Ang Bibliya​—Libro nga Gikan sa Diyos

1, 2. Nganong ang Bibliya espesyal kaayo nga regalo gikan sa Diyos?

UNSAY imong bation kon hatagan kag regalo sa imong higala? Gusto gyod dayon nimo kining ablihan, ug malipay ka kay gihunahuna ka sa imong higala. Pasalamatan gyod nimo siya.

² Ang Bibliya regalo gikan sa Diyos. Naghatag ni natog impormasyon nga dinhi ra gyod nato mabasa. Pananglitan, kini nag-ingon nga ang Diyos maoy naglalang sa langit, sa yuta, ug sa unang lalaki ug babaye. Kini dunay mga prinsipyo nga makatabang kon naa tay problema. Mahibaloan nato sa Bibliya kon unsaon sa Diyos pagpalampos ang iyang katuyoan nga himoong mas maayong puy-anan ang yuta. Espesyal gyod nga regalo ang Bibliya!

 3. Unsay imong makat-onan kon tun-an nimo ang Bibliya?

³ Kon imong tun-an ang Bibliya, imong mahibaloan nga gusto sa Diyos nga mahimo ka niyang higala. Samtang magkadaghan ang imong kahibalo bahin kaniya, mas masuod ka kaniya.

 4. Nganong makadayeg man ka sa Bibliya?

⁴ Ang Bibliya o ang bahin niini gihubad sa kapig 3,200 ka pinulongan, ug binilyong kopya na ang naimprenta. Ang Bibliya mabatonan na karon sa kapig 90 porsiyento sa populasyon sa kalibotan diha sa ilang pinulongan. Ug kada semana, kapin sa usa ka milyon ang mokuhag Bibliya! Wala gyoy libro nga parehas niini.

 5. Nganong makaingon ta nga ang Bibliya gikan sa Diyos?

⁵ Ang Bibliya “gisulat pinaagi sa paggiya sa Diyos.” (Basaha ang 2 Timoteo 3:16.) Pero basin moingon ang uban, ‘Tawo ra may nagsulat sa Bibliya, nganong makaingon man ta nga gikan ni sa Diyos?’ Ang Bibliya nag-ingon: “Ang mga tawo nagsulti sa mensahe sa Diyos samtang sila gigiyahan sa balaang espiritu.” (2 Pedro 1:21) Parehas ni sa negosyante nga nagsugo sa iyang sekretaryo sa paghimog sulat. Kinsa ang awtor sa sulat? Ang negosyante, dili ang sekretaryo. Ingon ana sad ang Bibliya. Ang Awtor niini mao ang Diyos, dili ang mga tawo nga iyang gisugo sa pagsulat. Gigiyahan sila sa Diyos sa pagsulat sa iyang mga hunahuna. Busa makaingon gyod ta nga ang Bibliya “pulong sa Diyos.”​—1 Tesalonica 2:13; tan-awa ang Endnote 2.

6, 7. Nganong makaingon ta nga nagkauyon ang tanang bahin sa Bibliya?

⁶ Ang Bibliya gisulat kapin sa 1,600 ka tuig. Ang mga magsusulat niini nabuhi sa lainlaing panahon. Ang uban edukado ug ang uban dili. Pananglitan, ang usa kanila doktor. Ang uban mag-uuma, mangingisda, magbalantay ug karnero, propeta, maghuhukom, ug hari. Bisan tuod lainlain ang magsusulat sa Bibliya, ang tanang bahin niini nagkauyon sa usa ka tema.a

⁷ Ang unang mga kapitulo sa Bibliya nagpatin-aw kon sa unsang paagi nagsugod ang mga problema sa kalibotan. Ug ang kataposang mga kapitulo naghisgot kon unsaon sa Diyos pagsulbad kini nga mga problema pinaagi sa paghimo sa yuta nga paraiso. Girekord sa Bibliya ang kasaysayan sa tawo sulod sa linibo ka tuig ug makita nato nga kanunayng natuman ang katuyoan sa Diyos.

 8. Unsay mga pananglitan nga nagpamatuod nga husto ang mga impormasyon sa Bibliya bahin sa siyensiya?

⁸ Ang Bibliya wala isulat aron magtudlo bahin sa siyensiya o gamiton ingong libro sa eskuwelahan, pero ang mga impormasyon niini bahin sa siyensiya pirmeng husto. Mao nay atong madahom sa libro nga gikan sa Diyos. Pananglitan, diha sa basahon sa Levitico gihatagan sa Diyos ang mga Israelinhon ug instruksiyon aron malikayan ang pagkaylap sa sakit. Gisulat ni dugay na kaayo. Adtong panahona wala pa mahibalo ang mga tawo kon sa unsang paagi ang mga bakterya ug virus makahatag ug sakit. Husto pod ang gitudlo sa Bibliya nga ang yuta gibitay sa wala. (Job 26:7) Ug sa panahon nga ang kadaghanang tawo nagtuo nga flat o patag ang yuta, ang Bibliya daan nang nag-ingon nga lingin kini.​—Isaias 40:22.

 9. Unsay gipakita sa pagkamatinud-anon sa mga magsusulat sa Bibliya?

⁹ Dihang maghisgot ang Bibliya bahin sa kasaysayan, pirme gyod ning husto. Pero daghang libro sa kasaysayan ang dili kaayo husto kay ang mga magsusulat dili matinud-anon. Pananglitan, usahay dili nila isulat nga napildi sa gubat ang ilang nasod. Pero ang mga magsusulat sa Bibliya matinud-anon. Ilang gisulat ang pagkapildi sa Israel. Gisulat sab nila ang ilang mga sala. Pananglitan, sa basahon sa Numeros, si Moises miingon nga siya nakahimog grabeng sala ug gidisiplina sa Diyos. (Numeros 20:2-12) Ang pagkamatinud-anon sa mga magsusulat sa Bibliya nagpakita nga gikan kini sa Diyos. Kana nagpasabot nga makasalig gyod ta niini.

10. Nganong ang tambag sa Bibliya makatabang nato karon?

¹⁰ Ang Bibliya “gisulat pinaagi sa paggiya sa Diyos ug mapuslanon sa pagtudlo, sa pagbadlong, sa pagtul-id.” (2 Timoteo 3:16) Busa ang tambag sa Bibliya makatabang nato karon. Si Jehova ang naghimo nato, maong makasabot siya sa atong mga hunahuna ug pagbati. Mas nakaila siya nato, ug gusto niya nga malipay ta. Nahibalo siya kon unsay makaayo ug kon unsay makadaot nato.

11, 12. (a) Unsay tambag ni Jesus diha sa Mateo kapitulo 5 ngadto sa 7? (b) Unsa pay atong makat-onan sa Bibliya?

¹¹ Sa Mateo kapitulo 5 ngadto sa 7, atong mabasa ang maayo kaayong tambag ni Jesus kon unsaon nga magmalipayon, kon unsaon pagtratar ang uban, kon unsaon pag-ampo, ug kon unsay angayng panghunahuna bahin sa kuwarta. Bisag 2,000 ka tuig na ning tambaga, epektibo ug makatabang gihapon ni karon.

¹² Sa Bibliya, gitudloan sab ta ni Jehova ug mga prinsipyo nga makatabang aron mas magmalipayon ang atong pamilya, mahimong maayong empleyado, ug makabaton ug maayong relasyon sa uban. Ang mga prinsipyo sa Bibliya makatabang gyod nato, bisag kinsa pa ta, bisag asa ta nagpuyo, o bisag unsay atong problema.​—Basaha ang Isaias 48:17; tan-awa ang Endnote 3.

13. Unsay gitagna ni Isaias nga mahitabo sa Babilonya?

¹³ Daghan nang tagna sa Bibliya ang natuman. Pananglitan, gitagna ni Isaias nga mapukan ang Babilonya. (Isaias 13:19) Detalyado niyang gisulti kon sa unsang paagi ni mapukan. Ang siyudad dunay dagkong mga ganghaan (gate) ug gilibotan ug suba. Pero gitagna ni Isaias nga mohubas ang suba ug nga abli ra ang mga ganghaan. Ang siyudad mailog sa mga moatake nga wala ray gubat. Espesipiko pa ganing gitagna ni Isaias nga si Ciro ang mopukan sa Babilonya.​—Basaha ang Isaias 44:27–45:2; tan-awa ang Endnote 4.

14, 15. Sa unsang paagi natuman ang tagna ni Isaias?

¹⁴ Paglabay ug 200 ka tuig human isulat ang tagna, dihay nangabot nga mga sundalo aron moatake sa Babilonya. Kinsay ilang lider? Sumala sa tagna, siya si Ciro, ang hari sa Persia. Kini na ang sinugdanan sa pagkatuman sa ubang detalye sa tagna.

¹⁵ Sa gabii nga giatake ang Babilonya, nagkombira ang mga tawo didto. Kompiyansa kaayo sila kay dagko ang paril sa siyudad ug gilibotan nig suba. Sa gawas sa siyudad, si Ciro ug ang iyang mga sundalo naghimog kanal aron pamabwon ang suba. Dihang mabaw na ni, gitabok ni sa mga sundalo sa Persia. Pero unsaon nila pagsulod sa Babilonya nga dagko man kaayo ang mga paril? Sumala sa tagna, wala masirad-i ang mga ganghaan maong nailog ang siyudad nga wala ray gubat.

16. (a) Unsay gitagna ni Isaias nga mahitabo sa Babilonya? (b) Giunsa nato pagkahibalo nga natuman ang tagna ni Isaias?

¹⁶ Gitagna ni Isaias nga moabot ang panahon nga dili na puy-an ang Babilonya. Siya misulat: “Siya dili na gayod pagapuy-an o mahimong puy-anan latas sa tanang kaliwatan.” (Isaias 13:20) Natuman ba na? Karon mga gun-ob na lang ang atong makita sa lugar nga nahimutangan kaniadto sa Babilonya (mga 80 kilometros habagatan sa Baghdad, Iraq) ug wala nay namuyo didto. Gisilhig ni Jehova ang Babilonya “pinaagi sa silhig sa kalaglagan.”​—Isaias 14:22, 23.b

17. Nganong makasalig ta sa tanang saad sa Diyos?

¹⁷ Kay daghan na kaayong tagna sa Bibliya ang natuman, makasalig gyod ta sa mga tagna niini bahin sa umaabot. Makaseguro ta nga tumanon ni Jehova ang iyang saad nga himoong paraiso ang yuta. (Basaha ang Numeros 23:19.) Oo, duna tay paglaom nga “kinabuhing walay kataposan nga gisaad kaniadto sa Diyos, kinsa dili gyod mamakak.”​—Tito 1:2.c

18. Unsay giingon ni Pablo bahin sa “pulong sa Diyos”?

¹⁸ Atong nakat-onan nga walay laing libro nga sama sa Bibliya. Ang tanang bahin niini nagkauyon, ug pirmeng husto ang giingon niini bahin sa siyensiya o kasaysayan. Naghatag ni natog maayong mga tambag ug naghisgot ug daghang tagna nga natuman na. Pero labaw pa niana ang mahimo sa Bibliya. Si apostol Pablo miingon: “Ang pulong sa Diyos buhi ug gamhanan.” Unsay ipasabot niana?​—Basaha ang Hebreohanon 4:12.

19, 20. (a) Sa unsang paagi makatabang nimo ang Bibliya nga mailhan pag-ayo ang imong kaugalingon? (b) Unsaon nimo pagpakita nga gipabilhan nimo kini nga regalo?

¹⁹ Ang Bibliya makapabag-o sa imong kinabuhi. Makatabang ni nimo nga mailhan pag-ayo ang imong kaugalingon. Matabangan ka niini nga masabtan ang imong tinuod nga motibo ug pagbati. Pananglitan, moingon tingali ta nga gihigugma nato ang Diyos. Pero aron mapamatud-an ang atong gugma kaniya, kinahanglan natong sundon ang Bibliya.

²⁰ Tinuod gyod nga gikan sa Diyos ang Bibliya. Gusto niyang basahon nimo ni, tun-an, ug higugmaon. Pabilhi kini nga regalo, ug padayon sa pagtuon niini. Pinaagi niini masabtan nimo ang katuyoan sa Diyos para sa tawo. Sa sunod kapitulo, makakat-on tag dugang bahin niini.