BEDAN

1. Gitala uban kang Gideon (Jerubaal), Jepte, ug Samuel ingong nagluwas sa Israel gikan sa mga kaaway. (1Sa 12:11) Hinunoa, wala nay laing gihisgotan sa Bibliya ni sa sekular nga kasaysayan bahin niini nga Bedan. Mahitungod niini nga teksto, si C. F. Keil ug F. Delitzsch nagkomento: “Imposible kaayo nga gihisgotan dinhi ni Samuel ang usa ka maghuhukom, nga gisayloan sa basahon sa Mga Maghuhukom tungod kay siya dili kaayo importante.”​—Commentary on the Old Testament, 1973, Tomo II, 1 Samuel, p. 118.

Gituohan sa pipila nga si Bedan mao si Barak. Ang konteksto sa 1 Samuel 12:11 nagpaila sa usa ka dakong manluluwas ug nagpahinumdom sa pagpanglupig ni Sisera ug sa kaluwasan nga misunod, usa ka kaluwasan nga gigamit ni Jehova si Barak. Gihisgotan si Barak uban kang Gideon ug Jepte sa Hebreohanon 11:32. Kini mabasa nga “Barak” sa 1 Samuel 12:11 sa Gregong Septuagint ug Syriac nga Peshitta. Ang uban nagtuo nga si Bedan mao si Maghuhukom Abdon.​—Tan-awa ang BARAK.

2. Usa ka kaliwat ni Manases.​—1Cr 7:17.