Dasiga ang Usag Usa Samtang ang Adlaw Nagakahiduol Na
“Magdinasigay sa usag usa, ilabina gayod sa makita ninyo nga ang adlaw nagakahiduol na.”—HEBREOHANON 10:25.
1, 2. Unsang adlawa ang haduol na, ug unsay angay nga tinamdan sa katawhan ni Jehova?
KADTONG kinsa karong adlawa nakigbahin sa pag-ingong, ‘Umari ka ug inom sa tubig sa kinabuhi,’ dili magpalain sa ilang kaugalingon. Samtang nagakahiduol na ang dakong adlaw sa kadaogan ni Jehova, ilang gipadapat ang tambag sa Bibliya: “Mamalandong kita sa usag usa alang sa pagdinasigay ngadto sa paghigugma ug sa maayong binuhatan, sa dili pagbiya sa atong panagkatigom, ingon sa ginabuhat sa pipila, hinunoa sa pagdasig sa usag usa, ug ilabina gayod sa makita ninyo nga ang adlaw nagakahiduol na.”—Hebreohanon 10:24, 25.
2 Ang Kasulatan nagtagna mahitungod nianang “adlawa” ingong ang “adlaw ni Jehova.” (2 Pedro 3:10) Sanglit si Jehova mao ang Labing Gamhanan, makagagahom sa tanang Diyos, walay adlaw ang posibleng molabaw sa iyang adlaw. (Buhat 2:20) Kini nagpasabot sa kabayawan sa iyang pagkasoberano ingong Diyos ibabaw sa tibuok uniberso. Kanang adlawa sa dili-hitupngang kabililhon nagakahiduol na.
3. Sa unsang paagi haduol na ang adlaw ni Jehova alang sa mga Kristohanon sa unang siglo, ug unsa man ang bahin kanato karong adlawa?
3 Gisultihan ni apostol Pablo ang mga Kristohanon sa unang siglo sa atong Kumong Panahon nga ang adlaw ni Jehova nagakahiduol na. Sila nagalantaw sa pag-abot nianang adlawa, apan balik didto, kanang adlawa maoy labaw pa kay sa 1,900 ka tuig. (2 Tesalonica 2:1-3) Bisan pa niana nga kamatuoran, sila nadasig tungod kay kanang adlawa tino nga moabot, ug kon ang mga Kristohanon sa kanunay mouswag sa maong pagtuo, sila makasulod ngadto nianang binulahang adlaw. (2 Timoteo 4:8) Balik didto, kanang adlawa nakitang haduol na. Alang kanato karong adlawa, ang adlaw ni Jehova haduol na gayod. Ang tanang kahibulongang mga katumanan sa tagna sa Bibliya nagapamatuod niining nagahatag-kalipayng kamatuoran. Sa dili madugay, ang ngalan sa atong Diyos, si Jehova, pagabalaanon sa walay kataposan.—Lukas 11:2.
Gidasig pinaagi sa Balaang Ngalan
4. Sumala sa Pinadayag 19:6, kinsa ang mahimong Hari, ug sa unsang paagi nasabtan ang iyang ngalan?
4 Ang balaang ngalan angay nga mahimong usa ka butang nga bililhon sa tibuok tawhanong pamilya. Ang Today’s English Version nag-ingon: “Dayega ang Diyos! Kay ang Ginoo, ang atong Diyos nga Labing Gamhanan, mao ang Hari!” (Pinadayag 19:6) Sumala niana nga hubad sa Bibliya sa ika-20ng siglo, siya mao ang Ginoo, ang labing gamhanang Diyos. Niana nga bersiyon, maingon man sa daghang ubang modernong mga bersiyon, wala nganli ang balaang Persona nga misugod sa pagmando ingong Hari. Ugaling, nahiapil ang balaang ngalan diha sa singgit nga “Hallelujah!” (“Dayega si Jah” or, “Dayega si Jehova”) nga makita diha sa Revised Standard Version, sa New International Version, ug sa hubad ni Moffatt sa Pinadayag 19:6. Alang sa daghan sa atong Kumong Panahon, ang balaang ngalan sa paninugdan dili makita diha sa mga hubad sa Bibliya. Bisan pa niana, ingon sa atong makita, ang maong ngalan nagdasig ug dako sa katawhan sa Diyos, sa karaan ug sa modernong mga panahon.
5, 6. (a) Nganong angay nga mahibaloan ni Moises ang ngalan sa Diyos nga iyang gihawasan? (b) Unsay angay nga mahimong epekto diha sa mga Israelinhon sa dihang gipasiugda ni Moises ang balaang ngalan?
5 Atong mahinumdoman nga sa dihang si Moises gipadala sa Labing Hataas nga Diyos ngadto sa katawhang Israel nga naulipon sa yuta sa Ihipto, ang pangutana kon kinsa ang nagpadala kaniya gibangon mismo diha sa mga hunahuna sa katawhan ngadto kang kinsa si Moises gipadala. Gilaoman ni Moises nga ang nag-antos nga katawhang Hudiyo buot mahibalo sa ngalan sa Diyos nga gihawasan niya. Tungod niini atong mabasa ang Exodo 3:15: “Ang Diyos sa makausa pa miingon kang Moises: ‘Kini maoy igaingon nimo ngadto sa mga anak ni Israel, “si Jehova ang Diyos sa imong mga katigulangan, ang Diyos ni Abraham, ang Diyos ni Isaac ug ang Diyos ni Jacob, nagpadala kanako nganhi kaninyo.”’ Kini mao ang akong ngalan ngadto sa panahong walay katinoan, ug kini maoy handumanan kanako ngadto sa tanang kaliwatan.”
6 Sa dihang kini nga impormasyon gipasiugda ngadto kanila, ang mga Israelinhon angayng madasig pag-ayo. Ang ilang kaluwasan gitino pinaagi sa bugtong matuod nga Diyos, si Jehova. Ug pagkamakapadasig kadto nga makabatog palaabuton nga makaila sa Diyos sa dihang iyang ipasundayag ang kahulogan sa iyang personal nga ngalan—sa pagkamapahitas-on dili magpalain sa iyang kaugalingon!—Exodo 3:13; 4:29-31.
7. (a) Sa unsang paagi mahibaloan nato nga ang mga tinun-an ni Jesus nakaila sa balaang ngalan? (b) Sa unsang paagi gililong ang ngalan sa Diyos?
7 Ang mga tinun-an ni Jesu-Kristo nadasig usab ug dako pinaagi sa balaang ngalan, si Jehova, ug ang gihawasan niini. (Juan 17:6, 26) Sa ministeryo ni Jesus sa yuta, wala gayod niya ililong ang balaang ngalan, ug dili maoy iyang katuyoan nga makabatog iyang kaugalingong ngalan, Jesus, nga una. Sa pagsugod lamang sa gitagnang apostasiya gikan sa matuod nga Kristohanong pagtuo nga gililong ang balaang ngalan, oo, sa praktikal nga paagi napapas sa Kristohanong panagkokabildohay. (Buhat 20:29, 30) Sa dihang ang ngalan sa Anak sa Diyos pagahatagan ug dakong kabantog, nga molabaw nianang iya sa Amahan, makaplagan sa nag-angkong mga Kristohanon nga ang ilang pagsimba walay nada, kulang sa kasuod sa pamilya, ug busa dili gayod makapadasig.
8. Unsa ang nagapadayong epekto diha sa katawhan sa Diyos sa pagsagop sa ngalang mga Saksi ni Jehova?
8 Busa, kini maoy usa ka hinungdan sa dili-matukib nga kalipay sa dihang ang Internasyonal nga mga Estudyante sa Bibliya nga nakig-uban sa Watch Tower Society misagop sa ngalang mga Saksi ni Jehova niadtong 1931. Dili lamang kini nagahatag-kalipay kondili kadto maoy labihan ka makapadasig. Tungod niini, ang bag-ong ginganlag mga estudyante sa Bibliya makadasig sa usag usa.—Itandi ang Isaias 43:12.
9. Sa unsang paagi ang matuod nga mga Kristohanon mobati bahin sa Usa kinsa sila maoy mga Saksi?
9 Busa, ang matuod nga mga Kristohanon karong adlawa nakakaplag nga tukmang ilhon ang Usa kinsa sila mao ang gitagnang mga Saksi, sama sa gibuhat ni Jesu-Kristo nga ilang Pangulo sa dihang siya dinhi pa sa yuta. (Pinadayag 1:1, 2) Oo, sila nag-ila kaniya ingong ang bugtong usa kansang ngalan mao si Jehova.—Salmo 83:18.
Napuno Uban sa Kalipay ug sa Balaang Espiritu
10-12. (a) Unsa ang mahimong epekto sa aktibong puwersa diha sa mga sumusunod ni Jesus? (b) Sa unsang paagi ang nagahatag-kalipayng mga Saksi ni Jehova buot makiglabot sa usag usa?
10 Diha sa iyang panamilit nga mga pulong si Jesu-Kristo miingon ngadto sa iyang mga apostol: “Busa panglakaw kamo ug himoang tinun-an ang mga tawo sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo. Ug, tan-awa! Ako magauban kaninyo sa tanang adlaw hangtod sa konklusyon sa sistema sa mga butang.”—Mateo 28:19, 20.
11 Matikdi nga ang bag-ong natudloang mga Kristohanon pagabawtismohan sa ngalan sa balaang espiritu. Kining balaang espiritu dili usa ka persona kondili ang aktibong puwersa ni Jehova nga Diyos, nga gamiton Niya pinaagi ni Jesu-Kristo. Sa Pentekostes, si Jehova nga Diyos, pinaagi ni Jesu-Kristo, nagbubo niining aktibong puwersa diha sa dedikadong mga sumusunod ni Jesu-Kristo. (Buhat 2:33) Sila napuno uban niining balaang espiritu, ug ang usa sa mga ekspresyon, o mga bunga, sa balaang espiritu mao ang kalipay. (Galacia 5:22, 23; Efeso 5:18-20) Ang kalipay maoy usa ka makapapukaw nga hiyas. Ang mga tinun-an mapuno uban sa kalipay ug sa balaang espiritu. Ang pag-ampo nga gilitok ni apostol Pablo maoy tukma kaayo: “Hinaot ang Diyos kinsa naghatag ug paglaom magapuno kaninyo sa tuman nga kalipay ug kalinaw pinaagi sa inyong pagtuo, nga kamo unta modagaya sa paglaom uban ang gahom sa balaang espiritu.”—Roma 15:13.
12 Kay napuno uban niining nagahatag-kalipayng espiritu, ang mga Saksi ni Jehova karong adlawa, apil ang “dakong panon,” buot, oo, ginapukaw, sa pagdasig sa usag usa taliwala niining dili-mahigalaong sistema sa mga butang. Uyon niini, si apostol Pablo mihisgot ug “pagdinasigay.”—Pinadayag 7:9, 10; Roma 1:12; 14:17.
Daghang Katarongan nga Madasig
13. Unsang mga katarongan nga atong nabatonan nga madasig ug sa pagdasig sa usag usa?
13 Kay sila nagapuyo taliwala niining sistema sa mga butang, nga ang magsusupak sa tanang butang matarong mao ang magmamando ug diyos pa, ang mga Kristohanon angay modasig sa usag usa sulod sa lukop-yutang Kristohanong kongregasyon, nga natuhopan uban sa balaang espiritu ni Jehova nga Diyos. (Hebreohanon 10:24, 25; Buhat 20:28) Kita adunay daghang katarongan nga madasig. Oo, pagkamapasalamaton nato nga nakabaton sa tukmang kahibalo kang Jehova ug sa Iyang Anak ug sa aktibong puwersa nga gigamit nila, sa ato pa, ang balaang espiritu! Pagkamapasalamaton nato alang sa paglaom nga ilang gihatag! Ang atong pagsimba sa ingon napuno uban sa kalipay. Giingnan ni apostol Pablo ang mga Kristohanon nga gisulatan niya nga angay nilang dasigon ang usag usa ug palig-onon ang usag usa diha sa ilang balaan kaayong pagtuo. Ilang buhaton kini nga ‘labi pa aron nga sila sa malarawanon makakita sa adlaw nga nagakahiduol na.’ Dugang pa, sa dihang ang politikanhong mga gahom niining yutaa magalaglag sa bakak nga Kristiyanidad, duyog sa tanang ubang bakak nga mga relihiyon, ang kahimtang nanginahanglan nga labi pang dasigon nato ang usag usa.
14. Kinsa ba ang angay magadasig sa usag usa, ug sa unsang paagi?
14 Samtang ang mga ansiano ang nanguna sa pagdasig sa panon diha sa ilang tinagsatagsa ka mga kongregasyon, ang tanang mga Kristohanon kinahanglang magadasig sa usag usa, sama sa gitambag sa Hebreohanon 10:25. Sa pagkamatuod, kini maoy usa ka Kristohanong kinahanglanon. Kon ikaw usa ka membro sa kongregasyon, nagahatag ka ba nianang maong pagdasig? Ikaw tingali mahibulong, ‘Sa unsang paagi akong mahimo kana? Unsay akong buhaton?’ Una, pinaagi lamang sa imong pagtambong sa mga tigom ug pinaagi sa imong pagpaluyo sa Kristohanong kahikayan, dili ba ang tanang ubang mga igsoong lalaki ug babaye madasig, bisan ikaw mismo malagmit madasig sa pagkakita nga ang uban sa pagkamatinumanon nagatambongan sa mga tigom sa kongregasyon? Sila usab madasig pinaagi sa imong panig-ingnan sa maunongong paglahutay. Pinaagi sa imong pagpadayon sa Kristohanong dalan bisan pa sa mga suliran sa kinabuhi ug mga kalisod, nga dili mosurender, imong gipahimutang ang usa ka makapadasig nga panig-ingnan.
Santaa ang Kaluya Gikan sa Yawa
15. Nganong ang Yawa adunay “dakong kapungot,” ug batok kang kinsa?
15 Dili kita lamang ang nahibalo nga ang adlaw ni Jehova haduol na. Si Satanas nga Yawa nahibalo usab. Ang Pinadayag 12:12 nagtug-an kanato nga alaot karon ang yuta “tungod kay ang Yawa nanaog nganhi kanimo, nga adunay dakong kapungot, sa pagkahibalo nga hamubo na lamang ang iyang panahon.” Ingon sa gipaila sa Pinadayag 12:17, ang iyang dakong kapungot gitumong batok niadtong “kinsa nagatuman sa kasugoan sa Diyos ug may buluhatong panghimatuod bahin kang Jesus.” Walay pagduhaduha bahin niini—ang Yawa buot magpaluya kanato! Ug siya nahibalo gayod kon unsaon sa pagsulay sa pagbuhat niini. Siya nahibalo sa atong mga kahuyangan ug mga suliran, ug siya nagagamit niini.
16. Nganong gigamit ni Satanas ang kaluya ingong usa ka hinagiban?
16 Nganong gigamit sa Yawa ang kaluya ingong usa ka hinagiban? Tungod kay kini sa kanunay misaler. Bisan ang usa ka tawo nga nakalahutay sa dihadihang pagsupak ug paglutos mahimong mahulog ingong biktima sa kaluya. Buot ni Satanas nga tamayon si Jehova nga Diyos ug mosulay sa pagpamatuod nga mapatalikod niya ang mga tawo gikan sa pagsimba Kaniya. (Proverbio 27:11; itandi ang Job 2:4, 5; Pinadayag 12:10.) Kon ikaw mawad-ag kadasig tungod niya, ipahinabo niyang ikaw maluya diha sa imong pag-alagad sa Diyos; siya gani basin magpahunong kanimo, nga mahimong dili-aktibo diha sa pagsangyaw sa maayong balita sa Gingharian.—2 Corinto 2:11; Efeso 6:11; 1 Pedro 5:8.
17. Sa unsang paagi ang dili maayong mga epekto sa kaluya dayag sa panahon ni Moises?
17 Ang dili maayong mga epekto sa pagkaluya makita diha sa kaso sa mga Israelinhon sa karaang Ihipto. Human nga nakigsulti si Moises kang Faraon, ang maong manlulupig nagpauswag ug dako sa ilang mga palas-anon ug sa iyang pagdaogdaog kanila. Ang Diyos nag-ingon kang Moises nga pasaligon ang mga Israelinhon nga Siya sa pagkamatuod magaluwas kanila, maghimo kanilang Iyang katawhan, motagana sa ilang kaikyasan, ug magdala kanila ngadto sa yutang saad. Sa ingon misulti niini si Moises ngadto sa mga anak ni Israel. Apan ang Exodo 6:9 miingon: “Sila wala mamati kang Moises tungod sa kaluya ug tungod sa mapintas nga kaulipnan.” Hangtod nga gikombinsir ni Jehova si Moises ug nagdasig kaniya, kini nga pagsanong nagpaluya gani kang Moises sa pagpakigsulti kang Faraon ingon sa gisugo kaniya.—Exodo 6:10-13.
18. Nganong adunay dakong panginahanglan alang sa katawhan sa Diyos nga pakigbisogan ang kaluya nga gipahinabo sa Yawa?
18 Si Satanas nga Yawa nahibalo pag-ayo sa dili maayong epekto nga ihatag sa kaluya diha sa usa ka alagad sa Diyos. Sumala sa giingon sa Proverbio 24:10: “Naluya ka ba sa adlaw sa kalisdanan? Ang imong kusog diyutay ra.” Sanglit kita nabuhing halalom na kaayo sa panahon sa kataposan, gikinahanglang nato nga mahimong kusganon ug malig-on sa espirituwal. Gikinahanglan gayod nga atong pakigbisogan ang atong mga pagkadili-hingpit, kahuyangan, ug mga kasaypanan nga hayan nagapugong kanato; sanglit si Satanas naningkamot sa paggamit niining maong mga kasaypanan, atong gikinahanglan ang tabang.
Nagasalig nga Malig-on Diha sa Halad ni Kristo
19. Unsay motabang kanato nga mabuntog ang kaluya, ug ngano?
19 Ang usa ka dakong tabang niining bahina mao ang tagana sa lukat nga gihimo ni Jehova pinaagi ni Jesu-Kristo. Kita mahimong mga mandadaog pinaagi sa pagsalig nga malig-on diha sa lukat. Peligroso nga pakamenosan kining maong tagana. Oo, sa gihapon kita masayop, o makasala, sanglit kita dili-hingpit. Apan kita dili angay nga maluya ug mohunong, nga mobating wala nay paglaom, ug sa ingon mahulog ngadto sa lit-ag ni Satanas. Kita nahibalo nga kita adunay usa ka bug-os nga halad alang sa sala. Ang lukat makaarang sa pagpapas sa mga sala. Kon kita sakop sa “dakong panon,” kita angay magbaton ug bug-os nga pagtuo ug pagsalig nga atong mahugasan ang atong mga sapot ug mapaputi kini diha sa dugo sa Kordero.—Pinadayag 7:9, 14.
20. Sa unsang paagi ang Pinadayag 12:11 nagpaila nga ang dakong tigpaluya, ang Yawa, mabuntog?
20 Sa Pinadayag 12:10 si Satanas gihubit ingong “ang magsusumbong sa atong mga igsoon . . . kinsa nagasumbong kanila sa adlaw ug sa gabii sa atubangan sa atong Diyos.” Sa unsang paagi mabuntog nato ang maong daotang magsusumbong ug higanting tigpaluya? Ang bersikulo 11 sa maong kapitulo nagatagana ug tubag: “Ilang nabuntog siya tungod sa dugo sa Kordero ug tungod sa pulong sa ilang pagpamatuod, ug wala mawili sa ilang mga kinabuhi bisan pa diha sa kamatayon.” Busa angayng huptan sa katawhan ni Jehova ang bug-os nga pagsalig diha sa halad lukat, ang dugo sa Kordero. Hupting malig-on ang pagdasig nga mabatonan gikan sa pagsangyaw, nga sa regular nagapakig-ambit sa maayong balita sa Gingharian sa Diyos ngadto sa tanan nga mahimo nimo.
21. Sa unsang paagi tingali kita sa wala tuyoa nakigbahin sa buhat sa Yawa sa pagpaluya sa atong mga igsoon?
21 Usahay, bisag wala tuyoa, kita nakigbahin sa buhat sa Yawa sa pagpaluya sa atong mga igsoon. Sa unsang paagi? Sa pagkahimong hinawayon kaayo, mapugsanon kaayo, o sa pagkahimong matarong nga labihan. (Ecclesiastes 7:16) Kitang tanan adunay mga kakulangan ug mga kahuyangan. Dili nato gamiton kini sama sa gibuhat sa Yawa. Hinunoa, mosulti kitag makapadasig mahitungod sa atong mga igsoon ug sa katawhan ni Jehova ingong usa ka organisadong grupo. Buot natong padayong lig-onon ang usag usa ug busa likayan ang pagpaluya kanila.
Pagdinasigay Samtang ang Adlaw Haduol Na
22, 23. (a) Nganong dili nato angayng itugyan lamang kini ngadto sa mga ansiano nga mahimong mga tuboran sa pagdasig? (b) Sa unsang paagi ang mga magtatan-aw sa Kristohanong kongregasyon madasig?
22 Angay natong himoon kini nga atong malig-ong tinguha kanunay ang paglig-on sa usag usa samtang ang adlaw haduol na. Dasiga ang uban pinaagi sa imong matinumanong panig-ingnan ug mga pulong sa paglipay. Sundoga si Jehova ug ang Ginoong Jesu-Kristo niining bahina. Ayawg itugyan kini ngadto lamang sa mga ansiano sa kongregasyon nga mahimong tinubdan sa pagdasig. Aw, ang mga ansiano usab nagkinahanglan ug pagdasig. Sila adunay mga kahuyangan ug mga kabilinggan nga sama sa nahibilin sa panon, ug ilang sagubangon ang samang mga suliran sa pagtagana sa ilang mga panimalay diha sa usa ka nagakadugtang kalibotan. Dugang niana, sila nakabaton sa gihubit ni Pablo nga kabalaka alang sa mga kongregasyon. (2 Corinto 11:28, 29) Ang ilaha maoy malisod nga buluhaton—sila nagkinahanglan ug pagdasig.
23 Ikaw madasig ug dako niadtong anaa sa mga posisyon sa pagkamagtatan-aw diha sa Kristohanong kongregasyon pinaagi sa pagkooperar uban kanila. Unya ikaw nagatuman sa tambag sa Hebreohanon 13:17: “Magmasinugtanon kamo niadtong nagapanguna kaninyo ug magpasakop kamo, kay sila nagabantay sa inyong mga kalag ingong mga tawo nga unya magahatag rag husay; nga ilang buhaton kini uban ang kalipay ug dili uban ang kasubo, kay kini makadaot kaninyo.”
24. Niining makapaluyang panahon, unsay angay natong buhaton, ug ngano?
24 Kita nabuhi sa makapaluyang panahon. Ang mga tawo sa pagkamatuod panguyapan tungod sa kahadlok ug sa pagpaabot sa mga butang mahitabo sa ginapuy-ang yuta, ingon sa gitagna ni Jesus. (Lukas 21:25, 26) Uban sa daghan kaayong mga suliran nga makapaguol ug makapaluya, “magdinasigay sa usag usa, ug ilabina gayod sa makita ninyo nga ang adlaw nagakahiduol na.” Sunda ang maayong tambag ni apostol Pablo sa 1 Tesalonica 5:11: “Magpadayon kamo sa paglipay sa usag usa ug sa paglig-onay sa usag usa, sama sa inyong ginabuhat karon.”
Unsaon Nimo sa Pagtubag?
◻ Nganong ang mga Kristohanon angay magadasig sa usag usa, nga labaw pa kaniadto?
◻ Sa unsang paagi ang kahibalo sa balaang ngalan nagadasig sa katawhan ni Jehova?
◻ Diha sa unsang mga paagi nga kita sa tinagsatagsa makadasig sa usag usa?
◻ Nganong kinahanglan natong likayan nga makigbahin sa buhat sa Yawa sa pagpaluya sa atong mga igsoon?
[Hulagway sa panid 17]
Ang mga ansiano manguna sa pagdasig sa panon sa ilang mga kongregasyon