DAKONG PANON

Usa ka ekspresyon nga komon diha sa Kristohanon Gregong Kasulatan. Ang “dakong (mga) panon” usahay gigamit maylabot sa dagkong mga pundok sa mga tawo nga namati sa publikong pagpanudlo ni Jesu-Kristo. (Mat 14:14; 19:2; 20:29) Human sa panan-awon bahin sa kalaglagan sa simbolikong Dakong Babilonya, si apostol Juan nakadungog ug “daw makusog nga tingog sa usa ka dakong panon didto sa langit.” (Pin 19:1) Apan, kon kinsa ang “usa ka dakong panon” nga gihisgotan sa Pinadayag 7:9 ilabinang makapainteres kaayo.

Niini nga kapitulo, si apostol Juan unang naghisgot sa pagtimbre sa 144,000 ka ulipon sa Diyos “gikan sa matag tribo sa mga anak nga lalaki ni Israel.” (Pin 7:2-8) Human niini, iyang nakita diha sa panan-awon ang “usa ka dakong panon” gikan sa tanang kanasoran, mga tribo, katawhan, ug mga pinulongan. Ilang giila nga ang ilang kaluwasan naggikan sa Diyos ug sa Kordero samtang sila nagabarog atubangan sa trono sa Diyos. Sila migula gikan sa “dakong kasakitan,” sila nag-alagad sa Diyos diha sa iyang templo, ug siya nagabuklad sa iyang tolda ibabaw kanila. Ang tanan nilang kagutom ug kauhaw pagataposon ug ang matag luha pagapahiran gikan sa ilang mga mata samtang ang iyang Anak (ang Kordero; Ju 1:29) magatultol kanila ngadto sa mga tubig sa kinabuhi.​—Pin 7:9-17.

Popular nga mga Panglantaw. Nagkalainlaing mga panglantaw ang gihatag bahin sa kahulogan niini ug kon kinsa kining “dakong panon.” Ang daghang komentarista nag-isip sa 144,000 ka tinimbrehan, nga unang gihisgotan, ingong mga membro sa “espirituwal nga Israel” ug nagtuo nga sila nagsimbolo sa Kristohanong kongregasyon samtang ania pa sa yuta. Ilang gituohan nga ang “dakong panon” naghawas sa samang Kristohanong kongregasyon didto sa langit, human ang mga indibiduwal nangamatay diha sa pagtuo ug nangabanhaw. Gituohan sa uban nga ang 144,000 literal nga naggikan sa “matag tribo sa mga anak nga lalaki ni Israel” (Pin 7:4), sa ato pa, ang unodnong mga Hudiyo nga nahimong mga Kristohanon, ug ilang giisip ang “dakong panon” ingong naghawas sa tanang Hentil nga mga Kristohanon. Apan, ang pagkonsiderar sa Pinadayag kapitulo 7 ug sa ubang nalangkit nga mga teksto nagpadayag ug dagkong mga panagsumpaki niini nga mga panglantaw, ug sa samang panahon nagpunting sa lahing konklusyon.

Ang pagtuo nga ang 144,000 ka tinimbrehan mao ang mga membro sa Kristohanong kongregasyon sa dihang ania pa sa yuta samtang ang “dakong panon” mao ang binanhaw nga mga Kristohanon didto sa langit dili moharmonya sa laing paghisgot sa 144,000 sa Pinadayag kapitulo 14. Didto ang 144,000 nagbarog uban sa Kordero sa “Bukid sa Zion.” Sa Hebreohanon 12:18-24 gitandi ni apostol Pablo ang kasinatian sa mga Israelinhon didto sa yutan-ong Bukid sa Sinai nianang sa mga Kristohanon kinsa “nakaduol sa Bukid sa Zion ug sa siyudad sa buhing Diyos, ang langitnong Jerusalem, ug sa tinagpulo ka libo nga manulonda, sa katibuk-ang katigoman, ug sa kongregasyon sa mga panganay nga natala sa mga langit.” Nan, dayag nga bisan tuod ang Pinadayag 14:3 nag-ingon nga ang 144,000 “gipalit gikan sa yuta,” ang konteksto naglarawan kanila ingong, wala sa yuta, apan atua sa langit uban sa langitnong Kordero, si Kristo Jesus. (Pin 14:​3, 4) Tungod niini, sayop ang panglantaw nga ang 144,000 naghawas sa Kristohanong kongregasyon samtang ania pa sa yuta ug nga sila usab mao ang “dakong panon” didto sa langit.

Dugang pa, ang paagi sa pagpresentar ni apostol Juan sa iyang panan-awon bahin sa “dakong panon” nagpaila ug usa ka tataw nga kalainan tali kanila ug sa 144,000 ka tinimbrehan. Siya miingon: “Human niining mga butanga [ang asoy bahin sa 144,000 ka tinimbrehan] nakita ko, ug, tan-awa! usa ka dakong panon, nga walay tawong makaihap.” (Pin 7:9) Sa ingon iyang gipaila ang “dakong panon” ingong lahi nga pundok ug mihimog tinong kalainan tali sa espesipikong gidaghanon sa 144,000 ug sa dili-maihap nga “dakong panon.” Sila usab gipalahi tungod kay sila naggikan, dili “sa mga anak nga lalaki ni Israel,” kondili sa tanang kanasoran, mga tribo, katawhan, ug mga pinulongan. Wala sila makit-i nga nagbarog ‘uban sa Kordero’ sama sa 144,000 sa Pinadayag 14:​1, apan sila nagbarog sa “atubangan sa Kordero.” Kining ubay-ubay nga mga katarongan nagpamatuod nga ang “dakong panon” maoy bulag ug lahi gikan sa 144,000 ka tinimbrehan.

Sa laing bahin, kon lantawon nga gipakita niini nga teksto nga ang mga Kristohanon nga kaliwat ug Hudiyo gipalahi gikan sa Hentil nga mga Kristohanon, mahimong sukwahi kini sa inspiradong pahayag ni apostol Pablo nga dili mahinungdanon diha sa Kristohanong kongregasyon ang unodnong mga kalainan, tungod kay ang mga membro niini nahiusa kang Kristo Jesus. (Rom 10:12; Gal 3:28) Si Jehova, kay ‘bug-os nga nagpasig-uli sa duha ka katawhan [mga Hudiyo ug mga dili-Hudiyo] ngadto kaniya diha sa usa ka lawas’ pinaagi kang Kristo, dili gayod madahom nga mohimog panag-ulang tali sa duha ka pundok pinaagi sa paglain sa unodnong mga Hudiyo gikan sa mga Hentil diha sa panan-awon nga gihatag kang Juan. (Efe 2:11-21; Buh 15:7-9) Kini madayag ilabina kon tagdon ang prinsipyo sa Diyos nga gipahayag ni Pablo. Ang apostol misulat: “Siya dili Hudiyo sa gawas lamang, ni ang pagkatinuli diha sa unod sa gawas lamang. Apan siya Hudiyo sa sulod, ug ang iyang pagkatinuli maoy sa kasingkasing pinaagi sa espiritu.” (Rom 2:​28, 29) Nganong wala man hisgoti ang bisan unsang ‘pagtimbre’ sa Hentil nga mga Kristohanon niini nga panan-awon gikan sa Diyos? Ug ngano mang ang Hentil nga mga Kristohanon dili makakat-on sa bug-os sa bag-ong awit nga giawit sa 144,000? (Pin 14:3) Nan, tin-aw nga ang 144,000 ka tinimbrehan maoy espirituwal nga Israel, dili unodnong Israel​—busa naglakip sa Hudiyo ug Hentil nga mga Kristohanon.​—Gal 6:16.

Ang Ilang Identipikasyon. Ang yawi aron mailhan ang “dakong panon” makaplagan diha sa kahubitan bahin kanila sa Pinadayag kapitulo 7 ug diha sa susamang mga teksto. Gihisgotan sa Pinadayag 7:15-17 nga ang Diyos ‘nagbuklad sa iyang tolda sa ibabaw nila,’ nga sila gitultolan ngadto sa “mga tuboran sa mga tubig sa kinabuhi,” ug nga ang Diyos nagpahid sa “tanang luha gikan sa ilang mga mata.” Sa Pinadayag 21:2-4 atong makaplagan ang susamang mga pahayag: “Ang tolda sa Diyos anaa uban sa mga tawo,” iyang “pagapahiran ang tanang luha gikan sa ilang mga mata,” ug ang “kamatayon mawala na.” Ang panan-awon nga gipresentar niini nga mga teksto maoy mahitungod sa mga tawo nga wala sa langit, diin naggikan ang ‘Bag-ong Jerusalem nga nanaog,’ apan sa mga tawo nga ania sa yuta, taliwala sa katawhan.

Kini magpatungha sa pangutana: Kon ang “dakong panon” maoy mga tawo nga makabatog kaluwasan ug magpabilin sa yuta, sa unsang paagi sila ikaingon nga ‘nagbarog sa atubangan sa trono sa Diyos ug sa atubangan sa Kordero’? (Pin 7:9) Ang posisyon nga ‘pagbarog’ usahay gigamit sa Bibliya aron ipaila ang pagbaton ug pinaboran o inuyonang posisyon sa panan-aw sa usa kansang presensiya nagabarog ang indibiduwal o pundok. (Sal 1:5; 5:5; Pr 22:​29, AT; Luc 1:19) Ngani, sa gisundan niini nga kapitulo sa Pinadayag, “ang mga hari sa yuta ug ang mga taas-ug-ranggo ug ang mga komandante militar ug ang mga dato ug ang mga kusgan ug ang tanang ulipon ug ang tanang tawong gawasnon” gihubit nga nanago “gikan sa nawong sa Usa nga naglingkod sa trono ug gikan sa kapungot sa Kordero, tungod kay ang dakong adlaw sa ilang kapungot nahiabot na, ug kinsay arang makabarog?” (Pin 6:15-17; itandi ang Luc 21:36.) Nan mopatim-aw nga ang “dakong panon” naglangkob sa mga tawo nga matipigang buhi nianang panahon sa kapungot ug makahimo sa ‘pagbarog’ ingong inuyonan sa Diyos ug sa Kordero.

Ang pagtultol kanila sa Kordero ngadto sa “mga tuboran sa mga tubig sa kinabuhi” maoy susama sa Pinadayag 22:​17, nga nag-ingon: “Ang espiritu ug ang pangasaw-onon nagpadayon sa pag-ingon: ‘Umari ka!’ Ug si bisan kinsa nga nagpatalinghog paingna: ‘Umari ka!’ ug si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.” Ang “pangasaw-onon” tin-aw nga gipaila sa Kasulatan ingong ang dinihogang Kristohanong kongregasyon, nga giminyo ngadto sa langitnong Pamanhonon, si Kristo Jesus. (Efe 5:25-27; 2Co 11:2; Pin 19:7-9; 21:9-11) Kini nga pagdapit gikan sa langitnong “pangasaw-onon” nga matang nga ‘moinom sa tubig sa kinabuhi nga walay bayad’ dayag nga bukas ngadto sa dili-limitadong gidaghanon sa mga tawo, “si bisan kinsa nga may tinguha.” Ang “dakong panon” dili usab maihap, busa ang panan-awon sa Pinadayag 7:9 moharmonya nianang sa Pinadayag 22:17.

Busa, ang katibuk-ang ebidensiya nagpunting sa “dakong panon” ingong naghawas sa tanang tawo nga dili sakop sa langitnong “pangasaw-onon” nga matang, o sa 144,000 nga tinimbrehan, apan kinsa magabarog nga inuyonan sa panahon sa “dakong kasakitan” ug matipigang buhi dinhi sa yuta.​—Tan-awa ang KONGREGASYON (Ang Kristohanong Kongregasyon sa Diyos); YUTA, I (Katuyoan); LANGIT.