Pagkahimong Mapainubsanon

Ang mga tawong mapainubsanon matinahoron. Dili sila manghambog o magdahom ug espesyal nga pagtagad. Hinuon, naa silay tinuod nga interes sa uban ug gustong makakat-on gikan nila.

Para sa uban, kahuyangan ang pagpaubos. Pero dili na tinuod, kay makatabang nato ni sa pag-angkon sa atong mga sayop ug limitasyon.

• Ang pagpaubos makatabang dihang makiglabot sa uban. “Mas daling makakitag amigo ang mga mapainubsanon,” sumala sa librong The Narcissism Epidemic. Kini sab nag-ingon nga ang maong mga tawo “dili malisdan sa pagpakig-uban ug pagpakig-estorya sa uban.”

• Ang pagpaubos makatabang sa kaugmaon sa imong anak. Ang pagpaubos makatabang sa imong anak karon ug sa umaabot​—pananglitan, dihang mangitag trabaho. “Kon ang batan-on bilib kaayo sa kaugalingon ug wala mahibalo sa iyang mga limitasyon, posibleng dili siya madawat sa trabaho,” misulat si Dr. Leonard Sax. “Pero kon interesado gyod siya kon unsay isulti sa nag-interbiyo, mas dakog posibilidad nga madawat siya.”a

Tudloi ang imong anak nga dili magpaimportante sa kaugalingon.

PRINSIPYO SA BIBLIYA: “Kon ang usa naghunahuna nga importante siya apan ang tinuod dili diay, gilimbongan niya ang iyang kaugalingon.”​—Galacia 6:3.

• Likayi ang pagsultig dili realistikong mga pasalig. Ang pagsulti nga “Matuman ang tanan nimong gipangandoy” ug “Mahimo nimo ang tanan nimong gusto” morag nindot paminawon, pero sagad dili nâ mahitabo. Mas magmalamposon ang imong mga anak kon naa silay realistikong mga tumong ug maningkamot nga makab-ot kana.

• Espesipikong pasalamati kon unsay iyang nahimo. Ang pag-ingon lang ug “very good” dili makatabang nga mahimong mapainubsanon ang imong anak. Busa espesipikong isulti kon nganong gipasalamatan nimo siya.

• Limitahe ang imong anak sa paggamit ug social media. Komon sa social media ang pagpabilib sa kaugalingon, diin i-broadcast sa uban ang ilang mga talento ug kalamposan. Lahi ra kaayo ni sa pagkamapainubsanon.

• Tudloi ang imong anak nga mangayo dayog pasaylo. Pasabta ang imong anak kon asa siya nasayop ug nga angkonon kana.

Tudloi ang imong anak nga magmapasalamaton.

PRINSIPYO SA BIBLIYA: “Ipakita nga mapasalamaton mo.”​—Colosas 3:15.

• Pag-apresyar sa kalalangan. Ang mga bata angayng makakat-on sa pag-apresyar sa kalalangan ug makasabot nga gikinahanglan nato ni aron mabuhi. Gikinahanglan nato ang hangin, tubig, ug pagkaon. Gamita ni nga mga pananglitan aron itudlo kanila ang pag-apresyar ug pagpasalamat sa kanindot sa kalalangan.

• Pag-apresyar sa uban. Itudlo sa imong anak nga ang uban mas labaw niya ug imbes maibog sa abilidad sa uban, puwede siyang makakat-on gikan nila.

• Pagpahayag ug apresasyon. Tudloi ang imong anak sa pagsultig “salamat,” ug ipasulti kini uban ang tinuod nga apresasyon. Ang pagkamapasalamaton makatabang nato nga magmapainubsanon.

Tudloi ang imong anak nga may kaayohan ang pagtabang sa uban.

PRINSIPYO SA BIBLIYA: “Magpaubos mo ug isipa ang uban nga labaw kay kaninyo, nga magtan-aw dili lang sa kaugalingong kaayohan, kondili sa kaayohan sab sa uban.”​—Filipos 2:3, 4.

• Hatagi ang imong anak ug buluhaton sa balay. Kon dili nimo hatagag buluhaton sa balay ang imong anak, basin maghunahuna siya nga mas importante ang gusto niyang himoon kay sa maong buluhaton. Angayng unahon ang mga buluhaton sa balay kay sa pagdula. Isulti kon nganong ang paghimo niana nga mga buluhaton makatabang sa uban ug kon nganong apresyahon ug tahoron siya tungod niana.

• Itudlo nga pribilehiyo ang pagtabang sa uban. Dako nig ikatabang sa mga bata nga mahimong hamtong. Dasiga ang imong anak nga maghunahuna kon kinsay tabanganan. Hisgoti uban niya kon unsay iyang ikatabang nila. Komendahi ug suportahi siya sa iyang pagtabang sa uban.