Mga Pangutana Gikan sa mga Magbabasa
Maalamon ba alang sa usa ka Kristohanon nga motambong sa seremonyas sa paglubong o kasal diha sa simbahan?
Ang atong pagpakigbahin sa bisan unsang matang sa bakak nga relihiyon dili makapahimuot kang Jehova ug angayng likayan. (2 Corinto 6:14-17; Pinadayag 18:4) Ang seremonyas sa paglubong diha sa simbahan maoy usa ka relihiyosong serbisyo nga lagmit adunay sermon nga nagduso ug dili-kasulatanhong mga ideya sama sa pagkadili-mamatay sa kalag ug langitnong ganti alang sa tanang maayong tawo. Mahimong naglakip usab kini sa mga tulumanon nga sama sa pagpanguros ug pagsabat sa pangadye uban sa pari o ministro. Ang mga pag-ampo ug uban pang relihiyosong mga kalihokan nga supak sa pagtulon-an sa Bibliya mahimong bahin usab sa usa ka relihiyosong seremonyas sa kasal nga himoon diha sa simbahan o bisan diin. Ang pagkaanaa sa usa ka pundok diin ang tanan makig-ambit sa bakak nga relihiyosong kalihokan mahimong makapalisod sa usa ka Kristohanon sa pagsukol sa pagpit-os nga makig-ambit. Pagkadili-maalamon ang pagladlad sa kaugalingon sa maong pagpit-os!
Unsa na man kon ang usa ka Kristohanon mobating obligado sa pagtambong sa seremonyas sa paglubong o kasal nga himoon diha sa simbahan? Pananglitan, mahimong agdahon sa dili-magtutuong bana ang iyang Kristohanong asawa nga mouban kaniya sa maong okasyon. Puwede ba siyang mouban kaniya bisag maghilomhilom lang? Agig pagtamod sa kagustohan sa iyang bana, mahimong mohukom ang asawa sa pag-uban kaniya, nga determinadong dili makig-ambit sa bisan unsang relihiyosong mga seremonyas. Sa laing bahin, siya mahimong mohukom nga dili moadto, nga maghunahuna nga ang emosyonal nga pagpit-os sa maong mga kahimtang basig dili niya maagwanta, nga basig ikakompromiso pa niya ang mga prinsipyo sa Diyos. Siya na ang mag-igong modesisyon. Seguradong buot gayod niyang magmalinawon ang iyang kasingkasing, nga may hinlong tanlag.—1 Timoteo 1:19.
Sa bisan unsang kahimtang, alang sa iyang kaayohan ang pagpatin-aw ngadto sa iyang bana nga tungod sa iyang tanlag dili gayod siya makapakig-ambit sa bisan unsang mga seremonyas o makaduyog sa pag-awit sa mga himno o makaduko sa iyang ulo sa dihang mag-ampo. Pinasukad sa iyang pagpatin-aw, ang bana mahimong makahinapos nga ang pagkaanaa sa iyang asawa makahatag ug suliran nga tingali dili makapahimuot kaniya. Palabihon tingali sa bana nga mao ray moadto tungod sa iyang gugma sa iyang asawa, pagtahod sa iyang mga pagtuo, o sa tinguha nga malikayan ang bisan unsang kaulaw. Apan kon moinsistir siya nga kinahanglang mouban ang iyang asawa kaniya, ang asawa mahimong makauban ingong usa ka maniniid lamang.
Hunahunaa usab ang mahimong epekto ngadto sa atong mga isigkamagtutuo kon motambong kita sa usa ka relihiyosong serbisyo diha sa simbahan. Makadaot ba kaha kini sa tanlag sa pipila? Dili ba kaha mahuyang ang ilang pagpakigbisog sa paglikay nga makigbahin sa idolatriya? ‘Tinoa ang mas hinungdanong mga butang,’ nagtambag si apostol Pablo, “aron kamo mahimong walay-ikasaway ug dili makapandol sa uban hangtod sa adlaw ni Kristo.”—Filipos 1:10.
Kon ang okasyon naglangkit sa suod nga kabanay, mahimong adunay dugang pagpit-os sa pamilya. Sa bisan unsang kahimtang, ang usa ka Kristohanon angayng mainampingong magtimbangtimbang sa tanang nalangkit nga mga butang. Ubos sa pipila ka kahimtang, ang bana o ang asawa mahimong makaingon nga walay kakulian tingaling motungha kon motambong lang ingong maniniid sa usa ka seremonyas sa paglubong o kasal nga himoon diha sa simbahan. Bisan pa niana, adunay mga kahimtang nga pinaagi sa pagtambong mahimong mas dako ang kadaot nga ikahatag sa kaugalingong tanlag mismo o nianang sa uban kay sa posibleng mga kaayohan. Bisan unsay kahimtang, angayng tinoon sa Kristohanon nga ang iyang desisyon dili makapugong kaniya sa paghupot ug hinlong tanlag atubangan sa Diyos ug sa tawo.