtod sa panahong walay tino, bisan hangtod sa kahangtoran; ang setro sa imong pagkahari maoy setro sa katul-id. Gihigugma mo ang pagkamatarong ug gidumtan mo ang pagkadaotan. Mao nga ang Diyos, ang imong Diyos, nagdihog kanimo sa lana sa kasadya labaw kay sa imong mga kauban.” Kay suheto man bahin niining matagnaong paghulagway, nasabtan ni Juan nga nagtumong kini sa kalihokan ni Jesus ingong Hari.—Itandi ang Hebreohanon 1:1, 2, 8, 9.
Nag-asdang sa Pagpangdaog
6. (a) Nganong ang Magkakabayo kinahanglang moasdang sa pagpangdaog? (b) Latas sa unsang mga tuig nagpadayon ang madaogong pag-asdang?
6 Apan, nganong kinahanglan mang moasdang sa gubat ang bag-ong gikoronahan nga Hari? Tungod kay ang iyang pagkahari gitukod panahon sa grabeng pagsupak sa pangunang kaaway ni Jehova, si Satanas nga Yawa, ug sa mga tawo sa yuta kinsa—nahibalo man o wala—nagsilbi sa mga katuyoan ni Satanas. Tungod sa pagkahimugso sa Gingharian, kinahanglang bugnoon ang usa ka dakong gubat sa langit. Sa iyang pagpakiggubat ubos sa ngalang Miguel (nga nagkahulogang “Kinsa ang Sama sa Diyos?”), gipildi ni Jesus si Satanas ug ang iyang mga demonyo ug gitambog sila nganhi sa yuta. (Pinadayag 12:7-12) Ang madaogong pag-asdang ni Jesus nagpadayon latas sa unang mga dekada sa adlaw sa Ginoo samtang gitigom ang samag-karnero nga mga tawo. Bisan tuod ang tibuok kalibotan nailalom gihapon “sa gahom sa usa nga daotan,” si Jesus mahigugmaong nagpadayon sa pagbantay sa iyang dinihogang mga igsoon ug sa ilang mga kauban, nga nagtabang sa matag usa nga magmadaogon sa pagtuo.—1 Juan 5:19.
7. Unsa ang mga kadaogan ni Jesus sa yuta sa unang mga dekada sa adlaw sa Ginoo, ug unsay angay natong determinasyon?
7 Unsa ang ubang mga kadaogan ni Jesus sa miaging kapin sa 90 ka tuig sa adlaw sa Ginoo? Sa tibuok kalibotan, ang katawhan ni Jehova, ingong mga indibiduwal ug ingong kongregasyon, nakaagom ug daghang kalisdanan, pagpit-os, ug mga paglutos, sama niadtong gihubit ni apostol Pablo sa pagpamatuod sa iyang ministeryo. (2 Corinto 11:23-28) Ang mga Saksi ni Jehova nagkinahanglan ug “gahom nga labaw sa kasarangan” aron makalahutay ilabina sa mga dapit nga dunay gubat ug kapintasan. (2 Corinto 4:7) Apan bisan pa sa lisod nga mga kahimtang, ang matinumanong mga Saksi nakasulti sama kang Pablo: “Ang Ginoo mibarog duol kanako ug mihatag kanakog gahom, aron nga pinaagi kanako ang pagwali matuman sa bug-os.” (2 Timoteo 4:17) Oo, si Jesus nagmadaogon alang kanila. Ug siya magpadayon sa pagpangdaog alang kanato, basta determinado kita nga bug-os magmadaogon sa atong pagtuo.—1 Juan 5:4.
8, 9. (a) Sa unsang mga kadaogan nakigbahin ang tibuok-kalibotang kongregasyon sa mga Saksi ni Jehova? (b) Diing mga nasora talagsaon kaayo ang pag-uswag sa mga Saksi ni Jehova?
8 Ang tibuok-kalibotang kongregasyon sa mga Saksi ni Jehova nakigbahin sa daghang kadaogan ubos sa paggiya sa ilang madaogong Hari. Sa talagsaong paagi, iyang gipanalipdan ang maong mga Estudyante sa Bibliya aron dili mapuo niadtong 1918, sa dihang sila mismo temporaryong ‘gidaog’ sa politikanhong organisasyon ni Satanas. Apan niadtong 1919, iyang gibali ang mga rehas sa prisohan sa pagluwas kanila, ug unya iyang gipalagsik sila sa pagmantala sa maayong balita “hangtod sa kinalay-ang dapit sa yuta.”—Pinadayag 13:7; Buhat 1:8.
9 Niadtong Gubat sa Kalibotan II ug una pa niana, ang Axis nga mga nasod nga gimandoan ug mga diktador naningkamot sa pagpapas sa mga Saksi ni Jehova sa daghang kayutaan diin ang mga lider sa relihiyon, ilabina ang herarkiya sa Romano Katoliko, dayag o hilom nga nagsuportar sa malupigong mga diktador. Apan ang 71,509 ka Saksi nga nagmantala sa dihang nagsugod ang gubat sa 1939 miuswag sa 141,606 pagkahuman sa gubat sa 1945, bisan pag kapin sa 10,000 kanila ang nakagugol ug daghang tuig diha sa mga prisohan ug kampo konsentrasyon, ug mga 2,000 ang gipatay. Ang gidaghanon sa aktibong mga Saksi sa tibuok yuta miuswag ngadto sa kapin sa unom ka milyon karon. Ang pag-uswag talagsaon diha sa Katolikong kayutaan ug sa kanasoran diin grabe kaayo ang mga paglutos—sama sa Alemanya, Hapon, ug Italya, diin ang mga Saksi karon nagtaho ug total nga kapin sa 600,000 ka aktibong mga ministro sa kanataran.—Isaias 54:17; Jeremias 1:17-19.
10. Unsang mga kadaogan ang gihatag sa madaogong Hari ngadto sa iyang katawhan “sa pagdepensa ug sa pagtukod sa legal nga paagi sa maayong balita”?
10 Gipanalanginan usab sa atong madaogong Hari ang iyang madasigong katawhan pinaagi sa paghatag kanila ug daghang kadaogan “sa pagdepensa ug sa pagtukod sa legal nga paagi sa maayong balita” diha sa mga korte ug atubangan sa mga magmamando. (Filipos 1:7; Mateo 10:18; 24:9) Kini nahitabo sa internasyonal nga gilapdon—sa Australia, Argentina, Canada, Gresya, India, Swaziland, Switzerland, Turkey, ug sa ubang kayutaan. Lakip sa 50 ka legal nga kadaogan sa mga Saksi ni Jehova sa Korte Suprema sa Tinipong Bansa mao ang mga desisyon nga naggarantiya sa katungod sa pagsangyaw sa maayong balita “sa publiko ug sa balay ug balay” ug sa pagdumili sa pag-apil sa idolatroso nga makinasodnong mga seremonyas. (Buhat 5:42; 20:20; 1 Corinto 10:14) Sa ingon, ang dalan nagpabiling bukas alang sa nagauswag nga tibuok-kalibotang pagpamatuod.
11. (a) Sa unsang paagi ang Magkakabayo ‘nagtapos sa iyang pagpangdaog’? (b) Unsay angayng epekto kanato sa pagbukas sa ikaduha, ikatulo, ug ikaupat nga timbre?
11 Sa unsang paagi si Jesus ‘nagtapos sa iyang pagpangdaog’?c Sama sa atong mahibaloan unya, kini iyang himoon pinaagi sa paglaglag sa bakak nga relihiyon ug sa pagtambog sa tanang nahibiling bahin sa makitang organisasyon ni Satanas ngadto sa simbolikong “linaw nga kalayo” sa kalaglagan, agig pagbindikar sa pagkasoberano ni Jehova. Kita karon masaligong nagpaabot nianang adlawa sa Armagedon sa dihang ang atong “Hari sa mga hari” bug-os nga magmadaogon batok sa malupigong politikanhon nga organisasyon ni Satanas! (Pinadayag 16:16; 17:14; 19:2, 14-21; Ezequiel 25:17) Sa kasamtangan, ang dili-mabuntog nga Mananaog nga nagsakay sa puti nga kabayo nagpadayon sa pagdasdas samtang si Jehova nagpadayon sa pagtigom sa mga tawong matinud-anon ug kasingkasing diha sa Iyang matarong nga nasod sa yuta. (Isaias 26:2; 60:22) Ikaw ba nakigbahin nianang masadyaong pagpakaylap sa Gingharian uban sa dinihogang Juan nga matang? Kon mao, ang nakita ni apostol Juan sa dihang gibuksan ang sunod nga tulo ka timbre seguradong magpalihok kanimo sa paggugol ug mas dakong panahon diha sa buluhaton ni Jehova karon.
Tan-awa, ang Kabayo nga ang Bulok Samag Kalayo!
12. Unsay giingon ni Jesus nga magtimaan sa iyang dili-makitang presensiya ingong Hari?
12 Sa talitapos na ang ministeryo ni Jesus sa yuta, ang iyang mga tinun-an nangutana kaniya nga silasila ra: “Unsa man unya ang ilhanan sa imong presensiya ug sa kataposan sa sistema sa mga butang?” Agig tubag, siya mitagna ug mga kalamidad nga mahimong “sinugdanan sa mga kaul-ol sa kasakit.” Si Jesus miingon: “Ang nasod motindog batok sa nasod, ug ang gingharian batok sa gingharian; ug aduna unyay dagkong mga linog, ug sa nagkalainlaing mga dapit mga kamatay ug mga kanihit sa pagkaon; ug aduna unyay makalilisang nga mga talan-awon ug dagkong mga ilhanan gikan sa langit.” (Mateo 24:3, 7, 8; Lucas 21:10, 11) Ang mga butang nga nakita ni Juan sa dihang gibuksan ang nahibiling mga timbre sa linukot nga basahon maoy susama gayod nianang tagnaa. Tan-awa karon samtang gibuksan sa hinimayang Jesus ang ikaduhang timbre!
13. Unsang sukwahi nga talan-awon ang hapit nang makita ni Juan?
13 “Ug sa dihang gibuksan niya ang ikaduhang timbre, nadungog ko ang ikaduhang buhing linalang nga nag-ingon: ‘Umari ka!’” (Pinadayag 6:3) Ang nagsugo mao ang ikaduhang kerubin nga may dagway sa torong baka. Ang hiyas nga gisimbolohan dinhi mao ang gahom, apan gahom nga gigamit sa matarong nga paagi. Ugaling lang, sukwahi ang makita ni Juan niining tungora tungod kay kini makahahadlok ug makamatay nga pagpasundayag sa gahom.
14. Unsang kabayo ug magkakabayo ang sunod nga nakita ni Juan, ug unsay gihulagwayan niining maong panan-awon?
14 Nan, giunsa pagtubag kining ikaduhang pagtawag nga “Umari ka!”? Niining paagiha: “Ug dihay laing migula, usa ka kabayo nga ang bulok samag kalayo; ug ang nagsakay niini gitugotan sa pagkuha sa pakigdait gikan sa yuta aron sila magpinatyanay sa usag usa; ug gihatag kaniya ang usa ka dakong espada.” (Pinadayag 6:4) Makapaguol gayod nga panan-awon! Ug walay duda kon unsay gihulagwayan niini: gubat! Dili ang matarong, madaogong gubat sa nagmadaogong Hari ni Jehova kondili ang mapintas, hinimog-tawo, internasyonal nga gubat nga giduyogan sa walay-hinungdan nga pag-ula sa dugo ug kasakit. Pagkahaom nga kining magkakabayo nagsakay sa usa ka kabayo nga ang bulok samag kalayo!
15. Nganong dili nato buot nga makigbahin sa pagdasdas sa ikaduhang magkakabayo?
15 Seguradong dili buot ni Juan nga makigbahin niining maong magkakabayo ug sa way-popanagana nga pagdasdas niini, kay kini ang gitagna bahin sa katawhan sa Diyos: ‘Dili na sila makakat-on pa sa pagpakiggubat.’ (Isaias 2:4) Bisag ania pa “sa kalibotan,” si Juan ug ang Juan nga matang usab ug ang dakong panon karon maoy “dili bahin” niining namantsahan-sa-dugo nga sistema. Ang atong mga hinagiban maoy espirituwal ug “gamhanan tungod sa Diyos” alang sa aktibong pagmantala sa kamatuoran, nga lahi sa unodnong pagpakiggubat.—Juan 17:11, 14; 2 Corinto 10:3, 4.
16. Kanus-a ug sa unsang paagi ang magkakabayo sa pula nga kabayo gihatagan ug “usa ka dakong espada”?
16 Diha nay daghang gubat una pa sa 1914, ang tuig sa dihang ang Magkakabayo sa puti nga kabayo midawat sa iyang korona. Apan karon ang magkakabayo sa pula nga kabayo gihatagan ug “usa ka dakong espada.” Unsay ipasabot niini? Sa pagbuto sa Gubat sa Kalibotan I, ang gubat sa tawo nahimong mas dugoon, mas malaglagon kay sukad masukad. Sa dugoong panaggubat sa 1914-18, ang mga tangke de-giyera, makahilo nga gas, ayroplano, submarino, dagkong mga kanyon, ug awtomatikong mga hinagiban gigamit sa unang higayon o sa sukod nga wala pa hitupngi. Sa mga 28 ka nasod, dili lang ang propesyonal nga mga sundalo ang gipugos sa pagpakiggubat kondili ang tibuok populasyon. Makalilisang ang gidaghanon sa nasamdan ug nangamatay. Kapin sa siyam ka milyong sundalo ang nangamatay, ug daghan kaayo ang nangamatay nga mga sibilyan. Bisag natapos na ang gubat, wala gihapoy tinuod nga kalinaw ang yuta. Kapin sa 50 ka tuig human nianang gubata, ang Alemang estadista nga si Konrad Adenauer mikomento: “Wala nay kasegurohan ug kalinaw ang kinabuhi sa mga tawo sukad sa 1914.” Tinuod gayod nga ang magkakabayo nga nagsakay sa pula nga kabayo gitugotan sa pagkuha sa kalinaw sa yuta!
17. Sa unsang paagi nagpadayon ang paggamit sa “dakong espada” human sa Gubat sa Kalibotan I?
17 Unya, kay nakati ang iyang kauhaw sa dugo, ang magkakabayo sa pula nga kabayo midasdas sa Gubat sa Kalibotan II. Ang mga hinagiban sa pagpatay mas makuyaw, ug ang nasamdan ug nangamatay midaghan ug upat ka pilo kay sa Gubat sa Kalibotan I. Niadtong 1945, duha ka bomba atomika ang mibuto sa Hapon, nga ang matag usa mipatay—sa usa lang ka pagkilab—ug mga tinagpulo ka libong biktima. Sa ikaduhang gubat sa kalibotan, ang magkakabayo sa pula nga kabayo nakakalas ug mga 55 ka milyong kinabuhi, apan wala gihapon siya matagbaw. Sumala sa kasaligang taho, kapin sa 20 ka milyong tawo ang gipatay sa “dakong espada” sukad sa Gubat sa Kalibotan II.
18, 19. (a) Inay usa ka kalamposan sa teknolohiyang militar, unsay gipamatud-an sa pinatyanay nga nagsugod sa Gubat sa Kalibotan II? (b) Unsang kapeligrohan ang ginaatubang sa katawhan, apan unsay pagabuhaton sa Magkakabayo sa puti nga kabayo sa pagsanta niini?
18 Matawag ba nato kini nga kalamposan sa teknolohiyang militar? Sa kasukwahi, pamatuod kini sa mapintas nga pagdasdas sa pula nga kabayo. Ug asa mosangko ang maong pagdasdas? Ang pipila ka siyentipiko naghisgot sa posibilidad nga aksidenteng mahitabo ang usa ka nukleyar nga gubat—ilabina ang usa ka tinuyong nukleyar nga gubat! Apan makapalipay nga ang madaogong Magkakabayo nga nagsakay sa puti nga kabayo adunay lahi nga panghunahuna bahin niini.
19 Basta ang pundasyon sa katilingban mao ang nasodnong garbo ug pagdumot, ang katawhan kanunayng mameligro sa nukleyar nga katalagman. Bisan pag magkabuang ang mga nasod sa pagwagtang sa tanang nukleyar nga hinagiban, magpabilin gihapon ang ilang kahibalo sa paggama niini. Sa mubong panahon, makagama na usab sila sa ilang makamatay nga nukleyar nga mga hinagiban; busa, ang bisan unsang gubat nga naggamit ug ordinaryong mga hinagiban sa dili madugay mahimong usa ka dakong trahedya. Ang garbo ug ang pagdumot nga naglimin sa mga nasod karon mosangko gayod sa kamatayon sa katawhan, gawas lang kon santaon sa Magkakabayo sa puti nga kabayo ang mapintas nga pagdasdas sa pula nga kabayo. Magmasaligon nga ang Haring si Kristo modasdas, sa pagtapos sa iyang pagpangdaog sa kalibotan nga gikontrolar ni Satanas ug sa pagtukod ug usa ka bag-ong yutan-ong katilingban nga ang pundasyon niini maoy gugma—gugma sa Diyos ug sa isigkatawo—usa ka puwersa alang sa kalinaw nga labaw kaayo kay sa dili-kasaligang nukleyar nga mga panagang sa atong nabuang nga panahon.—Salmo 37:9-11; Marcos 12:29-31; Pinadayag 21:1-5.
Nagdasdas ang Itom nga Kabayo
20. Nganong makasalig kita nga mabuntog sa Magkakabayo sa puti nga kabayo ang bisan unsang alaot nga kahimtang?
20 Gibuksan karon ni Jesus ang ikatulong timbre! Juan, unsay imong nakita? “Ug sa dihang gibuksan niya ang ikatulong timbre, nadungog ko ang ikatulong buhing linalang nga nag-ingon: ‘Umari ka!’” (Pinadayag 6:5a) Ikalipay, kining ikatulong kerubin “may nawong nga sama sa tawo,” nga naghulagway sa hiyas nga gugma. Ang gugma nga gipasukad sa prinsipyo mokaylap unya sa bag-ong kalibotan sa Diyos, maingon nga kining maanindot nga hiyas kaylap sa tibuok organisasyon ni Jehova karon. (Pinadayag 4:7; 1 Juan 4:16) Makasalig kita nga ang Magkakabayo sa puti nga kabayo, nga kinahanglang “magmando ingong hari hangtod ikabutang na sa Diyos ang tanang kaaway ilalom sa iyang mga tiil,” mahigugmaong magwagtang sa alaot nga kahimtang nga maoy sunod nga tukion ni Juan.—1 Corinto 15:25.
21. (a) Unsay gihulagwayan sa itom nga kabayo ug sa magkakabayo niini? (b) Unsay pamatuod nga nagdasdas gihapon ang itom nga kabayo?
21 Nan, unsay nakita ni Juan sa dihang gitubag ang ikatulong pagtawag nga “Umari ka!”? “Ug nakita ko, ug, tan-awa! usa ka itom nga kabayo; ug ang nagsakay niini may timbangan diha sa iyang kamot.” (Pinadayag 6:5b) Tumang kagutom! Mao kini ang makalilisang nga mensahe niining matagnaong talan-awon. Kini nagpunting sa mga kahimtang sayo sa adlaw sa Ginoo sa dihang ang pagkaon girasyon pinaagig mga timbangan. Sukad sa 1914 ang kagutom nagpadayon ingong usa ka tibuok-kalibotang problema. Ang mga gubat sa modernong panahon miresultag kagutom, kay ang mga kahinguhaan nga kasagarang gamiton sa pagpakaon sa mga gigutom sagad gamiton sa paggamag mga hinagiban sa gubat. Ang mga mag-uuma girekluta sa pag-apil sa gubat, ug ang mga uma nga nadaot tungod sa gubat ug ang mga polisa sa pagsunog sa yuta sa tuyo nga dili kini mapahimuslan sa kaaway nakapamenos sa produksiyon sa pagkaon. Mao gayod kini ang nahitabo sa unang gubat sa kalibotan, diin minilyon ang nag-antos sa gutom ug nangamatay! Ang nakapait pa, ang magkakabayo sa itom nga kabayo nga naghulagway sa gutom wala mohinay sa pagdasdas pagkahuman sa gubat. Sa katuigan sa 1930, lima ka milyon ang nangamatay sa usa lang ka gutom sa Ukraine. Ang ikaduhang gubat sa kalibotan nagpahinabog dugang kanihit sa pagkaon ug kagutom. Samtang ang itom nga kabayo nagpadayon sa pagdasdas, gibanabana sa World Health Organization nga ang malnutrisyon maoy pangunang hinungdan sa kamatayon sa kapig lima ka milyong bata kada tuig.
22. (a) Unsay giingon sa tingog, nga nagpahayag ug unsang panginahanglan? (b) Unsay gipasabot sa kantidad sa usa ka litrong trigo ug sa tulo ka litrong sebada?
22 Si Juan dunay dugang ikasugilon kanato: “Ug nadungog ko ang usa ka tingog nga maorag diha sa taliwala sa upat ka buhing linalang nga nag-ingon: ‘Usa ka litrong trigo alang sa usa ka denario, ug tulo ka litrong sebada alang sa usa ka denario; ug ayaw unsaa ang lana sa olibo ug ang bino.’” (Pinadayag 6:6) Ang upat ka kerubin nagkahiusa sa pagpahayag sa panginahanglang bantayan pag-ayo ang mga abiyo sa pagkaon—maingon nga ang katawhan kinahanglang “magakaon ug tinapay nga tinimbang ug uban ang kabalaka” sa dihang hapit nang malaglag ang Jerusalem sa 607 W.K.P. (Ezequiel 4:16) Sa panahon ni Juan, ang usa ka litrong trigo giisip ingong inadlawng rasyon sa usa ka sundalo. Pila may kantidad sa maong rasyon? Usa ka denario—ang suhol sa usa ka adlaw! (Mateo 20:2)d Komosta kon ang usa ka tawo may pamilya? Buweno, inay trigo, makapalit siya ug tulo ka litrong sebada nga wala mahashasi. Apan kana makapakaon lang ug usa ka gamayng pamilya. Ug ang sebada wala isipa ingong dekalidad nga pagkaon sama sa trigo.
23. Unsay gipasabot sa mga pulong, “Ayaw unsaa ang lana sa olibo ug ang bino”?
23 Unsay gipasabot sa mga pulong, “Ayaw unsaa ang lana sa olibo ug ang bino”? Alang sa uban, kini nagkahulogan nga bisag ang kadaghanan kulang ug pagkaon ug gigutom pa gani, ang mga kaluho sa mga dato dili maunsa. Apan sa Tungang Sidlakan, ang lana ug bino dili gayod matawag nga mga luho. Sa panahon sa Bibliya, ang tinapay, lana, ug bino giisip ingong ordinaryong mga pagkaon. (Itandi ang Genesis 14:18; Salmo 104:14, 15.) Dili kanunayng maayog kalidad ang tubig, busa ang bino kaylap nga gigamit ingong ilimnon ug usahay ingong tambal. (1 Timoteo 5:23) Kon bahin sa lana, sa adlaw ni Elias ang balo nga babaye sa Zarepta, bisag pobre, may gamayng lana gihapon nga magamit sa pagluto sa iyang nabiling harina. (1 Hari 17:12) Busa, ang sugo nga “ayaw unsaa ang lana sa olibo ug ang bino” dayag nga nagtambag nga dili hutdon dayon kining pangunang mga palaliton kondili daginoton ang paggamit niini. Kay kon dili, kini mahurot sa dili pa matapos ang kagutom.
24. Nganong dili na magdugay ang pagdasdas sa itom nga kabayo?
24 Pagkamalipayon nato nga ang Magkakabayo sa puti nga kabayo hapit nang magsanta sa pagdasdas sa itom nga kabayo! Kay kini ang nahisulat mahitungod sa Iyang mahigugmaong tagana alang sa bag-ong kalibotan: “Sa iyang mga adlaw molambo ang matarong, ug ang kadagaya sa pakigdait hangtod nga ang bulan mahanaw na. . . . Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.”—Salmo 72:7, 16; tan-awa usab ang Isaias 25:6-8.
Ang Luspad nga Kabayo ug ang Magkakabayo Niini
25. Sa dihang gibuksan ni Jesus ang ikaupat nga timbre, kang kinsang tingog ang nadungog ni Juan, ug unsay gipasabot niini?
25 Ang sugilanon wala pa maasoy sa bug-os. Gibuksan ni Jesus ang ikaupat nga timbre, ug gisultihan kita ni Juan sa resulta: “Ug sa dihang gibuksan niya ang ikaupat nga timbre, nadungog ko ang tingog sa ikaupat nga buhing linalang nga nag-ingon: ‘Umari ka!’” (Pinadayag 6:7) Mao kini ang tingog sa kerubin nga ang dagway nahisamag naglupad nga agila. Ang layog-abot nga kaalam maoy gipasabot dinhi, ug sa pagkamatuod si Juan, ang Juan nga matang, ug ang tanang uban pang mga alagad sa Diyos sa yuta kinahanglang magbantay ug molihok nga maalamon tungod sa gihulagway dinhi. Kon atong buhaton kini, sa usa ka paagi kita mapanalipdan batok sa mga hampak nga nagsakit sa mga tawong maalamon sa kalibotanong paagi niining garboso ug imoral nga kaliwatan karon.—1 Corinto 1:20, 21.
26. (a) Kinsa ang ikaupat nga magkakabayo, ug nganong haom ang kolor sa iyang kabayo? (b) Kinsay nagsunod sa ikaupat nga magkakabayo, ug unsay mahitabo sa iyang mga biktima?
26 Unsay laing makalilisang nga mga butang ang nahitabo sa dihang ang ikaupat nga magkakabayo misanong sa pagtawag? Si Juan misulti kanato: “Ug nakita ko, ug, tan-awa! usa ka luspad nga kabayo; ug ang nagsakay niini ginganlag Kamatayon. Ug ang Hades nagsunod sa iyang luyo.” (Pinadayag 6:8a) Ang magkakabayo sa kataposang kabayo adunay ngalan: Kamatayon. Sa upat ka magkakabayo sa Apokalipsis, siya lang ang direkta gayod nga nagpaila sa iyang kaugalingon. Busa haom nga ang Kamatayon nagsakay sa luspad nga kabayo, sanglit ang pulong luspad (Grego, khlo·rosʹ) gigamit sa Gregong literatura sa paghubit sa mga nawong nga daw masakiton. Haom usab nga ang Kamatayon gisundan dayon sa Hades (lubnganan), nga wala isulti kon sa unsang paagi, sanglit didto man mosangko sa Hades ang kadaghanang biktima sa mga kadaot nga ipahinabo sa ikaupat nga magkakabayo. Makapalipay nga sila pagabanhawon, sa dihang ‘itugyan na sa kamatayon ug sa Hades ang mga patay nga diha kanila.’ (Pinadayag 20:13) Apan sa unsang paagi mamiktima ang Kamatayon?
27. (a) Sa unsang paagi mamiktima ang magkakabayo nga Kamatayon? (b) Unsay gipasabot sa “ikaupat nga bahin sa yuta” diin ang Kamatayon adunay awtoridad?
27 Gipadayag sa panan-awon ang pipila ka paagi: “Ug gihatag kanila ang awtoridad ibabaw sa ikaupat nga bahin sa yuta, sa pagpamatay pinaagi sa taas nga espada ug sa kanihit sa pagkaon ug sa makamatay nga hampak ug pinaagi sa mapintas nga mga mananap sa yuta.” (Pinadayag 6:8b) Dili literal nga ikaupat nga bahin sa populasyon sa yuta ang apektado niini nga pagdasdas kondili usa ka dakong bahin sa yuta, daghan man o diyutay ang nagpuyo. Gikolekta niining maong magkakabayo ang mga biktima sa dakong espada sa ikaduhang magkakabayo ug ang mga biktima sa mga kagutom ug mga kanihit sa pagkaon sa ikatulong magkakabayo. Mangolekta usab siya sa iyang kaugalingong mga biktima, gikan sa makamatay nga hampak ug niadtong mangamatay usab sa mga linog, ingon sa gihubit sa Lucas 21:10, 11.
28. (a) Sa unsang paagi natuman ang tagna mahitungod sa “makamatay nga hampak”? (b) Sa unsang paagi napanalipdan ang katawhan ni Jehova batok sa daghang sakit karon?
28 Ang mamatikdan karon mao ang “makamatay nga hampak.” Human sa mga kadaot sa Gubat sa Kalibotan I, ang trangkaso Espanyola nakakalas ug kapin sa 20 ka milyong kinabuhi sulod lang sa pipila ka bulan sa 1918-19. Ang bugtong dapit sa yuta nga nakaikyas niining hampaka mao ang gamayng pulo sa St. Helena. Sa mga dapit diin daghan kaayong molupyo ang nangamatay, tinumpitumpi sa patay nga mga lawas ang gidaoban. Ug karon anaa ang makahahadlok nga pagdagsang sa sakit sa kasingkasing ug kanser, nga daghan niini maoy tungod sa pagpanabako. Sa gitawag ug “ngil-ad nga dekada” sa katuigan sa 1980, ang AIDS nadugang diha sa listahan sa “makamatay nga hampak” tungod sa estilo sa kinabuhi nga naglapas sa mga sukdanan sa Bibliya. Sa tuig 2000, ang siruhano heneral sa U.S. gitaho nga nag-ingon nga ang AIDS “lagmit mao ang kinagrabehang epidemya sa panglawas nga nasayran sukad sa kalibotan.” Siya miingon nga 52 milyones ka tawo sa tibuok kalibotan ang natakboyan ug HIV/AIDS, ug 20 milyones kanila ang nangamatay na. Pagkamapasalamaton sa katawhan ni Jehova nga ang maalamong tambag sa iyang Pulong nagpahilayo kanila gikan sa pagpakighilawas ug sa sayop nga paggamit sa dugo, nga pinaagi niana motakod ang daghang sakit karon!—Buhat 15:28, 29; itandi ang 1 Corinto 6:9-11.
29, 30. (a) Unsay kapadapatan karon sa “upat ka malaglagong mga buhat” sa Ezequiel 14:21? (b) Unsay atong pagsabot sa “mapintas nga mga mananap” sa Pinadayag 6:8? (c) Unsa ang pangunang punto sa matagnaong talan-awon?
29 Ang panan-awon ni Juan naghisgot ug mapintas nga mga mananap ingong ikaupat nga hinungdan sa ahat nga kamatayon. Sa pagkamatuod, ang upat ka butang nga gipasiugda sa pagbukas sa ikaupat nga timbre—gubat, kagutom, sakit, ug mapintas nga mga mananap—sa karaang panahon giisip ingong pangunang mga hinungdan sa ahat nga kamatayon. Busa kini naghulagway sa tanang hinungdan sa ahat nga kamatayon karon. Sama kini sa gipasidaan ni Jehova sa Israel: “Mao man usab unya sa dihang moabot ang akong upat ka malaglagong mga buhat sa paghukom—espada ug gutom ug madaotong mapintas nga mananap ug kamatay—nga akong ipadangat sa Jerusalem aron sa paglaglag sa yutan-ong tawo ug sa binuhing hayop gikan niana.”—Ezequiel 14:21.
30 Ang kamatayon pinaagi sa mapintas nga mga mananap panagsa lang mahimong mga ulohang balita karong panahona, bisan tuod ang mapintas nga mga hayop kanunayng makapatay ug mga biktima diha sa tropikal nga mga nasod. Sa umaabot, mahimong mas daghan pa kinig mapatay kon ang mga yuta mahimo nang awaaw tungod sa gubat o ang mga tawo mahimong luya na kaayo tungod sa kagutom ug dili na makaarang sa pag-abog sa gigutom nga mga mananap. Dugang pa, daghang tawo karon, sama sa way-salabotang mga mananap, nagpasundayag ug mananapong mga kinaiya nga sukwahi nianang gihubit sa Isaias 11:6-9. Kining mga tawhana dakog tulubagon tungod sa tibuok-kalibotang pagkaylap sa nalangkit-sa-sekso nga mga krimen, pagbuno, terorismo, ug pagpamomba diha sa modernong kalibotan. (Itandi ang Ezequiel 21:31; Roma 1:28-31; 2 Pedro 2:12.) Ang ikaupat nga magkakabayo nagkolekta usab sa ilang mga biktima. Sa pagkatinuod, ang pangunang punto niining matagnaong talan-awon mao nga ang magkakabayo sa luspad nga kabayo nangolekta ug mga biktima sa ahat nga kamatayon sa daghang paagi.
31. Nganong madasig kita bisan pa sa mga kadaot nga gipahinabo sa mga magkakabayo sa pula, itom, ug luspad nga mga kabayo?
31 Ang impormasyong gibutyag sa pagbukas sa unang upat ka timbre makapadasig kanato tungod kay kini nagtudlo kanato nga dili maguol tungod sa gubat, gutom, sakit, ug sa ubang mga hinungdan sa ahat nga kamatayon nga kaylap kaayo karon; ni kita mawad-ag paglaom tungod sa kapakyasan sa tawhanong mga lider sa pagsulbad sa mga problema karon. Kon ang mga kahimtang sa kalibotan nagpamatuod nga ang mga magkakabayo sa pula, itom, ug luspad nga mga kabayo nagdasdas diha sa ubang mga nasod, ayawg kalimot nga ang Magkakabayo sa puti nga kabayo maoy unang midasdas. Si Jesus nahimo nang Hari, ug siya nakadaog na tungod kay iya nang gitambog si Satanas gikan sa langit. Ang iyang dugang nga pagpangdaog naglakip sa iyang pagtigom sa nahibiling mga anak sa espirituwal nga Israel ug sa internasyonal nga dakong panon, nga milyonmilyon na ang gidaghanon, aron makalabang-buhi sa dakong kasakitan. (Pinadayag 7:4, 9, 14) Ang iyang pagdasdas kinahanglang magpadayon hangtod matapos ang iyang pagpangdaog.
32. Unsay kanunayng mahitabo sa dihang gibuksan ang matag usa sa unang upat ka timbre?
32 Ang pagbukas sa matag usa sa unang upat ka timbre gisundan sa mga tawag: “Umari ka!” Sa matag higayon, dihay kabayo ug magkakabayo nga midasdas. Sugod sa ikalimang timbre, dili na kita makadungog sa maong mga tawag. Apan ang maong mga magkakabayo nagdasdas gihapon, ug sila magapadayon sa pagdasdas hangtod sa kataposan sa sistema sa mga butang. (Itandi ang Mateo 28:20.) Unsa pay ubang hinungdanong mga hitabo ang ibutyag ni Jesus sa dihang iya nang buksan ang nahibiling tulo ka timbre? Ang pipila sa maong mga hitabo dili makita sa mga tawo. Ang uban, bisan pag makita, sa umaabot pa mahitabo. Bisan pa niana, kini seguradong matuman. Atong tan-awon kon unsa kini.
[Mga footnote]
a Apan, matikdi nga ang “babaye” sa Pinadayag 12:1 dunay mahulagwayong “korona nga napulog-duha ka bituon.”
b Alang sa detalyadong pamatuod nga si Jesus miabot na sa iyang Gingharian niadtong 1914, tan-awa ang mga panid 215-18 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.
c Bisan tuod daghang hubad sa Bibliya ang naghubad niining mga pulonga ingong “pagdaog” (Revised Standard, The New English Bible, King James Version) o “determinado sa pagpangdaog” (Phillips, New International Version), ang paggamit ug aorist subjunctive dinhi sa orihinal nga Grego naghatag sa diwa nga kompleto o bug-os. Busa, ang Word Pictures in the New Testament ni Robertson nagkomento: “Ang aorist tense dinhi nagpunting sa bug-os nga kadaogan.”
d Tan-awa ang potnot sa New World Translation Reference Bible.
[Kahon sa panid 92]
Ang Hari Nagdasdas nga Madaogon
Sa katuigan sa 1930 ug 1940, ang porsigidong mga kaaway naningkamot sa pagpatuo sa mga tawo nga ang ministeryo sa mga Saksi ni Jehova maoy ilegal, kriminal, o subersibo pa gani. (Salmo 94:20) Sa 1936 lang, dihay 1,149 ka pagdakop nga narekord sa Tinipong Bansa. Daghang legal nga mga kaso ang gipasaka sa mga Saksi hangtod pa gayod sa Korte Suprema sa Tinipong Bansa, ug ang mosunod maoy pipila sa ilang talagsaong mga kadaogan.
Niadtong Mayo 3, 1943, ang Korte Suprema midesisyon sa kasong Murdock v. Pennsylvania nga ang mga Saksi wala magkinahanglan ug lisensiya sa pagpahimutang ug literatura nga dunay bayad. Nianang adlawa usab, ang desisyon sa kasong Martin v. City of Struthers nag-ingon nga dili supak sa balaod ang pagtimbre sa mga pultahan samtang namalaybalay sa pagpanagtag ug mga handbill ug ubang mga basahong panganunsiyo.
Niadtong Hunyo 14, 1943, ang Korte Suprema midesisyon sa kasong Taylor v. Mississippi nga ang mga Saksi wala magdasig sa mga tawo sa pagbudhi sa gobyerno pinaagi sa ilang pagwali. Nianang adlawa usab, sa kasong West Virginia State Board of Education v. Barnette, ang Korte mihukom nga walay katungod ang hunta sa tunghaan sa pagpalagpot sa mga anak sa mga Saksi ni Jehova nga modumili sa pagsaludo sa bandera. Pagkasunod adlaw mismo, ang tibuok Hataas nga Korte sa Australia nagwagtang sa pagdili batok sa mga Saksi ni Jehova nianang nasora, nga nagdeklarar sa maong pagdili ingong “madaogdaogon, mabuotbuoton ug malupigon.”
[Kahon sa panid 94]
“Gitugotan sa Pagkuha sa Pakigdait Gikan sa Yuta”
Asa motultol ang teknolohiya? Ang The Globe and Mail, sa Toronto, Canada, Enero 22, 1987, nagtaho sa mosunod gikan sa usa ka pakigpulong ni Ivan L. Head, presidente sa Sentro sa Panukiduki sa Internasyonal nga Kaugmaran:
“Sumala sa kasaligang banabana, usa sa matag upat ka siyentipiko ug teknologo sa kalibotan nga nakigbahin sa pagpanukiduki ug kaugmaran ang nalangkit sa paggamag mga hinagiban. . . . Binase sa kantidad sa salapi sa 1986, ang gastos mikabat ug kapin sa $1.5-milyon matag minuto. . . . Kitang tanan ba nakabaton ug dugang kasegurohan tungod niining matanga sa pagpasiugda sa teknolohiya? Ang nukleyar nga mga hinagiban nga gipanag-iya sa gamhanang mga nasod maoy katumbas sa puwersa sa tanang hinagiban nga gigamit sa tanang nakigbugno sa Ikaduhang Gubat sa Kalibotan—pil-on ug 6,000 ka beses. Unom ka libo ka Ikaduhang Gubat sa Kalibotan. Sukad sa 1945, halos pito lang ka semana nga ang kalibotan walay kalihokang militar. Dihay kapin sa 150 ka internasyonal nga gubat o giyera sibil, nga gibanabanang nakakalas ug 19.3 ka milyong kinabuhi, kadaghanan niini maoy tungod sa episyente ug bag-ong mga teknolohiya nga naugmad niining panahon sa Hiniusang Kanasoran.”
Pagka-2005, ang kalihokang militar nakakalas na ug kapin sa 20 ka milyong kinabuhi.
[Kahon sa panid 98, 99]
Ang Gambalay sa Basahon sa Pinadayag
Tungod kay daghan na ang atong nahisgotan sa basahon sa Pinadayag, mas klaro na natong makita karon ang gambalay niining basahona. Human sa makaiikag nga pasiuna niini (Pinadayag 1:1-9), ang Pinadayag maisip nga nabahin ngadto sa 16 ka panan-awon ingon sa mosunod:
UNANG PANAN-AWON (1:10–3:22): Pinaagig inspirasyon nakita ni Juan ang hinimayang Jesus, kinsa nagpadalag makapadasig nga mga mensahe sa pagtambag sa pito ka kongregasyon.
IKA-2 NGA PANAN-AWON (4:1–5:14): Usa ka nindot nga talan-awon sa langitnong trono ni Jehova nga Diyos. Gitunol Niya ang usa ka linukot nga basahon ngadto sa Kordero.
IKA-3 NGA PANAN-AWON (6:1-17): Sa pagbukas sa unang unom ka timbre sa linukot nga basahon, anam-anam nga gibutyag sa Kordero ang daghag-bahin nga panan-awon sa mga panghitabo sa adlaw sa Ginoo. Ang upat ka magkakabayo sa Apokalipsis midasdas, ang gipamatay ingong martir nga mga ulipon sa Diyos nakadawat ug maputing tag-as nga mga besti, ug ang dakong adlaw sa kasuko gihubit.
IKA-4 NGA PANAN-AWON (7:1-17): Gipugngan sa mga manulonda ang mga hangin sa kalaglagan hangtod matimbrehan na ang 144,000 ka membro sa espirituwal nga Israel. Usa ka dakong panon gikan sa tanang nasod nagpahinungod sa kaluwasan ngadto sa Diyos ug kang Kristo ug gitigom sila aron makalabang-buhi sa dakong kasakitan.
IKA-5 NGA PANAN-AWON (8:1–9:21): Sa pagbukas sa ikapitong timbre, adunay pito ka pagpatingog sa trompeta, ang unang unom niini maoy naglangkob sa ikalimang panan-awon. Kining unom ka pagpatingog sa trompeta nagpahibalo sa mga paghukom ni Jehova sa katawhan. Ang ikalima ug ikaunom nga trompeta nagpahibalo usab sa una ug ikaduha nga mga kaalaotan.
IKA-6 NGA PANAN-AWON (10:1–11:19): Usa ka kusgang manulonda mihatag kang Juan ug gamayng linukot nga basahon, ang templo gisukod, ug atong nasayran ang kasinatian sa duha ka saksi. Kini natapos sa dihang gihuyop ang ikapitong trompeta, nga nagpahibalo sa ikatulong kaalaotan para sa mga kaaway sa Diyos—ang umaabot nga Gingharian ni Jehova ug sa iyang Kristo.
IKA-7 NGA PANAN-AWON (12:1-17): Kini naghubit sa pagkahimugso sa Gingharian, nga miresulta sa pagtambog ni Miguel sa halas, si Satanas, nganhi sa yuta.
IKA-8 NGA PANAN-AWON (13:1-18): Ang gamhanang mapintas nga mananap migimaw gikan sa dagat, ug ang mananap nga may duha ka sungay nga sama sa nating karnero nag-awhag sa katawhan sa pagsimba niini.
IKA-9 NGA PANAN-AWON (14:1-20): Usa ka matahom nga pasiunang pagtan-aw sa 144,000 diha sa Bukid sa Zion. Ang mga mensahe sa mga manulonda nadunggan sa tibuok yuta, ang paras sa yuta giani, ug ang pug-anan sa bino sa kasuko sa Diyos gitamaktamakan.
IKA-10 NGA PANAN-AWON (15:1–16:21): Nakita pag-usab ang langitnong korte, nga gisundan sa pagbubo sa pito ka panaksan sa kasuko ni Jehova ngadto sa yuta. Kining seksiyona natapos usab pinaagi sa usa ka matagnaong paghubit sa kataposan sa sistema ni Satanas.
IKA-11 NGA PANAN-AWON (17:1-18): Ang dakong bigaon, ang Dakong Babilonya, nagsakay sa usa ka sanag-pulang bulok nga mapintas nga mananap, nga mitidlom kadiyot sa kahiladman apan migimaw pag-usab ug milaglag sa dakong bigaon.
IKA-12 NGA PANAN-AWON (18:1–19:10): Ang pagkagun-ob ug pangataposang kalaglagan sa Dakong Babilonya gipahibalo. Human sa iyang pagkalaglag, ang pipila nagbangotan, ang uban nagdayeg kang Jehova; ang kaminyoon sa Kordero gipahibalo.
IKA-13 NGA PANAN-AWON (19:11-21): Si Jesus nanguna sa kasundalohan sa langit sa pagpatuman sa mabangis nga paghukom sa Diyos batok sa sistema ni Satanas, sa kasundalohan niini, ug sa mga tigpaluyo niini; gipistahan sa mga langgam ang ilang patayng mga lawas.
IKA-14 NGA PANAN-AWON (20:1-10): Ang pagtambog kang Satanas nga Yawa ngadto sa kahiladman, ang Usa ka Libo ka Tuig nga Pagmando ni Kristo ug sa iyang kaubang mga hari, ang kataposang pagsulay sa katawhan, ug ang paglaglag kang Satanas ug sa iyang mga demonyo.
IKA-15 NGA PANAN-AWON (20:11–21:8): Ang katibuk-ang pagkabanhaw ug ang dakong Adlaw sa Paghukom; pagtungha sa bag-ong langit ug bag-ong yuta, uban ang dumalayong mga panalangin para sa matarong nga katawhan.
IKA-16 NGA PANAN-AWON (21:9–22:5): Ang Pinadayag gitapos pinaagig mahimayaong panan-awon sa Bag-ong Jerusalem, ang asawa sa Kordero. Ang tagana sa Diyos sa pag-ayo sa sakit ug sa kinabuhi alang sa katawhan midagayday gikan nianang siyudara.
Ang Pinadayag gitapos pinaagig makapadasig nga mga pulong sa pagtimbaya ug pagtambag gikan kang Jehova, kang Jesus, sa manulonda, ug kang Juan mismo. Ang pagdapit ngadto sa tanan maoy “Umari ka!”—Pinadayag 22:6-21.