Mga Saksi ni Jehova

Kahubitan: Ang tibuok-kalibotang Kristohanong katilingban sa katawhan kinsa aktibong nagapamatuod bahin kang Jehova nga Diyos ug sa iyang mga katuyoan nga nagaapektar sa katawhan. Bug-os nilang gipasukad sa Bibliya ang ilang mga pagtulon-an.

Unsang mga pagtulon-an sa mga Saksi ni Jehova nga nagapalahi kanila gikan sa ubang mga relihiyon?

(1) Bibliya: Ang mga Saksi ni Jehova nagatuo nga ang tibuok Bibliya maoy dinasig nga Pulong sa Diyos, ug inay kay mosunod sa usa ka kredo nga gipasukad sa tawhanong tradisyon, sila nagatapot sa Bibliya ingong sukdanan sa tanan nilang pagtulon-an.

(2) Diyos: Sila nagasimba kang Jehova ingong bugtong matuod nga Diyos ug libreng nagasulti ngadto sa uban mahitungod kaniya ug sa iyang mahigugmaong mga katuyoan alang sa katawhan. Ang bisan kinsa nga sa publiko nagapamatuod bahin kang Jehova sagad ginaila nga kauban sa bugtong grupo—“Mga Saksi ni Jehova.”

(3) Jesu-Kristo: Sila nagatuo, nga dili si Jesu-Kristo bahin sa usa ka Trinidad, kondili nga, ingon sa gisulti sa Bibliya, siya mao ang Anak sa Diyos, ang una sa mga linalang sa Diyos; nga siya adunay antes-tawong paglungtad ug nga ang iyang kinabuhi gibalhin gikan sa langit ngadto sa tagoangkan sa usa ka ulay, si Maria; nga ang iyang hingpit tawhanong kinabuhi nga gihalad nagahimong posible sa kaluwasan ngadto sa kinabuhing dayon alang kanilang nagahupot ug pagtuo; nga si Kristo sa aktibo nagamando ingong Hari, uban sa hinatag-Diyos nga awtoridad ibabaw sa tibuok nga yuta sukad sa 1914.

(4) Gingharian sa Diyos: Sila nagatuo nga ang Gingharian sa Diyos mao ang bugtong paglaom sa katawhan; nga kana maoy tinuod nga kagamhanan; nga kana sa dili madugay maglaglag sa presenteng daotang sistema sa mga butang, lakip ang tanang tawhanong mga gobyerno, ug nga kana magpatungha ug usa ka bag-ong sistema nga ang pagkamatarong magapabilin.

(5) Langitnong kinabuhi: Sila nagatuo nga 144,000 espiritu-dinihogang mga Kristohanon ang magpakig-ambit uban ni Kristo didto sa iyang langitnong Gingharian, nga magamando ingong mga hari uban kaniya. Sila wala magatuo nga ang langit mao ang ganti alang sa matag usa nga “maayo.”

(6) Ang yuta: Sila nagatuo nga ang orihinal nga katuyoan sa Diyos para sa yuta mamatuman; nga ang yuta sa bug-os pagapuy-an sa mga magsisimba ni Jehova ug kini sila makahimo sa pagpahimulos sa walay kataposang kinabuhi diha sa tawhanong pagkahingpit; nga bisan ang mga patay pagabanhawon alang sa kahigayonan sa pag-ambit niining mga panalangina.

(7) Kamatayon: Sila nagatuo nga ang mga patay wala gayoy kahibalo sa bisan unsa; nga sila walay ginabati nga kasakit ni kalipay didto sa pila ka dapit sa espiritu; nga sila wala magalungtad gawas lamang sa hunahuna sa Diyos, busa ang paglaom sa ilang umaabot nga kinabuhi nahasalig sa usa ka pagkabanhaw gikan sa mga patay.

(8) Kataposang mga adlaw: Sila nagatuo nga kita karon nagapuyo, sukad sa 1914, sa kataposang mga adlaw niining daotang sistema sa mga butang; nga ang pipila nga nakakita sa mga hitabo sa 1914 makakita usab sa kompletong kalaglagan sa karong daotang kalibotan; nga ang mga mahigugmaon sa pagkamatarong makalabang-buhi ngadto sa hininloang yuta.

(9) Bulag gikan sa kalibotan: Sila maikagong nagatinguha nga mahimong dili bahin sa kalibotan, ingon sa gisulti ni Jesus nga mao gayod kana ang iyang mga sumusunod. Sila nagapakitag dalisay nga gugmang Kristohanon alang sa ilang mga silingan, pero dili sila moambit sa politika ug mga gubat sa bisan unsang nasod. Sila nagataganag materyal nga panginahanglan alang sa ilang mga pamilya apan nagalikay sa iya sa kalibotan nga mahakogong pangagpas sa materyal nga mga butang ug personal nga kadungganan ug sa hinobrang pagpatuyang sa kalingawan niini.

(10) Pagpadapat sa tambag sa Bibliya: Sila nagatuo nga importante ang pagpadapat sa tambag sa Pulong sa Diyos sa inadlawng kinabuhi karon—sa panimalay, sa tunghaan, sa patigayon, sa ilang kongregasyon. Nga walay pag-isip sa miaging paagi sa kinabuhi sa usa ka tawo, siya mahimo mang usa sa mga Saksi ni Jehova kon iyang biyaan ang mga buhat nga gitunglo sa Pulong sa Diyos ug magapadapat sa diyosnong mga tambag niini. Pero kon ang bisan kinsa sa ngadtongadto magabatasan sa pagpanapaw, sa pakighilawas, homoseksuwalidad, abuso sa droga, paghuboghubog, pagpamakak, o pangawat, siya palagpoton gikan sa organisasyon.

(Ang talaan sa itaas sa mubo nagatug-an sa pipila dagkong mga pagtulon-an sa mga Saksi ni Jehova pero dili kay maora ang tanang puntos nga ang ilang pagtulon-an lahi gikan sa ila sa ubang mga grupo. Ang Kasulatanhong basihanan alang sa mga pagtulon-an sa itaas makaplagan pinaagig Indise niining basahona.)

Ang mga Saksi ni Jehova ba Amerikanhong relihiyon?

Sila mga tigpaluyo sa Gingharian sa Diyos, dili sa politikal, ekonomiko, o sosyal nga sistema sa bisan unsang nasod niining daang kalibotan.

Tinuod nga ang mga Saksi ni Jehova nakabaton sa ilang moderno-adlaw nga pagsugod didto sa Estados Unidos. Ang dapit sa ilang hedkuwarter sa kalibotan didto nakatabang sa paghimong posible nga patikon ug ipadala ang mga basahon sa Bibliya ngadto sa kinalay-ang mga bahin sa yuta. Apan ang mga Saksi wala magapihigpihig sa bisan unsang nasod; sila makaplagan sa hapit tanang nasod, ug aduna silay mga opisina sa daghang bahin sa yuta aron sa pagdumala sa ilang buluhaton sa maong mga dapit.

Tagda: Si Jesus ingong Hudiyo natawo sa Palestina, apan ang Kristiyanidad dili Palestinyanhong relihiyon, di ba? Ang dapit sa tawhanong pagkahimugso ni Jesus dili mao ang labing importanteng butang nga pagatagdon. Ang gitudlo ni Jesus naggikan sa iyang Amahan, si Jehova nga Diyos, kinsa nagatagad sa mga tawo sa tanang kanasoran nga walay pagdapigdapig.—Juan 14:10; Buh. 10:34, 35.

Sa unsang paagi ang buluhaton sa mga Saksi ni Jehova gisuportahan sa panalapi?

Pinaagig boluntaryong mga amot, sama gayod sa gihimo sa unang mga Kristohanon. (2 Cor. 8:12; 9:7) Walay mga pangolekta nga gihimo sa ilang mga miting; wala sila mangayo ug salapi gikan sa publiko. Ang mga amot sa mga basahon sa Bibliya maoy pagkobre sa galastohan sa pagpatik ug pagpadala.

Ang mga Saksi dili binayran sa pagpamalaybalay o sa pagtanyag ug mga basahon sa Bibliya diha sa kadalanan. Ang gugma sa Diyos ug sa silingan nagapalihok kanila sa paghisgot bahin sa mahigugmaong mga tagana sa Diyos alang sa katawhan.

Ang Watch Tower Bible and Tract Society of Pennsylvania, usa ka legal nga korporasyong relihiyoso nga gigamit sa mga Saksi ni Jehova, giinkorporar niadtong 1884 sumala sa Nonprofit Corporation Law of the Commonwealth of Pennsylvania, U.S.A. Busa, pinaagig balaod dili mahimo, ug dili kana, usa ka negosyo nga kalihokan, ni ang mga indibiduwal makaganansiya pinaagi niini nga Sosyedad. Ang titulo sa katukoran (charter) sa Sosyedad nag-ingon: “Kini [ang Sosyedad] wala maghunahuna sa salapiong abot o ganansiya, iya man o sa laing paagi, alang sa mga membro niini, mga direktor o mga opisyal.”

Ang mga Saksi ni Jehova ba usa ka sekta o kulto?

Ang pipila nagabatbat sa sekta nga nagapasabot ug usa ka grupo nga mibulag gikan sa natukod nga relihiyon. Ang uban nagapadapat sa maong termino ngadto sa usa ka grupo nga nagasunod ug linain tawhanong lider o magtutudlo. Ang maong termino sagad gigamit diha sa mayubiton nga paagi. Ang mga Saksi ni Jehova dili salingsing sa pipila ka iglesya kondili nagalakip sa mga tawo gikan sa tanang matang sa kinabuhi ug gikan sa daghan relihiyosong kagikanan. Wala sila magatutok ngadto kang bisan kinsang tawo, apan hinunoa ngadto kang Jesu-Kristo, ingong ilang lider.

Ang usa ka kulto maoy usa ka relihiyon nga gikaingong dili naandan o kana nagapasiugdag pagsimba sumala sa gilagdang rituwal. Daghang kulto nagasunod sa buhi tawhanong lider, ug sagad ang ilang mga sumusunod nagapuyo nga ginurupo nga nahimulag gikan sa kadaghanan sa katilingban. Ang sukdanan kon unsay naandan, bisan pa niana, kinahanglan mao ang Pulong sa Diyos, ug ang mga Saksi ni Jehova sa bug-os nagatapot sa Bibliya. Ang ilang pagsimba maoy paagi sa kinabuhi, dili rituwal nga debosyon. Wala sila magasunod ug usa ka tawo ni nagapalain sa ilang kaugalingon gikan sa kadaghanan sa katilingban. Sila nagapuyo ug nagatrabaho diha sa taliwala sa ubang katawhan.

Unsang gidugayon na ang relihiyon sa mga Saksi ni Jehova?

Sumala sa Bibliya, ang han-ay sa mga saksi ni Jehova masubay balik sa matinumanong si Abel. Nag-ingon ang Hebreohanon 11:4–12:1: “Pinaagig pagtuo si Abel mihalad ngadto sa Diyos sa labaw ka bililhon kay kang Cain . . . Pinaagig pagtuo si Noe, human mahatagig balaang pasidaan sa mga butang nga wala pa makita, mipakitag diyosnong kahadlok . . . Pinaagig pagtuo si Abraham, sa gitawag siya, misugot sa pag-adto sa usa ka dapit nga iyang pagadawaton ingong panulondon . . . Pinaagig pagtuo si Moises, sa dako na siya, wala mosugot nga pagatawgon nga anak sa anak nga babaye ni Paraon, nga nagpili nga pagasakiton uban sa katawhan sa Diyos kay sa pagpahimulos sa lumalabayng kalipay sa pagpakasala . . . Busa, diay, sanglit kita ginalibotan ug dako kaayong panganod sa mga saksi, iwakli ta ang tanang kabug-at ug ang sala nga daling nagapiit kanato, ug dalaganon ta uban ang paglahutay ang lumba nga gipahimutang sa atong atubangan.”

Mahitungod kang Jesu-Kristo, ang Bibliya nagaingon: “Mao kini ang mga butang nga gisulti sa Amen, ang matinumanon ug tinuod nga saksi, ang sinugdanan sa mga binuhat sa Diyos.” Bahin kang kinsa nga siya usa ka saksi? Siya mismo nag-ingon nga iyang gipahayag ang ngalan sa iyang Amahan. Siya ang kinaunhang saksi ni Jehova.—Pin. 3:14; Juan 17:6.

Nga makapainteres, ang pipila sa mga Hudiyo nangutana kon ang buluhaton ni Jesu-Kristo nagrepresentar ba ug “bag-ong pagtulon-an.” (Mar. 1:27) Sa ulahi, ang pipila sa mga Grego naghunahuna nga si apostol Pablo nagpailaila ug “bag-ong pagtulon-an.” (Buh. 17:19, 20) Kadto bag-o ngadto sa mga igdulungog niadtong nakadungog niana, apan ang importanteng butang mao nga kana ang kamatuoran, nga bug-os nahiuyon sa Pulong sa Diyos.

Ang moderno-adlawng kasaysayan sa mga Saksi ni Jehova nagsugod uban sa pagkaporma sa usa ka grupo alang sa pagtuon sa Bibliya sa Allegheny, Pennsylvania, U.S.A., sayo sa mga tuig 1870. Sa sinugdan sila nailhan lamang ingong mga ‘Bible Students,’ apan sa 1931 ilang gisagop ang Kasulatanhong ngalang mga Saksi ni Jehova. (Isa. 43:10-12) Ang ilang mga pagtulon-an ug mga binuhatan dili man bag-o apan maoy kapasig-ulian sa unang-siglong Kristiyanidad.

Ang mga Saksi ni Jehova nagatuo ba nga ang ilang relihiyon mao lamang ang matuod?

Ang Bibliya wala magauyon sa modernong panghunahuna nga adunay daghang madawat nga mga paagi sa pagsimba sa Diyos. Ang Efeso 4:5 nagaingon nga adunay “usa ka Ginoo, usa ka pagtuo.” Misulti si Jesus: “Masigpit ang pultahan ug hiktin ang dalan nga padulong sa kinabuhi, ug diyutay ra ang nakatultol niini. . . . Dili ang tanang magaingon kanako, ‘Ginoo, Ginoo,’ makasulod sa gingharian sa mga langit, kondili siya nga nagatuman sa kabubut-on sa akong Amahan nga atua sa mga langit.”—Mat. 7:13, 14, 21; tan-awa usab ang 1 Corinto 1:10.

Sa sublisubli ang Kasulatan nagapunting sa lawas (kahugpongan) sa matuod Kristohanong mga pagtulon-an ingong “ang kamatuoran,” ug ang Kristiyanidad gihisgotan ingong “ang dalan sa kamatuoran.” (1 Tim. 3:15; 2 Juan 1; 2 Ped. 2:2) Tungod kay ang mga Saksi ni Jehova nagapasukad sa tanan nilang pagtulon-an, ilang mga sukdanan sa panggawi, ug organisasyonal nga mga paa- gi diha sa Bibliya, ang ilang pagtuo sa Bibliya mismo ingong Pulong sa Diyos nagahatag kanilag hugot nga pagtuo nga ang ilang nabatonan mao gayod ang kamatuoran. Busa ang ilang baroganan dili kay mapasigarbohon kondili nagapasundayag sa ilang pagsalig nga ang Bibliya mao ang hustong sukdanan nga pinasukad niana pagasukdon ang relihiyon sa usa. Dili sila maki-kaugalingon kondili maikagon nga ipaambit ang ilang ginatuohan sa uban.

Dili ba ang ubang mga relihiyon usab nagasunod man sa Bibliya?

Daghan ang nagagamit niana nga may gidak-on. Pero sila ba nagatudlo gayod ug nagabuhat sa nahasulod niana? Tagda: (1) Gikan sa ilang kadaghanang mga hubad sa Bibliya ilang giwagtang ang ngalan sa matuod nga Diyos sa linibo ka besis. (2) Ang doktrina sa Trinidad, ang ilang pagtulon-an sa Diyos mismo, ilang gihulam gikan sa paganong mga tinubdan ug giugmad kana sa presenteng porma kasiglohan human makompleto ang pagsulat sa Bibliya. (3) Ang ilang pagtulon-an sa pagkadimamatay sa tawhanong kalag ingong basihanan sa padayong kinabuhi wala kuhaa gikan sa Bibliya; kana naggamot sa karaang Babilonya. (4) Ang tema sa pagsangyaw ni Jesus mao ang Gingharian sa Diyos, ug siya nagpadala sa iyang mga tinun-an aron sa personal makigsulti sa uban maylabot niana; apan ang mga iglesya karon panagsa rang maghisgot sa maong Gingharian ug ang ilang mga membro wala magabuhat sa buluhatong pagsangyaw “niining maayong balita sa gingharian.” (Mat. 24:14) (5) Si Jesus miingon nga ang iyang tinuod nga mga sumusunod daling mailhan tungod sa ilang nagasakripisyo-kaugalingon nga gugma alang sa usag usa. Tinuod ba kana sa mga relihiyon sa Kakristiyanohan sa dihang ang mga nasod maggubatay? (6) Ang Bibliya nag-ingon nga ang mga tinun-an ni Kristo dili mahimong bahin sa kalibotan, ug kana nagapasidaan nga bisan kinsa ang buot mahimong higala sa kalibotan nagahimo sa iyang kaugalingon nga kaaway sa Diyos; apan ang mga iglesya sa Kakristiyanohan ug ilang mga membro nalambigit pag-ayo sa politikal nga mga kalihokan sa mga nasod. (Sant. 4:4) Tungod sa maong rekord, sa kamaminatud-on ikaingon ba nga sila nagasunod gayod sa Bibliya?

Sa unsang paagi ang mga Saksi ni Jehova nakakab-ot sa ilang pagpatin-aw sa Bibliya?

Ang usa ka yawing punto mao nga ang mga Saksi nagatuo gayod nga ang Bibliya maoy Pulong sa Diyos ug ang anaa niana maoy alang sa atong instruksiyon. (2 Tim. 3:16, 17; Roma 15:4; 1 Cor. 10:11) Busa dili sila modangop sa pilosopikanhong mga pangatarongan aron makalikay sa matin-aw nga mga pahayag sa kamatuoran niana o sa pagpakamatarong sa pagkinabuhi sa mga tawo kinsa misalikway sa moral nga mga sukdanan niana.

Sa pagpunting sa kahulogan sa simbolikong mga pulong diha sa Bibliya, ilang gitugotan ang Bibliya sa pagtaganag kaugalingong pagpatin-aw, inay kay ihatag ang ilang mga teoriya bahin sa kahulogan niana. (1 Cor. 2:13) Ang mga pagbutyag sa kahulogan sa simbolikong mga termino sagad man makaplagan diha sa ubang mga bahin sa Bibliya. (Ingong panig-ingnan, tan-awang Pinadayag 21:1; dayon, maylabot sa kahulogan sa “dagat,” basahang Isaias 57:20. Aron maila “ang Kordero” nga gitumong sa Pinadayag 14:1, tan-awang Juan 1:29 ug 1 Pedro 1:19.)

Mahitungod sa katumanan sa tagna, ilang ginapadapat ang giingon ni Jesus maylabot sa pagkaigmat sa mga hitabo nga motukma kon unsa ang gitagna. (Luc. 21:29-31; itanding 2 Pedro 1:16-19.) Sa mahunahunaon ilang ginabutyag ang maong mga hitabo ug dad-on ang pagtagad ngadto sa giingon sa Bibliya kon unsa ang kahulogan niana.

Si Jesus miingon nga sa ibabaw sa yuta siya adunay usa ka “matinumanon ug maalamong ulipon” (iyang dinihogang mga sumusunod nga giisip ingong usa ka grupo), nga pinaagi sa maong tinugyanan siya magtaganag espirituwal nga pagkaon ngadto kanilang nagalangkob sa panimalay sa pagtuo. (Mat. 24:45-47) Ang mga Saksi ni Jehova nagaila nianang kahikayana. Ingon nga mao kana ang gihimo sa unang-siglong mga Kristohanon, sila nagatutok sa nagamandong lawas sa maong “ulipon” nga matang aron sa pagsulbad sa malisod nga mga suliran—dili pinasukad sa tawhanong kaalam, kondili pinaagig pagkuha o pagpupu sa ilang kahibalo sa Pulong sa Diyos ug sa iyang mga pagdumala uban sa iyang mga alagad, ug uban sa tabang sa espiritu sa Diyos, nga niana sila maikagong nagaampo.—Buh. 15:1-29; 16:4, 5.

Nganong sa nangaging katuigan aduna man ing mga kausaban sa mga pagtulon-an sa mga Saksi ni Jehova?

Ang Bibliya nagapakita nga si Jehova nagapaarang sa iyang mga alagad sa pagkasabot sa iyang katuyoan diha sa mauswagong paagi. (Prov. 4:18; Juan 16:12) Busa, ang mga propeta nga balaang giinspirar sa pagsulat sa mga bahin sa Bibliya wala makasabot sa kahulogan sa tanang butang nga ilang gisulat. (Dan. 12:8, 9; 1 Ped. 1:10-12) Naamgohan sa mga apostol ni Jesu-Kristo nga dihay daghan pa nga wala nila masabti sa ilang panahon. (Buh. 1:6, 7; 1 Cor. 13:9-12) Ang Bibliya nagapakita nga adunay dakong pag-uswag sa kahibalo sa kamatuoran sulod sa “panahon sa kataposan.” (Dan. 12:4) Ang napauswag nga kahibalo sagad nagakina- hanglan ug mga pagpasibo o kausaban diha sa panghunahuna sa usa. Ang mga Saksi ni Jehova mahinangpong mapaubsanon sa paghimo sa maong mga kausaban.

Ngano ang mga Saksi ni Jehova nagasangyaw sa pamalaybalay?

Si Jesus mitagna alang sa atong adlaw niining buluhatona: “Kining maayong balita sa gingharian igawali sa tibuok pinuy-anang yuta alang sa pamatuod ngadto sa tanang kanasoran; ug unya moabot ang kataposan.” Siya misugo usab sa iyang mga tinun-an: “Panlakaw kamo . . . ug paghimog mga tinun-an sa katawhan sa tanang kanasoran.”—Mat. 24:14; 28:19.

Sa gipadala ni Jesus ang iyang unang mga tinun-an, siya mimando kanila sa pag-adto sa mga balay sa mga tawo. (Mat. 10:7, 11-13) Nag-ingon ang apostol nga si Pablo bahin sa iyang ministeryo: “Ako wala maglilong sa pagtug-an kaninyo sa bisan unsang butang mga makaayo ni sa pagtudlo kaninyo sa katilingban ug gikan sa balay ngadto sa balay.”—Buh. 20:20, 21; tan-awa usab ang Buhat 5:42.

Ang mensahe nga gimantala sa mga Saksi nagalangkit sa mga kinabuhi sa katawhan; sila gustong magmabinantayon nga wala gayoy masayloan. (Sof. 2:2, 3) Ang ilang mga pagduaw gipalihok sa gugma—una alang sa Diyos, usab alang sa ilang silingan.

Ang usa ka komperensiya sa relihiyosong mga pangulo sa Espanya nagmatikod niini: “Tingali [ang mga iglesya] sobrang nagpabaya nianang sa tino nagalangkob sa labing dakong pagkalinga sa mga Saksi—ang pagduaw sa balay, nga nagsumikad sa apostolikong metodo sa una gayong iglesya. Samtang ang mga iglesya, sa pipila ka okasyon, nagalimite sa ilang kaugalingon sa pagtukod sa ilang mga templo, sa pagbagting sa ilang mga kampana aron sa pagpadugok sa mga tawo ug sa pagwali sa sulod sa ilang mga dapit sa pagsimba, [ang mga Saksi] nagasunod sa apostolikong taktika sa pag-adto sa balay ngadto sa balay ug sa pagpahimulos sa matag okasyon sa pagpamatuod.”—El Catolicismo, Bogotá, Colombia, Septiyembre 14, 1975, p. 14.

Apan ngano ang mga Saksi nagasublisubli sa pagduaw bisan sa mga balay sa katawhan kinsa dili makiglabot sa ilang pagtuo?

Dili nila ipugos ang ilang mensahe sa uban. Apan sayod sila nga ang mga tawo mobalhin ug bag-ong mga puy-anan ug ang mga kahimtang sa mga tawo mausab man. Karon ang usa ka tawo hayan puliki kaayo nga dili makapaminaw; sa laing panahon basin siya malipayong mogahin ug panahon. Hayan ang usa ka membro sa panimalay dili interesado, pero ang uban basin interesado. Ang mga tawo mismo magakausab; ang seryosong mga suliran sa kinabuhi basin magpadasig ug pagkamatngon sa espirituwal nga panginahanglan.—Tan-awa usab ang Isaias 6:8, 11, 12.

Nganong ang mga Saksi ni Jehova ginalutos ug ginabiaybiay?

Si Jesus miingon: “Kon ang kalibotan nagadumot kaninyo, hibaloi nga kini nagdumot na kanako sa wala pa kini magdumot kaninyo. Kon kamo bahin pa sa kalibotan, ang kalibotan mahigugma sa mga iya. Karon kay kamo dili man bahin sa kalibotan, apan gipili ko kamo gikan sa kalibotan, tungod niini ang kalibotan nagadumot kaninyo.” (Juan 15:18, 19; tan-awa usab ang 1 Pedro 4:3, 4.) Ang Bibliya nagapakita nga ang tibuok kalibotan nailalom sa pagmando ni Satanas; ug siya ang dakong tighulhog sa paglutos.—1 Juan 5:19; Pin. 12:17.

Gisultihan usab ni Jesus ang iyang mga tinun-an: “Kamo mahimong mga tumong sa pagdumot sa tanang tawo tungod sa akong ngalan.” (Mar. 13:13) Ang pulong “ngalan” dinhi nagakahulogan kon unsa sa opisyal si Jesus, ang Mesiyanikong Hari. Moabot ang paglutos tungod kay ang mga Saksi ni Jehova nagauna man sa mga sugo niya kay sa kang bisan kinsang yutan-ong magmamando.

Kon Adunay Moingon—

‘Ngano kamong mga tawhana dili magpalangkit sa pagbuhat sa mga butang aron makatabang sa paghimo sa kalibotan (ang komunidad) nga usa ka dapit nga mas maayong puy-an?’

Mahimong tubagon mo: ‘Ang mga kahimtang sa komunidad sa dayag importante kanimo, ug mao man usab kana kanako. Makapangutana ako, Unsang suliran nga gibati mo nga kinahanglang maapil sa una nga pagatagdon?’ Dayon tingali modugang: ‘Nganong gibati mo nga kini nahimong ingon niana ka dakong panginahanglan? . . . Dayag, nga ang dihadiha nga aksiyon sa maong butang makaayo, apan mapaneguro ko nga ikaw mouyon nga buot mong makita ang kauswagan diha sa pasukaranang layog-abot. Kini ang paagi nga kami ingong mga Saksi ni Jehova nagatagad sa maong butang. (Ipatin-aw kon unsay atong ginabuhat sa pag-abag sa katawhan aron ikapadapat ang mga prinsipyo sa Bibliya sa ilang mga kinabuhi sa pagsulbad sa gamot sa suliran sa personal nga paagi; usab, kon unsa ang pagabuhaton sa Gingharian sa Diyos, ug kon ngano nga kini sa permanente magsulbad sa problema sa katawhan.)’

O ikaw makaingon: ‘(Human makobrehi ang pipila ka puntos sa unang tubag . . . ) Ang pipilang katawhan nagaamot alang sa kauswagan sa komunidad pinaagig paghatag ug kuwarta; ang uban nagabuhat niana pinaagig pagboluntaryo sa ilang mga serbisyo. Ang mga Saksi ni Jehova nagabuhat nianang duha. Tugoti akong mopatin-aw.’ Dayon tingali modugang: (1) ‘Aron mahimong usa sa mga Saksi ni Jehova, ang usa ka tawo sa matanlagon magabayad sa iyang buluhisan; kana magtaganag salapi alang sa gobyerno sa pagsuplay sa gikinahanglang mga serbisyo.’ (2) ‘Labaw pa niana ang gihimo namo, nagaduaw sa mga balay sa katawhan, nagatanyag ug pagtuon sa Bibliya uban kanila nga walay bayad. Sa dihang sila masinati na sa ginaingon sa Bibliya, sila makakat-on sa pagpadapat sa mga prinsipyo sa Bibliya ug busa makasulbad sa ilang mga gumonhap.’

Laing posibilidad: ‘Nalipay akong gipatungha mo ang maong punto. Daghang tawo wala gayod mangutana sa pagtino kon unsa ang aktuwal nga ginabuhat sa mga Saksi maylabot sa buluhaton sa komunidad. Dayag nga adunay labaw sa usa ka paagi aron sa pagtanyag ug tabang.’ Dayon tingali modugang: (1) ‘Ang pipila nagabuhat niana pinaagig pagtukod ug mga institusyon—mga ospital, mga puy-anan sa mga tigulang, mga sentrong rehabilitasyon alang sa mga nagiyan sa droga, ug uban pa. Ang uban hayan moboluntaryo sa pagduaw sa mga balay mismo sa katawhan ug pagtanyag ug tukmang tabang kutob sa ilang maarangan. Mao kana ang ginabuhat sa mga Saksi ni Jehova.’ (2) ‘Among napanid-an nga adunay butang nga makabag-o sa bug-os nga panglantaw sa usa ka tawo sa kinabuhi, ug mao kana ang kahibalo sa ginapakita sa Bibliya nga mao ang tinuod nga katuyoan sa kinabuhi ug ang malaoman sa ugma-damlag.’

Dugang sugyot: ‘Akong gipabilhan ang pagpatungha mo sa maong pangutana. Gusto tang makita nga mapauswag ang mga kahimtang, di ba mao? Makasukna ako, Unsa ang pagbati mo maylabot sa gibuhat mismo ni Jesus? Moingon ka ba nga ang iyang paagi sa pag-adto sa katawhan aron sa pagtabang mapuslanon? . . . Gipaninguha namong sundon ang iyang panig-ingnan.’

‘Ang mga Kristohanon gidahom nga mahimong mga saksi kang Jesus, dili kang Jehova’

Mahimong tubagon mo: ‘Punto kana nga makapainteres nga imong gipatungha. Ug husto ka nga aduna kitay responsabilidad sa pagkahimong mga saksi kang Jesus. Maoy hinungdan ang papel ni Jesus diha sa katuyoan sa Diyos gipasiugda sa among mga basahon. (Basin gusto mong gamiton ang usa ka kinabag-ohang libro o magasin nga nagapasundayag niini.) Pero aniay butang nga hayan bag-ong punto alang kanimo. (Pin. 1:5) . . . Kang kinsa nga si Jesus “ang Matinumanong Saksi”? (Juan 5:43; 17:6) . . . Si Jesus mihatag ug panig-ingnan nga ato gayong sundogon, di ba mao? . . . Nganong importante kaayo nga makaila kang Jesus ug sa iyang Amahan? (Juan 17:3)’