Usa ka Ekspertong Hardinero

ANG hantik nga olmigas sa Amerika del Sur nakapahingangha sa mga biologo tungod sa makutihong mga pamaagi niini sa paghardin. Aron pagtaganag pagkaon, kining giming nga insekto magtabastabas sa dahon ug magtigom sa mga biya gikan sa salog sa lasang ug magdala niini ngadto sa iyang ilalom-sa-yutang balayan. Unya galingon sa olmigas kining mga tipika nga mahimong minasa aron iabono sa hardin niini sa agup-op. Ang maong hantik kinaiyanhong nahibalo kon unsaon paghupot sa tinanom niini nga anaa sa labing maayong temperatura ug kaumog aron makabatog labing maayong mga resulta. Aron pagmugnag bag-ong mga luna nga kultibahon, balhinon niini ang mga pinutol gikan sa establisado nang mga tanom ngadto sa mas bag-ong mga luna sa dahon. Ang hantik nga olmigas nakahanas pa sa arte sa pagpul-ong aron labing maayog tubo ang agup-op. Ang mga tigdukiduking taga-Wales nakapaniid nga kining hanas nga hardinero magpasibo sa trabaho niini sumala sa gikinahanglang pagkaon sa balayan, sa ingon madaginot ang panahon ug kusog.

Hago nga trabaho ang paghardin, ug ang hantik nga olmigas maoy talagsaon niining bahina. Dili katingad-ang ang Bibliya nag-ingon: “Adtoa ang olmigas, ikaw nga tapolan; tan-awa ang mga paagi niini ug magmaalamon. Bisan pag wala kiniy komandante, tagdumala o magmamando, magaandam kini sa iyang pagkaon bisan sa ting-init; kini nagtigom sa taganang pagkaon niini bisan sa ting-ani.” (Proverbio 6:6-8) Tinuod, ang kinaiya sa olmigas nga hantik nagpamatuod sa kinaadman sa Maglalalang niini, si Jehova nga Diyos.​—Proverbio 30:24, 25.