Kinsa ang Diyos?

1, 2. Unsay pirmeng ipangutana sa mga tawo?

ANG mga bata daghag pangutana. Kon tubagon nimo sila, mangutana silag ‘Ngano?’ Ug kon motubag na pod ka, mangutana na sab silag ‘Ngano man?’

² Bata man ta o tigulang, naa tay mga pangutana, sama sa kon unsay atong kaonon, sul-obon, o paliton. O basin duna tay importanteng mga pangutana bahin sa atong kinabuhi ug kaugmaon. Pero dihang dili ta makakitag maayong tubag niini, basin mohunong na ta sa pagpangita sa mga tubag.

 3. Nganong daghan ang nagtuo nga dili nila makita ang tubag sa ilang importanteng mga pangutana?

³ Duna bay tubag ang Bibliya sa atong importanteng mga pangutana? Ang uban nagtuo nga duna, pero para nila ang Bibliya lisod sabton. Nagtuo sila nga mga magtutudlo o pari lang ang makatubag niana. Ang uban maulaw moangkon nga wala sila mahibalo sa tubag. Unsay imong ikasulti niana?

4, 5. Unsang importanteng mga pangutana ang gusto nimong matubag? Nganong kinahanglan kang magpadayon sa pagpangita sa mga tubag?

⁴ Gusto tingali nimong matubag ang mga pangutana nga sama sa: Unsay katuyoan sa akong kinabuhi? Unsay mahitabo kon mamatay ko? Naa ba gyoy Diyos? Ang iladong Magtutudlo nga si Jesus miingon: “Padayon sa pagpangayo, ug kamo pagahatagan; padayon sa pagpangita, ug kamo makakaplag; padayon sa pagpanuktok, ug kamo pagaablihan.” (Mateo 7:7) Ayawg hunong sa pagpangita sa tinuod nga tubag.

⁵ Kon ‘padayon kang mangita,’ makita nimo ang mga tubag diha sa Bibliya. (Proverbio 2:1-5) Dili lisod sabton ang mga tubag niini. Ang imong makat-onan makatabang nimo nga magmalipayon karon ug maghatag nimog nindot nga paglaom sa umaabot. Hisgotan nato ang usa ka pangutana nga nakapalibog sa daghang tawo.

 6. Nganong ang uban nagtuo nga ang Diyos wala maghunahuna sa atong kaayohan?

⁶ Daghan ang nagtuo nga ang Diyos wala maghunahuna sa atong kaayohan. Para nila, kon siya naghunahuna pa, dili unta ingon niini ang kalibotan. Bisag asa naay gubat, pagdumot, ug kalisdanan. Ang mga tawo masakit, mag-antos, ug mamatay. Ang uban naglibog, ‘Kon ang Diyos naghunahuna sa atong kaayohan, nganong gitugotan man niya kining tanang pag-antos?’

 7. (a) Sa unsang paagi ang mga lider sa relihiyon nagtudlo nga gipaantos ta sa Diyos? (b) Nganong makaseguro ta nga ang Diyos dili maoy hinungdan sa daotang mga panghitabo?

⁷ Usahay, ang mga lider sa relihiyon magtudlo nga gipaantos ta sa Diyos. Dihang may daotang mahitabo, moingon sila nga pagbuot ni sa Diyos. Dihang moingon sila ana, gibasol nila ang Diyos. Pero ang Bibliya nagtudlo nga ang Diyos dili gayod magpahinabog daotan. Ang Santiago 1:13 nag-ingon nga ang Diyos dili mosulay kang bisan kinsa pinaagig daotan. Kini nag-ingon: “Dihang ang usa anaa sa pagsulay, dili siya angayng moingon: ‘Gisulayan ko sa Diyos.’ Kay ang Diyos dili masulayan sa pagbuhat ug daotan, ni siya mosulay kang bisan kinsa pinaagi sa pagbuhat ug daotan.” Nagpasabot kini nga bisag wala pugngi sa Diyos ang daotang panghitabo, dili siya ang nagpahinabo niana. (Basaha ang Job 34:10-12.) Mogamit tag pananglitan.

 8, 9. Nganong sayop nga basolon ang Diyos tungod sa atong mga problema? Paghatag ug pananglitan.

⁸ Ang usa ka batan-ong lalaki nagpuyo uban sa iyang ginikanan. Pinangga kaayo siya sa iyang amahan ug gitudloan siya kon unsaon paghimog maayong mga desisyon. Dayon, ang batan-ong lalaki mirebelde sa iyang amahan ug milayas. Naghimo siyag daotan ug nagkaproblema. Basolon ba nimo ang iyang amahan sa nahitabo kay gitugotan niyang molayas ang iyang anak? Siyempre, dili! (Lucas 15:11-13) Sama sa maong amahan, wala pugngi sa Diyos ang mga tawo dihang mirebelde sila ug naghimog daotan. Busa dihang may daotang panghitabo, angay natong hinumdoman nga ang Diyos dili maoy nagpahinabo niana. Sayop gayod nga basolon ang Diyos.

⁹ Dunay maayo kaayong rason kon nganong gitugotan pa sa Diyos ang daotang mga panghitabo. Sa Kapitulo 11, mahibaloan nimo kon unsay giingon sa Bibliya bahin niini. Pero makaseguro ka nga gimahal ta sa Diyos ug dili gayod siya ang mabasol sa atong mga problema. Gani, siya lamang ang makasulbad niana.​—Isaias 33:2.

10. Nganong makaseguro ta nga ayohon sa Diyos ang tanang kadaot nga gihimo sa daotang mga tawo?

¹⁰ Ang Diyos balaan. (Isaias 6:3) Ang tanan niyang himoon putli, hinlo, ug maayo maong makasalig ta niya. Dili ingon niana ang mga tawo. Masayop sila usahay. Ug bisan ang usa ka matinud-anon kaayong magmamando walay gahom sa pag-ayo sa tanang kadaot nga gihimo sa mga daotan. Walay tawo nga may gahom nga sama sa gahom sa Diyos. Kaya ug gusto niyang ayohon ang tanang kadaot nga gihimo sa mga daotan. Iyang wad-on ang tanang daotan hangtod sa hangtod.​—Basaha ang Salmo 37:9-11.

11. Unsay pagbati sa Diyos dihang naa kay mga problema?

¹¹ Unsay pagbati sa Diyos bahin sa nagakahitabo sa kalibotan ug dihang naa kay mga problema? Ang Bibliya nagtudlo nga ang Diyos “nahigugma sa hustisya.” (Salmo 37:28) Busa dako kaayong butang kaniya kon unsay husto ug kon unsay sayop. Maguol siya dihang mag-antos ang mga tawo. Ang Bibliya nag-ingon nga “naguol ang iyang kasingkasing” dihang nakita niya ang grabeng pagkadaotan sa una. (Genesis 6:5, 6) Wala mausab ang Diyos. (Malaquias 3:6) Ang Bibliya nag-ingon nga gimahal gyod ka sa Diyos.​—Basaha ang 1 Pedro 5:7.

12, 13. (a) Nganong mobati tag gugma sa uban, ug unsay atong gibati sa mga pag-antos sa kalibotan karon? (b) Nganong makaseguro ta nga wad-on sa Diyos ang tanang pag-antos ug inhustisya?

¹² Nag-ingon sab ang Bibliya nga gilalang ta sa Diyos sumala sa iyang larawan. (Genesis 1:26) Nagpasabot kana nga gihimo ta sa Diyos nga may maayong mga hiyas nga sama sa iyaha. Busa kon maguol ka dihang makakita kag mga inosente nga nag-antos, labaw na gyod ang Diyos! Giunsa nato pagkahibalo?

¹³ Ang Bibliya nagtudlo nga “ang Diyos gugma.” (1 Juan 4:8) Ang tanang himoon sa Diyos maoy tungod sa gugma. Busa mobati tag gugma kay ang Diyos gugma. Hunahunaa: Kon naa kay gahom, imo bang wad-on ang tanang pag-antos ug inhustisya sa kalibotan? Siyempre himoon gyod na nimo kay gihigugma nimo ang mga tawo. Himoon sab kaha na sa Diyos? Naa siyay gahom ug gihigugma ta niya maong iyang wad-on ang tanang pag-antos ug inhustisya. Busa ang tanang saad sa Diyos nga gihisgotan sa sinugdanan niini nga libro matuman gayod! Pero, aron makasalig ka niini nga mga saad, kinahanglang mas mailhan pa nimo ang Diyos.

14. Unsay ngalan sa Diyos, ug giunsa nato pagkahibalo nga kinahanglan nato ning gamiton?

¹⁴ Kon naa kay gustong higalaon, kasagaran unsay una nimong isulti niya? Ang imong ngalan. Ang Diyos ba may ngalan? Daghang relihiyon nag-ingon nga Diyos o Ginoo ang iyang ngalan, pero dili ni ngalan. Titulo lang ni, sama sa “hari” o “presidente.” Gisultihan ta sa Diyos nga ang iyang ngalan maoy Jehova. Ang Salmo 83:18 nag-ingon: “Ang katawhan makaila unta nga ikaw, kansang ngalan maoy Jehova, ikaw lamang ang Labing Hataas ibabaw sa tibuok yuta.” Gigamit sa mga magsusulat sa Bibliya ang ngalan sa Diyos sa linibo ka beses. Gusto ni Jehova nga mahibalo ka sa iyang ngalan ug gamiton nimo kini. Iya kining gisulti nimo aron mahimo ka niyang higala.

15. Unsay kahulogan sa ngalang Jehova?

¹⁵ Ang ngalang Jehova makahuloganon. Kini nagkahulogan nga matuman sa Diyos ang tanan niyang saad ug mapalampos niya ang iyang katuyoan. Walay makapugong niya. Si Jehova lang ang angayan niini nga ngalan.a

16, 17. Unsay kahulogan sa (a) “ang Labing Gamhanan”? (b) “Hari nga walay kataposan”? (c) “Maglalalang”?

¹⁶ Sa ato nang nabasa, ang Salmo 83:18 nag-ingon bahin kang Jehova: “Ikaw lamang ang Labing Hataas.” Ang Pinadayag 15:3 nag-ingon sad: “Dako ug katingalahan ang imong mga buhat, Jehova nga Diyos, ang Labing Gamhanan. Matarong ug matuod ang imong mga dalan, Hari nga walay kataposan.” Unsay kahulogan sa titulong “ang Labing Gamhanan”? Nagkahulogan kana nga si Jehova mas gamhanan kay kang bisan kinsa sa tibuok uniberso. Ug ang titulong “Hari nga walay kataposan” nagkahulogan nga siya kanunayng naglungtad. Ang Salmo 90:2 nagpatin-aw nga siya walay sinugdanan ug walay kataposan. Dili ba talagsaon kaayo na?

¹⁷ Si Jehova lang ang Maglalalang. Ang Pinadayag 4:11 nag-ingon: “Takos ka, Jehova nga among Diyos, nga modawat sa himaya ug sa dungog ug sa gahom, kay gilalang nimo ang tanang butang, ug tungod sa imong kabubut-on sila milungtad ug nalalang.” Oo, si Jehova ang nagbuhat sa tanan​—gikan sa mga anghel ug mga bituon sa kalangitan, mga bunga sa kakahoyan, ug hangtod sa mga isda sa kadagatan!

18. Nganong naghunahuna ang uban nga dili gyod sila mahimong higala sa Diyos? Unsay giingon sa Bibliya bahin ana?

¹⁸ Dihang ang uban makabasa sa dalayegong mga hiyas ni Jehova, mabalaka sila ug maghunahuna, ‘Ang Diyos gamhanan kaayo, labing hataas, ug layo kaayo. Kinsa man ko nga hatagan niyag pagtagad?’ Pero mao ba na ang gusto sa Diyos nga atong bation? Dili gayod. Gusto ni Jehova nga masuod kanato. Ang Bibliya nag-ingon nga ang Diyos “dili layo sa matag usa kanato.” (Buhat 17:27) Gusto sa Diyos nga makigsuod ka niya, ug siya misaad nga ‘siya moduol kanimo.’​—Santiago 4:8.

19. (a) Unsay gikinahanglan aron mahimo kang higala sa Diyos? (b) Unsang hiyas ni Jehova ang gusto kaayo nimo?

¹⁹ Unsay gikinahanglan aron mahimo kang higala sa Diyos? Si Jesus miingon: “Aron ilang mabatonan ang kinabuhing walay kataposan, kinahanglan silang makaila kanimo, ang bugtong matuod nga Diyos, ug sa imong gipadala, si Jesu-Kristo.” (Juan 17:3) Padayon sa pagtuon, ug makaila ka kang Jehova ug kang Jesus. Ug ingong resulta, makabaton kag kinabuhing walay kataposan. Pananglitan, nahibalo na ta nga “ang Diyos gugma.” (1 Juan 4:16) Pero naa pa siyay ubang nindot nga mga hiyas. Giingnan ta sa Bibliya nga si Jehova “maluluy-on ug mabination, dili daling masuko ug dagaya sa maunongong gugma ug kamatuoran.” (Exodo 34:6) Si Jehova “maayo ug andam sa pagpasaylo.” (Salmo 86:5) Siya mapailobon ug maunongon. (2 Pedro 3:9; Pinadayag 15:4) Daghan pa kag mahibaloan bahin sa iyang nindot nga mga hiyas samtang magbasa ka bahin kaniya diha sa Bibliya.

20-22. (a) Sa unsang paagi ka masuod sa Diyos nga dili man nimo siya makita? (b) Unsay angay nimong himoon kon pahunongon ka sa uban sa pagtuon sa Bibliya?

²⁰ Sa unsang paagi ka masuod sa Diyos nga dili man nimo siya makita? (Juan 1:18; 4:24; 1 Timoteo 1:17) Dihang magbasa ka bahin kang Jehova diha sa Bibliya, mailhan nimo siya ingong tinuod nga Persona. (Salmo 27:4; Roma 1:20) Samtang magkadaghan ang imong kahibalo bahin kang Jehova, magkalalom ang imong gugma kaniya ug mas masuod ka kaniya.

²¹ Imong masabtan nga si Jehova ang atong Amahan. (Mateo 6:9) Gihatagan ta niyag kinabuhi, ug gusto sad niya nga magmalipayon ta pag-ayo. Mao nay gusto sa mahigugmaong amahan para sa iyang mga anak. (Salmo 36:9) Oo, ang Bibliya nagtudlo nga puwede kang mahimong higala ni Jehova. (Santiago 2:23) Hunahunaa kana. Gusto ni Jehova, ang Maglalalang sa uniberso, nga mahimo ka niyang higala!

²² Basig pahunongon ka sa uban sa pagtuon sa Bibliya. Mahadlok tingali sila nga mobalhin kag relihiyon. Pero ayawg tugoti nga may mopugong nimo nga mahimong higala ni Jehova. Siya ang pinakamaayong Higala.

23, 24. (a) Kon duna kay dili masabtan, nganong dili ka angayng maulaw sa pagpangutana? (b) Unsay atong hisgotan sa sunod kapitulo?

²³ Dihang magtuon ka sa Bibliya, dunay mga impormasyon nga dili nimo masabtan. Ayawg kaulaw sa pagpangutana o pagpangayog tabang. Si Jesus nag-ingon nga kinahanglang mapainubsanon ta, pareho sa mga bata. (Mateo 18:2-4) Ug ang mga bata daghag pangutana. Gusto sa Diyos nga matubag ang imong mga pangutana. Maong tun-i pag-ayo ang Bibliya aron mahibaloan gyod nimo ang kamatuoran.​—Basaha ang Buhat 17:11.

²⁴ Ang pinakamaayong paagi nga makakat-on bahin kang Jehova mao ang pagtuon sa Bibliya. Hisgotan sa sunod kapitulo kon nganong ang Bibliya lahi sa ubang libro.