OPISYAL SA PALASYO

Ang Hebreohanong pulong nga sa·risʹ, nga gihubad nga “opisyal sa palasyo” (1Ha 22:9), mahimong hubaron usab nga “eunuko” (Est 2:3; Isa 56:3) ug “opisyal” (Gen 40:​2, 7). Sa Genesis 37:36 (KJ) kini gihubad nga “opisyal,” ug sa nota sa panaplin kini nag-ingon: “Apan ang pulong nagpasabot dili lamang sa mga eunuko, kondili usab sa mga mayordomo sa panimalay, mga tig-alagad sa palasyo, ug mga opisyal.” Ang Gregong pulong nga eu·nouʹkhos, nga gihubad nga “eunuko,” mahimong magtumong sa usa ka opisyal sa palasyo (Buh 8:27) o kaha sa usa ka tawo nga dili makapanganak.​—Mat 19:12.

Sagad gituohan nga ang mga opisyal sa palasyo maoy mga tawo nga tinugyanan sa pribadong mga lawak sa usa ka palasyo o mansiyon, sama kang Blasto, nga mayordomo sa panimalay ni Haring Herodes. (Buh 12:20) (Apan, dinhi gigamit ang Gregong ekspresyon nga e·piʹ tou koi·toʹnos, usa ka tawo nga maoy “tinugyanan sa lawak-higdaanan.”) Apan ang mga buluhaton sa mga opisyal sa palasyo sa hari nagkalainlain gayod. Si Bigtan ug Teres maoy mga opisyal sa palasyo sa Medo-Persia nga maoy sinaligan nga mga alagad, lagmit ang ilang katungdanan mao ang pagbantay sa pultahan sa pribadong lawak ni Haring Ahasuero. (Est 2:21) Ang uban personal nga nag-alagad sa hari. (Est 1:​10, 11) Gipakita sa Bibliya ang pipila ka opisyal sa palasyo ingong mga tawo nga adunay mga katungdanan diha sa kasundalohan. (2Ha 25:19) Ang “pangunang opisyal sa palasyo” sa Babilonya may responsibilidad sa pagtudlog magbalantay alang kang Daniel, Hananias, Misael, ug Azarias human sa ilang pag-abot sa Babilonya sa dihang si Nabucodonosor nagdala kang Haring Jehoiakin ug sa pipila ka Hudiyo ngadto sa Babilonya niadtong 617 W.K.P.​—Dan 1:​3, 7, 11.

Mopatim-aw nga dili tanang opisyal sa palasyo maoy mga eunuko sa literal nga diwa, buot ingnon, mga tawo nga gikapnan. Ang literal nga mga eunuko sagad nga mao ang tinugyanan sa mga lawak sa mga babaye, o mga asawa sa hari. Apan ang mga buluhaton sa mga opisyal sama sa pangulong magtitiing (usa ka hataas nga katungdanan) ug sa pangulong panadero wala magkinahanglan nga sila kapnon aron matudlo sa maong katungdanan, bisan tuod sila lagmit mga eunuko nga gitudlo sa maong mas taas nga mga katungdanan. (Gen 40:2) Sa palasyo ni Paraon, si Potipar, nga usa ka opisyal sa palasyo ug pangulo sa mga bantay, maoy usa ka tawong minyo. (Gen 39:1) Ang Etiopianhong “eunuko” nga gibawtismohan ni Felipe nga tig-ebanghelyo maoy usa ka tawong adunay awtoridad, nga nagdumala sa tanang bahandi ni Rayna Candace. Siya usa ka kinabig sa Hudiyohanong relihiyon, usa ka magsisimba ni Jehova, ubos sa Balaod. Dili gayod siya usa ka literal nga eunuko, kay walay tawong kinapon ang makasulod sa kongregasyon sa Israel ug mga Hudiyo ug mga kinabig lamang ang gibawtismohan una pa sa pagkakabig ni Cornelio. (Buh 8:26-38; 10:​24, 34, 35, 44-47; Deu 23:1) Gitigom ni David ang iyang mga opisyal sa palasyo (nga makataronganong dili literal nga mga eunuko tungod sa Hudiyohanong tinamdan ug sa Balaod), uban sa mga prinsipe ug gamhanang mga tawo, aron sa pagpahibalo kanila nga ang iyang anak nga si Solomon mao ang gitudlo sa pagtukod sa templo ni Jehova.​—1Cr 28:1-6; tan-awa ang MAGTITIING; PINIYALAN.