Kapitulo 27

Natawo na ang Gingharian sa Diyos!

Panan-awon 7​—Pinadayag 12:1-17

Ulohan: Ang langitnong babaye nanganak, si Miguel nakiggubat kang Satanas ug nagtambog kaniya sa yuta

Panahon sa katumanan: Sukad sa paglingkod ni Kristo Jesus sa trono niadtong 1914 hangtod sa dakong kasakitan

 1. Sa unsang paagi makatabang kanato ang pagkasabot sa mga ilhanan nga gihubit sa Pinadayag mga kapitulo 12 hangtod sa 14?

ANG sagradong tinago sa Diyos napadayag na. (Pinadayag 10:7) Ang Gingharian ni Jehova pinaagi sa iyang Mesiyas naglungtad na gayod. Kini nagmando na! Ang presensiya niini nagkahulogan sa kalaglagan ni Satanas ug sa iyang binhi ug sa mahimayaong kadaogan sa Binhi sa langitnong organisasyon sa Diyos. Hinuon, wala pa matapos ang paghuyop sa ikapitong manulonda sa iyang trompeta kay daghan pa siyag ibutyag kanato mahitungod sa ikatulong kaalaotan. (Pinadayag 11:14) Ang mga ilhanan nga gihubit sa Pinadayag mga kapitulo 12 hangtod sa 14 makatabang kanato sa pagpauswag sa atong pagpabili sa tanan nga nalangkit sa maong kaalaotan ug sa pagpadayag o pagtapos sa sagradong tinago sa Diyos.

 2. (a) Unsang dakong ilhanan ang nakita ni Juan? (b) Kanus-a gipadayag ang kahulogan sa dakong ilhanan?

² Si Juan karon nakakita ug usa ka dakong ilhanan nga makapainteres gayod sa katawhan sa Diyos. Kini nagpaila sa usa ka makapaukyab nga matagnaong panan-awon, nga ang kahulogan niini unang gipatik sa Marso 1, 1925 nga gula sa The Watch Tower sa usa ka artikulo nga may ulohang “Pagkatawo sa Nasod” ug unya gipatik na usab niadtong 1926 sa librong Deliverance. Kining tin-aw nga pagsabot sa Bibliya nahimong usa ka makasaysayanhong timaan sa pag-uswag sa buluhaton ni Jehova. Busa pasagding hubiton ni Juan ang drama samtang gisugdan kini pagpadayag: “Ug usa ka dakong ilhanan ang nakita didto sa langit, usa ka babaye nga sinul-oban ug adlaw, ug ang bulan diha sa ilalom sa iyang mga tiil, ug sa iyang ulo may usa ka korona nga napulog-duha ka bituon, ug siya mabdos. Ug siya nagsiyagit tungod sa iyang kasakit ug sa labihang kaul-ol sa pagpanganak.”—Pinadayag 12:1, 2.

 3. Kinsa ang babaye nga nakita sa langit?

³ Sa unang higayon, si Juan nakakita ug usa ka babaye sa langit. Hinuon, siya dili usa ka literal nga babaye. Apan, siya usa ka ilhanan o simbolo. (Pinadayag 1:1) Unsay iyang gisimbolohan? Sa inspiradong mga tagna, ang mga babaye usahay maghawas sa mga organisasyon nga “kasado” sa talagsaong mga persona. Diha sa Hebreohanong Kasulatan, ang Israel gihisgotan nga asawa ni Jehova nga Diyos. (Jeremias 3:14) Sa Gregong Kasulatan, ang kongregasyon sa dinihogang mga Kristohanon gihisgotan nga pangasaw-onon ni Kristo. (Pinadayag 21:9-14) Ang babaye nga nakita dinhi ni Juan kasado usab sa lain, ug siya hapit nang manganak. Kinsa ang iyang bana? Buweno, sa ulahi ang iyang anak “gisakgaw ngadto sa Diyos ug sa iyang trono.” (Pinadayag 12:5) Sa maong paagi giangkon ni Jehova nga anak niya ang bata. Busa, ang babaye nga nakita ni Juan mao gayod ang simbolikong asawa ni Jehova.

 4. Kinsa ang mga anak sa simbolikong asawa sa Diyos, ug unsa may pagtawag ni apostol Pablo sa babaye nga nakita ni Juan?

⁴ Mga walo ka siglo nga miagi, gisultihan ni Jehova kining simbolikong asawa, nga miingon: “Ang tanan nimong mga anak mahimong mga tinudloan ni Jehova.” (Isaias 54:5, 13) Gikutlo ni Jesus kining tagnaa ug iyang gipadayag nga ang maong mga anak mao ang iyang matinumanong mga sumusunod, kinsa sa ulahi napormang kongregasyon sa dinihogang mga Kristohanon. (Juan 6:44, 45) Busa ang mga membro niining kongregasyona, nga giingon nga mga anak sa Diyos, maoy mga anak usab sa simbolikong asawa sa Diyos. (Roma 8:14) Gidugang ni apostol Pablo kining kataposang tipik sa impormasyon sa dihang siya miingon: “Ang Jerusalem sa itaas gawasnon, ug siya mao ang atong inahan.” (Galacia 4:26) Nan, ang “babaye” nga nakita ni Juan mao “ang Jerusalem sa itaas.”

 5. Sanglit ang simbolikong asawa ni Jehova may korona nga 12 ka bituon, unsa sa pagkatinuod ang Jerusalem sa itaas?

⁵ Apan unsa ba gayod ang Jerusalem sa itaas? Sanglit si Pablo nag-ingon nga ang babaye maoy sa “itaas,” ug si Juan nakakita kaniya sa langit, tataw nga siya dili yutan-ong siyudad; ni siya ang “Bag-ong Jerusalem,” kay kana nga organisasyon mao ang pangasaw-onon ni Kristo, dili ang asawa ni Jehova. (Pinadayag 21:2) Matikdi nga siya may korona nga 12 ka bituon. Ang numerong 12 nalangkit sa pagkakompleto diha sa organisasyonal nga kahikayan.a Busa, kining 12 ka bituon daw nagpasabot nga siya maoy organisasyonal nga kahikayan sa langit, sama ra sa karaang Jerusalem sa yuta. Ang Jerusalem sa itaas mao ang unibersohanong organisasyon ni Jehova sa espiritung mga linalang nga nagsilbing iyang asawa, diha sa pag-alagad kaniya ug sa pagpatunghag mga anak.

 6. (a) Unsay gipasabot sa kamatuoran nga ang babaye nga nakita ni Juan sinul-oban ug adlaw, adunay bulan sa ilalom sa iyang mga tiil, ug adunay korona nga mga bituon? (b) Unsay gisimbolohan sa mga kaul-ol sa pagpanganak sa mabdos nga babaye?

⁶ Nakita ni Juan kining babaye nga sinul-oban ug adlaw ug adunay bulan sa ilalom sa iyang mga tiil. Kon idugang nato ang iyang korona nga mga bituon, siya bug-os nga gilibotan ug langitnong mga kahayag. Gidan-agan siya sa pabor sa Diyos adlaw ug gabii. Pagkahaom nga simbolo sa talagsaon nga langitnong organisasyon ni Jehova! Siya usab mabdos, nga nag-antos sa mga kaul-ol sa pagpanganak. Ang iyang mga siyagit alang sa panabang sa Diyos nagpakita nga miabot na ang panahon nga siya manganak. Sa Bibliya, ang mga kaul-ol sa pagpanganak sagad nagsimbolo sa malisod nga trabaho nga kinahanglanon sa pagpatunghag usa ka hinungdanong resulta. (Itandi ang Salmo 90:2; Proverbio 25:23; Isaias 66:7, 8.) Walay duhaduha nga ang mga kaul-ol sa pagpanganak nga sama niini nasinati samtang ang langitnong organisasyon ni Jehova nangandam alang niining makasaysayanhong pagkatawo.

Usa ka Dakong Dragon nga ang Bulok Samag Kalayo

 7. Unsa ang laing ilhanan nga nakita ni Juan sa langit?

⁷ Unsa ang sunod nga nakita ni Juan? “Ug laing ilhanan ang nakita didto sa langit, ug, tan-awa! usa ka dakong dragon nga ang bulok samag kalayo, nga may pito ka ulo ug napulo ka sungay ug diha sa mga ulo niini may pito ka diadema; ug ang ikog niini nagbutad sa ikatulo ka bahin sa mga bituon sa langit, ug sila gitambog niini sa yuta. Ug ang dragon nagpadayon pagbarog atubangan sa babaye nga hapit nang manganak, aron nga, sa makapanganak na siya, tukbon niini ang iyang anak.”—Pinadayag 12:3, 4.

 8. (a) Kinsa ang dakong dragon nga ang bulok samag kalayo? (b) Unsay gipasabot nga ang dragon adunay pito ka ulo, napulo ka sungay, ug usa ka diadema sa matag ulo?

⁸ Kining dragon mao si Satanas, “ang orihinal nga halas.” (Pinadayag 12:9; Genesis 3:15) Usa siya ka mabangis nga tiglaglag—usa ka pitog-ulo nga dragon, o manunukob, nga bug-os makalamoy sa iyang tukbonon. Pagkakatingad-anan ang iyang dagway! Kanang pito ka ulo ug napulo ka sungay nagpasabot nga siya ang arkitekto sa politikanhong mapintas nga mananap nga hapit nang hubiton sa Pinadayag kapitulo 13. Kining mananapa may pito usab ka ulo ug napulo ka sungay. Sanglit si Satanas adunay usa ka diadema sa matag ulo—pito tanan—makapaneguro kita nga ang mga gamhanang nasod sa kalibotan nga gihawasan nianang mapintas nga mananap maoy ilalom sa iyang pagmando. (Juan 16:11) Ang napulo ka sungay maoy haom nga simbolo sa pagkakompleto sa gahom nga iyang gigamit niining kalibotana.

 9. Unsay gipasabot sa kamatuoran nga ang ikog sa dragon “nagbutad sa ikatulo ka bahin sa mga bituon sa langit” nganhi sa yuta?

⁹ Ang dragon adunay awtoridad usab sa espirituhanong dapit. Pinaagi sa iyang ikog, siya “nagbutad sa ikatulo ka bahin sa mga bituon sa langit.” Ang mga bituon mahimong maghawas sa mga manulonda. (Job 38:7) Ang paghisgot sa “ikatulo ka bahin” nagpasiugda nga daghang manulonda ang napahisalaag ni Satanas. Sa dihang sila nailalom sa iyang pagkontrol, sila dili na makaikyas pa. Sila dili na makabalik sa balaang organisasyon sa Diyos. Sila nahimong mga demonyo, nga samag gibutad ni Satanas nga ilang hari, o magmamando. (Mateo 12:24) Si Satanas nagtambog usab kanila nganhi sa yuta. Sa walay duhaduha kini nagtumong sa adlaw ni Noe sa wala pa ang Lunop, sa dihang si Satanas nagdani sa masupilong mga anak sa Diyos nga manaog sa yuta ug makig-ipon sa mga anak nga babaye sa mga tawo. Ingong silot, ang maong “mga manulonda nga nakasala” gitambog sa Diyos ngadto sa samag-bilanggoan nga kahimtang nga gitawag ug Tartaro.—Genesis 6:4; 2 Pedro 2:4; Judas 6.

10. Unsang magkaatbang nga mga organisasyon ang nadayag, ug nganong ang dragon nagtinguha sa pagtukob sa bata sa dihang ang babaye manganak?

¹⁰ Busa, nadayag na ang duha ka magkaatbang nga mga organisasyon—ang langitnong organisasyon ni Jehova ingon nga gihulagwayan sa babaye ug ang demonyohanong organisasyon ni Satanas nga naghagit sa pagkasoberano sa Diyos. Kinahanglang mahusay ang dakong isyu sa pagkasoberano. Apan sa unsang paagi? Si Satanas, nga nagabutad gihapon sa mga demonyo, maoy samag usa ka mabangis, manunukob nga mananap nga nangitag tukbonon. Siya naghulat nga ang babaye manganak. Buot niyang tukbon kining gipaabot nga bata tungod kay siya nahibalo nga kini magpameligro sa iyang padayong paglungtad ug sa kalibotan nga iyang gimandoan.—Juan 14:30.

Usa ka Anak, Usa ka Lalaki

11. Sa unsang paagi gihubit ni Juan ang pagkatawo sa anak sa babaye, ug nganong ang gianak gitawag ug “usa ka anak, usa ka lalaki”?

¹¹ Ang tinudlong panahon alang sa mga nasod sa paggahom nga walay pagbalda sa Diyos natapos na niadtong 1914. (Lucas 21:24) Dayon, nga takdo sa panahon, ang babaye nanganak: “Ug siya nanganak ug usa ka anak, usa ka lalaki, nga maoy magabantay sa tanang kanasoran pinaagi sa olisi nga puthaw. Ug ang iyang anak gisakgaw ngadto sa Diyos ug sa iyang trono. Ug ang babaye mikalagiw ngadto sa kamingawan, diin siya may dapit nga giandam sa Diyos, aron pakan-on nila siya didto sulod sa usa ka libo duha ka gatos ug kan-uman ka adlaw.” (Pinadayag 12:5, 6) Ang gianak maoy “usa ka anak, usa ka lalaki.” Nganong gigamit ni Juan kining doble nga mga pulong? Iyang gigamit kini sa pagpakita sa pagkaangayan sa maong anak, sa iyang katakos sa pagmando sa kanasoran nga may igong gahom. Kini nagpasiugda usab kon unsa ka halandomon, kon unsa ka masadyaon kining maong pagkatawo! Kini adunay hinungdanong papel sa pagtapos sa sagradong tinago sa Diyos. Aw, kining maong anak nga lalaki maoy “magabantay sa tanang kanasoran pinaagi sa olisi nga puthaw”!

12. (a) Diha sa Mga Salmo, unsa ang matagnaong gisaad ni Jehova mahitungod kang Jesus? (b) Unsay gisimbolohan sa pagpanganak sa babaye ug usa ka anak nga lalaki “nga maoy magabantay sa tanang kanasoran pinaagi sa olisi nga puthaw”?

¹² Karon, di ba morag sinati na kita nianang mga pulonga? Oo, si Jehova misaad nga matagnaon mahitungod kang Jesus: “Imong dugmokon sila pinaagi sa setro nga puthaw, imong pulpogon sila ingon sa usa ka sudlanan sa magkukulon.” (Salmo 2:9) Kini gitagna usab mahitungod kaniya: “Ang olisi sa imong kusog ipadala ni Jehova gikan sa Zion, nga magaingon: ‘Magapangdaog ka taliwala sa imong mga kaaway.’” (Salmo 110:2) Busa, ang pagkatawo nga nakita ni Juan naglangkit gayod kang Jesu-Kristo. Dili, dili kini ang pagkatawo ni Jesus sa usa ka birhen balik niadtong unang siglo sa atong Komong Panahon; ni kini nagtumong sa pagkabanhaw ni Jesus sa espiritung kinabuhi niadtong 33 K.P. Dugang pa, dili kini transmigration o pagbalhin ngadto sa laing lawas. Hinunoa, kini mao ang pagkatawo sa Gingharian sa Diyos niadtong 1914 ingong tinuod nga hitabo, ug si Jesus—nga atua na sa langit sulod sa duolag 20 ka siglo—gipalingkod na sa trono ingon nga Hari.—Pinadayag 12:10.

13. Unsay gipasabot nga ang anak nga lalaki “gisakgaw ngadto sa Diyos ug sa iyang trono”?

¹³ Dili gayod itugot ni Jehova nga si Satanas magtukob sa Iyang asawa o sa Iyang bag-ong natawong anak nga lalaki! Sa dihang gipanganak, ang anak nga lalaki “gisakgaw ngadto sa Diyos ug sa iyang trono.” Tungod niana, siya bug-os nga nailalom sa proteksiyon ni Jehova, kinsa mag-atiman sa bug-os niining bag-ong natawo nga Gingharian, nga Iyang instrumento sa pagbalaan sa Iyang balaang ngalan. Sa samang panahon, ang babaye mikalagiw ngadto sa usa ka dapit nga giandam sa Diyos alang kaniya sa kamingawan. Ang dugang mga detalye bahin niana hisgotan sa ulahi! Mahitungod kang Satanas, andam na karon ang entablado alang sa usa ka halandomong hitabo nga mahimong imposible na nga siya makadaot sa Gingharian sa langit. Unsa kanang hitaboa?

Gubat sa Langit!

14. (a) Ingon sa gitug-an kanato ni Juan, unsang hitabo ang naghimo nga imposible na nga si Satanas makadaot sa Gingharian? (b) Diin ba gipugngan si Satanas ug ang iyang mga demonyo nga dili na makagawas niana?

¹⁴ Si Juan nagtug-an kanato: “Ug miulbo ang gubat sa langit: Si Miguel ug ang iyang mga manulonda nakiggubat sa dragon, ug ang dragon ug ang mga manulonda niini nakiggubat apan kini wala makadaog, ni may dapit pa alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.” (Pinadayag 12:7-9) Busa ingong usa ka dramatikanhong hitabo sa pagtapos sa sagradong tinago sa Diyos, si Satanas gipalagpot, gitambog gikan sa langit, ug ang iyang mga demonyo gitambog nganhi sa yuta uban kaniya. Ang usa nga nagpahisalaag sa tibuok gipuy-ang yuta sa gidak-on nga siya nahimong diyos niini gipugngan ug dili na makagawas sa silinganan niining planetaha, diin nagsugod ang iyang pagrebelde.—2 Corinto 4:3, 4.

15, 16. (a) Kinsa si Miguel, ug giunsa nato pagkahibalo niana? (b) Nganong haom nga si Miguel mao ang nagtambog kang Satanas gikan sa langit?

¹⁵ Kinsa ang nagpalampos niining dakong kadaogan sa ngalan ni Jehova? Ang Bibliya nag-ingon nga si Miguel ug ang iyang mga manulonda. Apan kinsa si Miguel? Ang ngalan nga “Miguel” nagkahulogang “Kinsa ang Sama sa Diyos?” Busa, si Miguel interesado gayod sa pagbindikar sa pagkasoberano ni Jehova pinaagi sa pagpamatuod nga walay ikatandi Kaniya. Sa Judas bersikulo 9, siya ginganlan nga “Miguel nga arkanghel.” Makapainteres, ang titulong “arkanghel” gigamit sa ubang bahin sa Bibliya nga nagtumong sa usa lamang ka persona: si Jesu-Kristo.b Si Pablo nag-ingon mahitungod kaniya: “Ang Ginoo manaog gikan sa langit uban sa singgit sa pagsugo, uban sa tingog sa arkanghel ug uban sa trompeta sa Diyos.” (1 Tesalonica 4:16) Ang titulong “arkanghel” nagkahulogang “pangulo sa mga manulonda.” Busa dili ikatingala nga ang Pinadayag naghisgot mahitungod kang ‘Miguel ug sa iyang mga manulonda.’ Ang ubang mga bahin sa Bibliya nga naghisgot ug mga manulonda nga sakop sa usa ka matarong nga alagad sa Diyos nagtumong kang Jesus. Busa, si Pablo naghisgot mahitungod sa ‘pagpadayag sa Ginoong Jesus gikan sa langit uban sa iyang gamhanang mga manulonda.’—2 Tesalonica 1:7; tan-awa usab ang Mateo 24:30, 31; 25:31.

¹⁶ Kini ug ang ubang mga teksto motultol kanato sa tinong konklusyon nga si Miguel mao gayod ang Ginoong Jesu-Kristo diha sa iyang langitnong katungdanan. Karon, sa adlaw sa Ginoo, siya dili lamang moingon kang Satanas: “Hinaot si Jehova magabadlong kanimo.” Sanglit karon maoy panahon sa paghukom, si Jesus, ingon nga Miguel, nagtambog sa daotang si Satanas ug sa iyang demonyong mga manulonda gikan sa langit. (Judas 9; Pinadayag 1:10) Haom kaayo nga Siya mao ang Usa nga maghimo niini, kay Siya mao ang bag-ong gipalingkod nga Hari. Si Jesus mao usab ang Binhi, nga gisaad didto sa Eden, kinsa sa kataposan magdugmok sa ulo sa Halas, sa ingon magwagtang kaniya hangtod sa hangtod. (Genesis 3:15) Pinaagi sa pagpalagpot kang Satanas gikan sa langit, si Jesus nagpadulong na sa maong pangataposang pagdugmok.

“Paglipay, Kamong Kalangitan”

17, 18. (a) Unsang sanong sa langit ang gitaho ni Juan mahitungod sa pagkatambog ni Satanas gikan sa langit? (b) Unsay lagmit nga tinubdan sa makusog nga tingog nga nadungog ni Juan?

¹⁷ Si Juan nagtaho sa masadyaong sanong sa langit nianang dakong pagtambog kang Satanas: “Ug nadungog ko ang usa ka makusog nga tingog didto sa langit nga nag-ingon: ‘Ania na ang kaluwasan ug ang gahom ug ang gingharian sa atong Diyos ug ang awtoridad sa iyang Kristo, tungod kay ang magsusumbong sa atong mga igsoon gitambog na, kinsa nagsumbong kanila adlaw ug gabii atubangan sa atong Diyos! Ug sila nakadaog batok kaniya tungod sa dugo sa Kordero ug tungod sa pulong sa ilang pagpanghimatuod, ug wala nila higugmaa ang ilang mga kalag bisan atubangan sa kamatayon. Tungod niini, paglipay kamong kalangitan ug kamong nanagpuyo niini!’”—Pinadayag 12:10-12a.

¹⁸ Kansang makusog nga tingog ang nadungog ni Juan? Ang Bibliya wala magtug-an. Apan ang usa ka susamang singgit nga gitaho sa Pinadayag 11:17 naggikan sa nabanhaw nang 24 ka ansiyano nga anaa na sa ilang langitnong mga katungdanan, diin sila makahawas na karon sa 144,000 nga mga balaan. (Pinadayag 11:18) Ug sanglit ang gilutos nga dinihogang mga alagad sa Diyos nga ania pa sa yuta gihisgotan dinhi ingong “atong mga igsoon,” kining mga pulonga mahimong nagagikan sa samang tinubdan. Walay duhaduha nga kining maong mga matinumanon makaduyog sa ilang tingog sanglit ang pagbanhaw kanila mosunod dayon pagkahuman sa pagtambog kang Satanas ug sa iyang panon sa mga demonyo gikan sa langit.

19. (a) Sa pagkatapos sa sagradong tinago sa Diyos, ang dalan nabuksan aron si Jesus makabuhat ug unsang butang? (b) Unsay gipasabot sa pagtawag kang Satanas nga “magsusumbong sa atong mga igsoon”?

¹⁹ Ang pagkatapos sa sagradong tinago sa Diyos nagpasabot nga kinahanglang huptan ni Jesus ang awtoridad sa Gingharian ni Jehova. Busa ang dalan nabuksan aron tumanon sa Diyos ang iyang dakong katuyoan sa pagluwas sa matinumanong katawhan. Si Jesus magdalag kaluwasan dili lamang alang sa iyang mahinadlokon-sa-Diyos nga mga tinun-an karon sa yuta, kondili alang usab sa dili-maihap nga minilyong patay nga anaa sa panumdoman sa Diyos. (Lucas 21:27, 28) Ang pagtawag kang Satanas nga “magsusumbong sa atong mga igsoon” nagpakita nga, bisan pag napamatud-ang bakak ang iyang mga sumbong batok kang Job, siya nagpadayon gihapon sa pagkuwestiyon sa integridad sa mga alagad sa Diyos sa yuta. Dayag, iyang gisubli sa daghang higayon ang sumbong nga ang usa ka tawo mohatag sa tanan niyang nabatonan baylo sa iyang kalag. Pagkapakyas gayod ni Satanas!—Job 1:9-11; 2:4, 5.

20. Sa unsang paagi nabuntog sa matinumanong mga Kristohanon si Satanas?

²⁰ Ang dinihogang mga Kristohanon, kinsa giisip nga matarong “tungod sa dugo sa Kordero,” nagpadayon sa pagpamatuod sa Diyos ug kang Jesu-Kristo bisan pa sa mga paglutos. Sulod sa kapin na sa 120 ka tuig, kining Juan nga matang nagpunting sa dagkong mga isyu nga nalangkit sa kataposan sa Panahon sa mga Hentil niadtong 1914. (Lucas 21:24, King James Version) Ug ang dakong panon nagaalagad karon nga maunongon sa ilang kiliran. Walay mausa niini ang ‘mahadlok kanilang makapatay sa lawas apan dili makapatay sa kalag,’ sama sa sublisubling gipasundayag sa tinuod-kinabuhi nga mga kasinatian sa mga Saksi ni Jehova sa atong panahon. Pinaagi sa sinultihan ug sa hustong Kristohanong paggawi, ilang nabuntog si Satanas, nga kanunayng nagpamatuod nga siya bakakon. (Mateo 10:28; Proverbio 27:11; Pinadayag 7:9) Sa pagkabanhaw ngadto sa langit, pagkamalipayon gayod sa dinihogang mga Kristohanon, sanglit kay si Satanas wala na didto sa itaas sa pagsumbong sa ilang mga igsoon! Kini, sa pagkamatuod, maoy panahon nga ang tanang manulonda mosanong nga masadyaon sa awhag: “Paglipay kamong kalangitan ug kamong nanagpuyo niini!”

Usa ka Kaatbang nga Kaalaotan!

21. Sa unsang paagi si Satanas nagdalag kaalaotan diha sa yuta ug sa dagat?

²¹ Kay naglagot tungod sa ikatulong kaalaotan, si Satanas nagtinguha karon sa pagsakit sa katawhan pinaagi sa iyang linaing matang sa kaalaotan. Kini mao: “Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.” (Pinadayag 12:12b) Ang pagtambog kang Satanas gikan sa langit nagkahulogan gayod ug kaalaotan alang sa literal nga yuta, nga ginalaglag sa hakog nga mga tawo nga ilalom sa iyang paggahom. (Deuteronomio 32:5) Labi pa gayod, ang polisa ni Satanas nga ‘magmando o manglaglag’ nagdalag kaalaotan alang sa simbolikong yuta, ang katukoran sa tawhanong katilingban, ingon man sa simbolikong dagat, ang gubot nga masa sa katawhan mismo. Sulod sa duha ka gubat sa kalibotan, ang kapungot ni Satanas gibanaag sa kapungot sa mga nasod nga sakop niya, ug ang susamang pagsilaob sa demonyohanong kapungot nagpadayon hangtod niining adlawa—bisan pag sa kadiyot na lang! (Marcos 13:7, 8) Apan bisan pag makalilisang ang mga paagi sa Yawa, kini dili gayod makatupong sa daotan kaayong epekto nga ipatungha nianang ikatulong kaalaotan—ang paglihok sa Gingharian sa Diyos—diha sa makitang organisasyon ni Satanas!

22, 23. (a) Unsay giingon ni Juan nga nahitabo tapos ang dragon gitambog sa yuta? (b) Sa unsang paagi posible nga lutoson sa dragon “ang babaye nga nanganak sa batang lalaki”?

²² Sukad sa malaglagong pagpalagpot kang Satanas, ang mga igsoon ni Kristo nga ania pa sa yuta nag-antos sa kapintas sa iyang kapungot. Si Juan mitaho: “Karon sa dihang nakita sa dragon nga siya gitambog sa yuta, iyang gilutos ang babaye nga nanganak sa batang lalaki. Apan ang duha ka pako sa dakong agila gihatag ngadto sa babaye, aron siya makalupad paingon sa kamingawan ngadto sa iyang dapit; didto siya pakan-on sulod sa usa ka panahon ug mga panahon ug tunga sa panahon nga halayo sa atubangan sa halas.”—Pinadayag 12:13, 14.

²³ Gihisgotan na usab dinhi sa panan-awon ang panghitabo nga gipaila sa bersikulo 6, nga nagtug-an kanato nga tapos sa pagkatawo sa iyang anak, ang babaye mikalagiw ngadto sa kamingawan, nga halayo sa dragon. Tingali mahibulong kita kon sa unsang paagi mahimong lutoson sa dragon ang babaye, nga siya atua man sa langit ug ang dragon gitambog na karon dinhi sa yuta. Buweno, hinumdomi nga ang babaye may mga anak dinhi sa yuta, ang iyang binhi. Sa ulahing bahin niining panan-awona, kita gipahibalo nga si Satanas nagpahayag sa iyang kapungot nganha sa babaye pinaagi sa paglutos sa iyang binhi. (Pinadayag 12:17) Kon unsa ang mahitabo sa binhi sa babaye dinhi sa yuta mahimong isipon nga sama rag nahitabo sa babaye mismo. (Itandi ang Mateo 25:40.) Ug ang nagkadaghang mga kauban sa binhi dinhi sa yuta makasinati usab sa maong mga paglutos.

Usa ka Bag-ong Nasod

24. Unsay nasinati sa mga Estudyante sa Bibliya nga susama sa pagluwas sa mga Israelinhon gikan sa Ehipto?

²⁴ Samtang gibugno ang unang gubat sa kalibotan, ang mga igsoon ni Jesus nagpadayong matinumanon sa ilang pagpamatuod kutob sa ilang mahimo. Kadto gihimo atubangan sa migrabe nga pagsupak ni Satanas ug sa iyang mapintas nga mga sumusunod. Sa kataposan, ang publiko nga pagpamatuod sa mga Estudyante sa Bibliya halos nahunong na. (Pinadayag 11:7-10) Kadto nahitabo sa dihang nakasinati silag sama gayod sa nasinati sa mga Israelinhon sa Ehipto nga nag-antos usab ug grabeng pagpanglupig. Kadto ang panahon nga tulin silang gidala ni Jehova, nga daw pinaagi sa mga pako sa mga agila, ngadto sa luwas nga kahimtang didto sa desyerto sa Sinai. (Exodo 19:1-4) Mao man usab, tapos sa grabeng paglutos sa 1918-19, giluwas ni Jehova ang iyang mga saksi, nga naghawas sa babaye, ngadto sa luwas nga kahimtang sa espirituwal alang kanila sama nga ang desyerto maoy luwas nga dapit alang sa mga Israelinhon. Kadto maoy tubag sa ilang mga pag-ampo.—Itandi ang Salmo 55:6-9.

25. (a) Unsay gihimo ni Jehova niadtong 1919, sama nga iyang gihimo nga usa ka nasod ang mga Israelinhon didto sa kamingawan? (b) Kinsay naglangkob niini nga nasod, ug gipadangat sila sa unsang kahimtang?

²⁵ Sa kamingawan, gihimo ni Jehova ang mga Israelinhon nga usa ka nasod, nga nagsustento kanila sa espirituwal ug sa pisikal nga paagi. Mao man usab, sugod sa 1919, gihimo ni Jehova ang binhi sa babaye ingong espirituwal nga nasod. Dili kini saypon pagsabot nga mao ang Mesiyanikong Gingharian nga nagmando na gikan sa mga langit sukad sa 1914. Hinunoa, kini nga bag-ong nasod gilangkoban sa nahibilin sa dinihogang mga saksi sa yuta, kinsa gipadangat sa mahimayaong espirituwal nga kahimtang niadtong 1919. Tungod kay nianang panahona sila gitagan-an sa “ilang taganang pagkaon sa hustong panahon,” sila nalig-on alang sa buluhaton sa unahan.—Lucas 12:42; Isaias 66:8.

26. (a) Hangtod kanus-a molungtad ang panahon nga gihisgotan sa Pinadayag 12:6, 14? (b) Unsa ang katuyoan sa yugto nga tulo ug tunga ka panahon, kanus-a kini nagsugod, ug kanus-a kini natapos?

²⁶ Hangtod kanus-a molungtad ang maong temporaryo nga kahupayan alang sa binhi sa babaye sa Diyos? Ang Pinadayag 12:6 nag-ingon nga kini molungtad ug 1,260 ka adlaw. Gitawag sa Pinadayag 12:14 ang maong yugto nga usa ka panahon, mga panahon, ug tunga sa panahon; sa laing pagkasulti, tulo ug tunga ka panahon. Sa pagkamatuod, ang maong duha ka pamulong nagsimbolo sa tulo ug tunga ka tuig, nga sa Amihanang Hemispera nagsukad sa tingpamulak sa 1919 hangtod sa tinghunlak sa 1922. Usa kadto ka panahon sa makapahupay nga pagpabaskog ug pagkaorganisar pag-usab alang sa napasig-uling Juan nga matang.

27. (a) Sumala sa taho ni Juan, unsay gibuhat sa dragon human sa 1922? (b) Unsay katuyoan ni Satanas sa pagbugag usa ka baha sa paglutos batok sa mga Saksi?

²⁷ Ang dragon wala mohunong! “Ug ang halas mibugwak ug tubig nga ingon sa usa ka suba gikan sa baba niini nga gipaagpas sa babaye, aron siya malumos sa suba.” (Pinadayag 12:15) Unsay kahulogan sa “tubig nga ingon sa usa ka suba,” o sa “usa ka baha sa tubig”? (The New English Bible) Si Haring David sa karaang panahon naghisgot mahitungod sa daotang mga tawo nga misupak kaniya ingong “kusog nga mga pagbaha sa walay-silbi nga mga tawo” [“mga sapa sa mga walay bili,” Young]. (Salmo 18:4, 5, 16, 17) Ang gipahinabo ni Satanas karon maoy paglutos usab pinaagi sa walay-pulos o “walay-silbi nga mga tawo.” Human sa 1922 gibuga ni Satanas ang usa ka baha sa paglutos batok sa mga Saksi. (Mateo 24:9-13) Kini naglakip sa pisikal nga kapintasan, ‘pagmugna ug kasamok pinaagig balaod,’ mga pagpriso, ug mga pagpatay pa gani pinaagi sa pagbitay, pagpusil, ug pagpunggot sa ulo. (Salmo 94:20) Ang gipaubos nga si Satanas, kay gihikawan sa direktang pagduol sa langitnong babaye sa Diyos, mapungtanong misugod sa pag-atake sa iyang nahibilin nga binhi sa yuta ug sa paglaglag kanila, sa direktang paagi o sa pagpahinabo nga sila mawad-an sa pabor sa Diyos tungod sa pagbungkag sa ilang integridad. Apan ang ilang hugot nga tinguha maoy sama gayod sa kang Job: “Hangtod nga ako mamatay dili ko wad-on ang akong integridad gikan kanako!”—Job 27:5.

28. Sa unsang paagi ang baha sa paglutos mas migrabe pa panahon sa Gubat sa Kalibotan II?

²⁸ Kadtong mabangis nga baha sa paglutos mas migrabe pa panahon sa Gubat sa Kalibotan II. Sa Uropa mga 12,000 ka Saksi ang gibalhog sa mga kampo konsentrasyon ug mga prisohan sa Nazi, ug mga 2,000 ang namatay. Ubos sa mga komandante sa kasundalohan nga nagmando sa Italya, Hapon, Korea, ug Taiwan, ang matinumanong mga Saksi nag-antos ug susamang mapintas nga pagtratar. Bisan sa giingong demokratikanhong mga nasod, ang mga Saksi giatake sa mga grupo sa Aksiyong Katoliko, gibulitag alkitran ug mga balhibo, ug gipang-abog pagawas sa kalungsoran. Gibungkag ang Kristohanong mga asembliya ug gipalagpot ang mga batang Saksi gikan sa mga tunghaan.

29. (a) Sa unsang paagi gihubit ni Juan ang kahupayan nga naggikan sa wala-damha nga tuboran? (b) Sa unsang paagi “ang yuta mitabang sa babaye”? (c) Unsay padayong gibuhat sa dragon?

²⁹ Miabot ang kahupayan gikan sa wala-damha nga tuboran: “Apan ang yuta mitabang sa babaye, ug ang yuta mibuka sa baba niini ug gilamoy ang suba nga gibugwak sa dragon gikan sa baba niini. Ug ang dragon napungot sa babaye, ug nakiggubat sa mga nahibilin sa iyang binhi, nga nagabantay sa mga sugo sa Diyos ug may buluhaton sa pagpamatuod bahin kang Jesus.” (Pinadayag 12:16, 17) “Ang yuta”—ang mga elemento sulod sa kaugalingong sistema sa mga butang ni Satanas—misugod sa paglamoy sa “suba,” o “baha.” Panahon sa katuigan sa 1940 nabatonan sa mga Saksi ang sunodsunod nga paborableng mga desisyon sa Korte Suprema sa Tinipong Bansa, ug gikan sa mga kagamhanan sa ubang kanasoran, nga nagtuboy sa kagawasan sa pagsimba. Sa kataposan, ang Alyadong kanasoran milamoy sa Nazi-Pasista nga mga puwersa, nga nakahatag ug kahupayan sa mga Saksi nga nag-antos ubos sa mapintas nga diktador nga mga pagmando. Ang mga paglutos wala mohunong sa bug-os, kay ang kapungot sa dragon nagpadayon hangtod karon, ug siya nagpadayon sa pagpakiggubat batok niadtong “may buluhaton sa pagpamatuod bahin kang Jesus.” Sa daghang kanasoran, ang maunongong mga Saksi anaa gihapon sa prisohan, ug ang uban nangamatay gihapon tungod sa ilang integridad. Apan sa pipila niining mga nasora, lugakan sa mga awtoridad matag karon ug unya ang ilang pagpamit-os, ug mapahimuslan sa mga Saksi ang dakodakong kagawasan.c Busa, ingong katumanan sa tagna, ang yuta nagapadayon sa paglamoy sa suba sa paglutos.

30. (a) Gitagana sa yuta ang igong kahupayan aron mahitabo ang unsang butang? (b) Unsay resulta sa paghupot sa katawhan sa Diyos sa ilang integridad?

³⁰ Niining paagiha, ang yuta nagtaganag igong kahupayan mao nga ang buluhaton sa Diyos mikatap sa mga 235 ka nasod ug nakapatunghag kapin sa unom ka milyong matinumanong mga magwawali sa maayong balita. Duyog sa mga nahibilin sa binhi sa babaye, ang dakong internasyonal nga panon sa bag-ong mga magtutuo nagatuman sa mga sugo sa Diyos mahitungod sa pagkabulag sa kalibotan, hinlo nga moral, ug gugma sa mga igsoon, ug sila nagapamatuod bahin sa Mesiyanikong Gingharian. Ang ilang integridad nagtubag sa mabiaybiayong hagit ni Satanas, mao nga gipahibalo nga duol na ang kalaglagan ni Satanas ug sa iyang sistema sa mga butang.—Proverbio 27:11.

[Mga footnote]

[Kahon sa panid 185]

“Ang Yuta Mibuka sa Baba Niini”

Ang kang Satanas nga kusog nga baha sa paglutos gipahinabo diha sa daghang nasod batok sa dinihogang mga Kristohanon ug sa ilang mga kauban. Hinuon, ang mga panghitabo sulod sa sistema sa mga butang ni Satanas kasagarang misangpot sa pagkalamoy sa maong baha.

Ang baha sa magubtanong mga panon sa katawhan ug mga pagbilanggo didto sa Tinipong Bansa kasagarang gilamoy sa paborableng mga desisyon sa Korte Suprema sa katuigan sa 1940.

1945: Ang mabangis nga paglutos sa kanasorang gigamhan sa Alemanya ug sa Hapon nahunong tungod sa mga kadaogan sa Alyadong kanasoran sa Gubat sa Kalibotan II.

Sa dihang gipatuman ang pagdili sa mga Saksi ni Jehova didto sa Dominican Republic, ang mga Saksi gipamilanggo, gipanglatigo, ug gibunalan ginamit ang mga puloan sa pusil. Ang pagkabugto sa panaghigala ni Rafael Trujillo ug sa Iglesya Katolika Romana niadtong 1960 misangpot sa pagtangtang sa pagdili sa mga Saksi ni Jehova.

Ang pagpamusil, pagsunog, pagpanglugos, pagpamunal, pagpaantos, ug pagpamatay sa mga Saksi panahon sa usa ka giyera sibil sa Nigeria nahunong sa 1970 sa dihang napildi sa kasundalohan sa gobyerno ang mibulag nga probinsiya diin nahitabo kining mga butanga.

Sa Espanya ang mga balay gisulong ug ang mga Kristohanon gimultahan ug gibilanggo tungod sa “krimen” nga pagsulti bahin sa Diyos ug sa paghimog Kristohanong mga tigom. Kining paglutosa sa kataposan nahunong sa 1970, sa dihang ang mga Saksi ni Jehova gitugotan nga marehistro sa gobyerno tungod sa pagkausab sa polisa bahin sa dili-Katolikong mga relihiyon.

Sa Portugal ginatos ka balay ang girekisa nga walay mandamento. Ang mga Saksi gidagmalan sa pisikal ug gibalhog sa prisohan, ug giembargo ang ilang mga Bibliya. Kini nga terorismo ‘gilamoy’ sa dihang ang usa ka militaryong rebolusyon misangpot sa kausaban sa gobyerno niadtong 1974, ug giaprobahan ang usa ka balaod nga nagtugot sa kagawasan sa panagkatigom.

Sa Argentina, ubos sa militaryong gobyerno, ang mga anak sa mga Saksi ni Jehova gipalagpot gikan sa eskuylahan, ug ang mga Saksi sa tibuok nasod gipangdakop tungod sa pagsangyaw sa maayong balita. Ang maong paglutos nahunong ra niadtong 1984 sa dihang ang Asosasyon sa mga Saksi ni Jehova legal nga giila sa gobyerno nga nagmando kaniadto.

[Chart sa panid 183]

(Alang sa aktuwal nga porma, tan-awa ang publikasyon)

1914 Pagkatawo sa Gingharian

1919 Pagkatawo sa bag-ong nasod

1919-1922 Panahon sa pagpabaskog pag-usab

1922- Baha sa paglutos

[Mga hulagway sa panid 182]

Alaot ang yuta