Kapitulo Trese
Usa ka Dakong Panon Atubangan sa Trono ni Jehova
1. (a) Sa dili pa modawat ug ganti ang una-Kristohanong mga alagad o ang 144,000, unsay kinahanglan nilang masinati? (b) Unsay posibleng mahitabo sa “usa ka dakong panon” nga nagkinabuhi niining panahona?
ANG matinumanong mga alagad sa Diyos gikan kang Abel ngadto kang Juan Bawtista nagauna gayod sa pagbuhat sa kabubut-on sa Diyos sa ilang kinabuhi. Apan silang tanan nangamatay, nga naghulat sa pagkabanhaw sa kinabuhi sa yuta sa bag-ong kalibotan sa Diyos. Ang 144,000, nga magmando uban kang Kristo sa langitnong Gingharian sa Diyos, kinahanglang mamatay usab sa dili pa nila madawat ang ilang ganti. Hinuon, ang Pinadayag 7:9 nagpakita nga niining kataposang mga adlaw, adunay “usa ka dakong panon” gikan sa tanang kanasoran nga dili makasinatig kamatayon apan makabatog paglaom nga mabuhi hangtod sa kahangtoran sa yuta. Ikaw ba usa kanila?
Pag-ila sa Dakong Panon
2. Unsay mitultol sa tin-aw nga pagsabot sa ilhanan sa dakong panon sa Pinadayag 7:9?
2 Sa 1923, nasabtan sa mga alagad ni Jehova nga “ang mga karnero” sa sambingay ni Jesus nga makaplagan sa Mateo 25:31-46 ug ang “ubang mga karnero” nga iyang gihisgotan nga natala sa Juan 10:16 maoy mga tawo nga may kahigayonan nga mabuhi sa walay kataposan sa yuta. Sa 1931 kadtong gibatbat sa Ezequiel 9:1-11 nga gimarkahan ang ilang mga agtang nasabtan usab nga kauban niadtong dunay yutan-ong paglaom. Dayon sa 1935 nasayran nga ang dakong panon maoy bahin sa ubang mga karnero nga matang nga gihisgotan ni Jesus. Karon, kining giuyonan nga dakong panon mikabat na sa milyonmilyon.
3. Nganong ang ekspresyong ‘pagbarog atubangan sa trono’ wala magtumong sa usa ka langitnong matang?
3 Sa Pinadayag 7:9, ang dakong panon wala makita nga tua sa langit. Ang ilang ‘pagbarog atubangan sa trono’ sa Diyos wala magpasabot nga sila tua sa langit. Sila yanong makita sa Diyos. (Salmo 11:4) Ang kamatuoran nga ang dakong panon, “nga walay tawong makaihap,” dili diay langitnong matang madayag pinaagi sa pagtandi sa dili-tino nga gidaghanon niini diha sa nasulat sa Pinadayag 7:4-8 ug Pinadayag 14:1-4. Diha niana ang gidaghanon nga gikuha gikan sa yuta ngadto sa langit gibutyag nga 144,000.
4. (a) Unsa ang “dakong kasakitan” nga niana makalabang-buhi ang dakong panon? (b) Sumala sa giingon sa Pinadayag 7:11, 12, kinsa ang naniid sa dakong panon ug moduyog kanila sa pagsimba?
4 Ang Pinadayag 7:14 nag-ingon bahin sa dakong panon: “Mao kini sila ang nakalabang sa dakong kasakitan.” Sila makalabang-buhi sa kinalisdang kasamok nga masinati sukad sa tawhanong kasaysayan. (Mateo 24:21) Sa dihang mapasalamaton nilang gihatag ang kredito sa ilang kaluwasan ngadto sa Diyos ug kang Kristo, nan ang tanang matinumanong mga linalang sa langit mahiusa uban kanila sa pag-ingon: “Amen! Ang pagdayeg ug ang himaya ug ang kaalam ug ang pagpasalamat ug ang dungog ug ang gahom ug ang kusog maiya unta sa atong Diyos hangtod sa kahangtoran. Amen.”—Pinadayag 7:11, 12.
Pagpamatuod nga Takos
5. Unsaon nato pagtino ang kinahanglanon aron mahimong bahin sa dakong panon?
5 Ang kaluwasan sa dakong panon latas sa dakong kasakitan mahitabo uyon sa matarong nga mga sukdanan ni Jehova. Ang nagpatigbabaw nga mga hiyas sa mga luwason unya tin-aw nga gihisgotan sa Bibliya. Busa, posible nga ang mga mahigugmaon sa pagkamatarong molihok na karon aron magpamatuod nga takos sa paglabang buhi. Unsay angayng himoon niining mga tawhana?
6. Nganong tukma lang nga ang dakong panon ipakasama sa mga karnero?
6 Ang mga karnero malumo ug mapinasakopon. Busa sa dihang si Jesus miingon nga siya may ubang mga karnero nga dili iya sa langitnong matang, iyang gipasabot ang mga tawo nga dili lamang buot mabuhi hangtod sa kahangtoran sa yuta kondili magmapinasakopon usab sa iyang mga pagtulon-an. “Ang akong mga karnero magapatalinghog sa akong tingog, ug ako nakaila kanila, ug sila magasunod kanako,” siya miingon. (Juan 10:16, 27) Kini ang mga tawo nga maminaw gayod ug masinugtanong mobuhat sa isulti ni Jesus, nga mahimong iyang mga tinun-an.
7. Unsang mga hiyas ang angayng ugmaron sa mga sumusunod ni Jesus?
7 Unsang ubang mga hiyas ang angayng ugmaron sa matag usa niining mga sumusunod ni Jesus? Ang Pulong sa Diyos nagtubag: “Hukasa ang inyong daan nga pagkatawo nga nahiuyon sa kanhi ninyong paagi sa panggawi ug . . . isul-ob ang bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.” (Efeso 4:22-24) Ilang ugmaron ang mga hiyas nga magpalambo sa panaghiusa sa mga alagad sa Diyos—“gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.”—Galacia 5:22, 23.
8. Unsay atubangon sa dakong panon samtang sila nagpaluyo sa nanghibilin?
8 Ang dakong panon nagpaluyo sa diyutayng gidaghanon nga dunay langitnong paglaom, nga nagapanguna sa buluhatong pagsangyaw. (Mateo 24:14; 25:40) Ang ubang mga karnero nagpaluyo niining paagiha, bisan tuod sila nahibalo nga sila moatubang ug pagsupak, kay sa pagsugod niining kataposang mga adlaw, si Kristo Jesus ug ang iyang mga manulonda nagtambog kang Satanas ug iyang mga demonyo gikan sa langit. Kadto nagpasabot nga “alaot ang yuta . . . tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.” (Pinadayag 12:7-12) Busa, si Satanas nanghingusog sa pagsupak sa mga alagad sa Diyos samtang nagkahiduol na ang kataposan niining sistemaha.
9. Unsa ka malamposon ang mga alagad sa Diyos sa pagsangyaw sa maayong balita, ug ngano?
9 Bisan pa sa mapintas nga paglutos, ang buluhatong pagsangyaw padayong nagauswag. Gikan sa pipila lamang ka libong magsasangyaw sa Gingharian sa kataposan sa Gubat sa Kalibotan I, karon aduna nay milyonmilyon, kay si Jehova nagsaad: “Bisan unsa nga hinagiban nga buhaton batok kanimo dili magmalamposon.” (Isaias 54:17) Bisan ang usa ka membro sa Hudiyohanong hataas nga hukmanan miila nga ang buluhaton sa Diyos dili mapukgo. Iyang giingnan ang mga Pariseo sa unang siglo bahin sa mga tinun-an: “Pasagdi lang sila; (tungod kay, kon kining larawa o kining buhata gikan man sa mga tawo, kini mapukan; apan kon kini gikan sa Diyos, kamo dili makahimo sa pagpukan kanila;) kay kon dili, basin baya hinuon nga makaplagan kamo nga mga kaaway diay sa Diyos.”—Buhat 5:38, 39.
10. (a) Unsay ipasabot sa “marka” nga diha niadtong iya sa dakong panon? (b) Sa unsang paagi ang mga alagad sa Diyos mosunod sa “tingog gikan sa langit”?
10 Kadtong iya sa dakong panon gihulagway ingong gimarkahan alang sa kaluwasan. (Ezequiel 9:4-6) “Ang marka” maoy ebidensiya nga sila nagpahinungod na kang Jehova, nabawtismohan ingong mga tinun-an ni Jesus, ug nalangkit sa pag-ugmad sa samag-Kristong personalidad. Ilang gisunod ang “tingog gikan sa langit” nga nagmando maylabot sa tibuok kalibotang imperyo sa bakak nga relihiyon ni Satanas: “Gumula kamo kaniya, katawhan ko, kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak.”—Pinadayag 18:1-5.
11. Sa unsang hinungdanong paagi nagpasundayag kadtong iya sa dakong panon nga sila mga alagad ni Jehova?
11 Giingnan usab ni Jesus ang iyang mga sumusunod: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Sa kasukwahi, ang mga membro sa relihiyon niining kalibotana nagpinatyanay diha sa gubat, kasagaran gumikan lang kay sila may lahi nga nasyonalidad! Ang Pulong sa Diyos nag-ingon: “Ang mga anak sa Diyos ug ang mga anak sa Yawa dayag niining butanga: Ang matag usa nga wala magpadayon sa pagbuhat ug pagkamatarong wala magagikan sa Diyos, ni siya nga wala mahigugma sa iyang igsoon. . . . Kita kinahanglang magbaton ug gugma alang sa usag usa; dili sama kang Cain, nga naggikan sa usa nga daotan ug nagpatay sa iyang igsoon.”—1 Juan 3:10-12.
12. Sa dakong kasakitan, unsay buhaton ni Jehova sa relihiyosong ‘mga kahoy’ nga namungag walay pulos?
12 Si Jesus nagpahayag: “Ang matag maayong kahoy mamungag maayong bunga, apan ang matag daot nga kahoy mamungag walay pulos nga bunga; ang usa ka maayong kahoy dili makabungag walay pulos nga bunga, ni ang usa ka daot nga kahoy makabungag maayong bunga. Ang matag kahoy nga dili mamungag maayong bunga pagaputlon ug igasalibay ngadto sa kalayo. Nan, sa pagkatinuod, pinaagi sa ilang mga bunga kamo makaila niadtong mga tawhana.” (Mateo 7:17-20) Ang mga bunga nga gipamunga sa mga relihiyon niining kalibotana nagpaila kanila ingong daot nga ‘mga kahoy,’ nga hapit nang purilon ni Jehova sa dakong kasakitan.—Pinadayag 17:16.
13. Sa unsang paagi gipasundayag sa dakong panon nga sila nahiusang “nagbarog atubangan sa trono” ni Jehova?
13 Gipunting sa Pinadayag 7:9-15 ang mga kahimtang nga motultol sa kaluwasan sa dakong panon. Sila gipakita nga nahiusang “nagbarog atubangan sa trono” ni Jehova, nga nagbayaw sa iyang unibersohanong pagkasoberano. Ilang “gilabhan ang ilang tag-as nga mga besti ug gipaputi kini sa dugo sa Kordero,” nga nagpakitang ilang giila ang nagatabon-sa-sala nga halad ni Jesus. (Juan 1:29) Nagpahinungod sila ngadto sa Diyos ug nagpasimbolo niini pinaagi sa bawtismo sa tubig. Sa ingon gitagamtam nila ang hinlong pagbarog atubangan sa Diyos, nga gihulagwayan sa tag-as, puti nga mga besti, ug nagtanyag kaniyag “sagradong pag-alagad adlaw ug gabii.” May mga paagi ba nga ikapahiuyon nimo pag-ayo ang imong kinabuhi sumala sa gihubit dinhi?
Mga Kaayohan Karon
14. Unsa ang pipila sa talagsaong mga kaayohan nga ginatagamtam bisan karon sa mga alagad ni Jehova?
14 Lagmit, nakita nimo ang talagsaong mga kaayohan nga ginatagamtam bisan karon niadtong nagaalagad kang Jehova. Isip pananglitan, sa dihang nakat-onan nimo ang matarong nga mga katuyoan ni Jehova, nasabtan nimo nga may masanag nga paglaom sa umaabot. Busa karon ikaw adunay tinuod nga katuyoan sa kinabuhi—ang pag-alagad sa matuod nga Diyos uban ang malipayong palaaboton sa kinabuhing dayon sa paraisong yuta. Oo, ang Haring Jesu-Kristo “magatultol [sa dakong panon] ngadto sa mga tuboran sa mga tubig sa kinabuhi.”—Pinadayag 7:17.
15. Sa unsang paagi ang mga Saksi ni Jehova nakabatog kaayohan pinaagi sa pagsunod sa mga prinsipyo sa Bibliya maylabot sa politika ug sa moral?
15 Ang kahibulongang kaayohan nga gitagamtam sa dakong panon mao ang gugma, panaghiusa, ug panag-uyonay nga makaplagan taliwala sa mga alagad ni Jehova sa tibuok yuta. Sanglit kitang tanan nagakaon sa samang espirituwal nga pagkaon, kitang tanan nagasunod sa samang mga balaod ug mga prinsipyo nga makaplagan sa Pulong sa Diyos. Mao nga kita wala mabahin sa politikanhon ug nasodnong mga ideolohiya. Gimentinar usab nato ang taas nga sukdanan sa moral nga gipangayo sa Diyos sa iyang katawhan. (1 Corinto 6:9-11) Sa ingon, inay masinati ang panagbangi, pagkabahinbahin, ug imoralidad nga kaylap kaayo sa kalibotan, ang katawhan ni Jehova nagpahimulos sa gitawag ug espirituwal nga paraiso. Tagda kon giunsa kini pagbatbat sa Isaias 65:13, 14.
16. Bisan pa sa komon nga mga suliran sa kinabuhi, unsang paglaom ang nabatonan niadtong iya sa dakong panon?
16 Dili, ang tawhanong mga alagad ni Jehova dili hingpit. Ug sila apektado sa mga suliran nga komon sa kinabuhi niining kalibotana, sama sa pagkasugamak sa mga kalisdanan o pagkahimong inosenteng mga biktima sa mga gubat sa mga nasod. Gisagubang usab nila ang sakit, pag-antos, ug kamatayon. Apan may pagtuo sila nga sa bag-ong kalibotan, ang Diyos “magapahid sa tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.”—Pinadayag 21:4.
17. Way sapayan kon unsay mahimong mahitabo kanato karon, unsang kahibulongang umaabot ang giandam alang niadtong magasimba sa matuod nga Diyos?
17 Bisan pag mawad-an ka sa imong kinabuhi karon tungod sa pagkatigulang, sakit, aksidente, o paglutos, si Jehova magbanhaw kanimo sa kinabuhi sa Paraiso. (Buhat 24:15) Dayon magpadayon ka sa pagtagamtam sa espirituwal nga bangkete panahon unya sa Milenyong Paghari ni Kristo. Ang imong gugma sa Diyos molalom samtang makita nimo ang iyang mga katuyoan nga modangat sa mahimayaong katumanan. Ug ang makitang mga panalangin nga itagana unya ni Jehova magpalalom pa gayod sa imong gugma kaniya. (Isaias 25:6-9) Pagkakahibulongang umaabot ang giandam alang sa katawhan sa Diyos!
Repasong Panaghisgot
• Uban sa unsang talagsaong hitabo nga ang Bibliya naglangkit sa dakong panon?
• Kon buot gayod natong mahilakip nianang giuyonan sa Diyos nga dakong panon, unsay kinahanglan natong buhaton karon?
• Unsa ka hinungdanon kanimo ang mga panalangin nga ginatagamtam karon sa dakong panon ug sa pagatagamtamon pa unya sa bag-ong kalibotan sa Diyos?
[Hulagway sa panid 123]
Milyonmilyon sa dakong panon nahiusang nagasimba sa matuod nga Diyos