Langit

Kahubitan: Ang puloy-anan ni Jehova nga Diyos ug sa matinumanon espiritung mga linalang; usa ka gingharian nga dili makita sa tawhanong mga mata. Ang Bibliya nagagamit usab sa terminong “langit (mga langit)” diha sa nagkadaiya ubang mga kahulogan; pananglitan: sa pagrepresentar sa Diyos mismo, sa iyang organisasyon sa matinumanong espiritung mga linalang, usa ka kahimtang nga adunay balaang pag-uyon, ang kinaiyanhong uniberso gawas sa yuta, ang hawan nga nagalibot sa planetang Yuta, tawhanong mga gobyerno ubos sa pagmando ni Satanas, ug ang matarong bag-ong langitnong kagamhanan nga si Jesu-Kristo uban sa iyang kaubanang mga manununod gihatagan ug gahom ni Jehova aron sa pagmando.

Kitang tanan ba naglungtad na didto sa espiritung gingharian antes sa atong pagkahimugso ingong mga tawo?

Juan 8:23: “[Si Jesu-Kristo miingon:] ‘Kamo taga-ubos; ako taga-itaas. Kamo tagadinhi niining kalibotana; ako dili tagadinhi niining kalibotana.’” (Si Jesus gikan gayod sa espiritung gingharian. Apan, sumala sa gisulti ni Jesus, ang ubang mga tawo dili gikan didto.)

Roma 9:10-12: “Si Rebecca nagsamkon ug kaluha . . . Sa wala pa mahimugso sila ni makahimog bisan unsang maayo o daotan, aron ang katuyoan sa Diyos maylabot sa pagpili magapadayong nahasalig, dili diha sa mga buhat, kondili diha sa Usa nga nagatawag, nga gisulti ngadto kaniya: ‘Ang magulang magaalagad sa manghod.’” (Siyempre, kon ang kaluhang si Jacob ug Esau nagkinabuhi nang daan didto sa espiritung gingharian tino nga sila nakahimo untag rekord nga pinasukad sa ilang kagawian didto, di ba mao? Pero wala nila mahimo ang maong rekord kondili pagkahuman na lamang sa ilang pagkahimugso ingong mga tawo.)

Ang tanan bang maayong tawo mahalangit?

Buh. 2:34: “Si David [nga gipunting sa Bibliya ingong ‘tawo nga nauyonan sa kasingkasing ni Jehova’] wala mosaka ngadto sa mga langit.”

Mat. 11:11: “Sa pagkamatuod nagaingon ako kaninyo, Taliwala kanilang gianak ug mga babaye wala pay nahitungha nga molabaw kang Juan nga Bawtista; apan ang persona nga labing gamay didto sa gingharian sa mga langit mas dako pa kay kaniya.” (Busa si Juan wala mahalangit sa namatay siya.)

Sal. 37:9, 11, 29: “Ang mga mamumuhat sa daotan pagalaglagon, apan sila nga nagalaom kang Jehova mao ang magapanunod sa yuta . . . Ang mga maaghop sa ilang kaugalingon magapanunod sa yuta, ug sila gayod makakaplag sa ilang bug-os nga kalipay diha sa kadagaya sa pakigdait. Ang mga matarong mismo magapanunod sa yuta, ug sila magapuyo sa ibabaw niini sa walay kataposan.”

Kon si Adan wala pa magpakasala, siya ba sa kataposan mahalangit ra?

Gen. 1:26: “Ang Diyos mipadayon sa pag-ingon: ‘Buhaton nato ang tawo diha sa atong dagway, sumala sa atong panagway, ug magabuot sila sa mga isda sa dagat ug sa mga langgam sa kalangitan ug sa mga kamananapan ug sa tibuok nga yuta ug sa tanan nga nagakamang nga mga mananap ibabaw sa yuta.’” (Busa, ang katuyoan sa Diyos alang kang Adan nga siya ang tig-atiman sa yuta ug sa kamananapan diha niana. Walay gisulti maylabot sa iyang pag-adto sa langit.)

Gen. 2:16, 17: “Si Jehova nga Diyos usab nagsugo sa tawo: ‘Makakaon ka sa tanang kahoy sa tanaman ngadto sa katagbawan. Apan sa kahoy sa pag-ila sa maayo ug sa daotan dili ka gayod magakaon niana, kay sa adlaw nga ikaw magakaon niana ikaw gayod mamatay.’” (Dili maoy orihinal nga katuyoan ni Jehova alang sa tawo nga mamatay ra sa kapulihay. Ang sugo sa Diyos dinhi nga gikutlo nagpakita nga siya gipasidan-an batok sa dalan nga mohatod sa kamatayon. Ang kamatayon maoy silot sa pagkamasupilon, dili ang ganghaan paingon sa mas maayong kinabuhi didto langit. Ang pagkamasinundanon gigantihan unta ug mapadayonong kinabuhi, kinabuhing dayon, diha sa Paraiso nga gihatag sa Diyos ngadto sa tawo. Tan-awa usab ang Isaias 45:18.)

Kinahanglan ba ang tawo nga moadto sa langit aron makahupot sa tinuod malipayong ugma-damlag?

Sal. 37:11: “Ang mga maaghop sa ilang kaugalingon magapanunod sa yuta, ug sila gayod makakaplag sa ilang bug-os nga kalipay diha sa kadagaya sa pakigdait.”

Pin. 21:1-4: “Nakita ko ang usa ka bag-ong langit ug usa ka bag-ong yuta . . . Nadungog ko gikan sa trono ang makusog nga tingog nga nag-ingon: ‘Tan-awa! Ang balongbalong sa Diyos uban sa katawhan, ug siya magapuyo uban kanila, ug sila mahimong iyang mga katawhan. Ug ang Diyos mismo magpakig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, wala na ing pagbalata ni paghilak ni kasakit pa man. Ang unang mga butang nangagi na.’”

Miq. 4:3, 4: “Sila dili mobakyaw ug espada, nasod batok sa nasod, ni sila makakat-on pa sa gubat. Ug sila manglingkod gayod, ang tagsatagsa ilalom sa iyang paras ug ilalom sa iyang kahoyng igos, ug walay magahadlok kanila; kay ang baba gayod ni Jehova sa mga panon ang nagsulti niini.”

Gibuksan ba ni Jesus ang dalan paingon sa langit alang niadtong nangamatay sa wala pa ang iyang kaugalingong kamatayon?

Unsa man ang kahulogan sa 1 Pedro 3:19, 20? “Niini nga kahimtang [diha sa espiritu, human sa iyang pagkabanhaw] siya [Jesus] usab miadto ug miwali sa mga espiritu nga binilanggo, nga kaniadto nagmasupilon sa dihang sa mga adlaw ni Noe ang pailob sa Diyos nagpaabot, samtang gitukod pa ang arka, nga niini pipila lang ka tawo, sa ato pa, walo ka kalag [“mga kalag,” KJ, Dy; “mga tawo,” TEV, JB; “mga persona,” RS], ang naluwas latas sa tubig.” (Sila ba nga “mga espiritu nga binilanggo” mao ang mga kalag sa mga tawo nga mingdumili sa pagsunod sa pagsangyaw ni Noe antes ang Lunop, ug ang dalan ba sa maong panahon nabuksan na alang kanila paingon sa langit? Itandi ang 2 Pedro 2:4 ug Judas 6 uban sa Genesis 6:2-4 nga nagapakita nga kining maong mga espiritu maoy mga manulondaanong mga anak sa Diyos nga nagmateryalisar (temporaryong nagpakalawas) ug nanggiminyo sa adlaw ni Noe. Sa 1 Pedro 3:19, 20 ang Gregong pulong alang sa “mga espiritu” maoy pneuʹma·sin, samtang ang pulong nga gihubad nga “mga kalag” maoy psy·khaiʹ. Ang “mga espiritu” dili kay gikuhaan o walay lawas nga mga kalag kondili maoy masupilong mga anghel; ang “mga kalag” nga gipasabot dinhi maoy buhing mga tawo, mga tawhanon, si Noe ug iyang panimalay. Kon unsa ang giwali ngadto sa “mga espiritu nga binilanggo” mao gayod diay ang mensahe sa paghukom.)

Unsa ang kahulogan sa 1 Pedro 4:6? “Sa pagkamatuod, alang niini nga katuyoan nga ang maayong balita giwali usab ngadto sa mga patay, aron sila mahimong mahinukman diha sa unod ingon sa mga tawo apan mahimong mabuhi diha sa espiritu ingon sa Diyos.” (Kini bang maong “mga patay” mga tawo kinsa nangamatay sa wala pa ang kamatayon ni Kristo? Ingon sa gipakita na, ang mga patay dili mao “ang mga espiritu nga binilanggo.” Kadtong maong mga espiritu maoy masinupakong mga anghel. Ug ang pagwali dili man makahimog kaayohan nga lawasnon sa patay nga mga tawo tungod kay, ingon sa gibutyag sa Ecclesiastes 9:5, sila “dili mahibalo sa bisan unsa,” ug ang Salmo 146:4 nagadugang nga sa kamatayon ang “mga hunahuna mahanaw gayod” sa usa ka tawo. Apan ang Efeso 2:1-7, 17 nagapunting gayod sa mga tawo kinsa patay sa espirituwal ug nabuhi sa espirituwal ingong resulta sa pagdawat sa maayong balita.)

Ang langitnong kinabuhi ba gipadayag diha sa “Bag-ong Testamento” ingong paglaom alang sa tanang Kristohanon?

Juan 14:2, 3: “Sa balay sa akong Amahan adunay daghang puy-anan. Kon dili pa, moingon ba ako kaninyo, sanglit kay moadto ako aron sa pag-andam ug luna alang kaninyo. Labot pa, sa mahiadto na ako ug makaandam ug luna alang kaninyo, ako moanhi pag-usab ug pagadawaton ko kamo sa akong kaugalingon, aron nga kon asa ako atua usab kamo.” (Gipakita ni Jesus dinhi nga ang iyang matinumanong mga apostol, nga iyang gipakigsultihan, sa ngadtongadto, mahiuban didto sa “balay” sa iyang Amahan, sa langit, duyog kang Jesus. Pero wala niya hisgoti dinhi kon pila ang kaubanan nga mahiadto usab sa langit.)

Juan 1:12, 13: “Sa daghan nga midawat kaniya [Jesus], kanila naghatag siyag kagahom sa pagkahimong mga anak sa Diyos, kay sila mituo man sa iyang ngalan; ug sila gipanganak, dili gumikan sa dugo o gumikan sa unodnong kabubut-on o sa kabubut-on sa tawo, kondili sa Diyos.” (Matikdi nga ang konteksto, diha sa Ju 1 bersikulo 11, nagpunting sa “kaugalingong katawhan” ni Jesus, ang mga Hudiyo. Sa daghan kanila nga midawat kaniya sa miadto siya kanila sa unang siglo nangahimo man nga mga anak sa Diyos, uban sa panglantaw sa langitnong kinabuhi. Ang mga berbo diha sa teksto anaa sa kahimtang nga miagi na, busa kining puntoha dili nagatumong sa tanang tawo nga nahimong mga Kristohanon sukad sa maong panahon.)

Roma 8:14, 16, 17: “Ang tanang gimandoan sa espiritu sa Diyos, sila mga anak sa Diyos. Ang espiritu mismo nagapanghimatuod uban sa atong espiritu. Kon kita mga anak, nan, kita usab mga manununod: mga manununod gayod sa Diyos, apan kaubanang mga manununod ni Kristo, basta kita moantos uban kaniya aron kita usab pagahimayaon uban kaniya.” (Sa panahon nga kini gisulat maoy tinuod nga ang tanang gimandoan sa espiritu sa Diyos maoy mga anak sa Diyos kansang paglaom nga sila pagahimayaon uban kang Kristo. Pero dili kini mao gayod kanunay. Ang Lucas 1:15 nag-ingon nga si Juan nga Bawtista napuno sa balaang espiritu, apan ang Mateo 11:11 nagpatin-aw nga siya dili makaambit diha sa himaya sa langitnong Gingharian. Mao man, usab, human sa pagpanigom sa mga manununod sa langitnong Gingharian, adunay uban pa nga magaalagad ingong mga sumusunod sa iyang Anak apan dili makaambit diha sa langitnong himaya.)

Unsang tinong mga reperensiya ang anaa diha sa “Bag-ong Testamento” sa tagana alang sa mga Kristohanon nga pagagantihan uban sa kinabuhing dayon ibabaw sa yuta?

Mat. 5:5: “Malipayon ang mga maaghop, kay sila magapanunod sa yuta.”

Mat. 6:9, 10: “Amahan namo nga anaa sa mga langit, pagadayegon unta ang imong ngalan. Moabot unta ang imong gingharian. Matuman unta ang imong kabubut-on, ingon didto sa langit, mao man usab sa yuta.” (Unsa ang kabubut-on sa Diyos maylabot sa yuta? Unsa ang gipakita sa Genesis 1:28 ug Isaias 45:18?)

Mat. 25:31-33, 40, 46: “Sa dihang moabot na ang Anak sa tawo diha sa iyang himaya, ug ang tanang manulonda uban kaniya, unya siya molingkod diha sa iyang mahimayaong trono. Ug sa iyang atubangan pagatigomon ang tanang kanasoran, ug iyang pagalainon ang mga tawo gikan sa usag usa, sama gayod sa usa ka magbalantay nga magalain sa mga karnero gikan sa mga kanding. Ug ang mga karnero iyang pagapinigon sa iyang tuo, apan ang mga kanding anha sa iyang wala. . . . Ang hari moingon ngadto kanila [mga karnero], ‘Sa pagkamatuod moingon ako kaninyo, Sa gidak-on nga gibuhat ninyo kini ngadto sa usa sa labing gagmay niining akong mga igsoon, inyong gibuhat kini kanako.’ Ug [ang mga kanding] mamahawa ngadto sa walay kataposang pagkawagtang, apan ang mga matarong [ang mga karnero] ngadto sa walay kataposang kinabuhi.” (Matikdi nga kining “mga karnero” dili pareho sa mga igsoon sa Hari, kinsa “mga tig-ambit sa langitnong pagkatinawag.” [Heb. 2:10–3:1] Apan kining maong mga karnerohon buhi man sulod sa panahon nga si Kristo diha sa iyang trono ug sulod sa panahon sa dihang ang pipila sa iyang “mga igsoon” nagasugamak pa gihapon ug kalisdanan ibabaw sa yuta.)

Juan 10:16: “Ako adunay ubang mga karnero, nga dili sakop niining torila; kinahanglang pagadad-on ko usab sila, ug sila magapatalinghog sa akong tingog, ug sila mahimong usa ka panon, usa ka magbalantay.” (Kinsa man kini silang “ubang mga karnero”? Sila maoy mga sumusunod sa Maayong Magbalantay, si Jesu-Kristo, pero dili sakop sa “bag-ong tugon” nga toril sa mga karnero, uban sa paglaom sa langitnong kinabuhi. Apan sila suod gayod nga nakig-uban kanilang sakop nianang toril sa mga karnero.)

2 Ped. 3:13: “Adunay bag-ong mga langit ug usa ka bag-ong yuta nga kita nagapaabot sumala sa iyang saad, ug diha niini ang pagkamatarong magapabilin.” (Usab ang Pinadayag 21:1-4)

Pin. 7:9, 10: “Human niining mga butanga [human ang apostol nga si Juan nakakita sa bug-os nga gidaghanon sa mga “pinatikan” kinsa “gipalit gikan sa yuta” aron mahiuban kang Kristo sa langitnong Bukid Sion; tan-awang Pinadayag 7:3, 4; 14:1-3] mitan-aw ako, ug ania karon! ang usa ka dakong panon, nga walay tawo nga arang makaihap, gikan sa tanang kanasoran ug kabanayan ug mga katawhan ug mga pinulongan, nga nanagtindog atubangan sa trono ug atubangan sa Kordero, nanagsul-ob sa tag-as maputi nga mga besti; ug dihay mga palwa sa palmera sa ilang mga kamot. Ug padayon silang nanagsinggit sa makusog nga tingog, nga nag-ingon: ‘Ang kaluwasan gikan sa atong Diyos, kinsa naglingkod sa trono, ug sa Kordero.’”

Ngadto sa unsang gidaghanon nga ang Bibliya nagapaabot ug paglaom sa langitnong kinabuhi?

Luc. 12:32: “Ayaw pagkahadlok, gamayng panon, kay gikahimut-an sa inyong Amahan ang paghatag kaninyo sa gingharian.”

Pin. 14:1-3: “Akong nakita, ug tan-awa! ang Kordero [Jesu-Kristo] nga nagtindog ibabaw sa Bukid Sion [sa langit; tan-awang Hebreohanon 12:22-24], ug uban kaniya ang usa ka gatos ug kap-atan ug upat ka libo nga nagbaton sa iyang ngalan ug sa ngalan sa iyang Amahan nga gisulat sa ilang mga agtang. . . . Ug sila nanag-awit ug daw usa ka bag-ong awit . . . ug walay laing nakakat-on sa awit gawas sa usa ka gatos ug kap-atan ug upat ka libo, kinsa gipalit gikan sa yuta.”

Ang 144,000 ba sa kinaiya mga Hudiyo lamang?

Pin. 7:4-8: “Nadungog ko ang gidaghanon sa tinimrihan, usa ka gatos ug kap-atan ug upat ka libo, tinimrihan gikan sa matag banay sa mga anak ni Israel: . . . Juda . . . Ruben . . . Gad . . . Aser . . . Neptali . . . Manases . . . Simeon . . . Levi . . . Isacar . . . Zabulon . . . Jose . . . Benjamin.” (Dili kini sila ang mga tribo sa kinaiyang Israel sanglit kay wala man gayod ing tribo ni Jose, ang mga banay ni Ephraim ug Dan wala man malakip sa listahan dinhi, ug ang mga Levihanon gigahin man alang sa buluhaton maylabot sa templo pero wala isipa ingong usa sa 12 ka tribo. Tan-awang Numeros 1:4-16.)

Roma 2:28, 29: “Siya dili Hudiyo kon kana anaa ra sa dayag, ni ang sirkunsisyon nga anaa ra sa dayag diha sa lawas. Apan siya usa ka Hudiyo diha sa kinasuloran, ug ang iyang sirkunsisyon maoy sa kasingkasing pinaagig espiritu, ug dili pinaagig sinulat nga kodigo.”

Gal. 3:26-29: “Kamong tanan, sa pagkamatuod, maoy mga anak sa Diyos pinaagi sa inyong pagtuo diha kang Kristo Jesus. . . . Walay Hudiyo ni Grego, walay ulipon ni nahigawas nga tawo, walay lalaki ni babaye; kay kamong tanan usa ra ka persona uban kang Kristo Jesus. Dugang pa, kon kamo iya ni Kristo, kamo gayod kaliwat ni Abraham, mga manununod sumala sa saad.”

Ang gidaghanon bang 144,000 simboliko lamang?

Ang tubag gipakita sa kamatuoran nga, human sa paghisgot sa tinong gidaghanong 144,000, ang Pinadayag 7:9 nagpunting sa “usa ka dakong panon, nga walay tawo nga arang makaihap.” Kon ang gidaghanong 144,000 dili pa literal (mao gayod) kana walay kahulogan ingong pagpalahi sa “dakong panon.” Ang pagtamod sa maong numero o gidaghanon ingong literal nahauyon sa mga pulong ni Jesus sa Mateo 22:14 mahitungod sa Gingharian sa mga langit: “Daghan ang gipangdapit, apan diyutay ra ang napili.”

Sila ba nga bahin sa “dakong panon” nga gipunting sa Pinadayag 7:9, 10 moadto usab sa langit?

Ang Pinadayag wala maghisgot bahin kanila, sama sa paghisgot maylabot sa 144,000, nga sila “gipalit gikan sa yuta” aron mahiuban kang Kristo sa langitnong Bukid Sion.—Pin. 14:1-3.

Ang paghubit kanila ingong “nagtindog atubangan sa trono ug atubangan sa Kordero” nagapadayag, dili man kinahanglang sa usa ka lugar, kondili sa usa ka inuyonang kahimtang. (Itanding Pinadayag 6:17; Lucas 21:36.) Ang ekspresyong “atubangan sa trono” (Grego, e·noʹpi·on tou throʹnou; sa literal, “makita sa trono”) wala man magkinahanglan nga sila atua sa langit. Ang ilang kahimtang mao lamang nga “makita” sa Diyos, kinsa nagtug-an kanato nga gikan sa langit siya nagatan-aw sa mga anak sa mga tawo.—Sal. 11:4; itanding Mateo 25:31-33; Lucas 1:74, 75; Buhat 10:33.

Ang “dakong panon didto sa langit” nga gitumong sa Pinadayag 19:1, 6 dili pareho sa “dakong panon” sa Pinadayag 7:9. Sila nga didto sa langit wala ihulagway ingong “gikan sa tanang kanasoran” o nag-ingon nga ang ilang kaluwasan nagagikan sa Kordero; sila maoy mga anghel. Ang ekspresyong “dakong panon” gigamit sa lainlaing mga konteksto diha sa Bibliya.—Mar. 5:24; 6:34; 12:37.

Unsa may pagabuhaton didto niadtong moadto sa langit?

Pin. 20:6: “Sila mahimong mga saserdote sa Diyos ug sa ang Kristo, ug magmando ingong mga hari uban kaniya sa usa ka libo ka tuig.” (Usab ang Daniel 7:27)

1 Cor. 6:2: “Wala ba kamo masayod nga ang mga balaan magahukom sa kalibotan?”

Pin. 5:10: “Gihimo mo sila nga usa ka gingharian ug mga saserdote ngadto sa atong Diyos, ug sila magamando ingong mga hari ibabaw [“ibabaw sa,” RS, KJ, Dy; “ibabaw,” AT, Da, Kx, CC] sa yuta.” (Ang samang Gregong pulong ug gramatikal nga han-ay makaplagan diha sa Pinadayag 11:6. Diha niana ang RS, KJ, Dy, ubp., ang tanan naghubad nianang “ibabaw.”)

Kinsa ang nagapili kanilang moadto sa langit?

2 Tes. 2:13, 14: “Kinahanglan gayod nga sa kanunay kami magpasalamat sa Diyos tungod kaninyo, mga igsoong gihigugma ni Jehova, kay sukad pa sa sinugan kamo gipili sa Diyos alang sa kaluwasan pinaagig pagbalaan kaninyo uban sa espiritu ug pinaagi sa inyong pagtuo sa kamatuoran. Alang niini gayod nga dulnganan nga siya nagtawag kaninyo pinaagi sa maayong balita nga among ginamantala, alang sa katuyoan nga makabaton sa himaya sa atong Ginoong Jesu-Kristo.”

Roma 9:6, 16: “Dili ang tanang misanay gikan sa Israel tinuod nga ‘Israel.’ . . . Kini nagaagad, dili sa kabubut-on sa tawo ni sa iyang paningkamot, kondili sa Diyos, kinsa adunay kaluoy.”