ASTORET

Usa ka diyosa sa mga Canaanhon, nga giisip nga asawa ni Baal. Si Astoret sagad nga gihulagway ingong usa ka hubo nga babaye nga may hilabihan kadagko nga mga kinatawo. Ang pagsimba niini nga diyosa maoy kaylap taliwala sa nagkalainlaing katawhan sa kakaraanan, ug ang ngalang Astoret maoy komon diha sa lainlain nga porma. Ang Gregong ngalan maoy Astarte. Taliwala sa mga Filistehanon, si Astoret dayag nga giisip ingong usa ka diyosa sa gubat, sumala sa gipakita sa kamatuoran nga ang armadura sa napilding si Haring Saul gibutang didto sa templo sa mga larawan ni Astoret. (1Sa 31:10) Apan, sa panguna, si Astoret dayag nga usa ka diyosa sa pertilidad. Ang labing iladong bahin sa pagsimba kaniya naglakip sa mga kahilayan sa sekso diha sa mga templo o sa hatag-as nga mga dapit nga gipahinungod sa pagsimba kang Baal, diin nag-alagad ang lalaki ug babaye nga mga pampam.​—Tan-awa ang CANAAN, CANAANHON Num. 2 (Gisakop sa Israel ang Canaan).

Ang pagsimba kang Astoret lagmit nga naglungtad sa Canaan sukad pa sa kapanahonan ni Abraham, kay usa sa mga siyudad didto gitawag nga “Asterot-karnaim.” (Gen 14:5) Gihisgotan usab sa Kasulatan ang siyudad sa Astarot, ang pinuy-anan sa higante nga si Haring Og sa Basan. Ang ngalan niini nagpaila nga kining siyudara tingali maoy usa ka sentro sa pagsimba kang Astoret.​—Deu 1:4; Jos 9:10; 12:4.

Ang singular nga pormang ʽash·toʹreth (Astoret) unang makita sa Bibliya maylabot sa pag-apostata ni Haring Solomon sa hinapos nga bahin sa iyang paghari. Nianang panahona ang mga Israelinhon misugod sa pagsimba sa Astoret sa mga taga-Sidon. (1Ha 11:​5, 33) Ang bugtong laing higayon nga makita ang singular nga porma maoy maylabot sa paglumpag ni Haring Josias sa hatag-as nga mga dapit nga gitukod ni Solomon alang kang Astoret ug sa ubang mga bathala. (2Ha 23:13) Ang plural nga ʽash·ta·rohthʹ (“mga larawan ni Astoret,” NW; “Ashtarts,” AT) lagmit nagtumong sa mga larawan o mga dagway niining paganong diyosa.​—Huk 2:13; 10:6; 1Sa 7:​3, 4.