Takos ug Nasangkapan sa Pagtudlo sa Uban
1 Sa dihang si Moises gitudlo ingong hawas ni Jehova, wala siya mobating takos sa pagpahayag sa pulong sa Diyos ngadto kang Paraon. (Ex. 4:10; 6:12) Gipahayag ni Jeremias ang iyang kakulang sa pagsalig nga makaalagad ingong propeta ni Jehova, gisultihan ang Diyos nga dili siya mahibalo kon unsaon sa pagsulti. (Jer. 1:6) Bisan pa sa ilang unang kakulang sa pagsalig, kadtong duha ka propeta napamatud-an nga maisogong mga saksi dapig kang Jehova. Ang Diyos naghimo kanilang igong kuwalipikado.
2 Karong adlawa, salamat kang Jehova, atong nabatonan kon unsay atong gikinahanglan aron palamposon ang atong ministeryo uban ang pagsalig. (2 Cor. 3:4, 5; 2 Tim. 3:l7) Sama sa usa ka takos nga mekaniko nga may hugpong sa tanang kahimanan, kita tukmang nasangkapan aron palamposon ang atong natudlong ministeryo sa mahanasong paagi. Sa Enero atong itanyag ang gamay nga edisyon sa Mabuhing Walay Kataposan nga libro. Bisan tuod kining libroha dili bag-o, usa kini ka maayong tabang sa pagpanudlo nga makatabang sa katawhan nga makakat-on sa kamatuoran. Ang mosunod nga sinugyot nga mga presentasyon mahimong magamit.
3 Ang ulohan sa edukasyon hayan magamit sa pagpatungha ug interes sa Pulong sa Diyos. Makasugod ka ug panaghisgot sa pag-ingon:
◼ “Gipasiugda pag-ayo karong adlawa ang panginahanglan sa de kalidad nga edukasyon. Sa imong hunahuna, unsang matanga sa edukasyon nga angayng kab-oton sa usa ka tawo aron maseguro ang labing dakong kalipay ug kalamposan sa kinabuhi? [Tugoting motubag.] Ang dayong mga kaayohan maangkon niadtong kinsa mokuha sa kahibalo sa Diyos. [Basaha ang Proverbio 9:10, 11.] Kining basahona gipasukad sa Bibliya. Nagapunting kini sa bugtong tinubdan sa kahibalo nga motultol sa kinabuhing walay kataposan.” Basaha ang unang tudlingpulong sa parapo 19 sa panid 15 sa Mabuhing Walay Kataposan nga libro. Itanyag ang libro ug hikaya ang usa ka balikduaw.
4 Sa dihang mobalik sa tagbalay kinsa imong gikahisgotan sa kabililhon sa edukasyon sa Bibliya, ikaw makaingon:
◼ “Sa akong ulahing duaw, atong nahisgotan ang Bibliya ingon nga tinubdan sa edukasyon nga makapaseguro sa atong dumalayong umaabot. Siyempre, kinahanglag paningkamot ang pagkakat-on kon unsay atong gikinahanglang masayran gikan sa Kasulatan. [Basaha ang Proverbio 2:1-5.] Naglisod ang daghang tawo sa pagsabot sa pipila ka bahin sa Bibliya. Buot nakong ipasundayag sa makadiyot ang usa ka paagi nga among gigamit sa pagtabang sa katawhan nga makakat-on ug dugang bahin sa pangunang mga pagtulon-an sa Bibliya.” Ipasundayag sa makadiyot ang pagtuon sa Bibliya, ginamit ang pang-abli nga mga parapo sa libro. Kon ang tagbalay buot ug usa ka regular nga pagtuon, saysayi nga mobalik ka aron ipadayon kana sa sunod semana. Sa tukmang panahon sa ulahi, imong ikabalhin ang pagtuon ngadto sa librong Kahibalo nga Motultol sa Kinabuhing Walay Kataposan.
5 Daghang katawhan ang nasamok sa pag-antos sa minilyong kabataan sa kalibotan. Hayan makatabang ka sa tagbalay nga masabtan kon unsay panglantaw sa Diyos niini nga kalisdanan, sa pag-ingon:
◼ “Sa walay duhaduha nakaalinggat ka ug mga balita bahin sa mga kabataan libot sa globo nga gigutom, masakiton, ug sinalikway. Nganong ang nalangkit nga mga organisasyon wala makapaarang-arang sa kahimtang? [Tugoting motubag.] Matikdi kon unsay gisaad sa Diyos alang sa mga kabataan ug mga hamtong, ingon sa gitala sa Bibliya. [Basaha ang Pinadayag 21:4.] Kining libroha nagahatag ug dugang mga detalye bahin sa usa ka kalibotan nga gimbut-an sa Diyos diin ang pag-antos matapos.” Ablihi sa ilustrasyon nga naghulagway sa Paraiso, tingali sa mga panid 12 ug 13 o sa 156-7, ug hisgoti kana. Itanyag ang libro, ug hikaya ang laing duaw.
6 Kon sa sinugdan imong nahisgotan ang bahin sa pag-antos sa mga kabataan, sa sunod duaw hayan imong ikapadayon ang panaghisgot sa pag-ingon:
◼ “Niadtong dinhi ako di pa dugay, gipahayag nimo ang kabalaka bahin sa kalisdanan sa mga kabataan nga nagaantos tungod sa nabungkag nga mga panimalay, gutom, sakit, ug kapintasan. Makapahupay ang pagbasa sa Bibliya bahin sa kalibotan diin walay mga kabataan ni mga hamtong ang mag-antos sa sakit, kaul-ol, o kamatayon. Usa ka tagna sa basahon sa Isaias nagahubit sa usa ka mas maayo nga kinabuhi nga modangat sa yuta.” Basaha ug hisgoti ang Isaias 65:20-25. Itanyag ang pagtuon sa Bibliya.
7 Sanglit ang batasan sa pag-ampo kasagaran na sa relihiyosong katawhan, makasugod ka ug panaghisgot niining ulohana sa pag-ingon:
◼ “Kadaghanan kanato nakasinati na ug mga suliran sa atong mga kinabuhi nga nagtukmod kanato sa pag-ampo ngadto sa Diyos alang sa tabang. Apan, daghan ang mibati nga ang ilang pag-ampo wala dungga. Makita pa ngani nga ang relihiyosong mga pangulo nga nagaampo alang sa kalinaw wala ginadungog. Ikaingon nato kana sanglit ang gubat ug kapintasan nagapadayon sa paghampak sa katawhan. Ginapaminawan ba gayod sa Diyos ang mga pag-ampo? Kon mao, nganong daghan man kaayong mga pag-ampo ang maorag wala dungga? [Tugoting motubag.] Ang Salmo 145:18 nagasaysay kon unsay gikinahanglan aron dunggon ang atong mga pag-ampo. [Basaha ang kasulatan.] Sa usa ka paagi, ang mga pag-ampo ngadto sa Diyos kinahanglang tim-os ug nahisubay sa kamatuoran nga makaplagan sa iyang Pulong, ang Bibliya.” Ablihi ang Mabuhing Walay Kataposan nga libro sa kapitulo 27, ug ipunting kon unsay giingon niini bahin sa bili sa pag-ampo. Itanyag ang libro ug hikaya ang pagbalik aron mahisgotan pa kini ug dugang.
8 Sa dihang magasundal sa miaging panaghisgot bahin sa pag-ampo, hayan masulayan nimo kining paagiha:
◼ “Nalipay ako sa atong panaghisgot maylabot sa ulohan sa pag-ampo. Sa walay duhaduha imong makaplagan ang mga hunahuna ni Jesus kon unsay iampo alang sa mapuslanong giya.” Basaha ang Mateo 6:9, 10, nga nagapunting sa pangunang mga kabalaka nga gipasiugda ni Jesus sa iyang sulondang pag-ampo. Tanyagi nga ipasundayag ang pagtuon sa kapitulo 27 sa libro.
9 Kon bahin sa pagpaambit sa kahibalo sa Diyos ngadto sa uban, kita tingali makasukna, “Kinsa ang sa igo kuwalipikado niining mga butanga?” Ang Kasulatan nagatubag: ‘Kita.’—2 Cor. 2:16, 17.