ENOS

[Tawong May-Kamatayon].

Ang anak nga lalaki ni Set, nga natawo kaniya sa panuigon nga 105. Si Enos nag-edad ug 90 sa dihang nanganak kang Kenan, ug siya nabuhi sulod sa 905 ka tuig. (Gen 5:6-11) Ang iyang ngalan natala usab sa talaan sa mga kagikan sa 1 Cronicas 1:1 ug Lucas 3:38. Sa iyang adlaw “gisugdan ang pagtawag sa ngalan ni Jehova.” (Gen 4:26) Dayag nga dili kini pagtawag sa ngalan ni Jehova diha sa pagtuo ug putling pagsimba sama sa gibuhat ni Abel kapin na sa 105 ka tuig sa wala pa matawo si Enos. Miergo ang pipila ka Hebreohanong mga eskolar nga ang teksto angayng basahon nga “gisugdan pagpasipala,” o “dayon ang pagpasipala nagsugod.” Naghisgot sa adlaw ni Enos, ang Jerusalem Targum nag-ingon: “Mao kanang kaliwatana nga sa ilang mga adlaw sila nagsugod sa pagpakasala, ug sa paghimog mga idolo alang sa ilang kaugalingon, ug nagbansag sa ilang mga idolo sumala sa ngalan sa Pulong sa Ginoo.” Ang mga tawo tingali naggamit sa ngalan ni Jehova alang sa ilang kaugalingon o sa ubang mga tawo nga pinaagi kanila nagpakaaron-ingnon silang miduol sa Diyos diha sa pagsimba; o kaha naggamit sa iyang ngalan alang sa mga idolo.