Mga Pinulongan, Pagsulti sa

Kahubitan: Usa ka espesyal nga katakos nga gihatag pinaagi sa balaang espiritu ngadto sa pipila sa mga tinun-an sa unang Kristohanong kongregasyon nga nagpaarang kanila sa pagsangyaw o sa ubang paagi naghimaya sa Diyos diha sa linguwahe gawas pa sa ilang kaugalingon.

Nagaingon ba ang Bibliya nga ang tanang nakabaton sa espiritu sa Diyos “nagasultig mga pinulongan”?

1 Cor. 12:13, 30: “Sa pagkamatuod pinaagig usa ka espiritu kitang tanan nabawtismohan ngadto sa usa ka lawas . . . Dili ang tanan adunay mga hiyas sa pag-ayog mga sakit, sila ba? Dili ang tanan nagasultig mga pinulongan, sila ba?” (Usab ang 1 Corinto 14:26)

1 Cor. 14:5: “Karon buot ko nga kamong tanan magsultig mga pinulongan, apan akong gipalabi nga kamo managna. Sa pagkamatuod, siya nga nagapanagna mas dako kay kaniya nga nagsultig mga pinulongan, gawas kon, sa tinuoray, iyang ginahubad, aron ang kongregasyon mapalig-on.”

Ang paglitok sa mga pulong nga maorag nagasalimoang o maukyabon (ecstatic speech) diha sa linguwahe nga ang usa ka tawo dili gayod maantigo niana nagapamatuod ba nga siya nakabaton sa balaang espiritu?

Ang katakos ba sa “pagsultig mga pinulongan” mahimong magagikan sa tinubdan nga dili iya sa matuod nga Diyos?

1 Juan 4:1: “Mga hinigugma, ayaw ninyo pagtuohi ang matag dinasig nga pulong [“matag espiritu,” KJ, RS], apan sulayi ninyo ang dinasig nga mga pulong aron sa pagsuta kon kana ba gikan sa Diyos.” (Tan-awa usab ang Mateo 7:21-23; 2 Corinto 11:14, 15.)

Taliwala kanilang ‘nanagsultig mga pinulongan’ karong mga adlawa maoy mga Pentekostal ug mga Baptista, mga Romanong Katoliko usab, mga Episkopaliano, mga Metodista, mga Luterano, ug mga Presbiteriano. Si Jesus miingon nga ang balaang espiritu maoy ‘magtultol sa iyang mga tinun-an ngadto sa tibuok nga kamatuoran.’ (Juan 16:13) Ang mga membro ba sa kada usa niining mga relihiyona nagatuo nga ang uban usab nga “nagasultig mga pinulongan” gitultolan ngadto sa “tibuok nga kamatuoran”? Sa unsang paagi mahimo kana, sanglit silang tanan dili man nagakauyon? Unsang espirituha ang nagapaposible kanila sa “pagsultig mga pinulongan”?

Miadmeter ang hiniusang pahayag sa ‘Fountain Trust and the Church of England Evangelical Council’: “Kami usab nahibalo nga ang susamang kahibudngang kahimtang mahitabo man sa okulto/demonyohanong impluwensiya.” (Gospel and Spirit, Abril 1977, gipatik sa ‘Fountain Trust and the Church of England Evangelical Council,’ p. 12) Ang basahong Religious Movements in Contemporary America (giedit pinaagi ni Irving I. Zaretsky ug Mark P. Leone, nga nagkutlo kang L. P. Gerlach) nagtaho nga didto sa Haiti ang ‘pagsultig mga pinulongan’ gipaila sa Pentekostal ug Voodoo nga mga relihiyon.—(Princeton, N.J.; 1974), p. 693; tan-awa usab ang 2 Tesalonica 2:9, 10.

Ang ‘pagsultig mga pinulongan’ nga ginabuhat karong mga adlawa pareho ba sa gihimo sa una-siglong mga Kristohanon?

Sa unang siglo, ang milagrosong mga gasa sa espiritu, apil na ang katakos sa “pagsultig mga pinulongan,” nagpamatuod nga ang pabor sa Diyos nabalhin gikan sa Hudiyong sistema sa pagsimba ngadto sa bag-ong natukod Kristohanong kongregasyon. (Heb. 2:2-4) Sanglit kay ang tumong nakab-ot na sa unang siglo, gikinahanglan ba nga pamatud-an na usab kana pag-usab sa atong adlaw?

Sa unang siglo, ang katakos sa “pagsultig mga pinulongan” naghatag ug dakong kadasig sa internasyonal nga buluhaton sa pagpamatuod nga gisugo ni Jesus nga buhaton sa iyang mga sumusunod. (Buh. 1:8; 2:1-11; Mat. 28:19) Ingon ba niana nga paagi ang paggamit sa maong hiyas niadtong “nagasultig mga pinulongan” karong mga adlawa?

Sa unang siglo, sa dihang ang mga Kristohanon ‘nagsultig mga pinulongan,’ ang ilang gisulti nasabtan ang kahulogan sa mga tawo nga maantigo sa maong mga linguwahe. (Buh. 2:4, 8) Karon mga adlawa, dili ba tinuod nga ang ‘pagsultig mga pinulongan’ sagad nagalangkit sa maorag nagasalimoang nga paglitok sa mga pulong nga dili masabtan?

Sa unang siglo, ang Bibliya nagapakita, ang mga kongregasyon gikutohan (limitihan) sa ‘pagsultig mga pinulongan’ ngadto sa duha o tulo ka tawo kinsa pabuhaton niana sa tino nga miting; ang “matag usa magaulos sa pagsulti,” ug kon walay taghubad sa kahulogan sila magahilom. (1 Cor. 14:27, 28, RS) Ingon ba niana ang ginabuhat karong mga adlawa?

Tan-awa usab ang mga panid 173, 174, ubos sa ulohang “Espiritu.”

Mahimo kaha nga ang balaang espiritu nagatultol sa mga “charismatics” ngadto sa mga buhat nga saylo pa sa makaplagan diha sa Kasulatan?

2 Tim. 3:16, 17: “Ang tibuok Kasulatan dinasig sa Diyos ug mapuslanon alang sa pagpanudlo, alang sa pagbadlong, alang sa pagpanul-id, alang sa pagmatuto sa pagkamatarong, aron ang tawo sa Diyos sa bug-os takos, bug-os masangkapan alang sa tanang maayong buhat.” (Kon adunay moangkon nga nakabaton sa dinasig nga mensahe nga nahasupak sa mga pagpadayag sa espiritu sa Diyos pinaagi ni Jesus ug sa iyang mga apostol, posible ba nga kana gikan sa samang tinubdan?)

Gal. 1:8: “Bisan pa kon kami o usa ka manulonda nga gikan sa langit magawali kaninyo ingong maayong balita nianang [“nga sukwahi,” NE] dili sumala sa among giwali kaninyo ingong maayong balita, ipatunglo siya.”

Ang paagi ba sa kinabuhi sa mga membro sa mga organisasyon nga nagauyon sa ‘pagsultig mga pinulongan’ nagahatag ug ebidensiya nga nakabaton sa espiritu sa Diyos?

Ingong usa ka grupo sila ba nagapadayag gayod sa mga bunga sa espiritu sama sa kaaghop ug pugong-kaugalingon? Kini bang mga hiyasa dayag gayod sa mga tawo nga nagatambongan sa ilang mga miting alang sa pagsimba?—Gal. 5:22, 23.

Sila ba gayod “dili bahin sa kalibotan”? Tungod niini sila ba adunay bug-os nga pagkamahinalaron dapig sa Gingharian sa Diyos o sila ba nalambigit sa politikanhong mga kalihokan sa kalibotan? Nagpabilin ba silang mahinlo sa pagkasad-an-sa-dugo sa panahon sa gubat? Ingong grupo sila ba adunay maayong dungog tungod sa paglikay sa daotang kagawian sa kalibotan?—Juan 17:16; Isa. 2:4; 1 Tes. 4:3-8.

Ang matuod nga mga Kristohanon karong mga adlawa mailhan ba pinaagig katakos sa “pagsultig mga pinulongan”?

Juan 13:35: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”

1 Cor. 13:1, 8: “Kon ako nagasultig mga pinulongan sa mga tawo ug sa mga manulonda apan walay gugma, ako nahimong usa ka masaba nga agong o piyangpiyang nga nagatagingting. Ang gugma dili gayod mapakyas. Pero kon aduna may mga gasa sa pagtagna, kini mahanaw ra; kon aduna may pagsultig mga pinulongan, kini pahunongon ra.”

Si Jesus miingon nga ang balaang espiritu moabot ibabaw sa iyang mga sumusunod ug nga sila mahimong mga saksi kaniya ngadto sa kinalay-ang bahin sa yuta. (Buh. 1:8) Siya misugo kanila sa “paghimog mga tinun-an sa katawhan sa tanang kanasoran.” (Mat. 28:19) Siya usab nagtagna nga ‘kining maayong balita sa gingharian igawali sa tibuok pinuy-anang yuta alang sa usa ka pamatuod sa tanang kanasoran.’ (Mat. 24:14) Kinsa karong mga adlawa, ingon nga grupo ug sa tinagsatagsa, ang nagabuhat niining buluhatona? Uyon sa gisulti ni Jesus, di ba kinahanglang atong pangitaon kini ingong pamatuod nga ang usa ka grupo nakabaton sa balaang espiritu?

Ang ‘pagsultig mga pinulongan’ magapadayon ba hangtod sa pag-abot nianang “hingpit”?

Sa 1 Corinto 13:8 ang pagpunting gihimo ngadto sa pipila ka milagrosong mga gasa—tagna, mga pinulongan, ug kahibalo. Nagtumong na usab ang 1Co 13 bersikulo 9 sa maong duha ka gasa niini—kahibalo ug tagna—nga nag-ingon: “Kay kita sa bahin nahibalo, ug kita sa bahin nagatagna.” (KJ) O, ingon sa mabasa sa RS: “Kay ang atong kahibalo dili hingpit ug ang atong tagna dili hingpit.” Dayon ang 1Co 13 bersikulo 10 nag-ingon: “Apan sa dihang moabot na ang hingpit, nan kanang dili hingpit igahiklin ra.” (KJ) Ang pulong “hingpit” gihubad gikan sa Gregong teʹlei·on, nga nagapasabot sa kahulogan nga pagkabug-os, kompleto, o hingpit. Ang Ro, By, ug NW dinhi naghubad niana nga “kompleto.” Matikdi nga dili ang hiyas sa mga pinulongan ang gihisgotan nga “dili hingpit,” “sa bahin,” o dili kompleto. Kana naghisgot sa “tagna” ug “kahibalo.” Sa laing pagkasulti, bisan uban sa maong milagrosong mga gasa, ang unang mga Kristohanon aduna lamang ing dili hingpit o dili kompletong pagpanabot sa katuyoan sa Diyos. Apan sa dihang matuman na ang mga tagna, sa dihang malampos na ang katuyoan sa Diyos, nan “kanang hingpit,” o kompleto, moabot na. Busa, kini dayag nga wala maghisgot kon unsang gidugayon ang ‘gasa sa mga pinulongan’ magpadayon.

Apan, ang Bibliya nagabutyag kon sa unsang gidugayon ang ‘gasa sa mga pinulongan’ mahimong bahin sa Kristohanong kasinatian. Sumala sa rekord, kining gasaha ug ang ubang mga gasa sa espiritu kanunayng gipadangat sa mga tawo pinaagig pagpatong sa mga kamot sa mga apostol ni Jesu-Kristo o diha sa ilang atubangan. (Buh. 2:4, 14, 17; 10:44-46; 19:6; tan-awa usab ang Buhat 8:14-18.) Busa, human sa ilang kamatayon ug sa dihang ang mga indibiduwal nga sa maong paagi nakadawat sa mga gasa nangamatay, ang milagrosong mga gasa nga misangpot tungod sa paglihok sa espiritu sa Diyos kinahanglang midangat na sa kataposan niana. Ang maong panghunahuna nagauyon sa katuyoan sa maong mga gasa ingon sa gihisgotan sa Hebreohanon 2:2-4.

Dili ba ang Marcos 16:17, 18 (KJ) nagapakita nga ang katakos sa “pagsultig mga bag-ong pinulongan” maoy ilhanan nga nagapaila sa mga magtutuo?

Kinahanglang pagamatikdan nga kining mga bersikuloha nagatumong dili lamang sa ‘pagsultig mga bag-ong pinulongan’ kondili usab sa pagkupot sa mga serpente ug pag-inom sa makapatayng hilo. Ang tanan ba nga “nagasultig mga pinulongan” nagadasig usab niining mga buhata?

Alang sa mga komento maylabot sa mga katarongan kon ngano kining mga bersikuloha wala dawata sa tanang eskolar sa Bibliya, tan-awa ang mga panid 285, 286, ubos sa ulohang “Pag-ayog mga Sakit.”

Kon Adunay Moingon—

‘Nagatuo ka ba sa pagsultig mga pinulongan?’

Mahimong tubagon mo: ‘Makasulti man gayod ang mga Saksi ni Jehova sa daghang pinulongan, apan dili kami mosalga diha sa paglitok sa mga pulong nga maorag nagasalimoang sa “dili iladong mga pinulongan.” Apan makasukna ako, Ikaw ba nagatuo nga ang “pagsultig mga pinulongan” nga ginabuhat karong mga adlawa pareho gayod sa gibuhat sa una-siglong mga Kristohanon?’ Dayon tingali modugang: ‘Ania ang pipila ka puntos sa pagtandi nga akong nakaplagan nga makapainteres kaayo. (Basin gamiton ang materyal gikan sa mga panid 340, 341.)’

O ikaw makaingon: ‘Kami nagatuo gayod nga “nagsultig mga pinulongan” ang una-siglong mga Kristohanon ug nga kini mihulip sa tinong mga panginahanglan niadtong panahona. Nahibalo ka ba kon unsa kadtong mga panginahanglana?’ Dayon tingali modugang: (1) ‘Nagsilbe kadtong ilhanan nga giwaling sa Diyos ang iyang pabor gikan sa Hudiyong sistema ngadto sa bag-ong napormang Kristohanong kongregasyon. (Heb. 2:2-4)’ (2) ‘Kadto mapuslanong paagi sa pagpakaylap sa maayong balita sa internasyonal nga gilapdon sa hamubong panahon. (Buh. 1:8)’