Nganong Daghan Kaayo ang Pag-antos?

1, 2. Unsay ginapangutana sa daghang tawo?

GILAMPORNAS sa tsunami ang usa ka barangay. Usa ka tawo ang namusil diha sa simbahan, ug daghan ang nasamdan ug namatay. Ang inahan sa lima ka anak namatay tungod sa kanser.

² Dihang mahitabo ang mga trahedya nga sama niana, daghang tawo ang mangutana, “Ngano?” Daghan ang mangutana kon nganong ang kalibotan punog pagdumot ug pag-antos. Nakapangutana ba sab ka niana?

3, 4. (a) Unsay gipangutana ni Habacuc? (b) Unsay tubag ni Jehova?

³ Atong makat-onan sa Bibliya nga bisan ang mga tawong lig-on ug pagtuo sa Diyos nakapangutana sab niana. Pananglitan, si propetang Habacuc nangutana kang Jehova: “Nganong gipakita nimo kanako ang daotang mga buhat? Ug nganong gitugotan nimo ang pagdaogdaog? Nganong naa sa akong atubangan ang pagpanglaglag ug kapintasan? Ug nganong kaylap ang mga away ug panagbangi?”​—Habacuc 1:3.

⁴ Sa Habacuc 2:2, 3, mabasa nato ang tubag sa Diyos kang Habacuc ug ang Iyang saad nga bag-ohon ang kahimtang. Gihigugma pag-ayo ni Jehova ang mga tawo. Ang Bibliya nag-ingon: “Gimahal mo niya.” (1 Pedro 5:7) Ang tinuod, kon kita man gani dili gustong makakitag pag-antos, labaw na ang Diyos. (Isaias 55:8, 9) Busa atong hisgotan ang pangutana, Nganong daghan kaayo ang pag-antos sa kalibotan?

 5. Unsay giingon sa daghang lider sa relihiyon bahin sa pag-antos? Pero unsay gitudlo sa Bibliya?

⁵ Ang mga pastor, pari, ug ubang lider sa relihiyon sagad moingon nga pagbuot sa Diyos ang pag-antos sa mga tawo. Ang uban moingon nga giplano na daan sa Diyos ang tanang mahitabo sa tawo, apil na ang mga trahedya, ug dili gyod nato na masabtan. Moingon sab ang uban nga ang mga tawo, hasta mga bata, mamatay aron makauban sa Diyos didto sa langit. Pero dili na tinuod. Dili gyod si Jehova ang hinungdan sa daotang panghitabo. Ang Bibliya nag-ingon: “Ang matuod nga Diyos dili gayod mobuhat ug daotan, ug ang Labing Gamhanan dili gayod mohimog sayop nga binuhatan!”​—Job 34:10.

 6. Nganong ang Diyos maoy gibasol sa daghang tawo sa tanang pag-antos?

⁶ Ang gibasol sa daghang tawo sa tanang pag-antos mao ang Diyos kay nagtuo sila nga siya ang nagmando sa kalibotan. Pero atong nakat-onan sa Kapitulo 3 nga ang tinuod nga magmamando sa kalibotan mao si Satanas nga Yawa.

7, 8. Nganong daghan kaayo ang pag-antos sa kalibotan?

⁷ Ang Bibliya nag-ingon nga “ang tibuok kalibotan nailalom sa gahom sa usa nga daotan.” (1 Juan 5:19) Si Satanas, ang magmamando niining kalibotana, daotan kaayo ug pintas. Iyang ‘gipahisalaag ang tibuok gipuy-ang yuta.’ (Pinadayag 12:9) Daghan ang nagsundog kaniya. Usa lang na sa mga rason kon nganong kaylap kaayo ang pagpamakak, pagdumot, ug kapintasan.

⁸ Duna pay laing mga rason kon nganong daghan kaayo ang pag-antos sa kalibotan. Human morebelde si Adan ug Eva, ilang napasa sa ilang mga anak ang sala. Ug tungod sa sala, ang mga tawo mao ra poy hinungdan nga mag-antos ang uban. Kasagaran gusto nila nga mahimong mas labaw kay sa uban. Makig-away sila, makiggubat, ug daogdaogon nila ang uban. (Ecclesiastes 4:1; 8:9) Usahay mag-antos pod ang mga tawo tungod sa ‘panahon ug sa wala damhang panghitabo.’ (Ecclesiastes 9:11) Pananglitan, dihang may mahitabong aksidente o trahedya sa usa ka lugar, maatlan nga tua sila didto.

 9. Nganong makaseguro ta nga dunay maayong rason si Jehova nga gitugotan niya ang pag-antos?

⁹ Dili si Jehova ang hinungdan sa pag-antos. Dili siya ang mabasol sa gubat, krimen, ug pagdaogdaog. Dili siya ang nagpahinabo sa mga katalagman sama sa linog, bagyo, ug baha. Pero maghunahuna seguro ka, ‘Kon si Jehova ang labing gamhanan sa uniberso, nganong wala niya kini pugngi?’ Nahibalo ta nga gimahal ta pag-ayo sa Diyos, maong duna gyod siyay maayong rason nga gitugotan niya ang pag-antos.​—1 Juan 4:8.

10. Giunsa paghagit ni Satanas si Jehova?

¹⁰ Sa tanaman sa Eden, gilimbongan sa Yawa si Adan ug Eva. Giakusahan ni Satanas ang Diyos ingong daotang Magmamando. Siya miingon nga dunay maayong butang nga wala ihatag sa Diyos kang Adan ug Eva. Iyang gipatuo sila nga mas maayo siyang magmamando kay kang Jehova ug nga dili nila kinahanglan ang Diyos.​—Genesis 3:2-5; tan-awa ang Endnote 27.

11. Unsa nga pangutana ang kinahanglan natong tubagon?

¹¹ Si Adan ug Eva misupak ug mirebelde kang Jehova. Nagtuo sila nga duna silay katungod nga modesisyon para sa ilang kaugalingon kon unsay husto ug sayop. Unsaon ni Jehova pagpamatuod nga sayop ang mga rebelde ug nga nahibalo siya kon unsay pinakamaayo para kanato?

12, 13. (a) Nganong wala dayon laglaga ni Jehova ang mga rebelde? (b) Nganong gitugotan ni Jehova si Satanas sa pagmando niining kalibotana ug ang mga tawo sa pagmando sa ilang kaugalingon?

¹² Wala dayon laglaga ni Jehova si Adan ug Eva. Hinuon, gitugotan niya nga manganak sila. Dayon ang ilang mga anak gihatagan ni Jehova ug kahigayonan sa pagpili kon kinsay gusto nila nga mahimong ilang magmamando. Gusto ni Jehova nga ang yuta mapuno ug hingpit nga mga tawo, ug matuman gyod na bisag unsa pay himoon sa Yawa.​—Genesis 1:28; Isaias 55:10, 11.

¹³ Gihagit ni Satanas si Jehova atubangan sa minilyong mga anghel. (Job 38:7; Daniel 7:10) Busa gihatagan ni Jehova si Satanas ug panahon aron pamatud-an ang iyang akusasyon. Gihatagan sab niya ang mga tawo ug panahon nga maghimog kaugalingong mga gobyerno ubos sa paggiya ni Satanas aron makita kon molampos ba gyod sila kon walay tabang sa Diyos.

14. Unsay napamatud-an paglabay sa panahon?

¹⁴ Linibo na ka tuig nga naningkamot ang mga tawo sa pagmando sa ilang kaugalingon, pero pakyas sila. Napamatud-an nga bakakon si Satanas. Gikinahanglan gyod sa mga tawo ang tabang sa Diyos. Husto ang giingon ni propetang Jeremias: “Nahibalo ko pag-ayo, Oh Jehova, nga dili iya sa tawo ang pagtultol sa iyang dalan. Dili iya sa tawong naglakaw bisan ang pagtultol sa iyang lakang.”​—Jeremias 10:23.

15, 16. (a) Nganong gitugotan ni Jehova ang pag-antos sa taas kaayong panahon? (b) Nganong wala sulbara ni Jehova ang mga problema nga gipahinabo ni Satanas?

¹⁵ Nganong gitugotan ni Jehova ang pag-antos sa taas kaayong panahon? Nganong wala niya pugngi ang daotang mga butang? Nagkinahanglan ug panahon aron mapamatud-an nga pakyas ang pagmando ni Satanas. Gisulayan sa mga tawo ang lainlaing gobyerno, pero pakyas sila. Bisag miuswag ang siyensiya ug teknolohiya, misamot hinuon ang inhustisya, kakabos, krimen, ug gubat. Dili gyod ta molampos sa pagmando sa atong kaugalingon kon walay tabang sa Diyos.

¹⁶ Wala sulbara ni Jehova ang mga problema nga gipahinabo ni Satanas. Kay kon iya nang gihimo, morag misuportar siya sa pagmando ni Satanas, ug dili gyod na Niya himoon. Dugang pa, basig magtuo ang mga tawo nga molampos sila sa pagmando sa ilang kaugalingon. Pero bakak na, ug si Jehova dili sab mosuportar niana. Dili gyod siya mamakak.​—Hebreohanon 6:18.

17, 18. Unsay himoon ni Jehova sa tanang kadaot nga gipahinabo ni Satanas?

¹⁷ Kaya ba ni Jehova nga ayohon ang tanang kadaot nga resulta sa pagrebelde ni Satanas ug sa mga tawo? Oo. Ang tanan posible sa Diyos. Si Jehova molihok sa hustong panahon, dihang ang tanang hagit ni Satanas bug-os nang matubag. Tumanon na niya ang iyang katuyoan nga himoong Paraiso ang yuta. Ang tanan nga naa sa “handomanang mga lubnganan” banhawon. (Juan 5:28, 29) Wala nay magsakit o mamatay. Wagtangon ni Jesus ang tanang kadaot nga gipahinabo ni Satanas. Gamiton ni Jehova si Jesus “aron gub-on ang mga buhat sa Yawa.” (1 Juan 3:8) Mapasalamaton ta kang Jehova kay sa pagkakaron nagpailob siya aron makaila ta niya ug makadesisyon nga pilion siya ingong atong Magmamando. (Basaha ang 2 Pedro 3:9, 10.) Ug dihang mag-antos ta, tabangan ta niya nga makalahutay.​—Juan 4:23; basaha ang 1 Corinto 10:13.

¹⁸ Dili ta pugson ni Jehova nga pilion siya ingong atong Magmamando. Ang mga tawo gihatagan niyag regalo​—ang kagawasan sa pagpili. Atong sayron kon nganong importante ni kanato.

19. Unsa ang nindot nga regalo nga gihatag ni Jehova kanato? Nganong angay tang magpasalamat niini?

¹⁹ Ang kagawasan sa pagpili maoy nindot nga regalo gikan kang Jehova. Tungod niini, lahi kaayo ta sa mga hayop. Sila nagdepende lang sa ilang kinaiyanhong katakos, pero kita makapili kon unsaon pagkinabuhi ug makadesisyon kon ato bang pahimut-an si Jehova o dili. (Proverbio 30:24) Dili pod ta pareho sa mga makina nga kon unsay katuyoan nga gihimo sila mao ra pod ang ilang mahimo. Naa tay kagawasan sa pagpili kon unsay gusto natong himoon, kinsay atong higalaon, ug kon sa unsang paagi ta magkinabuhi. Gusto ni Jehova nga magmalipayon ta.

20, 21. Unsa ang pinakamaayong desisyon nga imong mahimo karon?

²⁰ Gusto ni Jehova nga higugmaon nato siya. (Mateo 22:37, 38) Sama siya sa usa ka amahan nga gustong makadungog sa iyang anak nga kinasingkasing nga moingong “I love you, Pa” ug dili kay napugos lang. Gihatagan ta ni Jehova ug kagawasan sa pagpili kon moalagad ba ta niya o dili. Si Satanas, Adan, ug Eva mipili nga supakon si Jehova. Unsaon nimo paggamit ang maong kagawasan?

²¹ Gamita ang imong kagawasan sa pagpili sa pag-alagad kang Jehova. Minilyon ang midesisyon nga pahimut-an ang Diyos ug isalikway si Satanas. (Proverbio 27:11) Unsay imong buhaton karon aron makapuyo sa bag-ong kalibotan sa Diyos dihang iya nang wad-on ang tanang pag-antos? Tubagon kana sa sunod kapitulo.