MANIKO

Usa ka sukod sa gitas-on o sa gisangkaron nga gibanabanang katumbas sa distansiya gikan sa siko hangtod sa tumoy sa tungatungang tudlo. (Deu 3:11) Adunay mga timailhan nga ang mga Israelinhon komon nga migamit sa maniko nga mga 44.5 sm (17.5 pul.), ug ang mga kalkulasyon niini nga publikasyon maoy pinasukad niana nga maniko. Pananglitan, ang Inskripsiyon sa Siloam nag-ingong 1,200 ka maniko ang gitas-on sa tunel sa tubig nga gihimo ni Haring Ezequias. Sumala sa mga pagsukod karong adlawa, kini nga tunel maoy 533 m (1,749 p) ang gitas-on. Busa, kon kuwentahon, kini nga mga sukod maoy pinasukad sa maniko nga 44.4 sm (17.49 pul.). Dugang pa, daghang mga bilding ug mga paril nga nakubkoban didto sa Palestina mahimong sukdon pinaagig tibuok nga mga numero niini nga yunit, nga naghatag ug dugang basehan sa pagkalkulo sa maniko ingong mga 44.5 sm (17.5 pul.).

Dayag nga ang mga Israelinhon migamit usab ug maniko nga mas taas ug usa ka dapal (7.4 sm; 2.9 pul.) kay sa “komon” nga maniko. Kining mas taas nga maniko nga mga 51.8 sm (20.4 pul.) maoy gigamit sa pagsukod sa templo sa panan-awon ni Ezequiel. (Eze 40:5) Lagmit dihay mubo usab nga maniko nga mga 38 sm (15 pul.), nga gisukod gikan sa siko hangtod sa mga buko sa mga tudlo sa gikumo nga kamot.​—Huk 3:​16, ftn sa Rbi8.